MARK 7

Gba̧‘a̧ usamɔ ko o zɔmdáa

(Zɔk Mt 15.1-9)

1O Fariziɛn in o ŋma wi-usi-heembea nɛ̀ tɛ̀ɛ́ nɛ̀ Jerusalɛm mɔi̧a katɛ Jesu, 2wen wa zɔka'e o ŋma ŋgaiwi ko Jesu tai er na, nyɔŋ nɛ̀ mɔ nɛ̀ ndiŋ er, 3wen o Fariziɛn, hee o dɔka Juif lɛŋ ga, tai er-wa nɛ̀ sa̧a̧-a̧ nɛti sɛka wa nyɔŋa mɔ, wen wa ndak nɛ́ ɗoŋ ɗafa-war-tɛ ko o zɔmdáa kɔ-wa. 4Kà wa píí ɗoŋ nɛ̀ lumɔ, wa tɛ zui yì nɛti sɛka wa nyɔŋa mɔ. O ŋma ɗafa-war-mɔ ko o zɔmdáa kɔ-wa a̧a̧ so sɛnɛ nɛ̀ dɔka-a mbɛt nɛ̀ wa kasi, hee fɔra ɗele in kpánà ká bá nɛ̀ tasi ga.

5Ɓɛɛ o Fariziɛn in o wi-usi-heembea ak Jesu: «Wen ge o ŋgaiwi kɔ-mɛ kasi o gba̧‘a̧ mɔ ko o zɔmdáa na, nyɔŋ nɛ̀ mɔ nɛ̀ ndiŋ er ge?» 6Ɓɛɛ a̧ kifi nú ha̧ wa: «Esaii tɔ̧ɔ̧ wen oi nú Sɔ̧ zu'nɛ́ nɛ̀ sa̧a̧-a̧, ɛ́nɛ́ o wi nɛ̀ a̧a̧ nɛ̀ see yiitoo nɔ'ɔ, wen a̧ yɔra so'e:

‹Dukbíí'ɛ zɔn am nɛ ndàrà-nú

ɓɛɛ see-aa ɔ nyɛi̧a nɛ‘m.#Es 29.13

7Wa gas'am sɔɔ géè,

wen usamɔ kɔ-wa nɛ́ o geŋa ko bíí ɓɛɛ.›

8Ɛ́nɛ́ wɛra heembea ko Sɔ̧ e nɛ̀ mgbɔɔr, ɓɛɛ ɛ́nɛ́ ndaɗi tɛ yuwar deemɔ ko bíí.» 9Ɓɛɛ a̧ tɔ̧ ha̧ wa: «Ɛ́nɛ́ siŋa heembea ko Sɔ̧ pi̧ nù h’ɛ́nɛ́ mɛ ndak nɛ́ pata yuwar duka-a ko o zɔmdáa k’ɛ́nɛ́. 10Wen Moisɛ tɔ̧ɔ̧ so'e ndé: ‹Mɛ̀ tú̧ tɛ dáà kɔ-mɛ in nàà kɔ-mɛ,› in mbɛt'e: ‹Wi nɛ̀ tɔ̧ ɗaŋ wen ha̧ dáà kɔ‘i, kóó ha̧ nàà kɔ‘i, wi tɛ gbɛ a̧ yinɛ.›#Gboa-a 20.12; 21.17; Lev 20.9; Wee-ɗoŋ-he 5.16 11Ɓɛɛ war k’ɛ́nɛ́, ɛ́nɛ́‘e ndé, wi nɛ̀ tɔ̧ ha̧ dáà kɔ‘i kóó ha̧ nàà kɔ‘i ndé: ‹Mɔ n'am tɛ̀ɛ́ gbak so nɛ̀ ɛ́nɛ́, nɛ́ mɔ nɛ̀ kifa korban#7.11 korban: nɛ̀ nú hébreu úsí nɛ́ mɔ̀ nɛ̀ bíí èè há̧ Sɔ̧. kaɗi (mɛ̀ nɛ́ wen nɛ tɔ̧‘e, mɔ nɛ‘i ee ha̧ Sɔ̧ kaɗi);› 12ɓɛɛ ɛ́nɛ́‘e wi’ɛi beka gbak dáà kɔ‘i in nàà kɔ‘i ɓɔna. 13Hegɔ, ɛ́nɛ́ e nɛ wen ko Sɔ̧ tɛ geemɔ, tɛ gba̧‘a̧ mɔ ko o zɔmdáa n’ɛnɛ usi'i. Ɓɛɛ ɛ́nɛ́ de nɛ o pɛrti mɔ hegɔ nɛ̀ dɔka-a mbɛt.»

Mɔ nɛ̀ de ha̧ war-tɛ-bíí mɛ ɗaŋ

(Zɔk Mt 15.10-20)

14A̧ saa o giiwi woyo, ɓɛɛ tɔ̧ ha̧ wa: «Ɛ́nɛ́ lɛŋ, ɛ̀nɛ̀ yéŋ zer'nɛ́, ɓɛɛ ɛ̀nɛ̀ zíí mgbara wen’ɛ nɛ̀ sa̧a̧-a̧. 15Ŋma mɔ kpɔk nɛ̀ a̧a̧ nɛ̀ zan nɛ̀ ye si kɔ̧ zaŋ-wi nɛ̀ nyɛma mɛ ɗaŋ war-tɛ-bíí bo na, ɓɛɛ mɛ̀ nɛ́ mɔ nɛ̀ gbo nɛ̀ kɔ̧̀ nú-wi a̧ ɗaŋ war-tɛ bíí ɛ̧.

[ 16«Wi nɛ̀ a̧a̧ nɛ̀ zer mɛ zii wen, a̧ a̧ zíí ŋgaɓo.]»

17Ŋgimbi nɛ̀ Jesu ee giiwi duk, ɓɛɛ si ɗoŋ kɔ̧́ tua kaɗi, o ŋgaiwi kɔ̧-a̧ aka mgbara lizaŋ n'aa tɔ̧a̧‘i. 18Ɓɛɛ a̧ tɔ̧ ha̧ wa: «Ɛ́nɛ́ mbɛt, ɛ́nɛ́ tɛ iŋ mgbara mɔ‘i hɔ̧ɔ̧ na nde? Mɔ nɛ̀ duk zan nɛ̀ ye si kɔ̧́ zaŋ-wi nyɛm mɛ ɗaŋ war-tɛ-bíí na. Ɛ́nɛ́ iŋ hegɔ na nde? 19Wen mɔ‘i ye si kɔ̧́ see-wi na, ɓɛɛ ye nɛ́ kɔ̧́ zaŋ-wi, ɓɛɛ gboo a nù.» Hegɔ, Jesu'e ndé, nyɔŋmɔ lɛŋ nɛ́ de nyɔŋmɔ. 20Ɓɛɛ a̧ tɔ̧ woyo: «Nɛ́ mɔ nɛ̀ gbo nɛ̀ tɛ-wi a̧ ɗaŋ war-tɛ-bíí. 21O ɗaŋ taamɔ nɛ̀ de ha̧ bíí mɛ duk nɛ̀ ɗaŋ-a gbo nɛ̀ kɔ̧́ see-wi: o mɔɔ nɔ‘i nɛ́ zuzu, gbɛɛ-zu, 22dee dàlà, dee wɔ-mɔ, dee mɔ nɛ̀ see yiitoo, dee gɔn-ta, dee mɔɔ-toyo, aa-see-mɔ, da̧a̧-dara, gɔɔ-tɛ, in dee-mɔɔ-mgbele. 23O ɗaŋmɔ nɔ‘i lɛŋ gbo nɛ̀ kɔ̧́ see-wi, ɓɛɛ ɗaŋa war-tɛ-wi.»

Kɔ̧ɔ̧ɗɔɔwen ko ŋma okoo Kanaŋ

(Zɔk Mt 15.21-28)

24Jesu kura nú Galilee, ɓɛɛ yak si nù Tir. A̧ yee kɔ̧́ ŋma tua, ɓɛɛ a̧ kɔ̧ ha̧ bíí mɛ iŋ‘e a̧ a̧a̧ hi̧i̧ na; mɔ kpɔk, a̧ nyɛm mɛ hu̧si tɛ-a hɔ ti na. 25Ŋma okoo nɛ̀ bem kɔ̧-a̧ be-okoo-a a̧a̧ nɛ̀ ɗaŋ-sɔ̧ zia nyɛrɛmɔ ko Jesu ɓɛɛ tɛ nɛ̀ haya-a hɔ̧fi̧ tik ká̧ naŋ-a. 26Kóò‘i bó nɛ́ zɔŋa Juif na, a̧ nɛ́ zɔŋa Fenisii nɛ̀ wa kòó sɛn Sirii, ɓɛɛ a̧ ai nú ha̧ Jesu mɛ ndak ɗaŋ-sɔ̧ tɛ bem kɔ̧-a̧ yinɛ. 27Ɓɛɛ Jesu kifi nú ha̧ a̧: «Mɛ̀ é ha̧ o bem nyɔŋ mɔ zaŋ sur nɛti sɛ, wen bó nɛ́ ɔ dee mɛ ba nyɔŋmɔ ko o bem pi̧ nù ha̧ o be toyo na.» 28Ɓɛɛ kóò‘i kifi nú: «Nɛ́ mɔ‘i, Gasa Wan; ɓɛɛ o be toyo nyɔŋ kànà nɛ́ ɓúsú nyɔŋmɔ nɛ̀ a nù er o bem, na nde?» 29Ɓɛɛ Jesu tɔ̧ ha̧ a̧: «Tɛ̀ de kifa-nú nɛ̀ mɛ kifa'i, mɛ̀ sí ɗoŋ, ɗaŋ-sɔ̧ gboo tɛ̀ bem kɔ-mɛ kaɗi.» 30Kóò‘i sii ɗoŋ tɛ̀ kɔ‘i, ɓɛɛ kpa bem’ɛi fara ɔ nù gɔn gado, ká ɗaŋ-sɔ̧ gboo tɛ-a kaɗi.

Jesu kpasa ŋma wi-mgbee-zer-mukɛ̧

31Jesu kura nù Tir, ɓɛɛ ɓir nɛ̀ war Sidɔŋ in nú Dekapol si nɛ̀ ɗoŋ si ká̧ tɔp Galilee. 32Wa mgbɔɔ ŋma wi-mgbee-zer nɛ̀ tɔ̧ wen sa̧ na tɛnɛ ha̧ a̧, ɓɛɛ wa ai nú ha̧ a̧ mɛ e er zu wi’ɛi. 33Nɛ́ mɔ'ɔ n'aa mgbɔɔ a̧ yaknɛ nyɛi̧ benaŋ nɛ̀ o giiwi, ɓɛɛ pi̧ er kɔ̧ zer-aa. Jesu aa sap er, ɓɛɛ ba fo nɛ̀ leɓe wi’ɛi. 34Nɛ́ mɔ'ɔ n'aa ɓera yí-a si yiwese, pɛ see, ɓɛɛ tɔ̧ ha̧ wi’ɛi: «Efata!» Mɛ̀ nɛ́ wen nɛ tɔ̧: «Mɛ̀ hú̧í̧.» 35Soɓee, zer-aa gboo bóóŋ ɓɛɛ leɓ‘a bur, ɓɛɛ a̧ ku̧ naŋ tɔ̧ɔ̧ wen nɛ̀ sa̧a̧-a̧. 36Jesu mboo nú-wa wen ká wa tɛ́ɛ̀ we ɗoŋ mɔ‘i ha̧ bíí, ɓɛɛ mbóó nú-wa n'aa mbo nɛ̀ ŋgaya-a'i, wa hur kɔ-wa nɛ́ nyɛrɛmɔ‘i siti. 37Ɗɛɗɛ-wa gɔna nyɛmna, ɓɛɛ wa tɔ̧: «A̧ dee mɔ lɛŋ nɛ̀ de-a, a̧ dee ha̧ o wi-mgbee-zer mɛ zii mɔ, in ha̧ o mukɛ̧ mɛ tɔ̧ wen.»

Currently Selected:

MARK 7: GB11DC

Highlight

Copy