MARK 16

O okoo nɛ̀ɛ̀ mɛ zɔk pɛsi

(Zɔk Mt 28.1-8; Lk 24.1-12; Jn 20.1-10)

1Hɔ-ɗoŋ wese-ɔm-tɛ, Marii Magdala, Marii nàà ko Jak in Salomee hi̧fa nɔ̧́-nyama mɛ nɛ̀ɛ́ a tɛ wɔr Jesu. 2Wa kura yak si nú pɛsi-fio mɛ tutuyɛ sut, tɛ kuti wese'i, ɓɛɛ ká wese daŋa kaɗi. 3Ɓɛɛ wa ak ŋmaa: «Nɛ́ o'o tɛ kin ta yinɛ nú pɛsi-fio h’ɛ́ɛ́ o nde?» 4Kà wa ba yí-wa nɛ̀ ŋgɔn wó, wa zɔka ta kina so yinɛ kaɗi; ta'i duka so nɛ́ zɔm gasa ta nyɛmna. 5Wa yee kɔ̧́ pɛsi, ɓɛɛ wa zɔk ŋma be-ŋgaiwi nɛ̀ duk nú nɛ̀ war wii-er-wa; a̧ pi̧i̧ nɛ́ bu laa, ɓɛɛ kíì de wa nyɛmna. 6Nɛ́ mɔ'ɔ nɛ̀ be-ŋgaiwi'i tɔ̧ɔ̧ ha̧ wa: «K’ɛ́nɛ́ de kíì na; wi n’ɛnɛ kii'i nɛ́ Jesu be Nazarɛt, nɛ̀ wa mgboia zu te-diŋa: a̧ bo hɛ̧ɛ̧ na, a̧ kura ŋgɔn kaɗi, ɛ̀nɛ̀ zɔ́k fara nɛ̀ wa ee so a̧ sɛnɛ. 7Ɛ̀nɛ̀ nɛ́ɛ̀ tɔ̧́ ha̧ o ŋgaiwi kɔ̧-a̧ in ha̧ Pierre mbɛt'e, a̧ yaka ti h’ɛ́nɛ́ si Galilee mɛ; nɛ́ hi̧i̧ ɛ̀nɛ̀ tɛ zɔk a̧, hee mɔ'ɔ n'aa bàá tɔ̧ so h’ɛ́nɛ́ ga.»#Mt 26.32; Mk 14.28

8Nɛ́ mɔ'ɔ nɛ̀ wa gboo kɔ̧́ pɛsi-fio, ma yì yak nɛ̀ nyɛi̧a-a, wen kíì dee wa ɓɛɛ tɛ-wa nak nak. Wa tɔ̧ wen'i ha̧ ŋma bíí na, wen kíì hɛra zaŋ-wa.

O bíí zɔka Jesu

[ 9Ɗoŋ nɛ̀ Jesu kura ŋgɔn tɛ kuti wese kaɗi, kuti wi n'aa usa tɛ-a ha̧ a̧ nɛ́ Marii Magdala n'aa bàá ndak so ɗaŋ-sɔ̧ mɔɔrɔ-ɗoŋ-yiitoo tɛ-a yinɛ‘i. 10Nɛ́ mɔ'ɔ nɛ̀ Marii Magdala nɛ̀ɛ̀ tɔ̧ nyɛrɛ mɔ‘i ha̧ o wi nɛ̀ duka so in Jesu, nɛ̀ ya hí̧í̧ nɛ̀ fio. 11Ɓɛɛ wa kɔ̧ ɗɔɔ wen n'aa tɔ̧‘e, Jesu duk kpasa, in wi zɔka a̧‘i, na. 12Nɛ̀ ɗoŋ woyo, Jesu usa tɛ ha̧ o ŋma ŋgaiwi kɔ‘i yiitoo nɛ̀ yak si nú fɔ mbɛt. 13Nɛ́ mɔ'ɔ nɛ̀ wa pia ɗoŋ, we ɗoŋ wen'i ha̧ o dɔka ŋgaiwi ko Jesu, ɓɛɛ wa kɔ̧ ɗɔɔ wen'i na mbɛt. 14Sɔŋkur-aa, a̧ usa tɛ-a ha̧ o ŋgaiwi kɔ̧-a̧ ɓu-zua-kpɔk, ŋgimbi nɛ̀ wa nyɔŋ nɛ́ mɔ, ɓɛɛ a̧ tɔ̧ wen ha̧ wa, wen sii-kafɛ in ŋgaya-see kɔ-wa, wen wa kɔ̧ ɗɔɔ wen ko o bíí nɛ̀ zɔka'e a̧ kura ŋgɔn'i na. 15Ɓɛɛ a̧ tɔ̧ ha̧ wa: «Ɛ̀nɛ̀ nɛ́ dam fara lɛŋ, ɛ̀nɛ̀ úsí De Mbe Wen ko Sɔ̧ ha̧ o bíí lɛŋ.#Tom 1.8 16Wi nɛ̀ kɔ̧ɔ̧ ɗɔɔ wen'i, ɓɛɛ nɛ̀ wa tɛ zui a̧, wi’ɛi tɛ kpasi; ɓɛɛ wi nɛ̀ kɔ̧ ɗɔɔ wen'i na, kita tɛ tik a̧. 17O mɔɔ-kifi nɛ̀ o wi nɛ̀ tɛ kpɛk wen'i tɛ de, nɛ́ mɔ'ɔ: wa tɛ ndak o ɗaŋ-sɔ̧ yinɛ nɛ̀ nin-am, wa tɛ tɔ̧ nú nɛtɛ nɛtɛ; 18wa tɛ ba o gɔ́k nɛ̀ er-wa, ɓɛɛ kà wa nɔ ŋma ɔ̧nɔ̧, ɔ̧nɔ̧‘i beka de ŋma mɔ in wa na; wa tɛ e er zu o wi-zɛɛ, ɓɛɛ o wi-zɛɛ kpasa.» 19Gasa Wan Jesu tɔ̧ɔ̧ wen'i ha̧ wa kaɗi, ɓɛɛ daŋ si yiwese,#16.19b ɓɛ̀ɛ́ dáŋ sí yíwèsé: Sɔ̧ bá à̧ dáŋnɛ́ sí yíwèsé.#Tom 1.9-11 dúk nù nɛ̀ war wii-er Sɔ̧. 20Ɓɛɛ kɔ-wa, Gasa Wan yora ɗoŋ wa, ha̧ nɛ̀ ŋgai ha̧ wa mɛ de o mɔɔ-kifi, wen ha̧ o bíí mɛ iŋ‘e wen nɛ̀ wa tɔ̧‘i nɛ́ kpasawen.]

Currently Selected:

MARK 16: GB11DC

Highlight

Copy