MARK 8

Jesu ha̧a̧ nyɔŋmɔ ha̧ bíí booro-naar

(Zɔk Mt 15.32-39)

1Tɛ́ ŋgimbi'i, giiwi tɛ̀ɛ́ tɛ Jesu woyo, ɓɛɛ wa kpa mɔɔ-nyɔŋ na. Nɛ́ mɔ'ɔ nɛ̀ Jesu saa o ŋgaiwi kɔ‘i, ɓɛɛ tɔ̧ ha̧ wa: 2«Ko de'm dee ha̧ o wi nɔ'ɔ nyɛmna, wen kinii dee zɛ taar nɛ̀ wa ya nɛnɛ katɛ‘m, ɓɛɛ wa bó nɛ̀ mɔɔ-nyɔŋ na. 3Kà‘m tɔ̧́ ha̧ wa mɛ si ɗoŋ tɛ̀ kɔ-wa nɛ̀ wɔ wó, wa tɛ tik ŋgata nɛ̀ yuwar, ɓɛɛ o ŋma bíí a̧a̧ mgbara wa nɛ̀ tɛ̀ɛ́ nɛ̀ nyɛi̧a fara mbɛt.» 4Ɓɛɛ o ŋgaiwi kɔ̧-a̧ tɔ̧ ha̧ a̧. «Ɛ́ɛ́ tɛ kpa bɔɔ brɛt n’ɛɛ tɛ ha̧ ha̧ o wi nɔ'ɔ mɛ nyɔŋ zaŋ sur ŋga-gbárà'ɛ déè ge?» 5Ɓɛɛ Jesu ak wa: «Ɛ́nɛ́ a̧a̧ nɛ̀ brɛt er'nɛ́‘i géè?» Wa tɔ̧a̧: «Nɛ́ mɔɔrɔ-ɗoŋ-yiitoo ɓɛɛ.» 6Nɛ́ mɔ'ɔ n'aa tɔ̧ɔ̧ ha̧ giiwi mɛ ya nù. A̧ kaia o brɛt nɔ‘i mɔɔrɔ-ɗoŋ-yiitoo'i, de osoko ha̧ Sɔ̧, ɓɛɛ gbin ha̧ ha̧ o ŋgaiwi mɛ kɛ̧, ɓɛɛ wa kɛ̧ nɛ́nɛ́ ha̧ giiwi. 7Wa a̧a̧ so nɛ̀ o ŋma be zoro tikiɗi; a̧ dee osoko ha̧ Sɔ̧ ɓɛɛ a̧ tɔ̧ ha̧ wa mɛ kɛ̧ mbɛt. 8O bíí nyɔŋa mɔ zaŋ sur, ɓɛɛ wa ndɛm oi nyɔŋmɔ nɛ̀ ɓɔna dun bɔtɔ mɔɔrɔ-ɗoŋ-yiitoo. 9Wa duka so hee bíí booro-naar ga. Jesu foo giiwi nɔ‘i sinɛ kaɗi, 10ɓɛɛ daŋ kombon nɛ̀ haya-a in o ŋgaiwi kɔ‘i, yak si nú Dalmanuta.

O Fariziɛn ak nɛ́ ŋma mɔɔ-kifi

(Zɔk Mt 12.38-39; 16.1-4; Lk 11.16,29)

11O Fariziɛn tɛ̀ɛ́, ɓɛɛ ku̧ naŋ sii kafɛ in Jesu, ha̧ a̧ mɛ de ŋma mɔɔ-kifi mɛ́ yiwese ha̧ wa, wen wa kɔ̧ɔ̧ so mɛ ba wen zaŋ-aa.#Mt 12.38; Lk 11.16 12Jesu pɛɛ see nɛ̀ ŋgaya-a, ɓɛɛ tɔ̧ ha̧ wa: «Wen ge o bíí kinɛɛ ak nɛ́ mɔɔ-kifi ge? Nɛ́ kpasawen a̧‘m tɔ̧ h’ɛ́nɛ́; ŋma mɔɔ-kifi beka de ha̧ o bíí kinɛɛ na!»#Mt 12.39; Lk 11.29 13Ɓɛɛ a̧ e wa ɓɔn hi̧i̧, daŋ kombon, ku yì si kur mɛ.

Hao ko o Fariziɛn in ko Herod

(Zɔk Mt 16.5-12; Lk 12.1)

14Tɛ̀ o ŋgaiwi ko Jesu bìì so ɗoŋ báá nyɔŋmɔ, ɓɛɛ wa duka so nɛ̀ brɛt kpɔk er wa kɔ̧́ kombon ɓɛɛ. 15Ɓɛɛ Jesu tɔ̧ mbɔrɔ ha̧ wa: «Ɛ̀nɛ̀ mbó ta'nɛ́, ɛ̀nɛ̀ zɔ́k tɛ‘nɛ́ nɛ̀ de-a nɛ̀ hao ko o Fariziɛn in ko Herod.»#Lk 12.1 16Ɓɛɛ o ŋgaiwi kɔ̧-a̧ zaŋ wen in o ŋmaa, wen nɛ̀ brɛt bo er wa na. 17Jesu kɔɓa mɔ‘i, ɓɛɛ tɔ̧ ha̧ wa: «Wen ge s’ɛ́nɛ́ zaŋ wen zu brɛt n’ɛnɛ bo nɛnɛ na ge? Ɛ́nɛ́ tɛ iŋ mgbara mɔ hɔ̧ɔ̧ na? Ɛ́nɛ́ tɛ zii gba̧a̧ mɔ hɔ̧ɔ̧ na nde? Ɛ́nɛ́ nɛ́ o wi-ŋga-see nde? 18Gbaayí‘nɛ́ a̧a̧ sɛnɛ, ɓɛɛ ɛ́nɛ́ zɔk mɔ na nde? Zer'nɛ́ a̧a̧ sɛnɛ, ɓɛɛ ɛ́nɛ́ zii mɔ na nde? Tɛ‘nɛ́ mbaŋ ɗoŋ#Jer 5.21; Ez 12.2; Mk 4.12 19ŋgimbi n'am gbina nɛ̀ brɛt mɔɔrɔ kɛ̧ nɛnɛ ha̧ o bíí booro-mɔɔrɔ na nde? Ɛ́nɛ́ ndɛma oi-aa dun bɔtɔ géè nde?» Ɓɛɛ wa kifi nú ha̧ a̧: «Nɛ́ bɔtɔ ɓu-zua-yiitoo.» 20«Ɓɛɛ ŋgimbi n'am gbina nɛ̀ brɛt mɔɔrɔ-ɗoŋ-yiitoo kɛ̧ nɛnɛ ha̧ o bíí booro-naar, ɛ́nɛ́ ndɛma oi-aa dun bɔtɔ géè nde?» Ɓɛɛ wa kifi nú ha̧ a̧: «Nɛ́ bɔtɔ mɔɔrɔ-ɗoŋ-yiitoo.» 21Ɓɛɛ a̧ tɔ̧ ha̧ wa: «Ɛ́nɛ́ tɛ zii mgbara-a na hɔ kinii nde?»

Jesu hu̧i̧a̧ yí ŋma wi-boma-yí sɛn Bɛtsaida

22Wa hɔɔ Bɛtsaida, ɓɛɛ o bíí mgbɔ ŋma wi-boma-yí tɛnɛ ha̧ Jesu, ɓɛɛ wa ai nú ha̧ Jesu mɛ tam tɛ-a. 23Jesu kasa er wi-boma-yí‘i, ɓɛɛ mgbɔ a̧ si ɗoŋ ye. Nɛ́ mɔ'ɔ n'aa ee sap yí-a, e er zu-a, ɓɛɛ ak a̧: «Mɛ'ɛ zɔk mɔ‘i nde?» 24Wi-boma-yí hu̧i̧a̧ yí ɓɛɛ tɔ̧: «Mi zɔk nɛ́ o bíí. Wa duk héé te ga, ɓɛɛ wa nɛ́ nɛ́ nɔ̀.» 25Hɔ-ɗoŋ-aa, Jesu guu er yí wi-boma-yí‘i woyo, ɓɛɛ a̧ zɔk mɔ nɛ̀ sa̧a̧-a̧. Yí-a hu̧i̧a̧ kaɗi, ɓɛɛ a̧ zɔk mɔ lɛŋ nɛ̀ sa̧a̧-a̧ war kpɔk. 26Jesu foo a̧ sinɛ, ɓɛɛ tɔ̧ ha̧ a̧: «Ká mɛ ɓir nɛ̀ saaye na.»

Pierre tɔ̧a̧‘e Jesu nɛ́ Mɛsii

(Zɔk Mt 16.13-20; Lk 9.18-21)

27Jesu yaka in o ŋgaiwi kɔ‘i sitɛ o be ye ká̧ Sezaree Filip. Nɛ̀ yuwar, a̧ aka o ŋgaiwi kɔ̧-a̧ nɛ̀ wen’ɛ: «Tɛ́ wen nɛ̀ o bíí tɔ̧ nɛ́nɛ́, wa tɔ̧‘e mi nɛ́ o?» 28Wa kifa nú ha̧ a̧: «O ŋma bíí tɔ̧‘e ndé, ɛ́nɛ́ nɛ́ Jean Zui-bíí; o ŋma'e ndé, ɛ́nɛ́ nɛ́ Elii; ɓɛɛ o ŋma tɔ̧ɔ̧ kɔ‘i'e ndé, ɛ́nɛ́ nɛ́ ŋma wi-tɔ̧-wen oi nú Sɔ̧.»#Mk 6.14-15; Lk 9.7-8 29Ɓɛɛ Jesu ak wa'e: «War k’ɛ́nɛ́, ɛ́nɛ́ tɔ̧ k’ɛ́nɛ́‘e mi nɛ́ o?» Pierre baa wen, ɓɛɛ tɔ̧: «Ɛ́nɛ́ nɛ́ Mɛsii.»#Jn 6.68-69 30Ɓɛɛ Jesu mbo nú-wa, wen ká wa tɛ́ɛ̀ tɔ̧ nyɛrɛ kɔ̧-a̧ ha̧ bíí.

Jesu tɔ̧ɔ̧ wen-fio in kura-ŋgɔn kɔ‘i

(Zɔk Mt 16.21-28; Lk 9.22-27)

31Ɓɛɛ a̧ ku̧ naŋ usa mɔ ha̧ wa hee mɔ'ɔ ga: «Bem ko bíí tɛ zɔk kànà bɔnɛ nyɛmna. O gasawi, o gasa wan-ɗafi-sɔ̧ in o wi-usi-heembea tɛ bɛ̧ a̧; o bíí tɛ gbɛ a̧, ɓɛɛ ɗoŋ zɛ yiitoo, taar-a a̧ kura ŋgɔn.» 32A̧ tɔ̧ɔ̧ wen'i ha̧ wa nɛ̀ sa̧a̧-a̧. Nɛ́ mɔ'ɔ nɛ̀ Pierre saa a̧ si mgbɔɔr, ɓɛɛ gai a̧. 33Jesu zika tɛ, zɔk o ŋgaiwi kɔ‘i, ɓɛɛ de ŋmaa in Pierre: «Mɛ̀ yú síɓí, Satan, mɛ̀ yú katɛ‘m! Taamɔ kɔ-mɛ bó nɛ́ ko Sɔ̧ na, nɛ́ taamɔ ko bíí.»

Ndaka pata Jesu

(Zɔk Mt 16.24-28; Lk 9.23)

34Ɓɛɛ a̧ sa giiwi in o ŋgaiwi kɔ̧-a̧ tɛnɛ, ɓɛɛ tɔ̧: «Kà ŋma bíí nɛ́ kɔ̧ɔ̧ mɛ tɛ ɗoŋ am, a̧ a̧ é tɛ̀ tɛ̀ geemɔ, a̧ a̧ bá te-diŋa kɔ̧-a̧, ɓɛɛ a̧ a̧ tɛ́ ɗoŋ am.#Mt 10.38; Lk 14.27 35Wen wi nɛ̀ kɔ̧ɔ̧ mɛ duk kpasa, tɛ fe, ɓɛɛ wi nɛ tɛ fe wen zu'm in wen zu De Mbe Wen, wi’ɛi tɛ kpasi.#Mt 10.39; Lk 17.33; Jn 12.25 36Kà ŋma bíí yɔ duka-kpasa kɔ‘i mɛ kpa mɔɔ-zaŋnu lɛŋ, ɓɛɛ kpaamɔ kɔ̧-a̧‘i tɛ de nɛ́ ge ha̧ a̧ ge? 37Nɛ́ ge a̧ a̧ tɛ ha̧ mɛ gɔn nɛ̀ zu duka-kpasa kɔ̧-a̧ woyo ge? 38Wi nɛ̀ tɛ de foe wen am in wen wen kɔ‘m ti o wi-ŋgazu in o wi-de-ɗaŋmɔ nɔ'ɔ, Bem ko bíí mbɛt tɛ de foe wen wi’ɛi, ŋgimbi n'aa tɛ tɛ nɛnɛ zaŋ gasamɔ ko Dáà kɔ̧-a̧ in o sa̧a̧ betom mɛ yiwese.»

Currently Selected:

MARK 8: GB11DC

Highlight

Copy