KU̧U̧NAŊMƆ 23
23
Fio ko Sara
1Ŋgimbi nɛ Sara dee sɛn zu nù nɛ́ pɛ gɔŋmaa-nɛ-ɓu-yiitoo-zua-mɔɔrɔ-ɗoŋ-yiitoo. 2A̧ fea sɛn Kiriat-Arba, fara nɛ‘i sa'e Hebrɔŋ sɛn nú Kanaŋ. Abraham nɛɛ de gera hi̧i̧ nɛ fio mbɛt.
3Ɓɛɛ Abraham kur fara fio nɛ́ɛ̀ tɔ̧ ha̧ o bezaŋ Hɛt'e: 4«Mi nɛ́ gɛnɛ k’ɛ́nɛ́; ɛ̀nɛ̀ há̧ fara ha̧‘m sɛn nu k’ɛ́nɛ́ wen guna kóò kɔ‘m.»#Heb 11.9,13; Tom 7.16
5O bezaŋ Hɛt kifa nú hee mɔ'ɔ ga ha̧ Abraham: 6«Nyaa, ɛ̀nɛ̀ zíí wen k’ɛɛ! Sɔ̧ ee'nɛ́ nɛ̀ wan mgbara yɛ; ɛ̀nɛ̀ gún fio k’ɛ́nɛ́ sɛn tɛ de kɔ̧ fio n’ɛnɛ hoka; ŋma bíí kpɔk beka bɛ̧ ha̧a̧ kɔ̧ fio h’ɛ́nɛ́ wen guna kóò k’ɛ́nɛ́ na.»
7Abraham kura ŋgɔn ɓɛɛ gu nù ti o bezaŋ Hɛt, 8ɓɛɛ a̧ tɔ̧ ha̧ wa woyo: «K’ɛ̀nɛ̀ nɛ́ kɔ̧ɔ̧ ɗɔaa wen baa fio kɔ‘m in guna a̧, ɛ̀nɛ̀ zíí wen kɔ‘m; ɛ̀nɛ̀ áí nú ha̧ Efrɔŋ, bem ko Sɔhar wen am, 9ha̧ a̧ mɛ ha̧ di̧i̧ Makpɛla nɛ duk nɛ kɔ̧-a̧ sɛn ká̧ nú fɔ kɔ̧-a̧ ha̧‘m. A̧ a̧ ɗɔr ha̧‘m nɛ mgbák gɛnɛ, ha̧ mɛ duk nɛ fara-gun-fio kɔ‘m tɛ k’ɛ́nɛ́.»
10Efrɔŋ duka so nù mgbara o bezaŋ Hɛt mbɛt, ɓɛɛ kifi nú ha̧ Abraham nɛ yí o bezaŋ Hɛt in o bíí lɛŋ nɛ tɛa saaye kɔ̧-a̧; a̧ tɔ̧a̧: 11«Nyaa, ɛ̀nɛ̀ zíí wen nú‘m nɛti sɛ! Fɔ in di̧i̧ nɛ a̧a̧ sɛn fara'i, mi ha̧a̧‘nɛ́ nɛ̀ yí o bíí kɔ‘m, ɛ̀nɛ̀ gún fio k’ɛ́nɛ́ sɛnɛ.»
12Ɓɛɛ Abraham gu nù ti o be-nù, 13a̧ tɔ̧ɔ̧ ha̧ Efrɔŋ nɛ yí o be-nù: «Mi ai nú ha̧ mɛ, mɛ̀ zíí wen kɔ‘m; mi tɛ ha̧ sede fɔ‘i ha̧ mɛ. Mɛ̀ bá er-am, ɓɛɛ nɛ́ hi̧i̧ a̧‘m tɛ gun fio kɔ‘m sɛnɛ.»
14Ɓɛɛ Efrɔŋ kifi nú ha̧ Abraham: 15«Nyaa, ɛ̀nɛ̀ zíí wen kɔ‘m nɛti sɛ. Kɔya sede gɔmŋmaa-naar mgbara ɛɛ in'nɛ̀ɛ́ nɛ ge? Ɛ̀nɛ̀ gún fio k’ɛ́nɛ́.» 16Abraham ee nú in Efrɔŋ, ɓɛɛ a̧ we dɔka sede nɛ Efrɔŋ tɔ̧ɔ̧ so nɛnɛ‘i ti o bezaŋ Hɛt. Duka nɛ kɔya sede gɔmŋmaa-naar nɛ̀ o wi-de-gɛnɛ lɛŋ iŋa.
17Hegɔ fɔ ko Efrɔŋ nɛ a̧a̧ sɛn Makpɛla nɛ zɔk ŋmaa in Mambre, nù, in di̧i̧ nɛ duk sɛnɛ‘i, in o te lɛŋ nɛ a̧a̧ sɛn bɛɛ-nù‘i hɔ sɛn ká̧ a̧ lɛŋ, 18duka nɛ ko Abraham, nɛ yí o bezaŋ Hɛt, in o bíí lɛŋ nɛ tɛa nú garo ye'i.
19Ɓɛɛ Abraham ba Sara gun sɛn gasa kɔ̧ di̧i̧ fɔ Makpɛla nɛ zɔk ŋmaa in Mambre, sɛn Hebrɔŋ nú Kanaŋ. 20O bezaŋ Hɛt ee fara-gun-fio kpɛɛfɔ‘i in di̧i̧ nɛ a̧a̧ sɛnɛ‘i ha̧ Abraham.
Currently Selected:
KU̧U̧NAŊMƆ 23: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
