LUK 1
1
Zu-Wen
1Nyaa Teofil,
O bíí nɛ̀ dɔka-a yɔra nyɛrɛ mɔ nɛ̀ hɔɔ mgbara ɛɛ, 2nyɛm nɛ̀ ɗoŋ mɔ nɛ̀ o wi-ya-oi-aa zɔka nɛ̀ ku̧u̧naŋ-a mɛ, ɓɛɛ wa we ɗoŋ-aa h’ɛ́ɛ́. O wi nɔ‘i yaa so nɛ́ o wi-tɔ̧-wen ko Sɔ̧. 3Hegɔ mi mbɛt, ɗoŋ n'am aka ndaa mɔ‘i lɛŋ nɛ̀ sa̧a̧-a̧, nɛ̀ ku̧u̧naŋ-a mɛ, mi taa mɔ mɛ́ yɔr mɔ‘i h’ɛ́nɛ́, nɛ̀ yuwar-a, nyaa Teofil, 4wen h’ɛ́nɛ́ mɛ iŋ‘e ndé, usamɔ n’ɛnɛ kpaa'i nɛ́ kpasamɔ.
Tɔ̧ɔ̧-wen koa Jean Zui-bíí
5Ŋma wi-ɗafi-sɔ̧ duka so ŋgimbi wan ko Herod, sɛn Judee; nin wi’ɛi nɛ́ Zakarii. A̧ nɛ́ zuduk ko Abia nɛ̀ duka so nɛ́ o wi-ɗafi-sɔ̧, ɓɛɛ kóò kɔ̧-a̧ nɛ́ bezaŋ Arɔŋ, nin-a nɛ́ Elizabɛt.#1 Kal Ny 24.10 6Wa yiitoo lɛŋ duka so nɛ́ o wi-de-mɔ nɛ̀ yuwar-a ti Sɔ̧; wa kasa so heembea in geŋa ko Gasa Wan nɛ̀ de-a. 7Wa bo so nɛ̀ bem na, wen Elizabɛt yara so nɛ̀ ndɔra, wa yiitoo lɛŋ sɔka so kaɗi mbɛt.
8Ŋma wese, Zakarii ɗafi nɛ́ Sɔ̧, wen duka nɛ́ ŋgimbi ko dùk kɔ̧-a̧ mɛ de tom-aa. 9Wa tana mɔ nyɛm nɛ̀ ɗoŋ yuwar deemɔ ko o wi-ɗafi-sɔ̧, ɓɛɛ tani ba nɛ́ Zakarii mɛ nɛ̀ɛ́ dɔ fuu-nyama kɔ̧̀ sa̧a̧-fara ko Gasa Wan. 10Dukbíí ko Sɔ̧ nɛ̀ oi-aa ɓɔna zan, wor nɛ̀ Sɔ̧, ŋgimbi dɔɔ fuu-nyama. 11Nɛ́ mɔ'ɔ nɛ̀ ŋma betom ko Gasa Wan hɔɔ yɔr yí Zakarii nɛ̀ war wii-er ká̧ fara-dɔ fuu-nyama. 12Zɔka a̧ nɛ̀ Zakarii zɔka hegɔ, kíì dee a̧ nyɛmna, ɓɛɛ a̧ sakali. 13Betom ko Sɔ̧ tɔ̧ɔ̧ ha̧ a̧: «Zakarii, ká mɛ de kíì na, Sɔ̧ zia aia-nú kɔ-mɛ, ɓɛɛ kóò kɔ-mɛ Elizabɛt tɛ ko be-wiwii ha̧ mɛ. Mɛ tɛ a nin-a'e Jean. 14Mɛ tɛ kpa desee in tortɛ wen zu a̧, ɓɛɛ o bíí nɛ̀ dɔka-a tɛ kpa desee zu kóó a̧ mbɛt, 15wen a̧ tɛ duk nɛ́ gasawi ti Gasa Wan; a̧ beka nɔ dɔ̧ɔ̧ waya-nyak-dɔ̧ɔ̧, kóó ŋma dɔ̧ɔ̧-zik-zu-wi na mbɛt. Sɔ̧ tɛ ha̧ ŋgai ko Sa̧a̧ Ɔmi ha̧ a̧ nɛ̀ kɔ̧́ zaŋ nàà kɔ̧-a̧ mɛ tɛnɛ.#Tɔra-bíí 6.3 16A̧ tɛ mgbɔ o be Israɛl nɛ̀ dɔka-a piinɛ ɗoŋ ha̧ Gasa Wan Sɔ̧ kɔ-wa. 17A̧ tɛ yak ti ha̧ Sɔ̧, ɓɛɛ taamɔ in ŋgai ko Elii tɛ duk tɛ-a, ha̧ a̧ mɛ de ha̧ o dáa-wan-bem mɛ ta mɔ wen o bem kɔ‘i, in ha̧ o wi-ŋgazu mɛ duk nɛ̀ iŋamɔ ko o wi-de-mɔ nɛ̀ yuwar-a, wen ha̧ a̧ mɛ mɔi̧#1.17 mɔ̧i̧: texte tɔ̧̀ɔ̧́ nɛ́ ɗáfí.#Mal 3.23-24 dukbíí ha̧ Gasa Wan mɛ duk dɔ̧́ɔ̧́ wen dee tom ha̧ a̧.»
18Ɓɛɛ Zakarii tɔ̧ ha̧ betom ko Sɔ̧: «Nɛ́ ge a̧ tɛ de ha̧‘m mɛ iŋ mɔ‘i ge nde? Wen mi sɔka kaɗi, ɓɛɛ pɛ ko kóò kɔ‘m dɔka mbɛt kaɗi.» 19Betom ko Sɔ̧ kifa nú ha̧ a̧: «Mi nɛ́ Gabriɛl, betom nɛ̀ yor ti Sɔ̧, ɓɛɛ Sɔ̧ toma'm tɛnɛ mɛ tɔ̧ wen ha̧ mɛ in ha̧‘m mɛ tɔ̧ de mbe wen'i ha̧ mɛ.#Dan 8.16; 9.21 20Nú-mɛ́ tɛ kpe, ɓɛɛ mɛ beka tɔ̧ wen ɓɔna hɔ wese nɛ̀ mɔ‘i tɛ hɔ, wen mɛ́ kpɛ́k wen kɔ‘m nɛ̀ tɛ hɔ gba̧a̧ tɛ ŋgimbi-a na.»
21O dɔka bíí zɛma Zakarii, ɓɛɛ ɗɛɗɛ-wa gɔn wen n'aa ɓɔna ɗoŋ-aa nyɛi̧ kɔ̧̀ sa̧a̧-fara ko Sɔ̧. 22Ɗoŋ n'aa gboo kaɗi, a̧ nyɛm mɛ tɔ̧ wen sitɛ wa ɓɔna, ɓɛɛ wa iŋ‘e ndé, ŋma mɔ hɔɔ zu ha̧ a̧ kɔ̧̀ sa̧a̧-fara ko Sɔ̧‘i. A̧ kpa nú-tɔ̧-wen ɓɔna, ɓɛɛ a̧ tɔ̧ wen sitɛ wa nɛ̀ er.
23Ŋgimbi nɛ̀ tom-ɗafa-sɔ̧ kɔ̧-a̧ kaɗa kaɗi, a̧ sii ɗoŋ tɛ̀ kɔ̧-a̧. 24Ɗoŋ mɔ‘i kóò kɔ̧-a̧ Elizabɛt baa zaŋ, ɓɛɛ Elizabɛt hu̧si zaŋ tɛ fio-zɛ mɔɔrɔ. Taamɔ kɔ̧-a̧ nɛ́ mɔ'ɔ: 25«Zɔ́k mɔ nɛ̀ Gasa Wan dee in am ŋgimbi n'aa zɔka nɛ̀ mɔ pii tɛ‘m: a̧ baa mɔ nɛ̀ pi̧i̧ so foe zu'm ti o bíí yinɛ.»
Tɔ̧ɔ̧-wen koa Jesu
26Ɗoŋ nɛ̀ zaŋ Elizabɛt dee fio-zɛ mɔɔrɔ-ɗoŋ-kpɔk, Sɔ̧ toma betom Gabriɛl nɛnɛ sɛn ŋma ye nú Galilee, nin ye'i nɛ́ Nazarɛt. 27Sɔ̧ toma a̧ sitɛ ŋma be-zɔŋa nɛ̀ ŋma wiwii nɛ̀‘i sa'e Jozɛf hara; nin be-zɔŋa'i nɛ́ Marii. Jozɛf nɛ́ bezaŋ wannu David.#Mt 1.18 28Nɛ́ mɔ'ɔ nɛ̀ Gabriɛl nɛ̀ɛ́ tɛ̀ ko Marii, ɓɛɛ tɔ̧ ha̧ a̧: «Mɛ̀ dúk nɛ̀ desee, mɛ́ wi nɛ̀ Sɔ̧ dee demɔ in mɛ̀ɛ̀, Gasa Wan a̧a̧ in mɛ̀ɛ̀ mbɛt.» 29Zia wen'i nɛ̀ Marii zia hegɔ, ɓɛɛ Marii sakali, ta nɛ̀ mɔ, gba̧a̧ fanamɔ‘i hee ge? 30Ɓɛɛ betom ko Sɔ̧ tɔ̧ ha̧ a̧: «Marii, ká mɛ́ de kíì na, wen mɛ́ kpaa de sɔnti ti Sɔ̧. 31Mɛ́ tɛ́ ba zaŋ, ko nɛ̀ be-wiwii, ɓɛɛ mɛ aa nin-a'e Jesu.#Mt 1.21 32A̧ tɛ duk nɛ́ gasawi, ɓɛɛ wa tɛ sa a̧‘e Bem ko Wan nɛ̀ a̧a̧ ŋgɔn mɛ. Ɓɛɛ Gasa Wan Sɔ̧ tɛ de ha̧ a̧ mɛ ɔ wan oi dáà kɔ̧-a̧ David.#2 Sam 7.12,13,16; Es 9.7 33A̧ tɛ ɔ wan zu o bíí nutua ko Jakob ɓɔnsɛnɛ, ɓɛɛ wan kɔ̧-a̧ beka kaɗi na.»
34Ɓɛɛ Marii ak betom ko Sɔ̧: «Mɔ‘i tɛ de dea-a hee ge? Wen mi iŋ wiwii na.»
35Ɓɛɛ betom ko Sɔ̧ kifi nú ha̧ Marii: «Sa̧a̧ Ɔmi tɛ zir pii zu mɛ, ɓɛɛ ŋgai ko Wan nɛ̀ a̧a̧ ŋgɔn mɛ tɛ kpe zu mɛ hee gi̧ɔ̧ ga. Wen hegɔ, bem nɛ‘i tɛ ko'i, tɛ duk nɛ́ sa̧a̧-wi, ɓɛɛ wi tɛ sa a̧‘e Bem ko Sɔ̧. 36Zɔk Elizabɛt nàm kɔ-mɛ nɛ̀ wa sa so'e kó-yar-ndɔra’ɛ baa zaŋ kinii tɛ sɔki kɔ̧-a̧, dee fio-zɛ mɔɔrɔ-ɗoŋ-kpɔk kaɗi, 37wen ŋma mɔɔ-gan Sɔ̧ bo na.»#Ku̧u̧ 18.14
38Ɓɛɛ Marii tɔ̧ ha̧ betom ko Sɔ̧‘i: «Mi nɛ́ kó-de-tom ko Gasa Wan, mɔ'ɔ hɔ́ tɛ‘m hee mɔ'ɔ nɛ̀ mɛ tɔ̧ɔ̧ ga!» Ɓɛɛ betom ko Sɔ̧ yak e Marii duk.
Marii nɛ̀ɛ̀ mɛ zɔk Elizabɛt
39Wese'i, Marii kura yak nɛ̀ haya-a si ŋma ye zu kaya, sɛn tɛ ŋma gasa ye Judee. 40Nɛ́ mɔ'ɔ naa yee kɔ̧́ tua ko Zakarii, ɓɛɛ fan Elizabɛt. 41Elizabɛt zia fanamɔ ko Marii, ɓɛɛ soɓee, bem foo mɔ kɔ̧ zaŋ-aa, ɓɛɛ Elizabɛt kpa ŋgai ko Sa̧a̧ Ɔmi. 42Elizabɛt tɔ̧ɔ̧ ha̧ Marii nɛ̀ hee-ger hee mɔ'ɔ ga: «Sɔnti-mɛ dee gan oi dɔka okoo lɛŋ, ɓɛɛ sɔnti bem nɛ̀ duk kɔ̧́ zaŋ mɛ‘i mbɛt ɔ dee. 43Mɔ‘i dee hee ge, sa nàà ko Gasa Wan kɔ‘m tɛ tɛ‘m’ɛ ge nde? 44Mɛ̀ zɔ̀k, ŋgimbi n'am zia fanamɔ nɛ̀ mɛ́ fana nɛ̀‘m'i, ɓɛɛ bem fo mɔ nɛ̀ desee kɔ̧́ zaŋ-am. 45Okoo nɛ̀ kpɛka wen ko Sɔ̧ duk nɛ̀ desee, wen mɔ nɛ̀ Gasa Wan tɔ̧ɔ̧ ha̧ a̧‘i tɛ hɔ gba̧a̧.»
Gima ko Marii
46Ɓɛɛ Marii tɔ̧:
«Sɔ̧-tɛ‘m gasi nɛ́ Gasa Wan;#1 Sam 2.1-10
47tortɛ ba nɛ‘m wen Sɔ̧,
Wan-kpas'am;
48wen a̧ zɔka mɔ pii tɛ geɗek kó-de-tom kɔ̧-a̧.
Nɛ mbetɛ kinii, hegɔ yaknɛ sɔ̧i̧i̧,
o bezaŋ ɗoŋ ŋmaa ɗoŋ ŋmaa tɛ tɔ̧‘e,
sɔnti'm ɔ dee,#1 Sam 1.11
49wen Wan nɛ̀ a̧a̧ nɛ̀ ŋgayamɔ lɛŋ dee gasamɔ ha̧‘m.
Nin-a ɔ sa̧a̧;
50Deako kɔ̧-a̧ duk zu o wi-yu-kíí a̧
in o bezaŋ-wa kpoo nɛ kpoo yaknɛ.
51A̧ dee mɔ nɛ̀ ŋga er-a,
pɛsi nɛ̀ o wi-ŋmaŋ-tɛ a taŋ sót-sót;
52a̧ foo o ŋga wannu yinɛ zu damti kɔ-wa,
ɓɛɛ a̧ ba o wi-mɔka-see e ŋgɔn.#Job 5.11; 12.19
53A̧ ha̧a̧ demɔ nɛ̀ dɔka-a ha̧ o wi nɛ̀ wɔ gbɛ wa,
ɓɛɛ a̧ fo o wanmbɔi yaknɛ nɛ̀ géé er.
54A̧ gbaka Israɛl wi-de-tom kɔ̧-a̧:
tɛ-a bi ɗoŋ dee demɔ
55ha̧ Abraham in o bezaŋ-aa na, yaknɛ sɔ̧i̧i̧.
Hegɔ, a̧ yora ɗoŋ ha̧a̧nú kɔ̧-a̧ ha̧ o dáà k’ɛɛ.»#Ku̧u̧ 17.7
56Nɛ́ mɔ'ɔ nɛ̀ Marii ɔɔ in Elizabɛt fio-zɛ taar, ɓɛɛ a̧ si tɛ̀ kɔ̧-a̧.
Koo Jean Zui-bíí
57Ŋgimbi nɛ̀ zɛ zaŋ dama kaɗi, Elizabɛt koo nɛ̀ be-wiwii. 58O bíí nɛ̀ ɔ katɛ Elizabɛt in o nàm kɔ̧-a̧ zia'e Gasa Wan dee demɔ in a̧, ɓɛɛ wa de nyɛŋɛ mɔ‘i in a̧. 59Ɗoŋ zɛ mɔɔrɔ-ɗoŋ-taar, ɓɛɛ o bíí nɛ̀ ɔ katɛ Elizabɛt in o nàm kɔ̧-a̧ mɔi̧ ŋmaa wen gɔna bɔr bem. Wa kɔ̧ɔ̧ so mɛ sa nin dáà kɔ̧-a̧ Zakarii ha̧ a̧,#Lev 12.3 60ɓɛɛ nàà kɔ̧-a̧ tɔ̧‘e: «Weyaa, nin-a tɛ duk nɛ́ Jean.» 61Ɓɛɛ wa tɔ̧ ha̧ a̧: «Ŋma nàm kɔ-mɛ bo nɛ̀ pɛrti nin'i na.»
62Ɓɛɛ wa tɔ̧ wen nɛ̀ er sitɛ dáà kɔ̧-a̧, ha̧ a̧ mɛ tɔ̧ nin n'aa kɔ̧ɔ̧ ha̧ wa mɛ sa ha̧ bem kɔ̧-a̧. 63Zakarii aka ŋma mɔ wen yɔra mɔ zu a̧, ɓɛɛ a̧ yɔr mɔ sɛnɛ‘e: «Nin-a nɛ́ Jean,» ɓɛɛ ɗɛɗɛ-wa lɛŋ gɔn wen mɔ‘i. 64Tɛ kpɔk kale ŋgimbi'i nú-a hu̧i̧a̧, leɓ‘a bura, ɓɛɛ a̧ ku̧ naŋ tɔ̧ɔ̧ wen gasi nɛ̀ Sɔ̧. 65Kíì dee o bíí katɛ wa lɛŋ, ɓɛɛ wa tɔ̧ nyɛrɛ mɔ‘i nɛ̀ nú ŋmaa mgbara kaya nú Judee mɛ lɛŋ. 66O bíí lɛŋ nɛ̀ zia nyɛrɛ mɔ‘i taa mɔ, ɓɛɛ tɔ̧: «Bem’ɛ tɛ duk nɛ́ ge bíí ge nde?» Nɛ̀ mbetɛ, er Gasa Wan duka zu a̧.
Gima ko Zakarii
67Zakarii dáà ko Jean kpaa ŋgai ko Sa̧a̧ Ɔmi, ɓɛɛ wór#1.67 wór: texte tɔ̧a: tɔ̧́ wen oi nú Sɔ̧. Sɔ̧ hee mɔ'ɔ ga:
68«Toka-de-yoŋgo a̧ dúk zu Gasa Wan, Sɔ̧ ko Israɛl
wen n'aa hɔɔ tɛ dukbíí kɔ̧-a̧ ɓɛɛ gbo wa.
69A̧ ha̧a̧ ŋgaya Wan-kpasi-wi#1.69 ngáyá Wan-kpàsì-wí: texte tɔ̧a zák-kpàsì-wí (zɔk Gima 18.3). h’ɛ́ɛ́ nutua ko David,
wi-de-tom kɔ̧-a̧.
70Hee mɔ'ɔ n'aa bàá tɔ̧ so nɛ̀ nú
o sa̧a̧ wi-tɔ̧-wen oi nú a̧ ɓeemɛ‘e ndé:
71Wi tɛ kpasi ɛɛ er o wisɛn k’ɛɛ
in o bíí lɛŋ nɛ̀ sɛn yɛ ga.
72A̧ dee ko ha̧ o dáà k’ɛɛ,
ɓɛɛ tɛ-a bi ɗoŋ sa̧a̧ nɔɔ-tɔk kɔ̧-a̧,
73in kanamɔ n'aa bàá kan so
ha̧ dáà k’ɛɛ Abraham na.
74Ɗoŋ n'aa tɛ kpasi ɛɛ er o wisɛn k’ɛɛ,
a̧ tɛ de h’ɛ́ɛ́ mɛ de tom ha̧ a̧ nɛ̀ nɔɔ-ŋgiɗi
75in h’ɛ́ɛ́ mɛ ya nɛ́ o wi-yu-kíí a̧
in o wi-de-mɔ nɛ̀ yuwar-a ti a̧,
ŋgimbi lɛŋ n’ɛɛ biti duk kpasa.
76Ɓɛɛ kɔ-mɛ, geɗek bem,
wa tɛ sa mɛ‘e ndé,
wi-tɔ̧-wen oi nú Wan nɛ̀ duk ŋgɔn mɛ;
wen nɛ́ mɛ'ɛ tɛ yak ti ha̧ Gasa Wan,
wen ɗafa yuwar ha̧ a̧.#Mal 3.1
77Nɛ́ mɛ'ɛ tɛ de ha̧ dukbíí ko Sɔ̧ mɛ iŋ‘e,
yuwar kpasa-a a̧a̧ nɛ̀ ɗoŋ ea-ɗaŋmɔ.
78Mɔ‘i duk nɛ́ mɔɔ-oi gasa deako ko Sɔ̧ k’ɛɛ;
mɛ̀ nɛ́ wen zu deako'i
ɛɛ zɔka nɛ̀ sɔra nɛ tɛ̀ɛ́ nɛ̀ ŋgɔn mɛ
79mɛ ha̧ sa̧a̧mɔ ha̧ o bíí nɛ̀ ya ti tum
in ɗɔɔ gi̧ɔ̧-fio,
in mɛ usi war ha̧ naŋ yɛ mɛ ba nɛ́ yuwar ga̧a̧mɔ.»#Es 9.1
80Jean ku̧u̧ naŋ gasa-a, taamɔ kɔ̧-a̧ hu̧i̧ hu̧i̧ siti. A̧ yaka nɛ́ɛ̀ duk ŋga-gbárà mɛ, hɔ wese n'aa ku̧u̧ nɛ̀ naŋ usa tɛ-a ha̧ o be Israɛl.
Currently Selected:
LUK 1: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
