LUKAS 13

Nloon asu nkôñelane minlem

Nkana nkôkôme figié

(Yoa 8:24; Mt 21:18-19,43; Rm 2:3-6; Eze 18:30-32)

1Melu mete, bôte bʼéziñ be nga zu kañete nye e jam e nga kui e be bôte ya Galilé e mbe bete Pilat a nga bundane metyi map a ma bityiʼa biap. 2A nga yalane be na: Ye mia simesane na bôte ya Galilé bete be mbe beta bebo abé a dañe ba bevoʼo bese amu be nga tôbane mintaé avale te? 3Ma jô mia na momo. Ve nge mi nji kôñelane minlem, mia ye fe jañe bese avale te. 4Nge na e bôte awôm a muam e nkume ya Siloé ô nga ku yôp a wôé, ye mia bumi na be mbe be bili mekua a dañe bôte bevoʼo bese be too Yérusalém? 5Ma jô mia na momo. Ve nge mia bo teke kôñelane minlem, mia ye jañe bese avale te ebien.

6A nga kane fe e nkana wu: môt éziñ a nga bili élé figié mbéan afube mindiʼi dé été. A nga zu jeñe bibuma yʼété ve teke koone jôm. 7E nde a nga jô mbaʼale afube mindiʼi na: tame yen, den a ntoo mimbu milaa, me zaʼa jeñ bibuma bi figié nyô, ve teke koone jôm. Bakéʼé je; amu jé ja di si e zesé? 8Mbaʼale afube mindik a nga yalane na: A Masa, betaʼa jôé je e mbu wu; ataté éyoñe ji a kui éyoñe te, ma ye faʼa je mbômaʼan a kut akun été. 9Melu ma zu éko éziñe na ja ye wume bibuma; nalé momo, wo ye baʼé je.

Ñyeyeme minga wo saéban

(Mt 12:9-13; Lk 14:1-6; Sam 146:8)

10Yésus a yeʼeleʼe e da ya meba me Zambe e môse Sabat, 11minga éziñe mbia nsisim ô nga veñesane ñyeyem den mimbu awôm a muam a mbe valé; a mbe kukuu teke foʼo nguleya tebe. 12Yésus a nga yene nye a nga kobô nye a jô nye na: A minga, ô kôtébaneya mfaʼa ya éyeme jôé. 13A nga beté nye mo. Awolo te a nga tebe a kañe Zambe. 14Ve évete ya aba Zambe é nga yene nalé abé na Yésus a nga saé môt e môse Sabat, nye jama bôte na: mimôse ya saé mi ne misaman, zaʼane ñhe saéban mimôse mite saa e môse sabat . Nti a nga yalane nye na: 15A bôte bebaduʼu, ye môt ase ya be mia, e môse sabat , a nji tii e nyaʼa jé nge éjakase jé na a ke nyuu je mendim? 16Ye e nji yiane na minga nyô, ngon Abraham, e nje Satan a biya nkaʼan den a ntoo mimbu awôm a muam, be tii nye, ngataʼa éte e môse Sabat? 17Eyoñ a mbe a kobôʼô nalé, besiñe bé bese be mbe njalan a meyat, a jama bôt a nga vak amu bitôtoʼo bi mam bise a mbe a boʼok.

Minkana ajô fes ôndôndôô a mvusu

(Mt 23:34-39; Lk 19:41-44)

18A nga beta jô na: éjôé Zambe ja funane jé, a ma ye veʼane je a jé? 19Ja funane fes ôndôndôô, e nje môt a nga nyoñ a wua je afube dé été; ja faa a bo élé, a anone ya yôp da tabe je mintyaé.

20A nga beta jô na: Ma ye veʼan éjôé ya yôp a jé? 21Ja funane mvusu e nye minga a nga nyoñ a futi nye avut mveʼan ôvek biyoñ bilaa a kui na ébañ é vus.

Ofanefane mbé

(Mt 7:13-14,21-23; 8:1-12)

22Yésus a mbe a tyiʼilaʼane bitison a minlam, a a mbe a yeʼeleʼe a kelek e mfaʼa ya Yérusalém.

23Môt éziñ a nga jô nye na: A Nti, ye ve bôte tyôtyoé e mbe da ye yen ényiñ? A nga yalane be na:

24Vaʼane ngule ya nyiin ôfanefane mbé . Amu ma jô mia de na: ézuk ja ye jeñe na é nyiin, ve teke ngul. 25Eyoñe mie ndaa a kôlôya si a a feteya mbé a na, éyoñ mi liʼiya atan, mia ye taté na mia kute mbé a jô na: A Nti! Diʼi bia e mbé ! A ye yalane mia na: Mi ne bôte ya vé? 26Eyoñe te mia ye taté na mia jô na: Bi nga di a nyu ôsu viôé, a ô nga yeʼele e minjoñe miangan. 27A a ye yalane mia a jô na: Kelane ma ôyap, mia bese mia bo ékotekot. 28Minyôn a nlatane mesôñ bia ye bobane valé, éyoñe mia ye yen Abraham, Izak, Yakob a bekulu mejô bese éjôé Zambe, a éyoñe mia ye wuaban atan. 29Bôte ba ye so e jôbe da tôô a e jôbe da dim, akôé a e nké; a ba ye tabe tawôlô éjôé Zambe. 30A tama yenan: e ba be tele mvus, ba ye tebe ôsu a ba be tele ôsu, ba ye tebe mvus.

Yésus a ke e Yérusalém

(Mt 23:34-39; Lk 19:41-44)

31Eyoñe te Befarizieñ bʼéziñ be nga zu jô nye na: Kelek, kôlôʼô va, amu Hérôde a kômbô wôé wo. 32A nga jô be na: Kela jôan nkemvaʼa te na: ô lôô ma vaa mimbia minsisim a ma saé bôt den a akiti; a e môse lale wo ye bo wu e mmanan ésaé. 33Ve ma yiane wulu den, a akiti a e môse wo tôñe valé; amu e nji yiane na nkulu mejô a wu e Yérusalém atan.

34Yérusalém, Yérusalém, wo wôé bekulu mejô a lume ba ba lômbane mekok , abime biyoñ avé me nga kômbô kôane bone bôé, ane nyia kup a kôan e mefabe mé si e metyi a bôʼô yôp, ve mi nji ke kômbô nalé. 35Tame yenan, e nda jenan ja ye liʼi mia bilik; ve ma jô mia de na, mia ye bo te beta yen ma akekui mi jôya na: Ebotan é boʼo be nyô a zu a jôé Nti!

Currently Selected:

LUKAS 13: BULU09

Highlight

Copy