LUK 7

Jesu kpasa bara ko ŋma wi-duk-zu o wi-biro gɔmŋmaa

(Zɔk Mt 8.5-13)

1Ŋgimbi nɛ̀ Jesu tɔ̧ɔ̧ wen kɔ‘i lɛŋ ha̧ o bíí kaɗi, a̧ yee saaye Kafarnaum. 2Ŋma wi-duk-zu o wi-biro gɔmŋmaa a̧a̧ so nɛ̀ ŋma bara n'aa kɔ̧ɔ̧ nyɛmna, nɛ̀ ɔ nɛ́ zɛɛ; wi’ɛi hɛɗa so fio kaɗi. 3Zia nyɛrɛmɔ ko Jesu nɛ̀ gasawi'i zia hegɔ, ɓɛɛ a̧ tom o ŋma gasa Juif mɛ nɛ̀ɛ́ ai nú ha̧ Jesu mɛ nɛ̀ɛ́ kpasi bara kɔ̧-a̧. 4Wa hɔɔ katɛ Jesu, ɓɛɛ wa ai nú ha̧ a̧ nɛ̀ dɔka-a, wa tɔ̧a̧: «Wi’ɛi nɛ́ bíí h’ɛ́nɛ́ mɛ gbak, 5wen a̧ kɔ̧ɔ̧ tugun bíí k’ɛɛ nyɛmna, in nɛ́ a̧ a̧ dee tua-mɔi̧a-a h’ɛ́ɛ́ mbɛt.» 6Jesu baa yuwar yak in wa. A̧ hɛɗa nɛ̀ tua kaɗi, ɓɛɛ gasawi'i tom o sɛm kɔ‘i mɛ tɔ̧ ha̧ a̧: «Gasa Wan, k’ɛ́nɛ́ ɗaŋ tɛ‘nɛ́ tɛnɛ géè na, wen mi nyɛm h’ɛ́nɛ́ mɛ ye kɔ̧́ tua kɔ‘m na. 7Mɛ̀ nɛ́ wen mɔ‘i s'am zɔka'e mi nyɛm so mɛ nɛ̀ɛ́ kpa'nɛ́ na. Ɛ̀nɛ̀ tɔ̧́ nɛ́ géé wen mɛ nú‘nɛ́ kpɔk ɓɛɛ, ha̧ wi-de-tom kɔ‘m kpasi. 8Mi mbɛt, wi-duk-zu'm a̧a̧ sɛnɛ, ɓɛɛ mi a̧a̧ nɛ̀ o wi-biro n'am duk zu wa. Kà‘m tɔ̧ ha̧ ŋma kpɔk'e: ‹Mɛ̀ nɛ́!› Ɓɛɛ a̧ nɛa. Kà‘m tɔ̧ ha̧ ɓii-aa'e: ‹Mɛ̀ tɛ́!› Ɓɛɛ a̧ tɛa. Kà‘m tɔ̧́ ha̧ bara kɔ‘m'e: ‹Mɛ̀ dé mɔ'ɔ!› Ɓɛɛ a̧ dee mɔ‘i.» 9Jesu zia wen'i, ɓɛɛ yeŋ wi’ɛi. Nɛ́ mɔ'ɔ n'aa zika tɛ sitɛ giiwi nɛ̀ tɛɛ ɗoŋ-aa, ɓɛɛ tɔ̧: «Mi tɔ̧ h’ɛ́nɛ́, kóó sɛn Israɛl, mi tɛ zɔk pɛrti kɔ̧ɔ̧ɗɔɔwen hegɔ na.» 10O wi nɛ̀ wa toma'i sii ɗoŋ ɓɛɛ wa kpa bara'i nɛ̀ haya-tɛ.

Jesu kpasa bem ko ŋma ko-gera saaye Nain

11Hɔ-ɗoŋ-aa, Jesu yaka si ŋma gasa ye nɛ̀‘i sa'e Nain, ɓɛɛ o ŋgaiwi kɔ̧-a̧ in giiwi yak in a̧. 12A̧ hɔɔ ká̧ nú garo saaye kaɗi, ɓɛɛ a̧ zɔk o bíí nɛ̀ gɔ fio nɛnɛ mɛ gun; nɛ́ kpɔk be-wiwii ko ŋma ko-gera a̧ fea. Giiwi saaye nɛ̀ dɔka-a nɛɛ so in ko-gera'i mbɛt. 13Gasa Wan zɔka kóò‘i ɓɛɛ ko de a̧ ɓɛɛ a̧ tɔ̧ ha̧ kóò‘i: «Ká mɛ hi̧i̧ kɔ̧a̧ ɓɔna.» 14A̧ ɗɔŋa siti ɓɛɛ tam mɔɔ-gɔ-fio, ɓɛɛ o wi-gɔ-fio yor. Ɓɛɛ a̧ tɔ̧: «Be-ŋgaiwi’ɛ, mi tɔ̧ ha̧ mɛ, mɛ̀ kúr!» 15Nɛ́ mɔ'ɔ nɛ̀ fio kura dúk nù, ɓɛɛ ku̧ naŋ tɔ̧ɔ̧ wen. Ɓɛɛ Jesu ha̧ a̧ ha̧ nàà kɔ̧-a̧ woyo. 16Kíì hɛra zaŋ-wa lɛŋ, ɓɛɛ wa zɔn Sɔ̧ tɔ̧ nɛnɛ‘e: «Gasa wi-tɔ̧-wen oi nú Sɔ̧ hɔɔ mgbara yɛ, ɓɛɛ Sɔ̧ hɔɔ mɛ zɔk dukbíí kɔ‘i.» 17Ɓɛɛ nyɛrɛmɔ ko Jesu hur dam nú Judee, in o ye ká̧ fara'i lɛŋ.

O ŋgaiwi ko Jean Zui-bíí

(Zɔk Mt 11.2-6)

18Nɛ́ mɔ'ɔ nɛ̀ o ŋgaiwi ko Jean tɔ̧ nyɛrɛmɔ nɛ̀ Jesu dea'i lɛŋ ha̧ Jean. Ɓɛɛ Jean sa o ŋma ŋgaiwi kɔ‘i yiitoo, 19ɓɛɛ tom wa mɛ ak Gasa Wan: «Wi nɛ̀ tɛ tɛ nɛ́ ɛ́nɛ́ náà, kóó ɛɛ tɛ zɛm nɛ́ ŋma mbe bíí nde?» 20Wa nɛɛ hɔ tɛ Jesu ɓɛɛ wa tɔ̧ ha̧ a̧: «Jean Zui-bíí tom nɛ́ ɛɛ tɛnɛ mɛ ak'nɛ́‘e: ‹Wi nɛ̀ tɛ tɛ nɛ́ ɛ́nɛ́ náà, kóó ɛɛ tɛ zɛm nɛ́ ŋma mbe bíí nde?› » 21Ŋgimbi'i, Jesu kpasa o wi-zɛɛ nɛ̀ dɔka-a, in o wi-kum, in o bíí nɛ̀ ɗaŋ-sɔ̧ a̧a̧ tɛ, a̧ dee ha̧ o wi-boma-yí nɛ̀ dɔka-a mɛ zɔk mɔ; 22a̧ kifa nú ha̧ o betom ko Jean: «Ɛ̀nɛ̀ nɛ́ɛ̀ tɔ̧́ mɔ n’ɛnɛ zɔka in mɔ n’ɛnɛ zia ha̧ Jean: o wi-boma-yí zɔk nɛ́ mɔ, o wi-kum nɛ́ nɛ́ nɔ̀ nɛ̀ tana-a, tɛ̀ o wi-doko sa̧a̧, o wi-mgbee-zer zii nɛ́ mɔ, o fio kur nɛ́ ŋgɔn, ɓɛɛ o bíí tɔ̧ nɛ́ De Mbe Wen ha̧ o wi-kɔsa mbɛt.#Es 35.5-6; 61.1 23O wi nɛ beka sakali wen zu'm na duk kɔ‘i nɛ̀ desee!»

Jesu tɔ̧ɔ̧ wen ko Jean Zui-bíí

(Zɔk Mt 11.7-19)

24Nɛ́ mɔ'ɔ nɛ̀ o ŋgaiwi ko Jean sia, ɓɛɛ Jesu ku̧ naŋ tɔ̧ɔ̧ wen zu Jean ha̧ o giiwi ak nɛ̀ wa: «Ɛ́nɛ́ nɛ̀ɛ̀ mɛ zɔk nɛ́ ge sɛn ŋga-gbárà mɛ‘i ge? Géé kan nɛ̀ búk fo’ɛ nde? 25Ɛ́nɛ́ nɛ̀ɛ̀ mɛ zɔk nɛ́ ge? Ŋma wi-pi̧-de-laa nde? O wi-pi̧-de-laa yá tɛ bɔtɛ, yá kɔ‘i nɛ̀nɛ́ kɔ̧̀ kira ko wannu mɛ ɛ̧. 26Ɛ́nɛ́ nɛ̀ɛ̀ bɔɔ mɛ zɔk nɛ́ ge? Ŋma wi-tɔ̧-wen oi nú Sɔ̧ nde? Mi tɔ̧ h’ɛ́nɛ́, wi n’ɛnɛ zɔka'i gana wi-tɔ̧-wen oi nú Sɔ̧. 27Mɛ̀ nɛ́ wi nɛ̀ wa bàá yɔr so mɔ wen-aa'e ndé:

‹Mi tom nɛ betom kɔ‘m mɛ yak ti ha̧ mɛ,

ha̧ a̧ mɛ ɗafi war ha̧ mɛ.›#Mal 3.1

28Mi tɔ̧ h’ɛ́nɛ́, zu nù‘e mgbara o bíí nɛ̀ okoo kòò lɛŋ, ŋma bíí nɛ̀ gana Jean bo na; ɓɛɛ zu-a'i, geɗek-wi tɛ Wan ko Sɔ̧ gana a̧.»

Kpɛka Jean Zui-bíí in Jesu

29Dukbíí nɛ̀ oi-aa in o wi-ba-garama nɛ̀ zia wen kɔ̧-a̧ iŋa'e Sɔ̧ nɛ́ wi-de-mɔ nɛ̀ yuwar-a ɓɛɛ wa kpɛk ha̧ Jean mɛ zui wa.#Mt 21.32; Lk 3.12 30Ɓɛɛ o Fariziɛn in o wi-usi-heembea e ee-zu-mɔ ko Sɔ̧ nɛ̀ ɗafa ha̧ wa tɛ geemɔ wen nɛ̀ wa e ha̧ Jean Zui-bíí mɛ zui wa na.

31Jesu tɔ̧ɔ̧ woyo: «A̧‘m wé bɔɔ tugun bíí kinɛɛ nɛ̀ o? Wa hɔɔ ŋmaa in o? 32Wa hɔɔ ŋmaa in o bem nɛ̀ ya nù bee-gara sa nɛ̀ ŋmaa tɔ̧ nɛnɛ‘e: ‹Ɛɛ dɔma fol h’ɛ́nɛ́, ɓɛɛ ɛ́nɛ́ yɔ yɔyɛ na. Ɛɛ bia gima fio, ɓɛɛ ɛnɛ hi̧i̧ kɔ̧a̧ na.› 33Wen Jean Zui-bíí tɛa, a̧ nyɔŋ brɛt na, a̧ nɔ dɔ̧ɔ̧ na, ɓɛɛ ɛnɛ tɔ̧‘e ndé a̧ nɛ́ wi-dawa. 34Nɛ́ mɔ'ɔ nɛ̀ Bem ko bíí tɛ̀ɛ̀ nyɔŋ nɛ̀ mɔ, nɔ nɛ̀ mɔ mbɛt, ɓɛɛ ɛ́nɛ́‘e ndé a̧ nɛ́ gba-gur-mɔ in wi-gbɛ-dɔ̧ɔ̧; ɛnɛ tɔ̧ɔ̧ mbɛt'e a̧ nɛ́ gbama-yari ko o wi-ba-garama in o ɗaŋwi. 35Mɔ kpɔk, o bem ko Iŋa-mgbara-mɔ iŋa'e deemɔ kɔ-a duk nɛ̀ yuwar-a.»

36Ŋma Fariziɛn saa Jesu mɛ nyɔŋ mɔ tɛ̀ kɔ‘i. Nɛ́ mɔ'ɔ nɛ̀ Jesu yee kɔ̧́ tua ko Fariziɛn'i, ɓɛɛ duk nù mɛ nyɔŋ mɔ. 37Ŋma ko-de-ɗaŋmɔ saaye'i hɔa. A̧ zia so'e Jesu nyɔŋ nɛ́ mɔ tɛ̀ ko Fariziɛn wó, ɓɛɛ a̧ ba dak nɔ̧́-nyama tɛnɛ.#Mt 26.7; Mk 14.3; Jn 12.3 38A̧ duka nɛ̀ ɗoŋ, hí̧í̧ nɛ̀ kɔ̧a̧, sɛn ká̧ naŋ Jesu; a̧ hi̧a̧ kɔ̧a̧ a zu naŋ Jesu, ɓɛɛ a̧ nyiŋ nɛ̀ mu̧i̧-zu-a; a̧ duia naŋ Jesu, ɓɛɛ a̧ a nɔ̧́-nyama sɛnɛ. 39Tɛ̀ zɔka mɔ‘i, Fariziɛn nɛ̀ saa Jesu mɛ nyɔŋ mɔ taa nɛ̀ kɔ̧ see: «Kà wi’ɛ a̧ bó so nɛ́ wi-tɔ̧-wen oi nú Sɔ̧ gáà, a̧ tɛ̀ɛ́ iŋ so kóò'ɛ nɛ̀ tam tɛ-a’ɛ, in yí-tom n'aa de mbɛt: a̧ nɛ́ ko-de-ɗaŋmɔ.» 40Ɓɛɛ Jesu tɔ̧ ha̧ Simɔŋ: «Mi a̧a̧ nɛ̀ ŋma wen mɛ tɔ̧ ha̧ mɛ.» Simɔŋ kifa nú: «Ɛ̀nɛ̀ tɔ̧̀, Wan-usi-mɔ.» 41Ɓɛɛ Jesu tɔ̧ ha̧ a̧: «Ŋma wanmbɔi a̧a̧ so nɛ̀ bíí yiitoo n'aa ndak nɛ̀ nyamandoi. Kpɔk baa so kɔya-sede gɔmŋmaa-mɔɔrɔ, ɓii-aa ɓu-mɔɔrɔ. 42Hee mɔ'ɔ nɛ̀ wa bó nɛ̀ sede-gbo-nyamandoi na ga, a̧ gbɛɛ nyamandoi ha̧ wa yiitoo'i lɛŋ. Mgbara wa yiitoo'i nɛ́ o'o tɛ kɔ̧ a̧ gan o nde?» 43Simɔŋ kifa nú: «Mi taa nɛ́ wi n'aa ee dɔka sede ha̧ a̧‘i.» Ɓɛɛ Jesu tɔ̧ ha̧ a̧: «Mɛ́ kɛ̧ɛ̧ mgbara wen'i nɛ̀ de-a.»

44Jesu zika tɛ sitɛ kóò‘i, ɓɛɛ tɔ̧ ha̧ Simɔŋ: «Mɛ zɔka kóò'ɛ nde? Mi yee kɔ̧́ tua kɔ-mɛ, ɓɛɛ mɛ fɔr naŋ-am na; kɔ̧-a̧, a̧ hi̧a̧ kɔ̧a̧ a̧ zu naŋ-am, ɓɛɛ a̧ nyiŋ nɛ̀ mu̧i̧-zu-a. 45Mɛ́ dui nú‘m na, ɓɛɛ ko kóò'ɛ nɛ̀ yee nɛ̀ tua mɛ, a̧ kaɗi nyíŋá#7.45 nyìŋá: texte tɔ̧a nɛ́ dúíá náŋ; wár kó ó Juif, mɔ‘i úsí nɛ́ tu̧u̧ tɛ̀ gásáwí héé ó wannu gá. naŋ-am na. 46Mɛ́ sɔ̧ de pɛr nɔ̧́ zú‘m na; kɔ̧-a̧ a̧ gbaia nɔ̧́-nyama a̧ zu naŋ-am. 47Hegɔ, mi tɔ̧ ha̧ mɛ, dɔka ɗaŋmɔ kɔ̧-a̧ lɛŋ bó zu a̧ ɓɔna, wen a̧ usa kɔ̧ɔ̧mɔ ha̧‘m nyɛmna. Wen wi nɛ̀‘i e ɗaŋmɔ ha̧ a̧ tikiɗi, usi kànà kɔ̧ɔ̧mɔ tikiɗi mbɛt.» 48Ɓɛɛ Jesu tɔ̧ ha̧ kóò‘i: «Ɗaŋmɔ kɔ-mɛ bó zu mɛ ɓɔna.» 49O bíí nɛ̀ yaa ká̧ nyɔŋmɔ lɛŋ taa mɔ: «Ɛ̧ɛ̧ nɛ́ ge bíí ge nɛ̀ e nɛ́ ɗaŋmɔ ha̧ o bíí mbɛt’ɛ ge?» 50Ɓɛɛ Jesu tɔ̧ ha̧ kóò‘i: «Nɛ́ kɔ̧ɔ̧ɗɔɔwen kɔ-mɛ a̧ kpasa mɛ, mɛ̀ yák zaŋ ga̧a̧mɔ.»

Currently Selected:

LUK 7: GB11DC

Highlight

Copy