LUK 5

Jesu saa o kuti ŋgaiwi kɔ‘i

(Zɔk Mt 4.18-22; Mk 1.16-20)

1Ŋma wese, Jesu duka ká̧ ŋgere tɔp Genezarɛt, ɓɛɛ giiwi mɔi̧ nɔ ŋmaa in a̧ mɛ zii wen ko Sɔ̧.#Mt 13.1-2; Mk 3.9-10; 4.1 2Jesu zɔka kombon yiitoo nɛ̀ ya ká̧ ŋgere, nɛ̀ o wi-pi̧-yɔk zira nɛ̀ kɔ̧́ a̧, ɓɛɛ wa fɔr nɛ́ yɔk kɔ-wa. 3Nɛ́ mɔ'ɔ nɛ̀ Jesu daŋa kɔ̧́ ŋma kombon kpɔk, kombon'i nɛ́ ko Simɔŋ. A̧ tɔ̧ɔ̧ ha̧ Simɔŋ mɛ ɗɔŋ benaŋ nyɛi̧ nɛ̀ ká̧ ŋgere, ɓɛɛ a̧ duk nù kɔ̧́ kombon'i usi nɛ̀ mɔ ha̧ giiwi.

4Ɗoŋ n'aa tɔ̧ɔ̧ wen kaɗi, a̧ tɔ̧ɔ̧ ha̧ Simɔŋ: «Mɛ̀ bá kombon si see dir yì, ɓɛɛ ɛ̀nɛ̀ pí̧ yɔk k’ɛ́nɛ́ wen baa zoro.» 5Ɓɛɛ Simɔŋ kifi nù: «Wan-usi-mɔ, ɛɛ zɔka bɔnɛ mɛ zɛ hegɔɔ mɔ sa̧ nɛnɛ, ɛɛ ba géé baa ŋma mɔ na, ɓɛɛ hee mɔ'ɔ nɛ̀ ɛ́nɛ́ a̧ tɔ̧ ga, mi tɛ pi̧ o yɔk.»#Jn 21.3

6Nɛ́ mɔ'ɔ nɛ̀ wa pi̧i̧ yɔk, ɓɛɛ wa ba zoro nɛ̀ dɔka-a nyɛmna; ɓɛɛ yɔk kɔ-wa ku̧ naŋ ŋmana-a.#Jn 21.6 7Wa a̧ŋa er ha̧ o sɛm kɔ-wa nɛ̀ ya kɔ̧́ ɓii kombon'i mɛ tɛ̀ɛ́ gbak wa. O wi nɔ‘i tɛa ɓɛɛ wa kai zoro a̧ kɔ̧́ kombon yiitoo'i dun, ɓɛɛ kombon de mɛ bin yì. 8Simɔŋ Pierre zɔka hegɔ, ɓɛɛ gbɛ zugur nù ti Jesu, ɓɛɛ tɔ̧: «Ɛ̀nɛ̀ yú ká̧ tɛ‘m, Gasa Wan, wen mi nɛ́ ɗaŋwi!» 9Gasa kíì baa Simɔŋ Pierre in o bíí lɛŋ nɛ̀ yaa in a̧, wen dɔka zoro nɛ̀ wa baa'i. 10Kíì dee Jak in Jean, o bem ko Zebedee, nɛ̀ gbama so in Simɔŋ mbɛt. Ɓɛɛ Jesu tɔ̧ ha̧ Simɔŋ: «Ká mɛ de kíì na; ku̧u̧naŋ-a sɔsɔɔ yak nɛnɛ mɛ tɛ duk nɛ́ wi-mɔi̧ o bíí.» 11Ɓɛɛ wa dak o kombon kɔ-wa a̧ zan, e mɔ lɛŋ duk, nɛ́ ɗoŋ-aa.

Jesu kpasa ŋma wi-doko

(Zɔk Mt 8.1-4; Mk 1.40-45)

12Hee mɔ'ɔ nɛ̀ Jesu duka tɛ ŋma ye ga, ŋma bíí nɛ̀ doko a̧a̧ tɛ̀ lɛŋ duka so hi̧i̧ mbɛt. A̧ zɔka Jesu ɓɛɛ a̧ tik nù gú yí nù, ɓɛɛ ai nú ha̧ a̧ hee mɔ'ɔ ga: «Gasa Wan, k’ɛ̀nɛ̀ nɛ́ kɔ̧a̧, ɛ́nɛ́ nyɛma mɛ de ha̧ tɛ‘m mɛ sa̧.» 13Nɛ́ mɔ'ɔ nɛ̀ Jesu nyɛi̧a er tam tɛ a̧, ɓɛɛ tɔ̧: «Mi kɔ̧ɔ̧ hegɔ, tɛ-mɛ a̧ sá̧.» Ɓɛɛ doko kaɗi tɛ a̧ tɛ kpɔk kale ŋgimbi'i. 14Ɓɛɛ Jesu mbo nú-a wen ká a̧ tɛɛ tɔ̧ mɔ‘i ha̧ ŋma bíí. Jesu tɔ̧a̧: «Mɛ̀ nɛ́ɛ̀ usi tɛ-mɛ ha̧ wi-ɗafi-sɔ̧, ɓɛɛ mɛ̀ há̧ mɔɔ-ɗafi-sɔ̧ wen tɛ-mɛ nɛ̀ sa̧a̧‘i hee mɔ'ɔ nɛ̀ Moisɛ bàá tɔ̧ so ga; mɔ‘i tɛ duk nɛ́ mɔɔ-sedaako yí bíí.»#Lev 14.1-32 15Nyɛrɛmɔ ko Jesu hura siti gan kuti-a, ɓɛɛ giiwi tɛ nɛ̀ dɔka-a mɛ zii wen kɔ̧-a̧ in ha̧ a̧ mɛ kpasi wa tɛ zɛɛ kɔ-wa. 16Jesu duka so yak si fara nɛ̀ bíí bo sɛnɛ na mɛ duk hi̧i̧ kɔfi nɛ̀ Sɔ̧.

Jesu kpasa ŋma kara-wi

(Zɔk Mt 9.1-8; Mk 2.1-12)

17Ŋma wese Jesu duka usi nɛ̀ mɔ. O Fariziɛn in o wi-usi-heembea nɛ̀ tɛ̀ɛ́ nɛ̀ o geɗek ye Galilee lɛŋ, in Judee ká bá nɛ̀ Jerusalɛm a̧a̧ so mgbara o bíí nɛ̀ yaa hi̧i̧ mbɛt, ɓɛɛ ŋgai ko Gasa Wan de ha̧ Jesu mɛ kpasi o wi-zɛɛ. 18Nɛ́ mɔ'ɔ nɛ̀ o ŋma bíí gɔɔ ŋma kara-wi nɛ̀ mɔɔ-gɔ-wi tɛnɛ ɓɛɛ wa kii war mɛ gɔ a̧ ye nɛ̀ tua e ti Jesu. 19Dɔka giiwi nyɛmna, ɓɛɛ wa kpa fara-ye-tua na. Nɛ́ mɔ'ɔ nɛ̀ wa daŋa zu tua, wɛ́n zu-a, ɓɛɛ zir kara-wi'i nɛ̀ oi mɔɔ-gɔ-a e see-a mgbara o bíí ti Jesu. 20Jesu zɔka kɔ̧ɔ̧ɗɔɔwen ko o wi nɔ‘i, ɓɛɛ tɔ̧: «Wi’ɛ, ɗaŋmɔ kɔ-mɛ bó zu mɛ ɓɔna.» 21O wi-usi-heembea in o Fariziɛn yaa so hi̧i̧, ɓɛɛ ta mɔ: «Ɛ̧ɛ̧ nɛ́ ge bíí ge nɛ̀ ɗaŋ kɔ‘i nɛ́ nin Sɔ̧'ɛ ge? Nɛ́ o a̧ nyɛma mɛ e ɗaŋmɔ ha̧ bíí gan zu Sɔ̧ o?» 22Jesu iŋa taamɔ kɔ-wa, ɓɛɛ tɔ̧ ha̧ wa: «Wen ge pɛrti taamɔ hegɔ a̧a̧ kɔ̧ see'nɛ́ ge? 23Wen nɛ̀ duk yɛ́kɛ́ɗɛ́ mɛ tɔ̧ nɛ́ tɔ̧a̧-a̧ ha̧ kara-wi: ‹Ɗaŋmɔ kɔ-mɛ bó zu mɛ ɓɔna,› náà, kóó nɛ́ tɔ̧a̧-a̧‘e: ‹Mɛ̀ kúr, mɛ̀ bá mɔɔ-gɔ-mɛ, mɛ̀ nɛ́ nɔ› nde? 24Ɓɛɛ h’ɛ́nɛ́ mɛ iŋ‘e nde Bem ko bíí a̧a̧ nɛ ŋgai mɛ e ɗaŋmɔ ha̧ bíí zaŋnu’ɛ,» Jesu tɔ̧ɔ̧ ha̧ kara-wi'i: «Mi tɔ̧ ha̧ mɛ, mɛ̀ kúr, mɛ̀ bá mɔɔ-gɔ-mɛ, ɓɛɛ mɛ̀ sí ɗoŋ tɛ̀ kɔ-mɛ.» 25Tɛ̀ kpɔk kale ŋgimbi'i, a̧ kura nɛ̀ yí-wa, ba mɔ n'aa duka so ɔ nù gɔn-a, ɓɛɛ si ɗoŋ tɛ̀ kɔ̧-a̧, zɔn nɛ̀ Sɔ̧. 26Kíì dee wa, ɓɛɛ wa ya yemsele. Wa gasa Sɔ̧, ɓɛɛ wa tɔ̧: «Ɛɛ zɔka ŋma mɔɔ-zap sɔsɔɔ.»

Jesu saa Levii

(Zɔk Mt 9.9-13; Mk 2.13-17)

27Ɗoŋ mɔ‘i, Jesu gboo, ɓɛɛ zɔk ŋma wi-ba-garama nɛ̀ duk nù fara-ba-garama; nin-a nɛ́ Levii, ɓɛɛ Jesu tɔ̧ ha̧ a̧: «Mɛ̀ tɛ́ ɗoŋ-am.» 28Levii ee mɔ lɛŋ duk, ɓɛɛ kúr, nɛ́ ɗoŋ-aa. 29Nɛ́ mɔ'ɔ nɛ̀ Levii dee gbaŋa tɛ̀ kɔ‘i ha̧ Jesu, ɓɛɛ o wi-ba-garama in o ŋma bíí nɛ̀ dɔka-a ya nyɔŋ nɛ̀ mɔ in wa. 30O Fariziɛn in o wi-usi-heembea kɔ-wa ku̧i̧a mɔ, ɓɛɛ tɔ̧ ha̧ o ŋgaiwi ko Jesu: «Wen ge s’ɛnɛ nyɔŋ mɔ, nɔ nɛ̀ mɔ kpɔk in o wi-ba-garama in o ɗaŋwi ge?»#Lk 15.1-2 31Ɓɛɛ Jesu kifi nú ha̧ wa: «Nɛ́ o wi-zɛɛ a̧ kii wan-nyina, nɛ̀ bó nɛ́ o bíí nɛ̀ duk nɛ̀ haya-tɛ na. 32Bo nɛ mi tɛɛ mɛ sa nɛ́ o wi-de-mɔ nɛ̀ yuwar-a na; mi tɛɛ mɛ sa nɛ́ o ɗaŋwi wen ha̧ wa mɛ kpai duka-a kɔ-wa.»

Jesu tɔ̧ɔ̧ wen zu zima-yì

(Zɔk Mt 9.14-17; Mk 2.18-22)

33Wa tɔ̧ɔ̧ ha̧ Jesu: «Ɓɔnsɛnɛ o ŋgaiwi ko Jean in o ŋgaiwi ko o Fariziɛn mbɛt zim nɛ yì wor nɛ̀ Sɔ̧, ɓɛɛ o ŋgaiwi k’ɛ́nɛ́ nyɔŋ kɔ‘i nɛ́ mɔ, nɔ nɛ̀ mɔ.» 34Ɓɛɛ Jesu tɔ̧ ha̧ wa: «Wi nyɛma so mɛ de ha̧ o sɛm ko wi-ba-kóò mɛ zim yì ŋgimbi n'aa biti duka-a in wa nde? 35Ŋgimbi tɛ hɔ nɛ̀ wa tɛ ba wi-ba-kóò er wa yaknɛ, ɓɛɛ seka wa zima yì wese'i.»

Gba̧‘a̧ mɔ in mbe mɔ

36Ɓɛɛ a̧ tɔ̧ lizaŋ ha̧ wa woyo: «Wi ɓir nú mbe zɔ̧-laa fur tɛ gba̧‘a̧ laa na; wen kà‘i de hegɔ, wi tɛ ɗaŋ mbe zɔ̧-laa'i, ɓɛɛ mbe zɔ̧-laa'i beka nyɛm ŋmaa in gba̧‘a̧-a̧ na mbɛt. 37Hegɔ mbɛt, wi a mbe dɔ̧ɔ̧ kɔ̧́ gba̧‘a̧ kpánà na, wen ká kpɔra dɔ̧ɔ̧ mbaŋ kpánà‘i, ká dɔ̧ɔ̧ tofi a̧ nù ɓɛɛ kpánà mbaŋa ba tɛ-wi mbɛt. 38Wi a̧ mbe dɔ̧ɔ̧ kɔ̧̀ mbe kpánà ɛ̧. 39Wi nɛ nɔɔ dɔ̧ɔ̧ nɛ̀ ɔ ŋgaya kɔ̧ nyɔ̧ɔ̧ dɔ̧ɔ̧ ɓɔna, wen wi’ɛi'e nde: ‹Nɛ́ ŋga dɔ̧ɔ̧ a̧ dee dea-a.› »

Currently Selected:

LUK 5: GB11DC

Highlight

Copy