MARK 5

Jesu kpasa ŋma bíí nɛ̀ ɗaŋ-sɔ̧ duk tɛ-a

(Zɔk Mt 8.28-34; Lk 8.26-39)

1Wa hɔɔ kur tɔp nù ko o bíí Gerasa. 2Jesu biti zira-a nɛ̀ kɔ̧́ kombon, ɓɛɛ ŋma bíí nɛ̀ ɗaŋ-sɔ̧ duk tɛ̀, we ti a̧ tɛnɛ. Wi’ɛi gboo nɛ̀ kɔ̧́ pɛsi-fio. 3Fara-ɔ-sɛnɛ kɔ̧-a̧ nɛ́ kɔ̧́ pɛsi-fio, ɓɛɛ bíí nyɛm so mɛ hɛr a̧ na, kóó nɛ̀ nyak-boi na mbɛt, 4wen wa duka so pi̧ nɛ́ poka naŋ-a nɛti hɛr nɛ̀ a̧ nɛ̀ nyak-boi, ɓɛɛ a̧ gbina poka'i, ŋman nɛ̀ nyak-boi tɛ-a yinɛ a nù. Ɓɛɛ ŋma bíí nyɛm so mɛ de ha̧ tɛ-a mɛ gbin na. 5Zɛ nɛ̀ wese wi’ɛi duk kɔ̧́ pɛsi-fio in sɛn zu kaya mɛ, hiɗi nɛ̀ mɔ, e nɛ̀ da̧i̧ tɛ̀ nɛ̀ ta.

6A̧ zɔka Jesu nɛ̀ nyɛi̧a-a, ɓɛɛ a̧ ma yì nɛ́ɛ̀ gu nù ti a̧, 7ɓɛɛ hiɗi mɔ tɔ̧ nɛnɛ‘e: «Jesu, Bem ko Sɔ̧ ŋgɔn mɛ! Ge a̧ mɛ kíí zu'm ge? Mi aia nú ha̧ mɛ nɛ̀ nin Sɔ̧, ká mɛ́ usi bɔnɛ ha̧‘m na.» 8(Wen Jesu tɔ̧ɔ̧ so kaɗi'e ndé: «Ɗaŋ-sɔ̧, mɛ̀ gbó tɛ̀ wi’ɛ!») 9Ɓɛɛ Jesu ak ɗaŋ-sɔ̧‘i: «Nin-mɛ nɛ́ o?» A̧ kifa nú ha̧ Jesu: «Nin-am nɛ́ Gíí wi-biro, wen ɛ́ɛ́ ɔ dɔka.» 10Ɓɛɛ ɗaŋ-sɔ̧‘i ai nú ha̧ Jesu wen ká a̧ tɛ̀ɛ́ ndak wa gbonɛ tɛ nù‘i.

11O gíí ŋgɔya yaa so nyɔŋ nɛ̀ mɔ ká̧ naŋ kaya hi̧i̧. 12Nɛ́ mɔ'ɔ nɛ̀ o ɗaŋ-sɔ̧ nɔ‘i aia nú ha̧ Jesu, ɓɛɛ tɔ̧ ha̧ a̧: «Mɛ̀ fó yɛ sitɛ o ŋgɔya nɔ'ɔ h’ɛ́ɛ́ yé tɛ-wa.» 13Ɓɛɛ Jesu e war ha̧ wa. Nɛ́ mɔ'ɔ nɛ̀ wa gboo, ye tɛ̀ o ŋgɔya nɔ‘i, ɓɛɛ ŋgɔya, hee booro-yiitoo ga, gbin nɛ̀ zu kaya a ɗɔɔ tɔp, ɓɛɛ fe yì lɛŋ. 14O wi-dai-ŋgɔya yuu mɔ, ɓɛɛ nɛ́ɛ̀ tɔ̧ nyɛrɛ mɔ nɛ̀ yaka sɛn tɛ gasa ye in tɛ o be ye, ɓɛɛ o bíí gar nɛnɛ mɛ zɔk mɔ nɛ̀ yaka'i. 15O bíí hɔɔ katɛ Jesu, ɓɛɛ wa zɔk wi nɛ̀ Gíí wi-biro ɗaŋ-sɔ̧ duka so tɛ-a'i fara duk nù; zu-a pia ɗoŋ, ɓɛɛ a̧ pi̧i̧ laa kaɗi mbɛt. Kíì dee wa nyɛmna. 16O wi nɛ̀ yaa oi mɔ‘i wee ɗoŋ mɔ nɛ̀ yaka tɛ wi nɛ̀ ɗaŋ-sɔ̧ duka so tɛ-a'i, in mɔ nɛ̀ hɔɔ zu o ŋgɔya, ha̧ wa. 17Ɓɛɛ o wi nɔ‘i ai nú ha̧ Jesu mɛ e nù kɔ-wa duk.

18Jesu yee kombon woyo, ɓɛɛ wi nɛ̀ ɗaŋ-sɔ̧ duka so tɛ-a'i ai nú mɛ nɛ in a̧. 19Jesu bɛ̧a̧, ɓɛɛ tɔ̧ ha̧ a̧: «Mɛ̀ sí ɗoŋ nutua kɔ-mɛ tɛ o bíí kɔ-mɛ, ɓɛɛ mɛ̀ wé ɗoŋ mɔ lɛŋ nɛ̀ Gasa Wan dee ha̧ mɛ tɛ deako kɔ̧-a̧.» 20Nɛ́ mɔ'ɔ nɛ̀ wi’ɛi yaka, ɓɛɛ a̧ ku̧naŋ yara-a sɛn nú Dekapol, tɔ̧ nɛ̀ nyɛrɛ mɔ nɛ̀ Jesu dee ha̧ a̧, ɓɛɛ ɗɛɗɛ bíí lɛŋ gɔn.

Jesu kpasa ŋma okoo nɛ̀ tɔk gbo a̧, in boko-bem ko Jairus nɛ̀ fea

(Zɔk Mt 9.18-26; Lk 8.40-56)

21Ɗoŋ nɛ̀ Jesu kuu tɔp nɛ̀ kombon si ɗoŋ kur mɛ kaɗi, gba giiwi mɔi̧a ŋmaa katɛ a̧, ɓɛɛ a̧ duk kɔ̧-a̧ ká̧ ŋgere tɔp'i. 22Jairus, ŋma kpɔk mgbara o wi-duk-zu tua-mɔi̧a-a, hɔa. Ŋgimbi n'aa zɔka Jesu, a̧ hɔ̧fa̧ tik nù ká̧ naŋ-a, 23ɓɛɛ gɔm er ha̧ a̧‘e: «Boko-bem kɔ‘m hɛɗa mɛ fe kaɗi; ɛ̀nɛ̀ tɛ́ɛ̀ e er'nɛ́ zu a̧ ha̧ a̧ kpásí.» 24Jesu yaka in Jairus, ɓɛɛ o giiwi nɛ́ ɗoŋ-aa nɔ nɛ̀ ŋmaa in a̧.

25Ŋma okoo duka so hi̧i̧ mbɛt; dee pɛ ɓu-zua-yiitoo a̧ tɔk gbo nɛ̀ a̧. 26A̧ zɔka bɔnɛ nyɛmna er o dɔka wi-de-nyina; a̧ ɗaŋa mɔ kɔ̧-a̧ lɛŋ wen zu nyina, ɓɛɛ zu-a'i tɛ-a kpa daama na. Zɛɛ kɔ̧-a̧‘i ŋgai ŋgai siti. 27Ɓɛɛ nɛ́ mɔ'ɔ nɛ̀ kóò‘i zia nyɛrɛmɔ ko Jesu. A̧ wɛna giiwi tan nɛ̀ ɗoŋ Jesu, ɓɛɛ tam nú laa kɔ̧-a̧, 28wen a̧ tàà so'e bàn nɛ̀‘i tam nɛ́ géé nú-laa kɔ̧-a̧, ɓɛɛ wi kpasa. 29Ɓɛɛ tɔk nɛ̀ gboo so a̧‘i, gɔn tɛ́ kale kpɔk ŋgimbi'i, ɓɛɛ a̧ iŋ‘e wi kpasa kaɗi. 30Soɓee, Jesu iŋa'e ŋma ŋgai gboo tɛ-wi. A̧ zika tɛ-a sitɛ giiwi, ɓɛɛ ak mɔ: «Nɛ́ o'o tama laa kɔ‘m o?» 31Ɓɛɛ o ŋgaiwi kɔ̧-a̧ kifi nú ha̧ a̧‘e: «Ɛ́nɛ́ zɔka giiwi nɔ́ nɛ́ ŋmaa in'nɛ̀ɛ́, ɓɛɛ ɛ́nɛ́ tɛ ak bɔɔ mɔ‘e, nɛ́ o'o foo'nɛ́ o ndé wó'ɛ, héé ge?»

32Jesu zɔka mɔ katɛ zik kpa ɗɛ́kɛ́t mɛ iŋ wi nɛ̀ dee mɔ‘i. 33Kíì dee kóò‘i, ɓɛɛ a̧ tɛ nɛ̀ naka-tɛ, wen a̧ iŋa mɔ nɛ̀ hɔa'i; a̧ guu nù ti Jesu, ɓɛɛ tɔ̧ kpasawen lɛŋ ha̧ a̧. 34Ɓɛɛ Jesu tɔ̧ ha̧ a̧: «Boko-bem kɔ‘m, nɛ́ kɔ̧ɔ̧ɗɔɔwen kɔ-mɛ a̧ kpasa mɛ; mɛ̀ yák zaŋ ga̧a̧mɔ, ɓɛɛ zɛɛ kɔ-mɛ a̧ káɗí.»

35Jesu ɓɔna fara tɔ̧ɔ̧ wen, ɓɛɛ o ŋma bíí gɔm nɛ̀ tɛ̀ ko wi-duk-zu tua-mɔi̧a-a, ɓɛɛ tɔ̧: «Boko-bem kɔ-mɛ fee kaɗi, ká mɛ́ gba zu Wan-usi-mɔ sɔɔ géè na.» 36Jesu bɔŋ kɔ‘i wen'i na, ɓɛɛ tɔ̧ ha̧ wi-duk-zu tua-mɔi̧a-a: «Ká mɛ de kíì na; mɛ̀ kɔ̧́ ɗɔaa ɓɛɛ!» 37Jesu e ha̧ ŋma bíí mɛ nɛ in a̧ na, kànà nɛ́ Pierre, in Jak in Jean nya Jak ɓɛɛ. 38Wa hɔɔ tɛ̀ ko wi-duk-zu tua-mɔi̧a-a, ɓɛɛ Jesu kpa o bíí fara zaŋ wen, wa hi̧i̧ nɛ́ kɔ̧a̧, hiɗi nɛ̀ mɔ nɛ̀ ŋgaya-a. 39Jesu yee tua, ɓɛɛ tɔ̧ ha̧ wa: «Ɛ́nɛ́ zaŋ wen, hi̧i̧ nɛ̀ kɔ̧a̧ hegɔ, wen ge? Bem’ɛ fe na, a̧ ɔ mɔ kɔ̧-a̧ nɛ́ yá.» 40Ɓɛɛ wa zɛkɛɗ‘a. A̧ foo bíí lɛŋ si zan kaɗi, ɓɛɛ a̧ mgbɔ dáà in nàà ko bem’ɛi, ká bá nɛ̀ o wi nɛ tɛ̀ɛ̀ in a̧, si kɔ̧́ tua, ɓɛɛ a̧ ye si fara nɛ̀ bem’ɛi ɔ nù sɛnɛ‘i. 41A̧ kasa er-a, ɓɛɛ a̧ tɔ̧ ha̧ a̧: «Talita kum!» Mɛ̀ nɛ́ wen nɛ tɔ̧‘e: «Be-okoo’ɛ, mi'e mɛ̀ tún!» 42Soɓee, ká boko-bem’ɛi kura katak, ɓɛɛ nɛ́ nɔ̀, wen a̧ a̧a̧ nɛ̀ pɛ ɓu-zua-yiitoo. Ɓɛɛ ɗɛɗɛ bíí lɛŋ gɔn. 43Jesu mboo nú-wa wen ká wa tɛ́ɛ̀ tɔ̧ nyɛrɛ mɔ‘i ha̧ ŋma bíí, ɓɛɛ a̧ tɔ̧ ha̧ wa mɛ ha̧ nyɔŋmɔ ha̧ bem’ɛi.

Currently Selected:

MARK 5: GB11DC

Highlight

Copy