Luc 13

Sama mbut hurum mbuo na mba mi mid’a

1Kur bur máma suma dingâ a mba de mi Jesus yam suma Galile suma Pilat mi tchazi mi gizeyêzi buzuwazi ki buzuna hahle mazi suma ngat buzuna mAlonina. 2Jesus mi hulong dazi ala: Agi djib’eregi ala suma Galile ndazina ni suma tchona kal suma ding suma Galile-na zu? 3An nga ni dagiya, nga na d’i. Wani le agi mbud’ugi nga hurugi yam tcho magid’a d’uo ni, agi mba bogi ni d’igi azi na mi.

4D’oze suma dogo yam klavandi suma gong nga fiyak ka akulo d’a Silowe-d’a ti dris kazi kä ti tchazina, agi djib’eregi ala azi ni suma tchona kal suma ding suma Jerusalem-ma zu? 5An nga ni dagiya, nga na d’i. Wani le agi mbud’ugi nga hurugi yam tcho magid’a d’uo ni, agi mba bogi ni d’igi azi na mi.

D’ogol ma yam tulum ma vut nga d’uo nina

6Jesus mi de zla d’a d’ogola ala: Sama dingâ nga ki tulum ma mam pum kur asinem ma guguzlud’ina. Mi mba á hal vuta atamu, wani mi fe nga d’i. 7Mi de mi sama ngom asine ma guguzlud’a ala: Gola! Wana ni biza d’a hindi d’a an mba á hal vuta hi tulum mámid’a, an nga ni fe d’i. Ang kam mbeyo! Ni kayam me ba, mi b’lak andagad’a hawa bap ke? 8Sama ngom guguzlud’a mi dum ala: Salana, ang aram kur biza d’a wanda tua, gak an grif andagad’a ad’umu, ni tchuk siligitna kua, 9dam mba mi vud’a. Wani le mi vut nga d’uo ni, ang mba kam mbei tua.

Jesus mi sut atcha d’a tugud’eid’a kur bur ma sabatna

10Jesus nga mi hat suma kur gong nga toka kur bur ma sabatna. 11Atchad’a nga kua ni d’a nga ki muzuk ma homozed’id’a, mi le bizad’a ki sed’et ni dogo yam klavandi, mi gunut kä dongndjolong, ti ndak á mat akulo d’i. 12Kid’a Jesus mi wata, mi yad’u, mi dat ala: Atchad’a, an pad’ak wa woi kur tugud’ei maka. 13Mi tin abom kad’u. Ata yi máma na wat, ti tchol akulo d’ingêr, nga d’i subur Alona.

14Ma ngolâ hi gong nga tokina, hurum zal yam Jesus kayam mi sut suma tugud’eid’a kur bur ma sabatna. Mi de mablau suma ala: Burâ karagaya nga, ndak yam suma á le sun mazid’a. Agi mbagi kur bur máma kayam mi sud’ugi woi kur tugud’ei magid’a. Wani agi mbagi kur bur ma sabatna d’i.

15Wani Salad’a mi hulong dum ala: Agi suma lop ira, na ni nge nge pî adigagi nga mi but amuhl mama d’oze koro mama ata yama te hatna, i mi hum mbina kur bur ma sabatna d’uo zu? 16Wani atcha d’a wanda ni Abraham gorom mba Seitan mi djinit bizad’a dogo yam klavandid’a, ndak á bud’ut tei kur bur ma sabatna d’uo zu? 17Kid’a nga mi de hina d’a, mam suma djangûna pet a mbut zulona, wani ablau suma a le furîd’a yam ahle suma subura pet suma Jesus mi lazina.

D’ogol ma yam ir mutarîna

(Gol Mat 13.31-32; Mar 4.30-32)

18Jesus mi de kua ala: Leud’a hAlonid’a ti hle tat ni d’igi me na ge? An mba ni ngat ni ki me ge? 19Ti hle tat ni d’igi ir mutar ma sana mi hlum mi gum kur asinema na. Mi wula, mi djeng aguna, aluweina a min aziyazi ata abom mi.

D’ogol ma yam angufina

(Gol Mat 13.33)

20Jesus mi de kua ala: An mba ni nga leud’a hAlonid’a ni ki me ge? 21Ti hle tat ni d’igi anguf fa atchad’a ti yot ti gizeyêt kafut ta a ngat kangota hindid’a na, gak ti tchub’urot akulo pet.

Hat ta yam vun agrek ma mbed’etnid’a

(Gol Mat 7.13-14,21-23)

22Jesus nga mi kal kur azì ma nglona ki ma gureina, nga mi hat suma, mi hle lovota á i Jerusalem. 23Sama dingâ mi djobom ala: Ma hat suma, ni suma tutu ba, a mba fe suta zu?

Jesus mi hulong dazi ala: 24Agi b’ad’agi tagi á kal avun agrek ma mbed’etna, kayam an nga ni dagiya, suma ablaud’a a mba hal lovota á kal kua, wani azi mba ndak ki.

25Fata samazina mi tchol wa, mi duk wa vun gonga ni, agi mba tchologi abua, agi mba ndagi tum vun gonga, agi mba dagi ala: Salamina, ang malami vuna. Mam mba mi hulong dagi ala: An we nga yima agi tchologï kuana d’i. 26Ata yi máma, agi mba dagi ala: Ami tamiya, ami tchami ki sed’engû, ang hat suma kur aziyamiya. 27Mam mba mi dagi kua ala: An nga ni dagi woi mbak: Agi pet ni suma le tchod’ina, an we nga yima agi tchologï kuana d’i, agi hud’ugi sä woi dei gevenu. 28Agi mba tchigiya, agi mba mud’ugi siyagi ata yima agi mba wagi Abraham azi ki Isak ki Jakob ki suma djok vun Alona pet suma a nga kur leud’a hAlonid’ina, wani agi tagid’a a mba tchugugi woi abua. 29Suma a mba tcholï abo ma yorogona kabo ma fladegena kabo ma norâ kabo ma sutna, a mba kak avun tena kur leud’a hAlonid’a. 30Wani suma danana a mba mbut suma avo’â, suma avo’â a mba mbut suma danana mi.

Jesus azi ki Jerusalem

(Gol Mat 23.37-39)

31Kur bur máma Fariziyê suma hiuna a mba, a de mi Jesus ala: Ang nde i ata yima dingâ, kayam Herot nga mi halang á tchid’a.

32Mi dazi ala: Agi i dagi mi bayak ndata ala: Gola! An nga ni dik muzuk ma tchona, nga ni sut suma tugud’eid’a ini kavini, kur bur ma hindina an mba dap vun sun manda. 33Wani an nga ni tit ini, avini ki fat ta siyad’a, kayam ma djok vun Alona ndak á mit ata yima ding ngi, mbeî mi mit ni kur Jerusalem.

34Agi suma Jerusalem-ma, agi suma Jerusalem-ma, agi tchagi suma djok vun Alona, agi durugi suma Alona mi sunugizïna kahinad’a mi. Ni yan ga ba, an min á kod’ogi d’igi ahleka nga d’i kot grotna ad’u gigingât na ge? Wani agi nga minigi d’i. 35Agi gologiya, aziyagi mba mi ar djona grib’ing. An nga ni dagiya, agi mba wan nduo d’a gak bur ma agi mba dagi ala: Ar Alona mi b’e vunam yam sama nga mi mba ki simiyê Ma didina na.

Currently Selected:

Luc 13: BA

Highlight

Copy