MARK 6

Jesu in o wi Nazarɛt

(Zɔk Mt 13.53-58; Lk 4.16-30)

1Jesu kura fara'i nɛ́ si nù kɔ‘i, ɓɛɛ o ŋgaiwi kɔ̧-a̧ nɛ́ in a̧. 2Wese-ɔm-tɛ, a̧ usa mɔ kɔ̧́ tua-mɔi̧a-a. O bíí nɛ̀ dɔka-a zia usamɔ‘i, ɗɛɗɛ-wa gɔna, ɓɛɛ wa tɔ̧: «A̧ kpaa mɔ‘i déè? Iŋa-mgbara-mɔ n'aa de nɛ̀ pɛrti mɔɔ-kifi nɔ'ɔ, a̧ kpaa bɔɔ déè? 3Bó nɛ́ a̧ nɛ́ wi-sɛk-te, bem ko Marii, ɓɛɛ bó nɛ́ o nya-a̧ nɛ́ Jak, in Jozɛs, in Judɛ ká bá nɛ̀ Simɔŋ na nde? Bó nɛ́ o boko-nya-a̧ duk in yɛ̀ɛ́ hɛ̧ɛ̧ na nde?» Ɓɛɛ nɛ́ mɔ‘i a̧ dee ha̧ wa mɛ sakali zu a̧. 4Ɓɛɛ Jesu tɔ̧ ha̧ wa: «O dɔka bíí yu wi-tɔ̧-wen oi nú Sɔ̧ yuu, ɓɛɛ kànà nɛ́ o bíí nù kɔ̧-a̧, in o bíí nutua kɔ̧-a̧ a̧ yu a̧ na ɓɛɛ.»#Jn 4.44 5Ɓɛɛ Jesu nyɛm mɛ de ŋma mɔɔ-kifi hi̧i̧ kpɔk yak zu nyɛi̧a er n'aa nyɛi̧a kpasi nɛ̀ o ŋma wi-zɛɛ na. 6Ɗɛɗɛ-a gɔna, wen wa kɔ̧ ɗɔaa ha̧ a̧ na.

Jesu toma o ŋgaiwi kɔ‘i ɓu-zua-yiitoo

(Zɔk Mt 10.5-15; Lk 9.1-6)

Jesu yara dam saaye lɛŋ nɛ̀ yaa zik fara'i, usi nɛ̀ mɔ. 7A̧ saa o ŋgaiwi kɔ̧-a̧ ɓu-zua-yiitoo, ɓɛɛ tom wa yiitoo yiitoo mɛ usi wen ko Sɔ̧ nɛnɛ, ɓɛɛ a̧ sur wa ha̧ wa mɛ kpa ŋgai zu o ɗaŋ-sɔ̧. 8A̧ tɔ̧a̧‘e ká wa ba ŋma mɔ er wa wen yuwar na, kànà nɛ́ dɔra kɔ-wa ɓɛɛ. Ká wa ba nyɔŋmɔ in ŋgoɓo sede na. Ká wa ba be kɔya sede ɓam tɛ kanda kɔ-wa na mbɛt.#Lk 10.4-11 9A̧ tɔ̧ɔ̧ ha̧ wa: «Ko ndárà, ɛ̀nɛ̀ á naŋ‘nɛ́, ɓɛɛ k’ɛ́nɛ́ kai laa yiitoo na.» 10A̧ tɔ̧ɔ̧ woyo: «K’ɛ̀nɛ̀ nɛ́ zira kɔ̧́ ŋma tua, ɓɛɛ ɛ̀nɛ̀ ɔ́ kànà kɔ̧̀ kpɔk tua'i hɔ wese n’ɛnɛ tɛ kur yak. 11Ɓɛɛ fara nɛ̀ o bíí kpɛk'nɛ́ sɛnɛ na, nɛ̀ wa kɔ̧́ zia wen k’ɛ́nɛ́ sɛnɛ na mbɛt, ɛ̀nɛ̀ gbó hi̧i̧, ɓɛɛ ɛ̀nɛ̀ mgbɔ́ fuunu naŋ‘nɛ́ a nù fara'i; mɔ‘i tɛ duk nɛ́ mɔɔ-sedaako yí-wa.»#Tom 13.51 12Nɛ́ mɔ'ɔ nɛ̀ o ŋgaiwi nɔ‘i ɓu-zua-yiitoo'i yaka, ɓɛɛ wa tɔ̧ ha̧ o bíí mɛ kpai duka-a kɔ-wa. 13Wa ndaka o ɗaŋ-sɔ̧ nɛ̀ dɔka-a yinɛ tɛ o bíí, wa tɛna nɔ̧́ a zu o wi-zɛɛ nɛ̀ dɔka-a kpasi nɛ̀ wa mbɛt.#Jk 5.14

Fio ko Jean Zui-bíí

(Zɔk Mt 14.1-12; Lk 9.7-9)

14Wannu Herod zia nyɛrɛmɔ ko Jesu, wen nin-a hura so nyɛmna, o bíí duka so tɔ̧‘e: «Nɛ́ Jean Zui-bíí a̧ kura ŋgɔn tɛ fio, ɓɛɛ sa a̧ kpa ŋgai; nɛ mɔ'ɔ n'aa de nɛ̀ mɔɔ-kifi nɛnɛ'ɛ.»#Mt 16.14; Mk 8.28; Lk 9.19 15O ŋma bíí tɔ̧a̧: «Nɛ́ Elii.» Ɓɛɛ o ŋma tɔ̧ kɔ‘i'e: «Nɛ́ ŋma wi-tɔ̧-wen oi nú Sɔ̧ nɛ̀ hɔɔ ŋmaa in o wan nɛ̀ yaa so ɓeemɛ ɛ̧.»

16Herod zia wen'i hegɔ ɓɛɛ tɔ̧: «Nɛ́ Jean Zui-bíí n'am ɓira so zu-a pi̧ nù a̧ kura ŋgɔn woyo.» 17Wen mɛ̀ nɛ́ Herod a̧ bàá tom bíí mɛ ba Jean hɛr pi̧ kɔ̧́ zɔɓɔ wen zu Herodiad kóò ko Filip nya Herod. Herod bàà so Herodiad nɛ̀ kóò,#Lk 3.19-20 18ɓɛɛ Jean duka so tɔ̧ nɛnɛ ha̧ Herod'e ndé: «Heembea e war ha̧ mɛ mɛ ba kóò ko nya-mɛ na.» 19Herodiad sɛna Jean wen mɔ‘i. A̧ kia war mɛ gbɛ a̧, ɓɛɛ a̧ kpa war-a na, 20wen Herod duka so yu Jean. Herod iŋa'e Jean nɛ́ bíí ko Sɔ̧ nɛ̀ de mɔ nɛ̀ yuwar-a, ɓɛɛ a̧ e ha̧ ŋma bíí mɛ de ɗaŋmɔ in a̧ na. Wen ko Jean sakala a̧, ɓɛɛ, zu-a'i, a̧ kɔ̧ɔ̧ mɛ zii wen'i mbɛt.

21Ŋma wese Herod dee gbaŋa wese nɛ̀ nàà kɔ̧-a̧ kòó nɛ̀ a̧, ɓɛɛ Herodiad kpa war mɛ de ha̧ wa mɛ gbɛ Jean. Wese'i Herod saa o gasa bíí kɔ‘i in o gasa wi-biro, ká bá nɛ̀ o gasawi nú Galilee mɛ, ha̧ wa mɛ tɛ̀ɛ́ nyɔŋ mɔ in a̧. 22Ɓɛɛ boko-bem ko Herodiad tɛ̀ɛ̀ yɔ yɔyɛ, ɓɛɛ boko-bem’ɛi de tɛ Herod in o bíí n'aa saa so tɛnɛ‘i, ɓɛɛ Herod ha̧ nú ha̧ boko-bem’ɛi: «Mɔ nɛ̀ mɛ kɔ̧ɔ̧ lɛŋ, mɛ̀ ák er-am, ɓɛɛ mi tɛ ha̧ mɛ.» 23Ɓɛɛ a̧ kan mɔ ti boko-bem’ɛi hee mɔ'ɔ ga: «Mɔ lɛŋ nɛ̀ mɛ tɛ ak er-am, mi tɛ ha̧ mɛ, kóó reeta mɔɔ-wan kɔ‘m mbɛt.» 24Boko-bem’ɛi gboa, ɓɛɛ nɛ́ɛ̀ tɔ̧ ha̧ nàà kɔ‘i: «A̧‘m ák nɛ́ ge?» Ɓɛɛ nàà kɔ̧-a̧ kifi nú ha̧ a̧: «Mɛ̀ ák nɛ́ gɔ̀ɔ́-zu Jean Zui-bíí.» 25Boko-bem’ɛi maa yì si ɗoŋ tɛ Herod ɓɛɛ tɔ̧ ha̧ a̧: «Mi kɔ̧ɔ̧ h’ɛ́nɛ́ mɛ ha̧ nɛ́ gɔ̀ɔ́-zu Jean Zui-bíí sɛn kɔ̧́ tasi ha̧‘m kinii kinii.» 26See wannu ɗaŋa, ɓɛɛ a̧ kɔ̧ mɛ bɛ̧ na, wen zu kanamɔ n'aa kànà so in wen foe yí o bíí n'aa saa so'i, 27ɓɛɛ a̧ tom ŋma wi-biro nɛ̀ pɛm a̧ nɛ̀ haya-a mɛ ba gɔ̀ɔ́-zu Jean Zui-bíí tɛnɛ. Wi-biro'i yaka nɛ́ɛ̀ ɓir zu Jean Zui-bíí kɔ̧́ zɔɓɔ mɛ, 28ba piinɛ ɗoŋ kɔ̧́ tasi ha̧ boko-bem’ɛi, ɓɛɛ boko-bem’ɛi ba ha̧ nàà kɔ‘i. 29O ŋgaiwi ko Jean zia nyɛrɛ mɔ‘i, ɓɛɛ wa tɛ́ɛ̀ ba wɔr-aa gun.

Jesu ha̧a̧ nyɔŋmɔ ha̧ bíí booro-mɔɔrɔ

(Zɔk Mt 14.13-21; Lk 9.10-17; Jn 6.1-14)

30O betom ko Jesu pia ɗoŋ katɛ a̧, ɓɛɛ we ɗoŋ mɔ nɛ̀ wa dea in mɔ nɛ̀ wa usa lɛŋ ha̧ a̧. 31Ɓɛɛ a̧ tɔ̧ ha̧ wa: «Ɛ̀nɛ̀ tɛ́ in am si fara nɛ̀ bíí bo sɛnɛ na, h’ɛ́nɛ́ ɔ́m tɛ‘nɛ́ sɛ́.» Wen o bíí nɛ̀ tɛ́ tɛ̀ɛ́ in o wan nɛ̀ sí sìí dɔka nyɛmna, ɓɛɛ o ŋgaiwi ko Jesu kpa géé be ŋgimbi mɛ nyɔŋ mɔ na mbɛt. 32Nɛ́ mɔ'ɔ nɛ̀ wa yee kombon, ɓɛɛ wa kai ŋmaa yak si fara nɛ̀ o bíí bo sɛnɛ na. 33O bíí zɔka wa fara yaka-a, ɓɛɛ o ŋma dɔka bíí iŋ ti wa. Nɛ́ mɔ'ɔ nɛ̀ o bíí kura nɛ̀ tɛ o ye nɛtɛ nɛtɛ lɛŋ nɛ̀ naŋ. Wa maa yì ɓɛɛ wa hɔ fara'i ti ha̧ Jesu in o ŋgaiwi kɔ‘i. 34Jesu zira kɔ̧ kombon, ɓɛɛ zɔk gba giiwi. Ko dee a̧ ha̧ wa wen wa ya hee o sami nɛ̀ wi-daia-a bo na ga; ɓɛɛ a̧ usi mɔ nɛ̀ dɔka-a ha̧ wa.#Tɔra-bíí 27.17; 1 Wan 22.17; 2 Kal Ny 18.16; Ez 34.5; Mt 9.36 35Mɔ ga̧a̧ kaɗi, ɓɛɛ o ŋgaiwi ko Jesu ɗɔli si katɛ a̧ tɔ̧ ha̧ a̧: «Fara’ɛ nɛ́ géé zaŋbɛɛ, ɓɛɛ mɔ ga̧a̧ kaɗi mbɛt. 36Ɛ̀nɛ̀ tɔ̧́ ha̧ wa pɛsi sitɛ o be ye in si saaye nɛ̀ ya katɛ yɛ hɛ̧ɛ̧ ha̧ wa hí̧fí nyɔŋmɔ.» 37Ɓɛɛ Jesu kifi nú ha̧ o ŋgaiwi kɔ‘i: «Ɛ́nɛ́ nɛ̀ tɛ̀‘nɛ́, ɛ̀nɛ̀ há̧ nyɔŋmɔ ha̧ wa.» Ɓɛɛ wa kifi nú ha̧ a̧: «Ɛ́nɛ́ kɔ̧ɔ̧ so ɛ̀ɛ̀ nɛ́ɛ̀ hi̧fi brɛt tɛ kɔya-sede gɔmŋmaa yiitoo sɛk’ɛɛ ha̧a̧ ha̧ wa nyɔŋ nde?» 38Jesu tɔ̧ɔ̧ ha̧ wa: «Ɛ́nɛ́ a̧a̧ nɛ̀ brɛt er'nɛ́ géè? Ɛ̀nɛ̀ nɛ́ɛ̀ zɔ́k mɔ.» Wa zɔka mɔ kaɗi, ɓɛɛ wa tɔ̧ ha̧ Jesu: «Nɛ́ brɛt mɔɔrɔ in zoro yiitoo ɓɛɛ.» 39Ɓɛɛ Jesu tɔ̧ ha̧ wa mɛ de ha̧ o bíí mɛ ya nù zu mbɔɗi zɔ̧ nɛ̀ dùk-aa, 40tɛ̀ o dùk-aa gɔmŋmaa gɔmŋmaa in ɓu-mɔɔrɔ ɓu-mɔɔrɔ. 41Nɛ́ mɔ'ɔ nɛ̀ Jesu kaia brɛt mɔɔrɔ in zoro yiitoo'i, ɓɛɛ a̧ ɓer yí-a si yiwese, de osoko ha̧ Sɔ̧, ɓɛɛ gbin brɛt'i ha̧ ha̧ o ŋgaiwi kɔ̧-a̧ mɛ kɛ̧ nɛ́nɛ́ ha̧ o bíí. A̧ kɛ̧ɛ̧ zoro nɔ‘i yiitoo'i dam nɛ̀ bíí lɛŋ mbɛt. 42Bíí lɛŋ nyɔŋa mɔ zaŋ sur, 43ɓɛɛ wa ndɛm oi brɛt in zoro nɛ̀ ɓɔna dun gɛsɛ ɓu-zua-yiitoo. 44Wiwii lɛŋ nɛ̀ nyɔŋa mɔ duka nɛ́ bíí booro-mɔɔrɔ.

Jesu nɛ̀ɛ́ nɔ̀ zu tɔp

(Zɔk Mt 14.22-33; Jn 6.15-21)

45Ɗoŋ mɔ‘i, ɓɛɛ Jesu tɔ̧ ha̧ o ŋgaiwi kɔ‘i mɛ ye kombon mɛ ku yì yak ti si Bɛtsaida mɛ, ha̧ a̧ mɛ fo o giiwi sinɛ. 46A̧ foo wa sinɛ kaɗi, ɓɛɛ a̧ daŋ zu kaya mɛ nɛ̀ɛ́ kɔfi Sɔ̧. 47Mɛ́ fi̧i̧-mɔ, kombon a̧a̧ see yì, ɓɛɛ a̧ biti zan mɛ ɛ̀nɛ́-a. 48Jesu zɔka'e o ŋgaiwi kɔ‘i ba kombon takaɗi wen nɛ̀ búk yu yuu kpai nɛ̀ wa; ɓɛɛ mɛ hèèmɔ-kɔra kpɔk, a̧ nɛ̀ɛ́ nɔ̀ nɛ̀ zu yì sitɛ wa; a̧ kɔ̧ɔ̧ so mɛ ɓir wa yak. 49Wa zɔka a̧ fara nɛ́ɛ́ nɔ̀ nɛ̀ zu yì, ɓɛɛ wa ta kɔ-wa'e nɛ́ hɔɔ-tɛ-bíí, ɓɛɛ wa a nú tɛ hiɗimɔ. 50Wa lɛŋ zɔka a̧, ɓɛɛ kíì de wa nɛ̀ dɔka-a. Soɓee, a̧ tɔ̧ɔ̧ wen sitɛ wa'e: «Ɛ̀nɛ̀ nɔ́ ŋgiɗi, mɛ nɛ́ mi, k’ɛ́nɛ́ de kíì na.»

51A̧ daŋa kombon sitɛ wa, ɓɛɛ búk kaɗi yua-a; ɗɛɗɛ-wa gɔna nyɛmna tɛ mɔ‘i, 52ɓɛɛ wa iŋ mgbara mɔɔ-kifi n'aa dee so nɛ̀ brɛt'i na mbɛt, wen see-wa ɔ ŋgaya.

Jesu kpasa o wi-zɛɛ sɛn nú Genezarɛt

(Zɔk Mt 14.34-36)

53Wa kuu yì hɔ nú Genezarɛt, ɓɛɛ wa kun kombon. 54Nɛ̀ wa zira mbɔɗɔnu kaɗi, o bíí iŋa'e mɛ̀ nɛ́ Jesu; 55ɓɛɛ o bíí ma yì dam fara lɛŋ tɛ nù‘i, ɓɛɛ wa gɔ o wi-zɛɛ nɛ̀ o mɔɔ-gɔ-wi nɛnɛ ha̧ a̧, si fara nɛ̀ wa iŋa'e a̧ a̧a̧ sɛnɛ‘i. 56Fara nɛ̀ Jesu hɔ sɛnɛ lɛŋ, kóó nɛ́ geɗek ye, kóó nɛ́ gasa ye, kóó nɛ́ ye nú-fɔ mbɛt, wa kai nɛ́ o wi-zɛɛ a bee-gara, ɓɛɛ wa gɔma er ti Jesu mɛ e ha̧ o wi-zɛɛ nɔ‘i mɛ tam géé nú-laa kɔ̧-a̧, ɓɛɛ o wi nɛ̀ tama nú-laa'i lɛŋ kpasa.

Currently Selected:

MARK 6: GB11DC

Highlight

Copy