LUK 6

Wese-ɔm-tɛ

(Zɔk Mt 12.1-8; Mk 2.23-28)

1Ɓɛɛ tɛ yiitoo wese-ɔm-tɛ tɛ kuti fio-zɛ, Jesu ɓira yak nɛ̀ kpɛɛfɔ alkamaari, ɓɛɛ o ŋgaiwi kɔ̧-a̧ hik alkamaari a̧ kɔ̧̀ er-wa nyiŋ a̧ kɔ̧̀ nú-wa.#Wee-ɗoŋ-he 23.26 2O ŋma Fariziɛn tɔ̧a̧: «Wen ge ɛnɛ de nɛ mɔ nɛ̀ heembea dor bíí tɛ dea-a wese-ɔm-tɛ ge?» 3Ɓɛɛ Jesu kifi nú ha̧ wa: «Ɛ́nɛ́ tɔr mɔ nɛ̀ David dee so ŋgimbi nɛ̀ wɔ gbɛɛ nɛ̀ a̧ in o ŋgaiwi kɔ̧-a̧ na nde?#1 Sam 21.1-6 4Bo nɛ bíí lɛŋ a̧ nyɔŋ so brɛt-ɗafi-sɔ̧ na, kànà nɛ́ o wi-ɗafi-sɔ̧ ɓɛɛ. Bo nɛ David yee so kɔ̧́ tua ko Sɔ̧, ba brɛt-ɗafi-sɔ̧ nyɔŋ, ɓɛɛ ha̧ ŋma ha̧ o ŋgaiwi kɔ‘i mbɛt na nde?»#Lev 24.9 5Ɓɛɛ Jesu tɔ̧ ha̧ wa woyo: «Nɛ́ Bem ko bíí a̧ duk zu wese-ɔm-tɛ.»

Jesu kpasa ŋma wan-mɔka-er

(Zɔk Mt 12.9-14; Mk 3.1-6)

6Ŋma wese-ɔm-tɛ woyo, Jesu yee kɔ̧́ tua-mɔi̧a-a, ɓɛɛ a̧ usi mɔ, ká ŋma bíí nɛ̀ wii-er mɔka a̧a̧ so hi̧i̧ mbɛt. 7O wi-usi-heembea in o Fariziɛn duka mbaɗi nɛ̀ mɔ sitɛ Jesu ha̧ wa mɛ zɔk kà̧ a̧ nɛ́ tɛ̀ɛ́ kpasi wan-mɔka-er'i wese-ɔm-tɛ, ha̧ wa mɛ kpa wen mɛ pi̧ zu a̧. 8Jesu iŋa taamɔ kɔ-wa, ɓɛɛ tɔ̧ ha̧ wan-mɔka-er'i: «Mɛ̀ kúr, mɛ̀ yór see-a hɛ̧ɛ̧.» Ɓɛɛ a̧ kur yor ŋgɔn. 9Ɓɛɛ Jesu tɔ̧ ha̧ wa: «Mi ak'nɛ́‘e, heembea kɔ̧ɔ̧ ha̧ bíí mɛ de demɔ wese-ɔm-tɛ, náà, kóó mɛ de nɛ́ ɗaŋmɔ nde; mɛ́ kpasi bíí náà, kóó mɛ́ gbɛ bíí nde?» 10Jesu zɔka wa zik kpa lɛŋ, ɓɛɛ tɔ̧ ha̧ wan-mɔka-er'i: «Mɛ̀ nyɛ́í̧ er-mɛ.» A̧ nyɛi̧a er-a, ɓɛɛ er-a kpasi. 11See-wa nyima, ɓɛɛ wa ba keta in o ŋmaa zu mɔ nɛ̀ wa tɛ de in Jesu.

Jesu hoka o betom ɓu-zua-yiitoo

(Zɔk Mt 10.1-4; Mk 3.13-19)

12Ŋgimbi'i, Jesu daŋa si zu kaya mɛ kɔfi Sɔ̧, ɓɛɛ a̧ kɔfi Sɔ̧ hegɔɔ mɔ sa̧ nɛnɛ. 13Mɔ sa̧a̧ kaɗi, a̧ saa o ŋgaiwi kɔ̧-a̧, hok o ŋma ɓu-zua-yiitoo mgbara wa, ɓɛɛ a nin-wa'e betom. 14Nin-wa nɛ́ mɔ'ɔ: Simɔŋ (n'aa gɔna nin-a'e Pierre), in Andre nya-a̧, Jak in Jean, Filip in Bartelemi, 15Matthieu in Tomas, Jak bem ko Alfe, Simɔŋ (nɛ wa sa'e mgbák kpasa be-nù), 16Juda bem ko Jak, in Judas Iskariot, wi nɛ tɛ e ɗɔra tɛ Jesu.

Jesu in giiwi

(Zɔk Mt 4.23-25)

17Jesu zira in wa, nɛ̀ zu kaya pii bɔkɔ-nù in dɔka o ŋgaiwi kɔ̧-a̧, in o gba giiwi nɛ̀ tɛ̀ɛ́ nɛ̀ nú Judee lɛŋ, in nú Jerusalɛm, in o wi nɛ ɔ ká̧ yì sɛn nù Tir in Sidɔŋ mbɛt. 18Wa tɛɛ mɛ zii wen kɔ̧-a̧, in ha̧ a̧ mɛ kpasi wa tɛ zɛɛ kɔ-wa. O wi nɛ̀ ɗaŋ-sɔ̧ a̧a̧ tɛ-wa mbɛt, kpasa. 19Giiwi nɔ‘i lɛŋ kii nɛ́ war mɛ tam tɛ Jesu, wen ŋgai gbo nɛ̀ tɛ a̧ kpasi nɛ̀ wa lɛŋ.

Bɔtɛ in bɔnɛ

(Zɔk Mt 5.1-12)

20Jesu zɔka mɔ sitɛ o ŋgaiwi kɔ‘i, ɓɛɛ tɔ̧ ha̧ wa:

«O wisan, ɛ̀nɛ̀ yá nɛ̀ desee

wen Wan ko Sɔ̧ nɛ́ k’ɛ́nɛ́!

21Ɛ́nɛ́ nɛ̀ wɔ gbɛ‘nɛ́ kinii,

ɛ̀nɛ̀ yá nɛ̀ desee,

wen zaŋ‘nɛ́ tɛ sur!

Ɛ́nɛ́ o wi nɛ̀ hi̧i̧ kɔ̧a̧ kinii,

ɛ̀nɛ̀ yá nɛ̀ desee,

wen ɛ́nɛ́ tɛ mam mami!

22«Kà o bíí nɛ́ sɛna'nɛ́, kà wa nɛ bɛ̧ɛ̧‘nɛ́, kà wa nɛ́ da̧a̧‘nɛ́, kóó kà wa nɛ́ ɗaŋa nin'nɛ́ wen zu Bem ko bíí, ɛ̀nɛ̀ yá nɛ̀ desee!#1 Pi 4.14 23Wese'i, ɛ̀nɛ̀ dé nyɛŋɛ, ɛ̀nɛ̀ kpíɗí nɛ̀ desee, wen mɔɔ-oi-tom k’ɛ́nɛ́ nɛ̀ pɛm'nɛ́ yiwese mɛ ɔ gasa, wen nɛ́ pɛrti mɔ‘i a̧ o dáà kɔ-wa dee so in o wi-tɔ̧-wen oi nú Sɔ̧.#2 Kal Ny 36.16; Tom 7.52

24Bɔnɛ a̧a̧ zu'nɛ́, o wanmbɔi,

wen nɛ́ kpaamɔ k’ɛ́nɛ́ a̧ gá̧ see'nɛ́!

25Bɔnɛ a̧a̧ zu'nɛ́ o wi nɛ̀ zaŋ sura,

wen wɔ tɛ gbɛ‘nɛ́!

Bɔnɛ a̧a̧ zu'nɛ́, o wi-mam-mami kinii’ɛ,

wen ɛ́nɛ́ tɛ zim fio, hí̧í̧ nɛ̀ kɔ̧a̧!

26«Bɔnɛ a̧a̧ zu'nɛ́ ŋgimbi nɛ̀ bíí lɛŋ tɛ tɔ̧ nɛ́ de wen k’ɛ́nɛ́, wen nɛ́ pɛrti mɔ‘i a̧ o dáà kɔ-wa dee so in o wi-tɔ̧-wen oi nú Sɔ̧ ndela!»

Kɔ̧ɔ̧ o wisɛn

(Zɔk Mt 5.38-48; 7.12)

27«Ɛ́nɛ́ o wi nɛ̀ zii wen kɔ‘m’ɛ, mi'e ndé, ɛ̀nɛ̀ kɔ̧́ o wisɛn k’ɛ́nɛ́, ɛ̀nɛ̀ dé demɔ in o wi-sɛn'nɛ́, 28ɛ̀nɛ̀ tók de yoŋgo zu bíí nɛ̀ fom'nɛ́, ɓɛɛ ɛ̀nɛ̀ kɔ́fí Sɔ̧ wen o bíí nɛ̀ de ɗaŋmɔ in'nɛ̀ɛ́. 29Kà bíí nɛ́ mbɛra ká̧ yí-mɛ́ kpɔk, ɓɛɛ nɛ̀ mɛ̀ é ɓii-aa ha̧ a̧ mbɛ́r; kà ŋma bíí nɛ́ baa gasa laa kɔ-mɛ, ká mɛ dor geɗek-a er-a na. 30Kóó o ndé nɛ kɔfi mɔ er mɛ, mɛ̀ há̧ ha̧ a̧, ɓɛɛ kà ŋma bíí nɛ́ baa mɔ kɔ-mɛ, ká mɛ ak mɔ‘i woyo na. 31Mɔ n’ɛnɛ kɔ̧ɔ̧ ha̧ bíí mɛ de h’ɛ́nɛ́, ɛ̀nɛ̀ dé kale mɔ‘i ha̧ wa mbɛt.#Mt 7.12

32«K’ɛ̀nɛ̀ nɛ́ kɔ̧ɔ̧ nɛ́ o bíí nɛ kɔ̧‘nɛ́, ɓɛɛ nɛ̀ ge ɛ̀nɛ̀ tɛ kpa oi-aa ge? Wen o wi-de-ɗaŋmɔ kɔ̧ nɛ́ o bíí nɛ̀ kɔ̧ wa mbɛt. 33K’ɛ̀nɛ̀ nɛ́ dee nɛ́ demɔ in o bíí nɛ̀ de demɔ in'nɛ̀ɛ́, ɓɛɛ nɛ́ ge ɛ̀nɛ̀ tɛ kpa oi-aa ge? Wen o wi-de-ɗaŋmɔ de nɛ́ kale mɔ‘i mbɛt. 34Ɓɛɛ k’ɛ̀nɛ̀ nɛ́ gbaka mɔ ha̧ o bíí n’ɛnɛ taa'e tɛ ha̧ mɔ‘i pii ɗoŋ h’ɛ́nɛ́, nɛ́ ge ɛ̀nɛ̀ tɛ kpa oi-aa ge? Wen o wi-de-ɗaŋmɔ mbɛt ha̧ nɛ́ nyamandoi ha̧ o ŋmaa ha̧ wa mɛ kpa kpɔk mɔ‘i si ɗoŋ. 35Ɓɛɛ k’ɛ́nɛ́, ɛ̀nɛ̀ kɔ̧́ wisɛn k’ɛ́nɛ́, ɛ̀nɛ̀ dé demɔ, ɛ̀nɛ̀ há̧ mɔ ha̧ o bíí, ɓɛɛ k’ɛ́nɛ́ zɛm mɔɔ-oi-aa na. Mɔɔ-oi-tom k’ɛ́nɛ́ ɔ gasa, ɓɛɛ ɛnɛ tɛ ya nɛ́ o bem ko Wan nɛ̀ a̧a̧ si ŋgɔn mɛ, wen kɔ̧-a̧, a̧ de nɛ́ demɔ in o wi nɛ̀ de osoko na in o ɗaŋwi mbɛt.»

Ká‘i gɔn kita zu ŋmà-wi na

(Zɔk Mt 7.1-5)

36«Ɛ̀nɛ̀ dé ko ha̧ o bíí hee mɔ'ɔ nɛ̀ Dáà k’ɛ́nɛ́ de nɛ̀ ko ha̧ o bíí'ɛ ga. 37K’ɛ́nɛ́ ɓa wen in bíí na, ɓɛɛ Sɔ̧ beka ɓa wen in'nɛ̀ɛ́ na; k’ɛ́nɛ́ gɔn kita zu bíí na, hegɔ Sɔ̧ beka gɔn kita zu'nɛ́ na; ɛ̀nɛ̀ é ɗaŋmɔ ha̧ bíí, ɓɛɛ Sɔ̧ tɛ e ɗaŋmɔ h’ɛ́nɛ́ mbɛt. 38Ɛ̀nɛ̀ há̧ mɔ ha̧ bíí, ɓɛɛ Sɔ̧ tɛ ha̧ mɔ h’ɛ́nɛ́: Sɔ̧ tɛ a mɔ dun ao gbol, i̧si̧ gbai a kɔ̧́ laa k’ɛ́nɛ́, wen nɛ́ ao n’ɛnɛ tɛ we nɛ̀ mɔ ha̧ bíí, a̧ Sɔ̧ tɛ we nɛ̀ mɔ h’ɛ́nɛ́ mbɛt.»

39Ɓɛɛ a̧ tɔ̧ ŋma lizaŋ ha̧ wa mbɛt: «O wi-boma-yí nyɛma so mɛ usi war ha̧ ŋmaa nde? Bo nɛ wa yiitoo lɛŋ tɛ tik kɔ̧̀ na nde?#Mt 15.14 40Betom gan wan kɔ‘i na; ɓɛɛ betom nɛ̀ yamba mɔ nɛ̀ de-a tɛ duk hee wan kɔ‘i ga.#Mt 10.24-25; Jn 13.16; 15.20

41«Wen ge mɛ zɔk be mbulumɔ nɛ̀ a̧a̧ yí nya-mɛ, ɓɛɛ mɛ zɔk kpíŋgíí-te nɛ̀ a̧a̧ yí-mɛ́ na ge? 42Hee ge mɛ tɛ tɔ̧ ha̧ nya-mɛ‘e: ‹Nya'm, mɛ̀ é ha̧‘m ba be mbulumɔ yí-mɛ́ yinɛ,› ɓɛɛ kɔ-mɛ, mɛ zɔk kpíŋgíí-te nɛ̀ a̧a̧ yí-mɛ́ na ge? Wi nɛ̀ a̧a̧ nɛ̀ see yiitoo, mɛ̀ bá kpíŋgíí-te yí-mɛ́ yinɛ, sɛka mɛ zɔka mɔ nɛ̀ sa̧a̧-a̧ mɛ ba be mbulumɔ nɛ̀ a̧a̧ yí nya-mɛ yinɛ.»

Waya-te

(Zɔk Mt 7.16-20; 12.33-35)

43«De te wai ɗaŋ waya-a na, ɓɛɛ ɗaŋ te wai de waya-a na mbɛt. 44Wi iŋ ti te nɛ̀ waya-a; wi ɓi mbɔra tɛ mgboi-gata na, kóó waya-nyak-dɔ̧ɔ̧ tɛ tɛn-dara na mbɛt.#Mt 12.33 45Wi-de-demɔ de nɛ demɔ nyɛm nɛ̀ ɗoŋ demɔ nɛ̀ a̧a̧ kɔ̧́ see-aa; ɓɛɛ ɗaŋwi de nɛ́ ɗaŋmɔ nyɛm nɛ̀ ɗoŋ ɗaŋmɔ kɔ̧́ see-aa; wen nɛ́ mɔ nɛ̀ duk kɔ̧́ see-wi a̧ nú-wi tɔ̧.#Mt 12.35

O tua yiitoo

(Zɔk Mt 7.24-27)

46«Wen ge s’ɛnɛ sa'm'e ‹Gasa Wan›, ɓɛɛ ɛnɛ de mɔ n'am tɔ̧ h’ɛ́nɛ́ mɛ de na ge? 47Kóó o ndé nɛ̀ tɛ tɛ‘m, nɛ̀ zii wen kɔ‘m, ɓɛɛ dee mɔ nyɛm ɗoŋ wen'i mbɛt, mi tɛ tɔ̧ wi n'aa hɔɔ ŋmaa in a̧ h’ɛ́nɛ́. 48A̧ hɔɔ ŋmaa in ŋma bíí nɛ̀ dee tua. Wi’ɛi za̧a̧ kɔ̧̀ naŋ-tua nɛ̀ ɗuka-a, ɓɛɛ a̧ e naŋ-tua'i nɛ̀ ta. Yì ha̧a̧, kin-yì yoo tua'i, ɓɛɛ tua fo tɛ na, wen wa mboo tua'i nɛ̀ nɔa-a. 49Ɓɛɛ wi nɛ̀ zii wen kɔ‘m, ɓɛɛ nɛ̀ de mɔ nyɛm ɗoŋ wen'i na, hɔɔ ŋmaa in wi nɛ̀ dee tua zu nù, ɓɛɛ e naŋ-tua'i na. Nɛ́ mɔ'ɔ nɛ̀ kin-yì yoo tua'i, ɓɛɛ tua'i gbin a nù nɛ oi-aa lɛŋ mútú-mútú.»

Currently Selected:

LUK 6: GB11DC

Highlight

Copy