LUK 8

O wi-nɛ̀ in Jesu

1Ɗoŋ mɔ‘i, Jesu yara nɛ̀ o gasa ye in o geɗek ye, tɔ̧ nɛ̀ De Mbe Wen Wan ko Sɔ̧ ha̧ o bíí. Ɓɛɛ o ŋgaiwi kɔ̧-a̧ ɓu-zua-yiitoo duka so in a̧, 2in o ŋma okoo n'aa ndaka so ɗaŋ-sɔ̧ tɛ-wa yinɛ, in n'aa kpasa so wa tɛ zɛɛ kɔ-wa. O wi nɔ‘i nɛ́ Marii (nɛ̀ wa sa'e Magdala), nɛ̀ ɗaŋ-sɔ̧ mɔɔrɔ-ɗoŋ-yiitoo gboo so tɛ a̧, sɛka#Mt 27.55-56; Mk 15.40-41; Lk 23.49 3Janɛ kóò ko Kuza, wi-pɛm-mbɔi ko Herod, in Suzanɛ in o ŋma nɛ̀ dɔka-a nɛ̀ gbaka so wa nɛ̀ mbɔi mbɛt.

Lizaŋ ko wi-pɛ-kpar-mɔ

(Zɔk Mt 13.1-9; Mk 4.1-9)

4Hee mɔ'ɔ nɛ̀ gba giiwi in o bíí nɛ̀ tɛ nɛ̀ saaye nɛtɛ nɛtɛ mɔi̧a katɛ Jesu ga, a̧ tɔ̧ɔ̧ lizaŋ'ɛ ha̧ wa:

5«Ŋma wi-pɛ-kpar-mɔ gboo so mɛ pɛ kpar-mɔ kɔ‘i, ɓɛɛ tɛ̀ pɛɛ mɔ n'aa pɛ nɛnɛ‘i, o ŋma kpar-mɔ aa nù ká̧ war. O bíí i̧sa̧, ɓɛɛ o nɔ̧́í̧ tɛɛ nyɔŋ lɛŋ yinɛ. 6O ŋma tika nù zu ta, ɓɛɛ ɗoŋ nɛ̀ wa hɔɔ kaɗi, wa kora, wen yì bo na. 7O ŋma woyo tika nù sɛn poo tɛnmɔ, ɓɛɛ tɛnmɔ hɔ kpɔk in wa, ɓɛɛ kpe zu wa. 8O ŋma kpar-mɔ tika tɛ de nù. Nɛ́ mɔ'ɔ nɛ̀ wa hɔa gasi, ɓɛɛ wai gɔmŋmaa.» Ɗoŋ n'aa tɔ̧ɔ̧ wen'i ha̧ wa kaɗi ɓɛɛ a̧ tɔ̧: «Wi nɛ̀ a̧a̧ nɛ̀ zer mɛ zii wen a̧ a̧ zíí ŋgaɓo!»

Wen ge sa a̧ tɔ̧ lizaŋ‘i ha̧ wa ge?

(Zɔk Mt 13.10-17; Mk 4.10-12)

9O ŋgaiwi kɔ̧-a̧ aka a̧ mɛ tɔ̧ gba̧a̧ lizaŋ‘i ha̧ wa. 10Ɓɛɛ a̧ tɔ̧ ha̧ wa: «K’ɛ́nɛ́, Sɔ̧ dee h’ɛ́nɛ́ mɛ iŋ mgbara o ɗukamɔ tɛ Wan kɔ‘i, ɓɛɛ ko o ŋma bíí, nɛ́ lizaŋ a̧ usi mɔ ha̧ wa, wen ha̧ wa mɛ kɛ̧i̧ mɔ, ɓɛɛ wa zɔk na; ha̧ wa mɛ yeŋ zer-wa, ɓɛɛ wa zii gba̧a̧-a̧ na.#Es 6.9-10

Gba̧a̧ lizaŋ ko wi-pɛ-kpar-mɔ

(Zɔk Mt 13.18-23; Mk 4.13-20)

11«Gba̧a̧ lizaŋ‘i nɛ́ mɔ'ɔ: kpar-mɔ nɛ́ wen ko Sɔ̧. 12O kpar-mɔ nɛ̀ aa nù ká̧ war usi nɛ́ o wi nɛ zia wen ko Sɔ̧, ɓɛɛ wan-ɗaŋmɔ tɛ́ɛ̀ ba wen'i kɔ̧ see-wa yinɛ, wen ká wa tɛ kɔ̧ ɗɔaa ha̧ Sɔ̧, ká wa kpasi. 13O wan nɛ̀ aa nù zu ta usi nɛ́ o bíí nɛ̀ kpɛk wen ko Sɔ̧ nɛ̀ desee ŋgimbi nɛ̀ wa zii wen'i, ɓɛɛ wen'i ye kɔ̧́ see-wa na. Tɛ́ ŋma ŋgimbi wa kɔ̧ɔ̧ ɗɔaa ha̧ Sɔ̧, ɓɛɛ kà ŋma weamɔ kpa wa, ɓɛɛ wa ee duk. 14O wan nɛ̀ aa nù poo tɛnmɔ usi nɛ́ o bíí nɛ̀ zia wen ko Sɔ̧, ɓɛɛ taamɔ́-zaŋnu, in wɔ-mbɔi in wɔ mɔɔ-zaŋnu nɛtɛ nɛtɛ gana zu wa, ɓɛɛ wen ko Sɔ̧ nɛ̀ wa zia'i de ŋma mɔ̀ tɛ-wa na.#8.14 dé ŋma mɔ̀ tɛ-wa ná: texte tɔ̧a: nyɛ́m mɛ́ wàì ná. 15O wan nɛ̀ aa nù tɛ de nù usi nɛ́ o wi nɛ̀ zia wen ko Sɔ̧, ɓɛɛ kasi e kɔ̧́ see nɛ̀ yuwar-a in nɛ̀ de-a mbɛt, ɓɛɛ wen'i nɛ̀ wa zia'i waia wen wa ee see-wa sɛnɛ.»

Lizaŋ ko lamba

(Zɔk Mk 4.21-25)

16«Wi e wee tɛ lamba mɛ ba e ɗɔɔ kpánà, kóó ɗɔɔ gado na; wi ba lamba e zu paku ha̧ o bíí nɛ̀ ye tua mɛ zɔk sa̧a̧mɔ;#Mt 5.15; Lk 11.33 17wen ŋma mɔ nɛ bíí tɛ hu̧si nɛ̀‘i beka zɔk na bo na; ŋma hu̧sa̧mɔ nɛ̀ beka gbo zan ha̧ bíí mɛ iŋ na, bo na mbɛt.#Mt 10.26; Lk 12.2

18«Ɛ̀nɛ̀ zɔ́k tɛ̀‘nɛ́ tɛ ziamɔ k’ɛ́nɛ́! Wen nɛ́ wi nɛ̀ a̧a̧ nɛ̀ mɔ, a̧‘i tɛ e mbe-a zu-a ha̧ a̧; ɓɛɛ wi nɛ̀ bó nɛ̀ mɔ na, kóó be mɔ n'aa taa'e a̧ a̧a̧ nɛnɛ‘i, wi tɛ ba er-a yinɛ!»#Mt 25.29; Lk 19.26

Kpasa nàm ko Jesu

(Zɔk Mt 12.46-50; Mk 3.31-35)

19Nàà ko Jesu in o nya-a̧ tɛɛ tɛ a̧, ɓɛɛ kpa fara mɛ hɔ tɛ a̧ na, wen giiwi nyɛmna, 20ɓɛɛ o bíí tɔ̧ ha̧ Jesu'e: «Nàà k’ɛ́nɛ́ in o nya'nɛ́ a̧a̧ zan'i, wa kɔ̧ɔ̧ mɛ zɔk'nɛ́.» 21Ɓɛɛ Jesu kifi nú ha̧ wa: «O wi nɛ̀ zii wen ko Sɔ̧, ɓɛɛ nɛ̀ de mɔ nyɛm ɗoŋ wen'i, o wi nɔ‘i nɛ́ nàà kɔ‘m in o nya'm.»

Jesu dee ha̧ ŋga-búk mɛ ga̧

(Zɔk Mt 8.23-27; Mk 4.35-41)

22Ŋma wese, Jesu daŋa kombon in o ŋgaiwi kɔ‘i, ɓɛɛ a̧ tɔ̧ ha̧ wa: «Ɛ̀ɛ̀ kú tɔp si kur mɛ.» Ɓɛɛ wa ku̧ naŋ kuu yì. 23Ɓɛɛ ŋgimbi nɛ̀ wa a̧a̧ tɛ kuu yì‘i, Jesu ɔ kɔ‘i nɛ́ yá. Nɛ́ mɔ'ɔ nɛ̀ ŋma ŋga hara-búk ku̧u̧ naŋ ɓoɓa-a zu tɔp, ɓɛɛ yì ku̧ naŋ duna kombon. Pɛr-fio nuna wa. 24O ŋgaiwi ko Jesu nɛ̀ɛ̀ si katɛ a̧, ɓɛɛ tun a̧; wa tɔ̧ɔ̧ ha̧ a̧: «Wan-usi-mɔ, Wan-usi-mɔ wa, tɛ̀-ɛ́ɛ́ yɔɔ kaɗi!»

Jesu tuna, gai búk in pɛŋa-yì; mɔɔ nɔ‘i kaɗa, ɓɛɛ mɔ ga̧ dezeŋ. 25Hɔ-ɗoŋ-aa, ɓɛɛ Jesu tɔ̧ ha̧ wa: «Kɔ̧ɔ̧ɗɔɔwen k’ɛ́nɛ́ a̧a̧ déè?»

Kíì dee wa, ɗɛɗɛ-wa gɔna mbɛt, ɓɛɛ wa tɔ̧ sitɛ o ŋmaa: «Wi’ɛ nɛ́ o sa a̧ tɔ̧ wen ha̧ búk in tɔp mbɛt ɓɛɛ mboo zu ha̧ a̧'ɛ o?»

Jesu kpasa ŋma bíí nɛ̀ ɗaŋ-sɔ̧ a̧a̧ tɛ a̧

(Zɔk Mt 8.28-34; Mk 5.1-20)

26Wa hɔɔ nù ko o wi Gerasa nɛ̀ zɔk ŋmaa in Galilee. 27Jesu biti zira-a nɛ̀ kɔ̧́ kombon, ɓɛɛ ŋma bíí saaye'i, nɛ̀ o ɗaŋ-sɔ̧ a̧a̧ tɛ, we ti a̧ tɛnɛ. Zɛ ɔ dɔka wi’ɛi pi̧ laa ɓɔna in a̧ ɔ kɔ̧́ tua na mbɛt; fara-ɔɔ kɔ̧-a̧ nɛ́ kɔ̧́ pɛsi-fio. 28A̧ zɔka Jesu, ɓɛɛ a̧ hɔ̧fi̧ tik nù ká̧ naŋ-a hiɗi nɛ̀ mɔ tɔ̧ nɛnɛ‘e: «Jesu, Bem ko Sɔ̧ ŋgɔn mɛ! Ge a̧ mɛ kii zu'm ge? Mi aia nú ha̧ mɛ, ká mɛ usi bɔnɛ ha̧‘m na!» 29Nɛ́ mɔ'ɔ nɛ̀ Jesu tɔ̧ɔ̧ ha̧ ɗaŋ-sɔ̧ mɛ gbo tɛ-wi’ɛi yak. Zɛ ɔ dɔka nɛ̀ ɗaŋ-sɔ̧ de nɛ́ ŋmaa in a̧; kà wa hɛr a̧ nɛ̀ nyak-boi, kóó wa pi̧i̧ poka naŋ-a ha̧ a̧ mɛ duk keɗeŋ, a̧ gbina o mɔɔ nɔ‘i, ɓɛɛ ɗaŋ-sɔ̧ mgbɔɔ a̧ yaknɛ si zaŋbɛɛ mɛ. 30Ɓɛɛ Jesu ak a̧: «Nin-mɛ nɛ́ o?» A̧ kifa nú ha̧ a̧: «Nin-am nɛ́ Gii wi-biro»; wen mɔ‘i, nɛ́ o ɗaŋ-sɔ̧ nɛ̀ dɔka-a á̧ duka so tɛ a̧. 31O ɗaŋ-sɔ̧ aia nú ha̧ Jesu, wen ká̧ a̧ tɛ de ha̧ wa mɛ yak si kɔ̧̀ ɗuka-fara.

32Gba gíí ŋgɔya yaa so zu kaya'i nyɔŋ nɛ̀ mɔ, ɓɛɛ o ɗaŋ-sɔ̧ ai nú ha̧ Jesu mɛ e ha̧ wa mɛ ye tɛ o ŋgɔya nɔ‘i, ɓɛɛ a̧ e war ha̧ wa. 33O ɗaŋ-sɔ̧ gboo tɛ wi’ɛi ye tɛ o ŋgɔya nɔ‘i, ɓɛɛ o ŋgɔya gbin nɛ̀ zu kaya a̧ ɗɔɔ tɔp, ɓɛɛ fe yì lɛŋ.

34O wi-dai-ŋgɔya zɔka mɔ‘i ɓɛɛ wa yu mɔ yak mɛ nɛ̀ɛ́ tɔ̧ nyɛrɛ mɔ‘i saaye in o be ye mbɛt. 35Ɓɛɛ o bíí nɛ́ mɛ́ zɔk mɔ nɛ̀ yaka'i. Wa hɔɔ katɛ Jesu, ɓɛɛ wa zɔk wi nɛ̀ ɗaŋ-sɔ̧ duka so tɛ a̧‘i fara duka nù ká̧ naŋ Jesu. Zu-a pia ɗoŋ ɓɛɛ a̧ pi̧i̧ laa kaɗi mbɛt. Kíì dee wa nyɛmna. 36O wi-ya-oi mɔ‘i wee ɗoŋ mɔ nɛ̀ dee ha̧ wi nɛ̀ ɗaŋ-sɔ̧ duka so tɛ a̧‘i mɛ kpasi nɛnɛ. 37Ɓɛɛ o bíí nú Gerasa lɛŋ tɔ̧ ha̧ Jesu mɛ yu tɛ nù kɔ-wa nɛ̀ nyɛi̧a-a, wen kíì dee wa nyɛmna. Jesu daŋa kombon ɓɛɛ si ɗoŋ. 38Wi nɛ̀ o ɗaŋ-sɔ̧ gboo so tɛ a̧ aia nú, ɓɛɛ ak a̧ mɛ duk in a̧. Jesu foo a̧ sinɛ, ɓɛɛ tɔ̧ ha̧ a̧: 39«Mɛ̀ sí ɗoŋ tɛ o bíí kɔ-mɛ, ɓɛɛ mɛ̀ wé ɗoŋ mɔ lɛŋ nɛ̀ Sɔ̧ dee in mɛ̀ɛ́.» Ɓɛɛ wi’ɛi yak tɔ̧ nɛ̀ nyɛrɛ mɔ nɛ̀ Jesu dee in a̧‘i dam saaye'i lɛŋ.

Jesu kpasa ŋma okoo nɛ̀ tɔk gbo a̧, in boko-bem ko Jairus nɛ̀ fea

(Zɔk Mt 9.18-26; Mk 5.21-43)

40Jesu sii ɗoŋ Galilee, ɓɛɛ giiwi kpɛk a̧, wen wa lɛŋ duka so zɛm nɛ̀ a̧. 41Ɓɛɛ ŋma bíí tɛ, nin-a nɛ́ Jairus, a̧ nɛ́ wi-duk-zu tua-mɔi̧a-a. A̧ tika nù tibee Jesu, ɓɛɛ ai nú ha̧ a̧ mɛ́ nɛ̀ tɛ̀ kɔ̧-a̧, 42wen kpɔk be-okoo kɔ̧-a̧ nɛ̀ a̧a̧ nɛ̀ pɛ hee ɓu-zua-yiitoo ga hɛɗa fio kaɗi.

Jesu yaka, ɓɛɛ giiwi nɔ a̧ súm-súm nɛ́ nɛnɛ in a̧. 43Ɓɛɛ ŋma okoo a̧a̧ sɛnɛ nɛ̀ tɔk gbo a̧ dee pɛ ɓu-zua-yiitoo kaɗi; a̧ ɗaŋa sede kɔ̧-a̧ lɛŋ ha̧ o wan-nyina, ɓɛɛ ŋma kpɔk nyɛm so mɛ kpasi a̧ na. 44A̧ ɗɔla siti nɛ̀ ɗoŋ Jesu, tam nú-laa kɔ̧-a̧, ɓɛɛ tɔk gɔn tɛ́ kale ŋgimbi'i. 45Ɓɛɛ Jesu ak mɔ: «Nɛ́ o'o tama'm o?» Bíí lɛŋ kafa, ɓɛɛ Pierre tɔ̧: «Wan-usi-mɔ, nɛ́ o bíí a̧ nɔ ŋmaa in'nɛ̀ɛ́ ir nɛ̀ ɛnɛ!» 46Ɓɛɛ Jesu tɔ̧ woyo: «Ŋma bíí tama'm; wen mi iŋa nɛ̀ de-a, ŋma ŋgai gboo tɛ‘m.» 47Kóò‘i zɔka'e Jesu iŋa mɔ‘i, ɓɛɛ a̧ nɛ́ nɛ̀ naka-tɛ, tik nù ká̧ naŋ Jesu; a̧ tɔ̧ɔ̧ ndaa mɔ nɛ̀ dee ha̧ a̧ mɛ tam nɛ̀ Jesu nɛ̀ gbaayí o bíí lɛŋ, in mɔ nɛ̀ dee ha̧ zɛɛ kɔ̧-a̧ mɛ kaɗi nɛnɛ tɛ́ kale ŋgimbi'i. 48Jesu tɔ̧ɔ̧ ha̧ a̧: «Boko-bem kɔ‘m, kɔ̧ɔ̧ɗɔɔwen kɔ-mɛ kpasa mɛ, mɛ̀ yák zaŋ ga̧a̧mɔ.»

49Jesu biti tɔ̧ɔ̧ wen, ɓɛɛ ŋma bíí tɛ nɛ̀ tɛ̀ ko gasa wi-duk-zu tua-mɔi̧a-a, ɓɛɛ tɔ̧ ha̧ a̧: «Bem k’ɛ́nɛ́ fee kaɗi, k’ɛ́nɛ́ gba zu Wan-usi-mɔ sɔɔ géè ɓɔna.» 50Jesu zia wen'i, ɓɛɛ tɔ̧ ha̧ a̧: «Ká mɛ de kíì na; mɛ̀ kɔ̧́ ɗɔaa ɓɛɛ, ɓɛɛ bem kɔ-mɛ tɛ kpasi.» 51Jesu hɔɔ kɔ̧́ tua ko gasa wi-duk-zu tua-mɔi̧a-a, ɓɛɛ a̧ e ha̧ ŋma bíí mɛ ye tua in a̧ na, kànà nɛ́ Pierre in Jean in Jak ká bá nɛ̀ dáà in nàá-wan-bem ɓɛɛ. 52O bíí lɛŋ hi̧i̧ nɛ́ kɔ̧a̧ hiɗi nɛ̀ mɔ zu bem’ɛi, ɓɛɛ Jesu tɔ̧ ha̧ wa: «K’ɛ́nɛ́ hi̧i̧ kɔ̧a̧ hegɔ na, bem’ɛ fe na, a̧ ɔ nɛ́ yá.» 53Ɓɛɛ wa zɛkɛɗi a̧, wen nɛ̀ wa iŋa'e bem’ɛi fee kaɗi. 54Jesu kasa er bem’ɛi, ɓɛɛ sa a̧: «Bem kɔ‘m, mɛ̀ tún!» 55Ɔmi pia ɗoŋ ɓɛɛ a̧ kur tɛ kpɔk kale ŋgimbi'i. Ɓɛɛ Jesu tɔ̧ ha̧ wa mɛ ha̧ nyɔŋmɔ ha̧ a̧. 56Gasa kíì dee dáà in nàà kɔ̧-a̧, ɓɛɛ Jesu mbo nú-wa wen ká wa tɛɛ tɔ̧ wen'i ha̧ ŋma bíí.

Currently Selected:

LUK 8: GB11DC

Highlight

Copy