LUKAS 14

Môt a saéban e môse sabat

(Lk 6:6-11; 13:10-17)

1Môse sabat éziñ, Yésus a nga nyiin e nda jia ya bivete Befarizieñ asu ya di; 2a bivete bi bi mbe bi fombôʼô nye. E teme na, môt éziñ, nkôkone mendim, ô ntele nye ôsu. 3Yésus ve nyoñe nkobô a jô beyeʼele metiñ a Befarizieñ na: Ye nkañesan ô ne ye momo na be saé môt e môse sabat ? 4Be nga tabe bivô. Ane a nga nyoñe nkôkon, a saé wô a suu wô. 5Wôna a nga jô be na: e mbé ya be mia, nge monafame wé nge nyaʼa jé ja ku anjeñ, a ye bo te dutu je môse sabat été été? 6A be nji bo nguleya yalane nye jame te.

Eto ya ôsu

(Mt 23:5-12; Rm 12:3)

7A nga kane bôt be ne nloban nkana , amu a nga yene be ane be mbe be tobôk bito ya ôsu; nye be na: 8Eyoñe ba te bañete wo abôʼô aluk, te ke tabe éto ya ôsu, a za bo na e môt ba semé a dañe wo fe a ne mbañetan, 9a na môt a nga bañete mia bebaane a za zu jô wo na: Vaʼa nye éto. Eyoñe te wo ye wôʼô ôsone ya ke tabe éto ya mvus. 10Vʼéyoñe ba te bañete wo, kele tabe éto ja suʼulan, ndemben éyoñe môt a nga bañete wo a ye so, a jô wo na: A mvôé jam betek e nkôñe wo dañe yôp, nalé a ye bo wo duma asu e ba mia be be be mia ye tabe tawôlô. 11Yaa, e môt a bete émiene yôp a ye silibane si, a nyô a sili émiene si, a ye betebane yôp.

12A nga jô fe môt a nga bañete nye na: éyoñe wo ve bôte bidi ya zañe môs nge mamengôʼé, te bañete bemvôé bôé, nge bobenyoñ, nge bebiaé bôé, nge bôte mia be be mi too be ne minkukum, be zaa bañete wo éyoñe jap a nalé a viane bo e maʼane môé. 13Vʼéyoñe wo bo beta ésulane bidi, bañeteʼe minzôzoé, e bôt be ne bibuʼa biziñ ntyiʼan, miñyeyem, mindindim. 14A wo ye vak amu be nji bi jôme ya yaʼane wo; amu wo ye bi maʼan éyoñe bezôsôô be bôt ba ye wômô.

Nkana bôt be nga bañete

(Mt 22:2-14)

15Wua ya bôt be nga too tawôlô, éyoñ a maneya wôʼô mejô mete, a nga jô Yésus na: Ebotan a môt a ye tabe tawôlô ndian éjôé Zambe! 16A Yésus a nga yalane nye na: Môt éziñ a nga kômesane beta dina a bañete bôt abui. 17Awolo ndian, a nga lôme mbo ésaé wé a kate bôt a nga bañete na: Zaʼan amu mam mese me ntoo nkôman. 18Ve bese tyiñe jia be nga taté na ba sili njaman : Nyô ôsu a nga jô nye na: Me nga kus afup a me ne ntindane ya ke yene de; ma yeʼelane wo na, nyoñe ma ane nyô a yiane jamban. 19E mfe ke na: Me nga kuse fia benyak étan, ma ke veʼele be, ma yeʼelane wo ô nyoñe ma ane nyô a yiane jamban. 20Nyô mboʼo ke na: Me ndôme luk amu ajô te me se nguleya zu. 21E mebulan, mbo ésaé a nga kate Masa wé mam mete. Ajô te mmie ndaa, ôlun été, a nga jô e mbo ésaé wé na: Kelek avô e minseñ a minjoñe ya tison, ô zuu ma va: minzôzoé, e bôt be ne bibuʼa ntyiʼan, mindindim a miñyeyem. 22E mbo ésaé nye na: A Masa, e jam ô nga bendé e maneya boban, bito bi ngenane bi yoo. 23Masa a nga jô mbo ésaé na: Kele mezen a e minkaʼalé minkaʼalé, yemeteʼe bôt be nyiin, nalé ate e nda jam ja ye jaé. 24Amu ma jô mia de na: Teke wua ya bôt be nga too mbañetan a ye tyeʼe jôme ya dina wom.

Aval avé bia yiane tôñe Yésus

(Mt 10:37-39; 16:24-26; Mk 9:49-50)

25Yésus a ézuʼu bôt be kele nsamba, ane a nga kôñelan a jô be na:

26Nge môt éziñ a zu be ma, a nge a nji vini ésaa wé, nyia wé, minga wé, bone bé, bobenyañe bé a bekale bé, jaʼan ényiñe jé ébien, a se nguleya bo e ñyeʼé wom. 27A Nyô a nji beʼe krôa jé a bo te tôñe ma, a se nguleya bo e ñyeʼé wom.

28Amu, za ya be mia, nge a kômbô lôñe nkum, a bo te taté tabe si asu ya bo metañe ya moné a yian ésaé, a yen nge a bili abime da ye bo na ésaé te é man, 29woñ ô too na nge a mane bo mbôkaʼa ya nkum, a za bo te nguleya mane wô, a bôte ba ye yene nye be za wôé nga a jô na: 30Môte nyô a nga taté na a lôñ, ve a nji bo nguleya mane.

31Nge na, njô bôte mbé a ne na nge a kôlô si na a ke wosane njô bôte mbok, a bo te taté tabe si a fas nge a bili ngule ya wulu a ke tôbane môt a zu wosane nye a bôte toyini mewôm mebaé nye ki toyini awôm? 32Ke nyô mboʼo a ngenan ôyap, nye ve lôme minlômane be nye asu mam ma silibane na mvoʼé é boban e zañe jap.

33Ajô te ñhe, nyô ase ya be mia a bo te bene biôme bise a bili, a se nguleya bo e ñyeʼé wom.

34Nku ô ne mbamba jôm; ve nge nku ô bo fe éyôs, ba ye tyiti wô a jé? 35O nji ke beta volô, toʼo asu si, toʼo asu akun; ba wua wô fé. Nyô a nee melo asu ya wôk, a wôʼôk.

Currently Selected:

LUKAS 14: BULU09

Highlight

Copy