KU̧U̧NAŊMƆ 21

Kóó Izak

1GASA WAN dee demɔ in Sara hee mɔ'ɔ n'aa ha̧a̧ so nú-a wen dea-a ga. 2Sara sɔka so kaɗi, ɓɛɛ a̧ ba zaŋ ko nɛ̀ be-wiwii ha̧ Abraham, nyɛm nɛ ɗoŋ ŋgimbi nɛ Sɔ̧ baa gɔn.#Heb 11.11 3Abraham aa nin Izak ha̧ be-wiwii nɛ Sara koo ha̧ a̧‘i. 4Izak kpaa zɛ mɔɔrɔ-ɗoŋ-taar, ɓɛɛ Abraham gɔn bɔr-aa nyɛm nɛ ɗoŋ ha̧a̧nú ko Sɔ̧.#Ku̧u̧ 17.12; Tom 7.8 5Abraham koo Izak ká a̧ a̧a̧ nɛ pɛ gɔmŋmaa. 6Ɓɛɛ Sara tɔ̧: «Sɔ̧ dee ha̧ nú‘m mɛ gɔn mami. O bíí lɛŋ nɛ tɛ zii mɔ'ɔ tɛ mam mami nɛ desee in am.» 7Ɓɛɛ a̧ tɔ̧ mbɛt'e: «Mɛ̀ nɛ́ o'o tɛ̀ɛ́ tɔ̧ so ha̧ Abraham nde, Sara tɛ̀ɛ́ pi̧ so bere nú o bem o? Wen nɛ́ sɛn tɛ sɔki kɔ̧-a̧, a̧‘m koo nɛ bem ha̧ a̧.»

Ndaka Agar in Ismaɛl

8Bem gasa, in a̧ bɛ̧ɛ̧ bere; hegɔ Abraham dee gasa gbaŋa wese nɛ wa baa nɛ bere sɛn nu Izak yinɛ.

9Sara zɔka be-wiwii nɛ Agar zɔŋa Egiptɛ koo ha̧ Abraham nɛ duk de nɛ saa in bem kɔ̧-a̧ Izak, 10ɓɛɛ a̧ tɔ̧ ha̧ Abraham: «Mɛ̀ ndák kó-de-tom’ɛ yinɛ in bem kɔ̧-a̧, wen bem ko kó-de-tom er yɛ beka kɛ̧ mɔɔ-oi in bem kɔ‘m Izak na.» 11Wen'i ha̧a̧ ɗaŋsee ha̧ Abraham, wen nɛ́ bem kɔ̧-a̧.#Gal 4.29-30 12Ɓɛɛ Sɔ̧ tɔ̧ ha̧ a̧: «Ká mɛ́ kpa ɗaŋsee zu wen nɛ Sara tɔ̧ɔ̧ ha̧ mɛ wen bem nɛ mɛ koo in kó-de-tom kɔ-mɛ na. Mɔ nɛ Sara ak er-mɛ lɛŋ, mɛ̀ kɔ̧́ ɗɔaa, wen mɛ̀ nɛ́ nɛ̀ ɗoŋ Izak a̧ pɛ́r-nam kɔ-mɛ tɛ ba nin-mɛ ɓɔnsɛnɛ.#Rɔm 9.7; Heb 11.18 13Mɔ kpɔk, mi tɛ de ha̧ dukbíí mɛ gbo nɛ̀ tɛ bem ko kó-de-tom mbɛt, wen a̧ nɛ bem kɔ-mɛ mbɛt.»

14Abraham kura mɛ tutuyɛ sut, a̧ baa brɛt in yì há̧ há̧ Agar. Abraham baa bem’ɛi e gun ger nàà kɔ̧-a̧, ɓɛɛ a̧ fo wa yaknɛ. Agar yaka yambali nɛ ŋga-gbárà Bɛrseba nɛnɛ. 15Ŋgimbi nɛ yì kɔ̧ dak kaɗa kaɗi, a̧ baa bem e ti ŋma be te. 16A̧ nɛɛ duk kɔ̧-a̧ nɛ be nyɛi̧a-a hee naŋ gɔmŋmaa ga, ɓɛɛ a̧ tɔ̧: «Mi beka duk oi fio ko bem kɔ‘m na.» A̧ duka nù nɛ nyɛi̧a-a ɓɛɛ a̧ hi̧i̧ kɔ̧a̧ nɛ ŋgaya-a.

17Sɔ̧ zia hiɗimɔ ko bem, ɓɛɛ betom ko Sɔ̧ sa Agar; a̧ tɔ̧ɔ̧ ha̧ a̧: «Agar, nɛ́ ge a̧ de mɛ ge? Ká mɛ́ de kíì na, wen Sɔ̧ zia hiɗimɔ ko bem sɛn fara n'aa duk'i. 18Mɛ̀ kúr, mɛ̀ bá bem nɛ ŋgɔn in mɛ̀ kás'a nɛ er, wen mi tɛ de ha̧ gasa dukbíí mɛ gbo nɛ̀ tɛ-a.» 19Sɔ̧ hu̧i̧a̧ yí Agar wen zɔka mɔ nɛ̀ de-a, ɓɛɛ a̧ zɔk gɔna-yì sɛn ti a̧. A̧ ɗuu yì‘i dun dak, ɓɛɛ a̧ ha̧ ha̧ bem mɛ nɔ. 20Sɔ̧ duka in bem’ɛi, a̧ gasa, ɓɛɛ a̧ de ye sɛn ŋga-gbárà. A̧ duka nɛ gasa wi-pi̧-góò nyɛmna. 21A̧ dee ye sɛn ŋga-gbárà Paraŋ, ɓɛɛ nàà kɔ̧-a̧ ba nɛ zɔŋa Egiptɛ nɛ̀ kóò ha̧ a̧.

Abraham nɔɔ tɔk in Abimɛlɛk

22Tɛ ŋgimbi'i, Abimɛlɛk in Pikɔl, gasawi ko o wi-biro kɔ̧-a̧ tɔ̧ɔ̧ ha̧ Abraham: «Sɔ̧ a̧a̧ in mɛɛ sɛn tɛ mɔ lɛŋ nɛ mɛ de.#Ku̧u̧ 26.26 23Mɛ̀ kán mɔ sɛn ti'm kinii nɛ nin Sɔ̧, mɛ beka e ɗɔra tɛ‘m, o bem kɔ‘m in o bezaŋ-am na, ɓɛɛ mɛ tɛ zɔk am nɛ de-a hɔ nɛnɛ tɛ ye nɛ mɛ tɛ duk sɛnɛ, hee mɔ'ɔ n'am zɔka nɛ̀ mɛ nɛ̀ de-a ga.» 24Abraham kifa nú: «Nɛ́ kpasawen, mi tɛ de hegɔ.» 25Ɓɛɛ Abraham wuli o ŋma wi-de-tom ko Abimɛlɛk wen zu gɔna-yí-nɔɔ nɛ o wi-de-tom ko Abimɛlɛk dora e nɛ kɔ‘i. 26Abimɛlɛk kifa nú: «Mi iŋ wi nɛ dee mɔ‘i na. Mɛ́ tɔ̧ ha̧‘m nɛti na, zia-a kɔ‘m nɛ mɔ‘i sɔsɔɔ‘i ɓɛɛ.»

27Abraham kaia o geɗek mɔ-dai in o ndai ha̧ Abimɛlɛk, ɓɛɛ wa yiitoo nɔ tɔk in ŋmaa.

28Abraham kaia o zɔŋa sami mɔɔrɔ-ɗoŋ-yiitoo sɛn mgbara o dɔka-a e nɛtɛ. 29Ɓɛɛ Abimɛlɛk ak Abraham: «O zɔŋa sami nɔ'ɔ mɔɔrɔ-ɗoŋ-yiitoo nɛ mɛ hoka a hɛ̧ɛ̧ nɛtɛ'ɛ nɛ́ wen ge?» 30A̧ kifa nú: «Nɛ́ wen ha̧ mɛ mɛ kpa o zɔŋa sami mɔɔrɔ-ɗoŋ-yiitoo nɛ̀ mɔɔ-er-am. Mɔ'ɔ tɛ duk nɛ mɔɔ-sedaako, nɛ usi'e nɛ́ mi a̧ gɔna yì'ɛ.» 31Mɛ̀ nɛ́ wen hegɔ sa wa saa nin fara'i «Bɛrseba» wen wa yiitoo kànà so mɔ sɛn hi̧i̧. 32Ɗoŋ nɛ wa nɔɔ tɔk sɛn Bɛrseba kaɗi, Abimɛlɛk kura in Pikɔl gasawi ko o wi-biro kɔ̧-a̧, ɓɛɛ wa si ɗɔŋ sitɛ nù ko o be Filistii.

33Hegɔ Abraham guna ŋma be te#21.33 be te: texte tɔ̧ɔ̧ nɛ tamaris. sɛn Bɛrseba, ɓɛɛ a̧ wor GASA WAN Sɔ̧ nɛ duk kpoo nɛ kpoo. 34Abraham duka ɗoŋ-aa nyɛi̧ tɛ nù ko o be Filistii.

Currently Selected:

KU̧U̧NAŊMƆ 21: GB11DC

Highlight

Copy