Kutangisa 26
26
Isaki egala ku Gera
1Kukabe ne bhamba mu shango, bhamba lipoga lisi ilelije lakatongobepo mu misi ya Abhurahama. Ngono Isaki kayenda ku Gera kuna Abimeleki mambo we Bafilisitiya. 2Yahwe bakaboneka kuna Isaki bakandwa bakati, “Usitongoyenda ku Egipiti, gala mu shango yandinokubudza. 3#Kutangisa 22:16-18Gala mu shango iyeyi, imi ndowobe nawe akukombolela. Ndowokupa shango idzedzi dzose iwe ne bana babo. Zwandakatuna ndigadzabgwe tate babo Abhurahama ndowozwithama. 4Ndowothama kuti bana babo babe banji se nyenyedzi dze zhuzhugwi. Ndowobapa shango idzedzi dzose. Njudzi dzose dze shango dzowokombolegwa ngekwe bana babo, 5ngekuti Abhurahama wakabe endihwa, ethama zwandakandwa, ehwa ndayo dzangu, elondolodza ndaulo dzangu ne milayo yangu.”
6Ndizo Isaki kagala mu Gera. 7#Kutangisa 12:13; 20:2Balume be magalo iyawo bakati bembhuzwa ngekwe nkadzi uwe kabadwa kati, “I hazwadzi yangu,” ngoti wakatja kuti, “Nkadzi wangu.” Wakabe ekumbula eti, “Balume be magalo iyawa bangana bakandibulaya ngekwa Ribeka, ngoti wakanaka.” 8Kwakati Isaki agala tjibaka tjilefu ikoko, Abimeleki mambo we Bafilisitiya kati elinga kuzhe nge fesitere kabona Isaki ebhatabhata nkadzi uwe Ribeka ezana naye. 9Ipapo Abimeleki kadana Isaki kati kunli, “Nkadzi uwo iwoyu. Ini tjakayita kuti uti i hazwadzi iyo?”
Isaki kadabila eti, “Ngoti ndakakumbula kuti ndowodwa ndibulawa ndibulaigwa iye.”
10Abimeleki kabe eti, “Ini ikoku kwawatithamila? Mmwe ha angabe akabe akalala ne nkadzi uwo, ungabe wakabe watiwanisa nlandu.” 11Ndizo Abimeleki kadwa bathu babe kati, “Iye unowoti kathamila mbipo nlume iwoyu kene nkadzi uwe unowobulawa.”
12Isaki kalima mu shango iyeyo ngono mu gole ilelo kavuna zwidzwalo zwakawanda ngoti Yahwe bakankombolela. 13Ngono kafuma, fumwa iye ikadwilila iwanda kuswikila ebe nfumi nkulu. 14Wakabe akafuma pkhwizi ne mbudzi ne ng'ombe, ana balanda banjinji ngono Bafilisitiya bakanthamila fupa. 15Ndizo Bafilisitiya bakabe bavukidza matshime wose akabe atshiwa ne balanda ba Abhurahama tate babe misi ya bakabe batjatjila.
16Abimeleki kadwa Isaki kati, “Tjidwazo patili ngoti wabe ne masimba kutipinda.” 17Ndizo Isaki kafuluka kanobiga mishasha iye mu nkuku we Gera ngono kagalako. 18Isaki kavukula matshime akabe atshiwa ndi tate babe Abhurahama akabe avukidziwa ne Bafilisitiya shule kwe kufa kwa Abhurahama. Ngono kaadana nge mazina aakabe adang'wa ndiwo ndi tate babe.
19Balanda ba Isaki bakatsha tshime mu nkuku ngono bakapubula vula. 20Koga balisi be mu Gera bakalongelana nabo zhoba beti, “Vula iyeyi nge yedu.” Ndizo Isaki katumila tshime ilelo eti, “Eseki” ngoti bakalongelana naye zhoba.
21Balanda ba Isaki bakatsha limwe tshime ngono bakalilongelana zhoba nge kwalo kakale. Ndizo kalidana eti, “Lubengo.” 22Isaki kadwa ipapo kanotsha limwe tshime ngono bakasililongelane zhoba. Kalitumila kati, “Rehoboti” eti, “Ngwenu Yahwe batipa magalo akazhuka kuti tiwande mu ali.”
23Kudwa ipapo Isaki kayenda ku Bheerisheba. 24Mu busiku igogo Yahwe bakazwilakidza kunli ngono bakandwa bakati, “Ndimi Ndzimu wa tate babo Abhurahama. Usitje, ngoti ndi nawe, ndowokukombolela awatsha ludzi gugo ngekwe nlanda wangu Abhurahama.” 25Isaki kathama tjibeso tjinopisigwa zwibhayilo ngono kanamata Yahwe. Kabaka mishasha iye ipapo ngono balanda babe bakatsha tshime.
Tjidumano tja Isaki na Abimeleki
26 #
Kutangisa 21:22
Ipapo Abimeleki kayenda kuna Isaki edwa ku Gera ana Ahuzati nkumbuludzi uwe na Fikoli nlauli we babhayani ba Abimeleki. 27Isaki kababhuzwa kati, “Mabingani ngeno? Atenti mondishima makanditata pamuli?”
28Bakadabila beti, “Tobona zubuyanana kuti Yahwe banawe, ndizo tabe titi ngakube ne tjidumano tje mbakisano pakati kwedu nawe, 29tjekuti usitongo tithamila tjimwe tjakabipa se naswi tisakakuthamila tjimwe tjakabipa, takakuyendisa nge mbakiso. Nasi wakombolegwa ndi Yahwe.” 30Isaki kabathamila nzano we zojiwa ngono bakaja bakang'wa. 31Tjimuka mangwanana bakatunilana. Isaki kabapeleka, ngono bakansiya nge mbakiso.
32Mu zhuba ilelo balanda ba Isaki bakazha bakambudza ngekwe tshime labakatsha. Bakati, “Tapubula vula.” 33Kalitumila eti Shiba#26:33 Shiba: Dama ilele mu Tjihebheru lodwa kutuna. kuswikila mu zhuba lino zina le nzi iwoyo lodang'wa Bheerisheba.
Esau elobola be njudzi dzipoga
34Esau wakati ana makole ali makumi manna (40) kabe ekotosa Juditi nkololokadzi wa Bheeri na Bhasemati nkololokadzi wa Eloni be Tjihiti. 35Ngono bakabipisa butjilo gwa Isaki na Ribeka.
Currently Selected:
Kutangisa 26: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
