KU̧U̧NAŊMƆ 22

Abraham baa Izak mɛ ɗafi nɛ̀ Sɔ̧

1Ɗoŋ o mɔ nɛ yaka, Sɔ̧ wee Abraham, ɓɛɛ sa ha̧ a̧: «Abraham!» Ɓɛɛ a̧ kɔ̧ sara: «Mi nɛ mɔ'ɔ!»#Heb 11.17-19 2Sɔ̧ tɔ̧a̧: «Mɛ̀ bá kpɔk bem kɔ-mɛ Izak nɛ mɛ kɔ̧ɔ̧ nyɛmna a̧ mɛ̀ nɛ́ si sɛn tɛ nù ko Mɔriya, nɛ́ sɛn hi̧i̧ a̧ mɛ tɛ dɔ a̧ nɛ kpoo-sɔ̧ ha̧‘m sɛn zu kaya n'am tɛ usi ha̧ mɛ.»#2 Kal Ny 3.1 3Abraham kura mɛ tutuyɛ sut, a̧ hɛra tuifuu kɔ̧-a̧, a̧ mgbɔɔ o ŋma wi-de-tom kɔ̧-a̧ yiitoo in bem kɔ̧-a̧ Izak mbɛt; a̧ gbaa gua wen dɔa-a nɛ kpoo-sɔ̧, ɓɛɛ a̧ yak si sɛn fara nɛ Sɔ̧ usa so ha̧ a̧. 4Taar zɛ nɛɛ nɔ̀, Abraham baa yí nɛ ŋgɔn, ɓɛɛ a̧ zɔk fara'i nɛ nyɛi̧a-a. 5Abraham tɔ̧ɔ̧ ha̧ o wi-de-tom kɔ‘i: «Ɛ̀nɛ̀ yá k’ɛ́nɛ́ hɛ̧ɛ̧ in tuifuu; ɛ́ɛ́ in bem, ɛ́ɛ́ tɛ nɛ hɔ sɛn mɛ‘i, ɛ́ɛ́ tɛ gasi Sɔ̧ ɓɛɛ ɛ́ɛ́ pia ɗoŋ kpa'nɛ́.»

6Abraham baa gua-ɗafi-sɔ̧ e sɛn zu bem kɔ̧-a̧ Izak, ɓɛɛ a̧ ba wee in paa, ɓɛɛ wa kai ŋmaa in bem yak. 7Izak saa dáà kɔ‘i Abraham ɓɛɛ tɔ̧: «Baaba!» Abraham kifa nú: «Mi nɛ mɔ'ɔ, bem kɔ‘m.» Izak aka dáà kɔ‘i: «Wee in gua nɛ́ mɔ'ɔ, ɓɛɛ be-sami wen dɔɔ-kpoo-sɔ̧ a̧a̧ bɔɔ dee?» 8Abraham kifa nú: «Bem kɔ‘m, mɛ̀ nɛ́ Sɔ̧ a̧ tɛ ha̧ be-sami wen dɔɔ-kpoo-sɔ̧.» Ɓɛɛ wa kai ŋmaa yak siti.

9Ŋgimbi nɛ wa hɔɔ sɛn fara nɛ Sɔ̧ usa so ha̧ Abraham kaɗi, a̧ ɗafa fara-ɗafi-sɔ̧, a̧ aa gua sɛnɛ, ɓɛɛ a̧ hɛr bem kɔ̧-a̧ Izak giti zu fara-dɔ-kpoo-sɔ̧ zu gua.#Jk 2.21 10Abraham hu̧i̧a̧ er ɓɛɛ dak paa wen gɔna ger bem kɔ̧-a̧. 11Nɛ́ mɔ'ɔ nɛ betom ko GASA WAN saa a̧ nɛ yiwese, ɓɛɛ tɔ̧: «Abraham! Abraham!» Ɓɛɛ a̧ kɔ̧ sara: «Mi nɛ mɔ'ɔ!» 12Betom tɔ̧a̧: «Ká mɛ́ ba er-mɛ sitɛ bem kɔ-mɛ wen gɔna a̧ na! Ká mɛ́ de ŋma mɔ in a̧ na! Kinii, mi iŋa ndé, mɛ yu Sɔ̧ yuu wen mɛ bɛ̧ ha̧a̧ kpɔk bem kɔ-mɛ ha̧‘m na.» 13Abraham baa yí nɛ ŋgɔn, ɓɛɛ zɔk vala sami, nɛ zak-a haka mgbara da̧a̧ be te, ɓɛɛ Abraham nɛ́ɛ̀ ba vala sami'i, nɛ́ɛ̀ gɔn oi nú bem kɔ̧-a̧ ɗafi nɛ̀ Sɔ̧. 14Abraham aa nin fara'i'e: «GASA WAN ha̧a̧ mɔ!» Mɛ̀ nɛ́ wen hegɔ wi tɔ̧ hɔ sɔsɔɔ‘i: «GASA WAN ha̧a̧ mɔ sɛn zu kaya.»

15Betom ko GASA WAN saa Abraham war yiitoo woyo nɛ yiwese, 16ɓɛɛ tɔ̧‘e: «Wen nɛ GASA WAN tɔ̧ nɛ mɔ'ɔ: Mi kana tɛ‘m! Hee mɔ'ɔ nɛ mɛ dee mɔ hegɔ, ɓɛɛ ká mɛ́ e kpɔk bem kɔ-mɛ na ga,#Heb 6.13-14 17mi tɛ tok de yoŋgo zu mɛ, mi tɛ de ha̧ bezaŋ-mɛ mɛ dɔk hee o sɔra yiwese in nyɛmɛ ká̧ zaŋ gba-tɔp ga, ɓɛɛ o bezaŋ-mɛ tɛ gan o wisɛn kɔ-wa tɛ biro.#Heb 11.12 18O dukbíí lɛŋ sɛn zu nù tɛ kpa toka-de-yoŋgo nɛ ɗoŋ bezaŋ-mɛ wen mɛ mboo zu-mɛ tɛ wen kɔ‘m.»#Tom 3.25 19Abraham pia ɗoŋ kpa o wi-de-tom kɔ‘i, wa kura si ɗoŋ si Bɛrseba, ɓɛɛ Abraham de ye hi̧i̧.

O bezaŋ Nahɔr

20Ɗoŋ mɔɔ nɔ‘i, wa tɛ̀ɛ́ tɔ̧ ha̧ Abraham ndé, Milka mbɛt koo o be-wiwii ha̧ nya-a̧ Nahɔr. 21Kaya-bem kɔ̧-a̧ nɛ́ Us, hɔ-ɗoŋ-aa nɛ́ Buz, Kemuɛl dáà ko Aram, 22Kɛsɛd, Hazɔ, Pildas, Yidlaf in Bɛtuɛl. 23Bɛtuɛl koo Rebeka. O bem mɔɔrɔ-ɗoŋ-taar nɛ Milka koo ha̧ Nahɔr, nya Abraham nɛ́ mɔɔ nɔ‘i. 24Nahɔr a̧a̧ so nɛ ŋma okoo, nin kóò‘i nɛ Reuma; a̧ koo so bem mbɛt; nin o bem kɔ̧-a̧ nɛ mɔ'ɔ: Teba, Gaham, Tahas in Maka.

Currently Selected:

KU̧U̧NAŊMƆ 22: GB11DC

Highlight

Copy