LUKAS 12

Yésus a yeʼele beyéʼé bé na be bo te ko woñ e si nyô

(Mt 10:16-33; 16:6-12)

1Amu mam mete, mbôlô bôt be nga sulan betoyini betoyini, bôt be tibiʼi ba bevoʼo yôp, e nde Yésus a taté na a jô beyéʼé bé na: tabaʼane mvusu Befarizieñ ntyee, e nye a ne nsisime bebaduʼu. 2Teke jam éziñ é ne nsolan da yiane bo te kulan, nge nsolane jam bôt ba yiane bo te yem. 3Amu ajô te e jam ese mia ye jô e dibi été da ye wôʼôban e bizôña môs a e jam mia ye jô ôfôfoé e bitune bi nda été, ba ye yôtane de e mendile menda yôp. 4Ma jô mia de, mia bemvôé bam te mia ko ba ba wôé nyôle woñ, a e mbe bete be se nguleya bo jam afe mvus éte. 5Ma ye liti mia nyô mia yiane ko woñ. Koone woñ, e nyô a ne na nge a mane wôé, a bili nguleya wua bôt étôtôlan, yaa, ma jô mia na e nye mia yiane ko woñ. 6Ye be nji kuane bemvokuma betan frañ ébaé? Ve da, teke wua yʼété Zambe a vuan. 7Jaʼane ésile ya e nlô wônan ése é ne nlañan. Ajô te te koone woñ, mi ne tañ anen a dañ abui bemvokuma.

8Ma jô mia de na: nyô ase a meme ma e mise me bôt e Mona môte fe a ye meme nye e mise bʼéngele be Zambe. 9Ve môt a ye kate ma e mise me bôt, a ye kateban e mise bʼéngele be Zambe.

10E nyô ase a ye kobô Mona môt ébiasé, a ye jamban, ve nyô a kobô Mfufube Nsisim ébiasé, aa ye ke jamban.

11Eyoñe ba ye kee mia e meba me Zambe, bekobô mejô a bejôô, te tyelane minleme yôp avale mia ye kamane miabebien, nge jam mia ye jô: 12Amu Mfufube Nsisim a ye yeʼele mia e jame mia jô awolo te ebien.

Nkukum ô ne teke fek

(Mt 16:26; Lk 16:19-26; Yer 9:23; Ekl 9:12)

13Môt éziñ ya jama bôt a nga jô Yésus na: A Nyeʼele jôʼô mojañe na bia nye bi kaban éliʼi jangan. 14A nga yalane môt ate na: Za a nga telé ma e be mia na me bo ntyiʼi mejô nge nkab akum? 15Wôna a nga jô be na: Tukaʼa tabane ntyel a aval ôzañ akum ese; amu jaʼane afoʼo été, ényiñe môt é nji ke timbi a e biôme a bili. 16A a nga kane be nkana :

Sii nkukume môt éziñ é nga ve nye abui bidi.

17A mbe a fasek e be émien été na: Ma ye bo aya? Amu me nji bi afôla ya naane bidi biam. 18Nye na e jame ma ye bo e nde di: Ma ye tyame mekañe mam, a lôñe mefe ma dañ anen, ma ye yoé fône jam ése été a akume dam, 19a ma ye jô nleme wome na: a e nleme wom, ô mbili abui akum e ne nnaan asu abui mimbu; wokoʼon, jaʼak, nyaʼak a vaʼak. 20Ve Zambe a nga jô nye na: a akute môt! Alu dina ebien, ba ye nyoñe nsisime wôé; e biôm ô maneya kômesan bia ye bo e bi bi za? 21Avale te e nde e né e be nyô a tôkan abui akum asu dé émien, a too teke kum asu Zambe.

Mam ma tyelé nleme yôp. Nyaa akumu

(Mt 6:19-34; 1 Tim 4:6-8; Hé 13:5)

22Wôna Yésus a nga jô beyéʼé bé na: Amu ajô te ma jô mia na: Te mia tyelé minleme yôp ajô ényiñe jenan mfaʼa jôme mia ye di, nge ajô nyôle jenan mfaʼa jôme mia ye jaé. 23Amu ényiñ ja dañe bidi a nyôl ja dañe ngômesan. 24Fombaʼane bigbwañ: bi ne teke bé nge kôan, teke akañ nge angun: ve Zambe a ve bie bidi. Abim avé mi ne beta tañ a dañ anon? 25Za ya be mia, amu ntyelane nleme wé yôp, a ne wôñôlô ényiñe jé e nté ényiʼa wo? 26Nge mi se ñhe nguleya bo toʼo ve ôyôme jam, amu jé mia tyelé nleme yôp ajô mam mevok. 27Yenan, ane same meyañ ja yaé, teke saé nge tiñ, ve da ma jô mia na toʼo Solômon, étôtoʼo jé ése été, a nji ke jaé ngômesan ane jia ya be be. 28Nge Zambe a jalé biloʼo ngômesan, e mbie bia yené den e mefup, vʼakiti bia ye wuaban e mbume nduan, ngumane ke mia, ye a ye bo te dañe bo mia nalé, a bôt be nee mbunane tyôtyoé? 29Ve mia, te jenañe jôme mia ye di, nge jôme mia ye nyu, a te tebane feʼe ne vema. 30Amu meyoñ me ne te buni Zambe e si nyô e me ma jeñe mam mete mese. Esoo wônan a yeme na mia yi bie. 31Ve tataʼa jeñan éjôé jé; a mam mete ma ye vebane mia abet.

32Te ko woñ, a mbame bone biyem; amu Esoo wônan a nga yene mvaé ya ve mia éjôé.

33Kuʼane jôme mi bili, a vaʼane je bingôngole bi bôt. Boʼone na mi bi mimfeʼe mi moné mi ne te vele, akum e ne te man e yôp, e vôme miñwuwup mi ne te kui bebé, nge siʼibem te ndamane biôm. 34Amu e vôm akume dôé e né, e valé fe e nye nleme wôé ô né.

Mombaʼan

(Mt 24:36-44; 25:1-30; Mk 13:33-37)

35Tiñetaʼane kandé e mengeteñ menan a belambe benan be yôñôk. 36A mia, funaʼan e bôt ba yange na e Masa wop a so éliʼiti, asu ya dii nye mbé awolo ebien a ye so a kute mbé .

37Ebotan é ne e be bebo bisaé bete e mbe Masa wop, e nsoone wé, a ye koone be be mombôʼô. Ma jô mia bebela na, a ye tiñeti kandé angeteñ, a bo be na be tabe e tawôlô a a ye subu na a saane be. 38Toʼo a so évevé baa nge ji lale, a koone be nalé, be ne ébotan. 39Tukaʼa yemane de na nge miene nda a too ye yem awolo avé ñwuwup wo yiane so, a nga ye mombô, teke jôʼé na be bôé nye nda . 40Mia fe tabaʼane nkôman, amu Mona môt a ye so awolo mi nji simesan.

41Pierre a nga jô nye na: Ye bia wo ku e nkana wu, ye bôte bese? 42A Nti a nga jô na: Za ñhe a ne mbamba mbaʼale akum a ntyel, e nye Masa wé a ye telé e be bebo bisaé bé na a ve be ngabe bidi fôn éyoñe ja yian? 43Ebotan a mbo ésaé ate, e nye Masa wé, éyoñ a ye so, a ye koon a boʼo ésaé nalé! 44Ma jô mia de bebela na: A ye telé nye njôô ya akume dé ese. 45Ve nge mbo ésaé ate, a jô émien été na: Masa wom a bo njuʼu ya so, nge a taté na a bôme bebo bisaé, befam a binga, a di, a nyu, a soʼo bilam, 46Masa mbo ésaé ate a ye so e môs a nji yange, awolo a nji yem, a ye bo nye bifuse bifus a bo nye na a nyoñe ngap asuʼulane bikotekote bi bôt. 47E mbo ésaé a nga bo te yeme nkômbane Masa wé a nga bo teke kômesane jôm éziñ a a nga bo teke bo ane nkômbane wé ô né, a ye biban abui minkasa. 48Nyô a nga bo te yeme nkômbane Masa wé ve a nga bo mam ma yiane melep , mbo ésaé ate a ye bibane minkasa tyôtyoé. Ba ye sili abui e be nyô be nga ve abui a ba ye dañe sili abui be nyô be nga dañe ve abui.

Amu jé Yésus a nga zu?

(Mt 10:34-36)

49Me nga zu wua nduan e si nyô, a jé éfe ma yiane kômbô nge é maneya kalan? 50Nduban éziñ ô ne e ñwô ô ne wu ma yiane duban, abim ôjejaʼa e bili ma na jame te e boban! 51Ye mia simesane na me nga zu ve mvoʼé si nyô? Momo, ma kate mia, ve nkandaʼane mengam. 52Amu ataté éyoñe ji, bôte betan e nda jia, ba ye kabane zañ, belaa ba ye wosane bebaé a bebaé ba ye wosane belaa; 53ésaa a ye wosane monafame wé, a monafam a ye wosan ésaa, nyia a ye wosane ngo jé a mona minga a ye wosane nyia wé; ntyi minga a ye wosane mbom, a mbom wo ye wosane ntyia minga.

54A mbe a betaʼa jô jama bôte na: éyoñe mia yene nkut ô téʼé e jôbe da dim, mia jô tyiʼibi tyiʼibi na: mveñ ja zu nnoñ. Nalé ve boban. 55A éyoñe mia yen évuñulu ya nké ja vuñ, mia jô na: ayôñ da zu bo, nalé ve boban. 56A bôte bebaduʼu, mia yeme yemelan avale si a yôp bi né: Amu jé mi ne teke yemelan éyoñ yʼéyoñe ji?

57A amu jé miabebien mi ne teke yemelane jam e ne zôsôô ? 58Eyoñe mia nsiñe wôé mia ke asu be nkobô mejô, tatéʼé mane kôm a nye, a za kee wo asu be ntyiʼi mejô, ntyiʼi mejô ke a za kee wo e mo me mone bezimbi a mone bezimbi ke a futi wo e mbôk. 59Ma jô wo de na wo ye bo te kui mimbôk te na ô yaʼan a kui e nsañ moné wo dañe tyôtyoé.

Currently Selected:

LUKAS 12: BULU09

Highlight

Copy