Kutangisa 27
27
Isaki ekombolela Jakubo
1Kukati Isaki akwegula asingatjabonesese ku mesho, kadana nkololo uwe we mbano Esau kati kunli, “Nkololo wangu!”
Esau kadabila eti, “Ndipano.”
2Isaki kabe eti kunli, “Bona, imi ndakwegula, zhuba le kufa kwangu anditoliziba. 3Ndizo ngwenu wali tola mathumo awo ne misebe ne dati uyende ku shango unondivimila phuka, 4ube undibhikila zojiwa zwinozipa zwandinoda, uzwizhise kundili ndije ndizo ndikokukombolela ndisathu afa.”
5Ribeka wakabe akahwilila Isaki elebeleka ne nkololo uwe Esau. Kukati Esau ayenda ku shango kunovima phuka, 6Ribeka kabe eti kuna Jakubo, “Ndahwa tate babo bedwa nkulu uwo Esau beti, 7‘Undizhisile phuka undithamile zojiwa zwinozipa ndije ndizo ndikukombolele mbeli kwa Yahwe ndisathu afa.’ 8Ndizo mwanangu undihwilile uthame tjandinokudwa. 9Yenda ku danga undizhisile mbudzana mbili dzakakola, ndizo ndibhikile tate babo zojiwa zwinozipa zwe moyo wabo. 10Ukozwitola unobapa kuti baje ndizo bakokukombolela basathu bakafa.”
11Jakubo kashandula Ribeka mmeyabe eti, “Nkulu wangu Esau nthu una mmbethe mu mmbili wose, koga imi andina mmbethe. 12Pamwe tate banowondiambamba ngono bakaziba kuti ndobatjebela bebe bendilonga bhiso pana kuti bandikombolele.”
13Koga mmeyabe bakati kunli, “Mwanangu, bhiso ilelo ngalibe mu ndili. Iwe shinga tjandinoleba koga. Yenda unondizhila idzo.” 14Ndizo Jakubo kayenda kanodzibhata kabuya nadzo kuna mmeyabe. Mmeyabe bakabhika zojiwa zwinozipa nge zila inodiwa ndi tate babe. 15Ribeka katola zwiambalo zwe mwana uwe hwola Esau zwakanaka zwakabe zwili mu ng'umba kazwiambadza mwana uwe ntjetjana Jakubo. 16Kaambadza Jakubo makanda e mbudzana mu maboko ne mu ntshibha paakabe asina mmbethe. 17Ribeka kapa Jakubo zojiwa zwinozipa ne tjiwunga tjaakabe abhika.
18Jakubo kayenda kuna tate babe kati, “Tate!”
Ibo bakati, “Ndipano! Ndiwe ani mwanangu?”
19Jakubo kabe eti kuna tate babe, “Ndimi Esau mbano yenyu. Ndashinga sekwa mandidwa. Mukani zwenyu mugale muje nyama ye phuka yandabuya nayo mundikombolele.”
20Isaki kabhuzwa nkololo uwe eti, “Waiwana tjini nge kulibilidza kungapa mwanangu?”
Jakubo kashandula eti, “Yahwe Ndzimu wenyu bandiwanisa iyo.”
21Isaki kadwa Jakubo kati, “Sedzela pejo ndikubhate mwanangu kuti ndizibe kuti ndiwe nkololo wangu Esau kene aa.” 22Jakubo kasedzela kuna Tate babe Isaki bakambhata ngono bakati, “Hwi nde la Jakubo, koga maboko nde a Esau.” 23Ngono bakasinzibe ngoti maboko awe ana mmbethe se e nkulu uwe Esau, ndizo bakankombolela. 24Bakabhuzwa bakati, “Apa ndiwe dumbu nkololo wangu Esau kene?”
Kashandula kati, “Ndimi.”
25Isaki kabe eti, “Undipe nyama ye phuka iyo yawabulaya ndije ndiko kukombolela.” Jakubo kazhisa nyama ne nkumbi kunli ndizo Isaki kaja kang'wa. 26Ipapo tate babe Isaki bakati kunli, “Sedzela ngeno mwanangu undipute.” 27#Bahebheru 11:20Kayenda pabali kabaputa. Isaki kati ehwa nnuhwo we zwiambalo zwizwe kankombolela eti, “Kunuhwa kwe nkololo wangu konga kunuhwa kwe shango yakakombolegwa ndi Yahwe. 28Ndzimu ngaukupe khawa ye kudzimu ne fumwa ye shango bawatshe zwidzwalo zwizo ne nkumbi uwo. 29#Kutangisa 12:3Bathu ngabakushingile ne zwitjaba ngazwikuthigamile. Ube she we bana ba tate babo ne bakololo ba mmeyabo bakuthigamile. Banokuyemulila bhiso, bhiso ngaliwile ibo, banokukombolela ngabakombolegwe.”
Esau unokumbilabo kukombolegwa
30Kukati Isaki apedza kukombolela Jakubo, Jakubo atjadwa koga pana tate babe, Esau kaswika edwa kuvima. 31Na iye kabhikabo zojiwa zwinozipa ngono kazwiyisa kuna tate babe. Ngono kati ku bali, “Tate, mukani mugale muje nyama ye phuka yandabuya nayo ndizo mu kondikombolela.”
32Tate babe Isaki bakambhuzwa beti, “Ndiwe ani?”
Esau kashandula eti, “Ndimi Esau nkololo wenyu we mbano.”
33Isaki katetema kwazo ngono kabhuzwa kati, “Ndiani iwoyu wanovima phuka kaizhisa kundili? Ndaija usathu ukabuya ngono ndankombolela, nge malebeswa unowokombolegwa.”
34Esau kati ehwa matama a tate babe kaphutuka nge tjililo tjikulu tjinogwadza. Kadwa tate babe kati, “Mundikombolele, namibo mundikombolele tate bangu.”
35Isaki kadabila eti, “Nnung'una uwo wazha nge bupitipiti ngono katola kukombolegwa kuko.”
36 #
Kutangisa 25:29-34
Esau kabe eti, “Zina linoyi Jakubo lonfanila. Wanditjebela mu thambo idzedzi mbili dzose. Wakanditolela fanilo dze kuzwagwa kwangu ndili mbano, ngwenu wanditolela kukombolegwa kwangu. Akuna kukombolegwa kwa mandisiyila kene?”
37Isaki kadabila Esau eti, “Ndanthama she uwo ne ludzi gugo gose ndaguthama balanda babe ngono ampa mathunde ne nkumbi. Ndizo ini wali tjandingakuthamila mwanangu?”
38 #
Bahebheru 12:17
Esau kati kuna tate babe, “Mungabe muna tjing'ompela koga tjamungandikombolela nditjo kene tate? Mundikombolelebo tate bangu!” Ngono Esau kalila kwazo.
39 #
Bahebheru 11:20
Ipapo tate babe Isaki bakan'dabila beti,
“Magalo awo anowobe kule ne fumwa ye shango,
Anobe kule ne khawa ye kudzimu.
40 #
Kutangisa 36:8; 2 Bomambo 8:20 Iwe unowotjila nge thumo.
Unoshingila nnung'una uwo.
Koga tjibaka tjaunowopanduka,
Unowosununguka mu kulaula kukwe.”
41Esau kabenga Jakubo embengela kukombolegwa ndi tate babe. Kakumbula eti, “Mazhuba ekulilila tate abe pejo, kudwa ipapo ndowobulaya nnung'una wangu.”
42Ribeka kati ahwa mano anolukwa ndi Esau nkololo uwe hwola kadana Jakubo nkololo uwe ntjetjana kandwa kati, “Nkulu uwo Esau unozwinyaladza nge nkumbulo we kukubulaya. 43Ndizo ngwenu wali mwanangu thama tjandinoleba. Tizhila kuna basekulu babo Labani ku Harani. 44Ugale nabo kuswikila bushongola gugwe gutebama. 45Kowoti bushongola gwe nkulu uwo gwapela, akangang'wa tjawakanshingila, ndowozhisa dama ku kuli kuti ubuye ngeno. Kobhatshani kuti mundilashikile mose zhuba ling'ompela?”
Isaki unotumila Jakubo kuna Labani
46Ribeka kati kuna Isaki, “Ndanyala kakale ndadziyidzika mu butjilo ngekwe bakadzi ibaba be Bahiti. Jakubo ha angalobola mmwe we bakadzi be shango iyeyi be Tjihiti kunganaka ha ndingafa.”
Currently Selected:
Kutangisa 27: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
