MARK 9

1Ɓɛɛ a̧ tɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́, o ŋma bíí mgbara'nɛ́ hɛ̧ɛ̧ beka fe nɛti na, hɔ ŋgimbi nɛ̀ wa tɛ zɔk Wan ko Sɔ̧ hɔa zaŋ ŋgayamɔ kɔ‘i sɛ́.»

Tɛ Jesu kpaia duk hee gasa sa̧a̧mɔ ga

(Zɔk Mt 17.1-13; Lk 9.28-36)

2Zɛ mɔɔrɔ-ɗoŋ-kpɔk ɗoŋ mɔ‘i, Jesu mgbɔɔ Pierre in Jean ká bá nɛ̀ Jak nɛnɛ in a̧ si zu ŋma kusa kaya, ɓɛɛ wa ya hi̧i̧ ɛ̀nɛ́-wa. Tɛ Jesu kpaia ti wa;#2 Pi 1.17-18 3laa kɔ̧-a̧ kifa nɛ̀ bu-a tál-tál, ɓɛɛ tok tok zar-zar; ŋma mɔ nɛ̀ nyɛma mɛ fɛ̧ŋ zaŋnu’ɛ hee mɔ‘i ga bo na. 4Kà wa zɔk wó, Elii in Moisɛ nɛ́ mɔ'ɔ nɛ̀ ya tɔ̧ nɛ̀ wen in a̧'ɛ. 5Ɓɛɛ Pierre tɛ́ɛ̀ tɔ̧ ha̧ Jesu: «Wan-usi-mɔ, daden nɛ̀ ɛ́ɛ́ a̧a̧ hɛ̧ɛ̧! Ɛ́ɛ́ tɛ de gbáksák taar hɛ̧ɛ̧, k’ɛ́nɛ́ kpɔk, ko Moisɛ kpɔk, in ko Elii kpɔk mbɛt». 6Pierre iŋ wen n'aa tɛ tɔ̧ na, wen kíì dee wa nyɛmna. 7Bu-zan tɛ̀ɛ̀ kpe zu wa, ɓɛɛ ŋma tiger tɔ̧ wen nɛ̀ tɛ̀ bu-zan'i tɛnɛ‘e ndé: «Wi’ɛ nɛ́ Bem kɔ‘m n'am kɔ̧ɔ̧ nyɛmna, ɛ̀nɛ̀ zíí wen nú-a.» 8Kà o ŋgaiwi ko Jesu bé tɛ̀ɛ́ kɛ̧i̧ mɔ katɛ wó, wa zɔk ŋma bíí na, kànà nɛ́ Jesu a̧ duk in wa ɓɛɛ.

9Hee mɔ'ɔ nɛ̀ wa biti zira-a nɛ̀ zu kaya mɛ tɛnɛ ga, Jesu mboo nú-wa ká wa tɔ̧ mɔ nɛ̀ wa zɔka'i ha̧ ŋma bíí na, hɔ ŋgimbi nɛ̀ Bem ko bíí tɛ kur ŋgɔn tɛ fio sɛ. 10Wa kasa mɔ‘i e kɔ̧́ see-wa, ɓɛɛ wa ak ŋmaa zu wen kura-ŋgɔn tɛ fio'i. 11Nɛ́ mɔ'ɔ nɛ̀ wa aka a̧: «Wen ge sa o wi-usi-heembea tɔ̧‘e Elii tɛ pii ɗoŋ sɛ́ wó'ɛ ge?»#Mal 3.23; Mt 11.14 12Ɓɛɛ Jesu kifi nú ha̧ wa: «Nɛ̀ mbetɛ, Elii tɛ́ tɛ̀ kana mɛ ɗafi mɔ lɛŋ nɛ̀ war-a! Ɓɛɛ Yɔramɔ tɔ̧ɔ̧ bɔɔ‘e ndé, Bem ko bíí tɛ zɔk bɔnɛ nyɛmna, ɓɛɛ o bíí tɛ e a̧ tɛ geemɔ wó‘e, wen ge? 13Kɔ‘m, mi tɔ̧ h’ɛ́nɛ́, Elii'i tɛ̀ɛ̀ kaɗi, nɛ́ mɔ'ɔ nɛ̀ o bíí dee mɔ in a̧ hee mɔ'ɔ nɛ̀ see-wa kɔ̧ɔ̧ ga, nyɛm nɛ̀ ɗoŋ mɔ nɛ̀ wa yɔra wen-aa.»

Jesu kpasa ŋma wi-doe

(Zɔk Mt 17.14-21; Lk 9.37-43)

14Jesu, Pierre, Jak in Jean sii ɗoŋ sitɛ o dɔka ŋgaiwi ko Jesu; ɓɛɛ kpa o giiwi in o wi-usi-heembea nɛ̀ ya zik wa, si nɛ̀ kafɛ in wa. 15Zɔka Jesu nɛ̀ giiwi zɔka hegɔ, ɗɛɗɛ-wa gɔna, ɓɛɛ wa ma yì sitɛ a̧ mɛ fan a̧. 16Ɓɛɛ a̧ ak wa: «Nɛ́ ge wen ge ɛ̀nɛ̀ si kafɛ zu-a in wa’ɛ ge?» 17Ɓɛɛ ŋma bíí poo giiwi kifi nú ha̧ a̧: «Wan-usi-mɔ, mi mgbɔɔ nɛ́ bem kɔ‘m nɛ̀ doe a̧a̧ zu-a, nɛ̀ tɔ̧ wen na, tɛnɛ h’ɛ́nɛ́. 18Fara lɛŋ nɛ̀ doe zar a̧ pi̧ nù sɛnɛ, gba-woo gbo gboo nɛ̀ kɔ̧̀ nú-a, ɓɛɛ a̧ nyɔŋa goko-a duk nɛnɛ kiŋgiŋgi. Mi aka o ŋgaiwi k’ɛ́nɛ́ ha̧ wa mɛ ndak ɗaŋ-sɔ̧-doe'i yinɛ tɛ-a, ɓɛɛ wa kpa ŋgai na.» 19Ɓɛɛ Jesu tɔ̧: «Ɛ́nɛ́ o tugun bíí nɛ̀ kɔ̧ɔ̧ɗɔɔwen k’ɛ́nɛ́ bo na’ɛ, mi tɛ duk in'nɛ̀ɛ̀ hɔ tɛ ge ŋgimbi ge? Mi tɛ de ko h’ɛ́nɛ́ hɔ tɛ ge ŋgimbi ge? Ɛ̀nɛ̀ mgbɔ́ bem’ɛi tɛnɛ ha̧‘m.» 20Ɓɛɛ wa mgbɔ a̧ nɛnɛ ha̧ Jesu. Zɔka Jesu nɛ̀ ɗaŋ-sɔ̧-doe'i zɔka hegɔ, ɓɛɛ ɗaŋ-sɔ̧‘i zar bem’ɛi pi̧ nù, nak nɛnɛ ɗik-ɗik, ɓɛɛ gba-woo gbo nɛ̀ kɔ̧̀ nú-a. 21Jesu aka dáà ko bem’ɛi: «Mɔ‘i ku̧u̧ naŋ dee a̧ mɛ gese ge?» Ɓɛɛ a̧ kifi nú: «Mɔ‘i ku̧u̧ naŋ dee a̧ nɛ̀ bem mɛ. 22Ɓɛɛ ɓɔnsɛnɛ doe zar nɛ́ a̧ pi̧ tɛ wee, kóó pi̧ ɗɔɔ yì ha̧ a̧ mɛ fe. K’ɛ̀nɛ̀ nɛ́ nyɛma mɛ de ŋma mɔ, n’ɛ̀nɛ̀ dé ko h’ɛ́ɛ́, ɓɛɛ ɛ̀nɛ̀ gbák yɛ.» 23Ɓɛɛ Jesu tɔ̧ ha̧ a̧: «Mɛ‘e: ‹Kà‘m nɛ́ nyɛma mɛ de ŋma mɔ› nde? Ŋma mɔɔ-gan wi nɛ̀ kɔ̧ɔ̧ ɗɔaa ha̧ Sɔ̧ bo na.» 24Ɓɛɛ dáà ko bem’ɛi tɔ̧ nɛ̀ hee-ger'e: «Mi kɔ̧ɔ̧ ɗɔaa ha̧ Sɔ̧, ɓɛɛ ɛ̀nɛ̀ gbák am ha̧ kɔ̧ɔ̧ɗɔɔwen kɔ‘m mɛ dɔk gan kuti-a.»

25Jesu zɔka giiwi nɛ̀ gar tɛnɛ nɛ̀ dɔka-a, ɓɛɛ de ŋmaa in ɗaŋ-sɔ̧-doe'i'e: «Mɛ́ ɗaŋ-sɔ̧ nɛ̀ de ha̧ zer-wi mɛ mgbe in ha̧ nú-wi mɛ kpe’ɛ, mi'e, mɛ̀ gbó tɛ bem’ɛ, ɓɛɛ ká mɛ pii ɗoŋ tɛ-a ɓɔna.» 26Nɛ́ mɔ'ɔ nɛ̀ ɗaŋ-sɔ̧-doe'i hiɗa mɔ, ɓɛɛ zuɗi bem’ɛi pi̧ nù nɛti sɛka a̧ gbo yak, ɓɛɛ bem’ɛi ŋgai kiŋgiri hee fio ga. Taamɔ ko o bíí‘e: «A̧ fee kaɗi.» 27Nɛ́ mɔ'ɔ nɛ̀ Jesu kasa er-a, ba a̧ e ŋgɔn, ɓɛɛ a̧ yor ŋgɔn katak.

28Jesu sii ɗoŋ kɔ̧́ tua kaɗi, ɓɛɛ o ŋgaiwi kɔ̧-a̧ ak a̧ ɛ̀nɛ́-a: «Ɓɛɛ nɛ̀ war k’ɛ́ɛ́, ɛ́ɛ́ nyɛm so mɛ ndak ɗaŋ-sɔ̧-doe'i na, wen ge?» 29Jesu kifa nú ha̧ wa: «Pɛrti ɗaŋ-sɔ̧ hegɔ‘i, wi kɔfi nɛ́ Sɔ̧ ndak nɛnɛ ɓɛɛ!»

Jesu tɔ̧ɔ̧ wen-fio kɔ‘i

(Zɔk Mt 17.2-23; Lk 9.43-45)

30Jesu yaka in o ŋgaiwi kɔ‘i ɓir nɛ̀ nú Galilee yak, ɓɛɛ a̧ kɔ̧ ha̧ bíí mɛ iŋ na, 31wen a̧ duk so usi nɛ̀ mɔ ha̧ o ŋgaiwi kɔ̧-a̧, tɔ̧ nɛnɛ ha̧ wa'e ndé: «Bem ko bíí tɛ ye er o bíí, wa tɛ gbɛ a̧; ŋgimbi nɛ̀ wa gbɛɛ a̧ kaɗi, ɗoŋ zɛ yiitoo, taar-a ɓɛɛ a̧ tɛ kur ŋgɔn tɛ fio.» 32Wa zii mgbara wen'i na, ɓɛɛ wa yu nɛ́ aka a̧.

Gasawi nɛ́ o?

(Zɔk Mt 18.1-5; Lk 9.46-48)

33Wa hɔɔ Kafarnaum; ɗoŋ nɛ̀ wa yee tua kaɗi, Jesu aka wa: «Nɛ́ ge wen ge ɛ̀nɛ̀ zaŋ nɛ̀ yuwar tɛnɛ'ɛ ge?» 34Ɓɛɛ wa ya sélélé, wen wa zaŋa wen nɛ̀ yuwar, ha̧ wa mɛ iŋ gasawi mgbara wa.#Lk 22.24 35Nɛ́ mɔ'ɔ nɛ̀ Jesu duka nù, sa o ŋgaiwi kɔ‘i ɓu-zua-yiitoo, ɓɛɛ tɔ̧ ha̧ wa: «Kà ŋma bíí nɛ́ kɔ̧ɔ̧ mɛ duk ti ha̧ o dɔka bíí, a̧ a̧ dúk nɛ́ sɔŋkur bíí in wi-de-tom ko bíí lɛŋ.»#Mt 20.26-27; 23.11; Mk 10.43-44; Lk 22.26 36Ɓɛɛ a̧ sa ŋma be geɗek bem e mgbara wa see-a, a̧ kɔŋgɔla ger-a ndaɗi nɛ̀ a̧, ɓɛɛ tɔ̧ ha̧ wa: 37«Wi nɛ̀ kpɛk ŋma geɗek bem, hee bem’ɛ ga, nɛ̀ nin-am, wi’ɛi kpɛk nɛ‘m; ɓɛɛ wi nɛ̀ kpɛk am, bó nɛ́ mi a̧ a̧ kpɛk na; a̧ kpɛk nɛ́ wi nɛ̀ toma'm tɛnɛ.»#Mt 10.40; Lk 10.16; Jn 13.20

Wi nɛ̀ sɛn yɛ na nɛ́ k’ɛɛ

(Zɔk Lk 9.49-50)

38Jean tɔ̧ɔ̧ ha̧ a̧: «Wan-usi-mɔ, ɛ́ɛ́ zɔka ŋma bíí nɛ̀ ndak ɗaŋ-sɔ̧ yinɛ tɛ bíí nɛ̀ nin'nɛ́. Ɛ́ɛ́ kɔ̧ɔ̧ so mɛ dor a̧ wen a̧ bo in yɛ̀ɛ̀ na.» 39Ɓɛɛ Jesu tɔ̧: «K’ɛ́nɛ́ dor a̧ na, wen ŋma bíí nɛ̀ nyɛma dee mɔɔ-kifi nɛ̀ nin-am kaɗi, ɓɛɛ tɛ̀ɛ̀ tɔ̧ ɗaŋ wen ha̧‘m nɛ̀ ɗoŋ bo na. 40Wen wi nɛ̀ sɛn yɛ na, wi’ɛi nɛ́ bíí k’ɛɛ.#Mt 12.30; Lk 11.23 41Wi nɛ̀ tɛ ha̧ yí-nɔɔ h’ɛ́nɛ́ wen ɛ́nɛ́ nɛ́ bíí ko Krist, nɛ́ kpasawen a̧‘m tɔ̧ h’ɛ́nɛ́, wi’ɛi tɛ kpa mɔɔ-oi dee demɔ kɔ‘i.»#Mt 10.42

Mɔɔ-ɗaŋ duka-a ko bíí

(Zɔk Mt 18.6-9; Lk 17.1-2)

42«Wi nɛ̀ tɛ de ha̧ ŋma bíí mgbara o bem nɔ'ɔ, nɛ̀ kɔ̧ɔ̧ ɗɔaa ha̧‘m’ɛ, mɛ́ de ɗaŋmɔ, gana so a'i kún zɔm dita ta-hɔ̧n-mɔ ger-a pi̧ a̧ ɗɔɔ ɗuka dir gba-tɔp. 43Kà er-mɛ nɛ́ ɔra mɛ mɛ de ɗaŋmɔ, nɛ̀ mɛ̀ ɓír a̧ yinɛ, wen gana so ha̧ mɛ mɛ kpasi nɛ̀ oi kpɔk ɓaa, bá nɛ̀ yea-a kɔ̧́ wee Gehɛn nɛ̀ bi na kpoo nɛ kpoo, nɛ̀ oi ɓaa-mɛ yiitoo lɛŋ. [#Mt 5.30 44Fara'i, wee bi sɛnɛ na ndó-ndó-ndó in o dɔk fe sɛnɛ na mbɛt.] 45Kà naŋ-mɛ nɛ́ ɔra mɛ mɛ de ɗaŋmɔ, nɛ̀ mɛ̀ ɓír a̧ yinɛ, wen gana so ha̧ mɛ mɛ kpasi nɛ̀ oi kpɔk ku, bá nɛ̀ pi̧i̧ mɛ kɔ̧́ wee Gehɛn nɛ̀ oi ku-mɛ yiitoo lɛŋ. [ 46Fara'i, wee bi sɛnɛ na ndó-ndó-ndó in o dɔk fe sɛnɛ na mbɛt.] 47Kà yí-mɛ nɛ́ ɔra mɛ mɛ de ɗaŋmɔ, nɛ̀ mɛ̀ sɔ́kɔ́ɗ‘a yinɛ, wen gana so ha̧ mɛ mɛ ye tɛ Wan ko Sɔ̧ nɛ̀ kpɔk yí, bá nɛ̀ pi̧i̧ mɛ nɛ̀ oi yí-mɛ yiitoo sɛn kɔ̧́ wee Gehɛn.#Mt 5.29 48Fara'i, wee bi sɛnɛ na ndó-ndó-ndó in o dɔk fe sɛnɛ na mbɛt.#Es 66.24 49Wen wee tɛ de ha̧ war-tɛ bíí lɛŋ mɛ sa̧, hee mɔ'ɔ nɛ tɔŋ de nɛnɛ in kpoo’ɛ ga.

50«Tɔŋ nɛ demɔ, ɓɛɛ kà kpɔra tɔŋ nɛ gboo kaɗi, wi tɛ de hee ge ha̧ a̧ mɛ kpɔr woyo ge? Duka-a k’ɛ́nɛ́ a̧ hɔ ŋmaa in nyɔŋmɔ nɛ tɔŋ a̧a̧ sɛnɛ, ɓɛɛ ɛ̀nɛ̀ ya nɛ de-a in o ŋmaa.»#Mt 5.13; Lk 14.34-35

Currently Selected:

MARK 9: GB11DC

Highlight

Copy