Kutangisa 28
28
1Ndizo Isaki kadana Jakubo kankombolela kandwa kati, “Usitongolobola nkadzi we Nkanana. 2Milika uyende ku Padani Aramu ku ludzi gwa batategulu babo tate ba mmeyabo Bhethuwele unolobola mmwe we bakololokadzi ba Labani basekulu babo. 3Ndzimu Masimbawose ngaukukombolele ukupe bana banjinji bawande kudzina mube njudzi njinji. 4#Kutangisa 17:4-8Ngaukupe iwe ne bana babo kukombolegwa kwa Abhurahama kuti ndizo utole shango iyeyi yaugele muili ngwenu se nzhi, shango Ndzimu yawakapa Abhurahama.” 5Ipapo Isaki kadwa Jakubo kuti ayende ku Padani Aramu kuna Labani basekulu babo nkololo wa Bhethuwele we N'aramu hazwadzi ya Ribeka mme ba Jakubo na Esau.
Esau unotola mmwe nkadzi
6Ipapo Esau kahwa kuti Isaki wakombolela Jakubo ngono kan'yisa ku Padani Aramu kunoshaka nkadziko. Kahwa kuti wakati enkombolela kandwa kati asitongo lobola nkadzi we Nkanana, 7ngono Jakubo kahwa tate babe na mmeyabe kayenda ku Padani Aramu. 8Kukati Esau ebona kuti bakadzi be Tjikanana abatoshathisa Isaki tate babe 9kayenda kuna Ishimaele nkololo wa Abhurahama kanolobola Mahalati nkololokadzi wa Ishimaele hazwadzi ya Nebayoti epaphidza bakadzi baakabe anabo kale.
Mawoloto a Jakubo ali ku Bhetele
10Jakubo kamilika mu Bheerisheba kayenda ku Harani. 11Zhuba likammilila pamwe pathu ngono katola bgwe limwe ipapo kalisazamila kayizela. 12#Johani 1:51Kawolota ebona datho lakamisiwa pasi mu shango, theswi dzalo dziswika kudzimu, batumwa be Ndzimu bedeluka bakabuya bakatatha ndilo. 13#Kutangisa 13:14, 15Yahwe bakabe bali mile pezhugwi kwalo ngono bakabe beti, “Ndimi Yahwe Ndzimu wa batategulu babo Abhurahama, Ndzimu wa Isaki. Shango yaulele muili ndowoipa iwe ne bana babo. 14#Kutangisa 12:3; 22:18Ludzi gugo gowowanda se hwuluba ye shango, mowopashila ku golombedzo ne ku bhezhuba ne ku bunandzwa ne ku burwa. Njudzi dzose dze shango dzowokombolegwa nge kuko nenge kwe bana babo. 15Bona, ndinawe, ndowokutjengeta kumwe ne kumwe kwaunoyenda akubuza mu shango iyeyi. Andingakusiye kuswikila ndishinga tjandakakugadza bgwe.”
16Jakubo kamuka mu hwope ngono kati, “Nge malebeswa tjose Yahwe bayapo pathu ipapa, koga ndabe ndisingazibe.” 17Kawigwa ngotja ngono kati, “Pathu ipapa panotjisa seni! Ipapa pathu i ng'umba ye Ndzimu, ipapa nkoba we kudzimu.”
18Tjimuka mangwanana Jakubo katola bgwe laakabe akasazamila kalimisa kube ikumbuludzo ngono kalidila mafuta. 19Katumila pathu ipapo kati Bhetele nenguba nzi iwoyu wakabe udang'wa Luzi. 20Ipapo Jakubo katuna kabe eti, “Ha Ndzimu ungabe nami ukanditjengeta mu gwendo igogu gwandinoyenda ukandipa zojiwa ne zwiambalo 21adzina abgwilila ku nzi wa tate kusina tjibiibi, Yahwe banowobe Ndzimu wangu. 22Bgwe ileli landamisa ipapa se ikumbuludzo lowobe ng'umba ye Ndzimu ngono kose kwa munowondipa ndowodusa tje bugumi.”
Currently Selected:
Kutangisa 28: KBTP
Highlight
Share
Copy
Want to have your highlights saved across all your devices? Sign up or sign in
Kalanga Bible © Bible Society of Botswana, 2008, 2018.
