MƐ̀KÌKÌÌ MƐ ƁƐKƐ̀NÌ-FÌTOM 1
1
Rìtumɛ̀n ɗi Kaàtà à mɛ̀kìkìì mɛ ɓɛkɛ̀nì-fìtom
1Tyoofil, ɓi kaàtà wɛ̀m à ǹtonto, ǹkalìghà ɓìɓan ɓìcèm ɓi Yeesus à Kìghà, rì ɓi à rèsàkà, à tumɛ̀n a rìtumɛ̀n 2à kpaŋ ŋwos anɛ à ɓaa lɛ, à mɛ reɓsag ɓiɓan ɓii rì ìtèɗ wu Kitɛntɛ̀ɛ̀n ki Nghay rì ɓɛ̀kɛ̀nì-fìtom ɓɛ̀ à ɓɔ̀ngà, à ɓɔg min aɗyoo.
3Ajɛ̀m ì rìwu ɗii, à rèsɛ̀ngà ɓɔ, à ki rèsi ɓɔ ɓìrèmzɛnà lɛɛ̀gwey ɓi lɛ ɓɛɛ yi lɛ à rì cem; à rèsɛ̀ngà a lɔ̀ŋkaa, mɛ̀ru mɛ̀tin mɛɓɛɛ̀, à kakàlì ɓɔ ɓìɓan ɓi ɓi seesee kìlɔ̀ŋ ki Bɛ̀ll.
4Ŋwos adɛŋ ànɛ Yeesus à ɗiɗìghà ǹɗaŋ ɗi ɓɛ̀yilàg ɓii, nni à siŋdɛ̀ngà ɓɔ lɛ: Kɛ̀ ɓi Pɛ̀sɛn a Yorisalɛm, ɓoŋina lɔŋ ǹkàg wu Tààta à kàkà mìni, wɛɛ̀wu ǹwogsìghà mìni; 5lɛ Zyaŋ à ɓàɓtìghà ɓum ɗì mɛ̀nig, kìɓan kifog mìnii ri ɓiì ɓàɓtɛɛ ri Kìtɛntɛ̀ɛ̀n ki Nghay di ɓɔɔ mɛru ɓɛ ghaghii.
Yeesus à ɓɔɔgh aɗyoo
6Ɓɛ̀yilàg ɓɛ ɓaghà nyi ɓɛ̀taŋzɛn a nyòò, nni ɓɛ tɔkà nyi lɛ: Kan! Cààmɛ̀n ki kɛɛ̀ki ù rì nya ɓiì pɛ̀ɛ̀zii ki rɛsii kilamì ki Isirayɛl miì? 7Nni Yeesus à ɓàkà ɓɔ lɛ: Ki seesee ɓi mini lɛ ɓi yi gòn nsoò lɛ cààmɛ̀n ki Tààta nyimiɗ yɛɛ rengà rì ìtèɗ wii wu rilàmì. 8Kìɓan kifog ɓì ɓiì terì ìtèɗ wudɛŋ di Kìtɛntɛ̀ɛ̀n ki Nghay ki yuuyì ɓi mìni, fɔɔnnɛ ɓì rì ɓiì ɓaà ɓɛ̀wusìnɛ̀ɗ ɓɛm à tumɛ̀n a Yorisalɛm, à kpaŋ ɓi ziì Zyude bimiɗ, rì a Samari, à kɛ̀n kì kpaŋì a ɓɛ̀yɔ̀ŋyɔ̀ŋ ɓɛ zi.
9Lɔŋ yɛ̀ɛ à kpaaghà fɔlɔɔ, nni à tumɛ̀ngà rìɓɔg aɗyoo, ɓɛ̀roɓɛ̀n ɓɛ seesèè yɛ̀ɛ à ɓɔɓɔ̀kà à ràm à ɗim ɓɔ ɓi mis, di kìkwìɗ ki mɛ lɔg nyi. 10Nni yɛ̀ɛ ɓɛ cɛɛnɛ̀ngà fɔlɔɔ mis aɗyoo, cààmɛ̀n ki Yeesus à ɓɔkà, fɔɔnnɛ ɓɛ sigmɛ̀ngà di ɓum ɓɛ ti ɓɔ asu ɓɛɓɛɛ̀, rì ɓìlàà ɓi puɓ, 11ɓɛ kpaa ɓɔ lɛ: Mini ɓumɓɛ a Galile ɓɛ! Ɓi cɛ nnɛ ɓi cɛɛnɛɛ foo mis aɗyoo? Yeesus ànɛ à pɛ̀sɛɛ ànɛn ɓi nyìinyìm wìn, à ɓɔg aɗyoo, à ri sugtiigɛy lɔŋ yɛ̀ɛ ɗi ɓì ghɛɛ nyi ɗìn di a ɓɔɓɔg aɗyoo.
12Fɔɔnnɛ ɓɛ̀yilàg ɓɛ sugtìghà min a Yorisalɛm, lɛ ɓɛ ɓaghà ɓi dòn ìnɛ ì ɓaghà ɗii lɛ, dòn ì ɓɛ̀òlìvyee, yɛ̀ɛ raɓsɛ̀ngà rì Yorisalɛm com ki kpaŋɛn bimiɗ à kilòmɛɛ̀tìrɛ̀. 13Yɛ̀ɛ ɓɛ kpagà a Yorisalɛm, ɓɛ ɓɔg ɓi mɛɛ mɛ aɗyoo, ɓi kìden ki naa ki ɓɛ nkɔ̀ràg miì; ɓɛ ɓaghà lɛ: Rì Pyɛɛri, rì Zyaŋ, rì Zyag, rì Andire, rì Filiɓ, rì Tomas, rì Batelemi, rì Matyoo, rì Zyag à man à Alfe, rì Simɔn ànɛ à ɓaghà ɓi nɗaŋ wu ɓɛ̀zelot ri Zyuudɛ à man à Zyag. 14Ɓɛ ǹti ɓɛ taŋzàg ɓɔɔ̀cèm lɔŋ nɗem wùfog lɛ ɓɛɛ ɓɔŋzag Bɛ̀ll, ǹɗaŋ ri ɓɛ̀yiɓ, rì Marii à jɛɛ Yeesus, rì ɓɛ̀geni ɓɛ Yeesus.
Ɓɛ ɓɔni Matyas lɛ a teɗ ìkɔ̀ɔ̀ wu Zyudas ɓi bàlìì ɓɛ̀kɛ̀nì-fìtom
15Ŋwos adɛŋ, ɓi mɛ̀ru mɛ̀n, ɓɛ̀gherɛ̀n ɓɛ ɓaghà ɓɛ̀ taŋzɛn nunùg ɓum mɛ̀tin taàfog; nni Pyɛɛri à pɛ̀sɛ̀ngà aɗyoo ɓi nyìinyìm wàà, à kpaa lɛ: 16Ɓɔɔsoŋ̀! kìɓan ki Kìtɛntɛ̀ɛ̀n ki Nghay ki lokà kì rèsii ɓi kaàtà à Bɛ̀ll, ɓi ŋwɔm wu Davit, ki rarɛ̀n ɗì Zyudas ànɛ à syògày ɓumɓɛ ɓɛ ɓangà Yeesus bee, ki ghɛɛ̀sɛ̀ngà lɛ kɛɛ kilɛ̀n. 17Zyudas àa nɗì kìbog ki ɓi ǹɗaŋ wis, àa nki rì rì gàɓ ɓi kìsay ki tì rì rì kɔ. 18Ŋwaànɛ̀n à làkà dɛm ri mɛ̀lèɓ mɛ à fɔ̀ngà ɓi kìɓe kii, à ki kpì ǹto duŋzi kìbuutug ki lanì, ɓyom ɓii ɓi ɗùm ɓi tyaŋzɛ̀n. 19Ɓum ɓɛ̀cèm ɓɛ a Yorisalɛm ɓɛ yighà kìɓan kiǹ, kɛɛ kighà lɛ ɓɛɛ reŋi dɛm inɛ̀n ɓi kìtòkì kaa lɛ Akɛldama, yɛɛ lɔɔ lɛ, dɛm i bwaɓ. 20Wɔ̀lɛ ki ri kì kànɛn ɓi kaàtà à Ɓɛ̀sam lɛ:
Ɓɛ ghɛɛ̀sɛɛ kì rinii mɛɛ mii, mum kɛ̀ɛ kɔ̀ri miì, ri tì lɛ: Ŋwaàdɛŋ à ghɛ̀ɛ̀sɛɛ kì terì ìkɔ̀ɔ̀ wii wu kisày.
21Ki ghɛɛ̀sɛɛ lɛ, yɛ̀ɛ ɓum ɓɛdɛŋ ɓɛ kɛɛ̀kɛ̀ɛ̀ghà rì ɓìsi cààmɛ̀n kìcèm ki Kan Yeesus à rerènìghà kìlɔ̀ŋ nɗaŋ ri ɓìsi, 22à tumɛ̀n lɔŋ yɛ̀ɛ Zyaŋ à ɓàɓtìghà nyi à kpaŋ yɛ̀ɛ àa m̀pɛsɛɛ ɓi nyìinyìm wìs a ɓɔg aɗyoo, kìbog ki ɓi ɓɔ kɛɛ ɓasɛn ɗì ɓìsi lɛ kɛɛ ɓa wusìnɛ̀ɗ ɓi rìghèmɓɛ̀n ɗii.
23Fɔɔnnɛ ɓɛ rɛsìghà min ɓum ɓɛɓɛɛ̀ lɛ rì Yoosɛɓ ànɛ à ɓaghà ɗii lɛ Ɓarisaɓas, nyinnɛ ɓɛ nkpɔgì tì lɛ Yustus, rì Matyas. 24Nni ɓɛ ɓɔŋzìghà Bɛ̀ll ɓɛ kpaa lɛ: Kan, wɔ̀ yɛɛ yii mɛ̀rem mɛ ɓum ɓɛ̀cèm, rèsi ɓìsi ghɛn innɛ ù ɓɔ̀ni ɓi ɓum ɓɛ kiɓɛ̀ɛ̀ ɓɛ 25lɛ a teɗ ìkɔ̀ɔ̀ wu nkɛ̀nì-fìtom wu Zyudas àa ncàri, à kɛ̀n kì terì wu wu nghɛ̀ɛ̀sɛɛ rì nyi. 26Fɔɔnnɛ ɓɛ pikà ǹtɔ̀ŋ rì mii maa, ǹtɔ̀ŋ à kpì ɓi ɗii ɗi Matyas, ɓɛ ɓas min nyi rì kìntɛ̀ɗ ɗì bog ki ɓɛ̀kɛ̀nì-fìtom kimbog.
Currently Selected:
MƐ̀KÌKÌÌ MƐ ƁƐKƐ̀NÌ-FÌTOM 1: BAFNT
Highlight
Share
Copy
Want to have your highlights saved across all your devices? Sign up or sign in
Bafia Nouveau Testament © Bible Society of Cameroon, 2019.
