MƐ̀KÌKÌÌ MƐ ƁƐKƐ̀NÌ-FÌTOM 2
2
Rìyù ɗi Kitɛntɛ̀ɛ̀n Ki Nghay
1Ŋwosi Pàŋtèkot, ɓɛ̀gherɛ̀n ɓɛ̀cèm ɓɛ ɓaghà ɓɛ̀ taŋzɛn jàŋbog. 2Nni ɓɛ sigmɛ̀ngà lɛ, gom ì rìì aɗyoo, ì ɓa yɛ̀ɛ gom ì coo bɛ̀ɓ ki kɛɛ̀ fɛɛfɛɓsì, ki yu kì ronì naa ìnɛ ɓɛ ɓaghà miì. 3Fɔɔnnɛ ɓɛ ghɛngà ɓyom yɛ̀ɛ mɛ̀ròò mɛ ɗuu, ɓincèm ɓì ghasakɛn dɛŋ-dɛ̀ŋ-dɛŋ di ɓyɛɛ̀ ɓɛ̀ɓɛli ɓɔ ɓi nyòò. 4Ɓɛ̀sɛ̀ɛ̀ ɓɛ̀cèm ɓɛ ɓa min ɓɛronɛn ri Kìtɛntɛ̀ɛ̀n ki Nghay, ɓɛ ki tòtog ɓitòkì ɓidɛŋ lɔŋ yɛ̀ɛ Nghay à fafàghà ɓɔ ìtèɗ wu lɛ ɓɛɛ totòg.
5Wɔ̀lɛ Ɓɛ̀yudɛ̀n ɓɛ ɓɛ falɛ̀ngà ɓi rìgherɛ̀n ɓɛ ɓaghà girig a Yorisalɛm, di ɓɛ pɛsaagh yì ɓi ɓìlɔ̀ŋ ɓìcèm ɓi ɓi ziinɛ. 6Yɛ̀ɛ gom ìnɛ̀n ì kìlɛ̀ngà fɔlɔɔ, ɓum ɓɛ ghɛŋmɛ̀n yì nni yɛ̀ɛ mum ǹcèm ànɛ ɓi ɓumɓɛ̀n à woogh di ɓɛ̀kɛ̀nì-fìtom ɓɛɛ̀ tòtog kitòkì kii, ɓɛ rɔɓ lɛ rèèree. 7Ɓɛ̀sɛ̀ɛ̀ ɓɛ̀cèm ɓɛ kuuràkà ɓɛ rɔɓ myɔm ɓìkpaŋ. Fɔɔnnɛ ɓɛ tɔɔ̀tɔ̀ɔ̀ghrɛ̀ngà ɓɔrìɓɔ lɛ: Nti ɓum ɓɛ̀cèm ɓɛ ɓɛɛ̀ tòtog ɓɛ, ɓɛ rì ɓumɓɛ a Galile? 8Nni cɛ kɛɛ kiì lɛ, mum bimiɗ ànɛ ɓi ɓìsi a wowog di ɓɛɛ̀ tòtog kitòkì kii? 9À tumɛ̀n lɛ ɓɛ̀-Paritɛ, ɓɛ̀-Mɛɛɗɛ, ɓɛ̀-Elamit, ɓumɓɛ a Mɛzopotamii, ri ɓɛ a Zyude rì ɓɛ a Kapados, rì ɓɛ a Pɔŋ, rì ɓɛ a Azii, 10ɓɛ̀roɓɛ a Firizii, rì ɓɛ a Paŋfilii, rì ɓɛ a Egiɓtɛn, rì ɓɛ ɓi, kìden ki zi ki a Liɓii ki ki wòŋzɛɛ rì Sirɛn, rì ɓɛ̀roɓɛ ɓɛ pɛsɛ̀ngày a Rom, à teɗ lɛ, Ɓɛ̀yudɛ̀n ɓɔmiɗ, rì ɓɛ̀roɓɛ ɓɛ lɔɔ̀ghrɛ̀ngà ɓi rìgherɛ̀n ɗi Ɓɛ̀yudɛ̀n à kpaŋ lɛ, 11ɓumɓɛ a Kirɛɗɛ, rì ɓɛ a Araɓii, cɛ kɛɛ kii lɛ, ti wowog yɛ̀ɛ ɓɛɛ̀ kakali dàm yi ɓiɓan yi Bɛ̀ll ɓi ɓìtòkì ɓis? 12Ɓɛ̀sɛ̀ɛ̀ ɓɛ̀cèm ɓɛ kuuràkà; ɗyomzɛ̀n ɗi ɗim ɓɔ, ɓɛ tɔɔ̀tɔ̀ɔ̀ghrɛ̀n ɓɔmiɗ lɛ: Rìkuu ɗi kiɓan aɗi ɗyɛɛ̀ ri lɛ? 13Kìɓan kifog, ɓum ɓɛdɛŋ ɓɛ wɔwɔ̀là ɓɛ̀yilàg ɓɛ kpaakpàà lɛ, ɓɛ ri ɓɛ̀ŋwaŋɛn mɛrɔ̀g lɛ kɔɔ̀kɔɔ̀.
Ɓìtòkì ɓi Pyɛɛri
14Nni Pyɛɛri à pɛ̀sɛ̀ngà aɗyoo rì ɓɛ̀kɛ̀nì-fìtom ǹtɛ̀ɗ rì bog, à kpaa ɓumɓɛ̀n jɛ̀ɛ̀ aɗyoo lɛ: Mìni Ɓɛ̀yudɛ̀n, rì mini ɓɛ̀sɛ̀ɛ̀ ɓɛ̀cèm ɓɛ ɓi kɔ̀kɔrii a Yorisalɛm, ramina mɛ̀ree, ɓi wog kìɓan ki nkìki lɛ, nkpaà mìni: 15Ɓumɓɛ ɓɛ ŋwaŋi ɓi mɛrɔ̀g yɛ̀ɛ ɓi fèfeg lɔɔ, lɛ mɛ̀kɛ̀ɛ̀ taànìn à sariwa yɛɛ kaka lɛ. 16Kìɓan kifog, Bɛ̀ll yɛɛ roozii jɛ̀ɛ̀ yìì inɛ à kpaaghà ɓi ŋwɔm wu ǹkpaŋzì-ɓìɓan wiì ànɛ lɛ Zyuwɛl lɛ: 17Ɓi mɛ̀ru mɛ siitòn, ǹɗomigɛy Ǹghay wɛ̀m ɓi mum bimiɗ, fɔɔnnɛ ɓɛ̀dɛlì ɓin rì ɓɛ̀gɔ̀n ɓin ɓɛ ɓaà gɛ ɓɛ̀kpaŋzì-ɓìɓan ɓɔn ɓin ɓɛ ghɛnghɛ̀n dàm yi ɓiɓan rì ìtèɗ wu Nghay à Bɛ̀ll, ɓìdɛ̀ndɛm ɓi kikì ɓìtùg ɓin ɓi ɓum. 18Ɛ̀ɛ̀! ɓi mɛ̀ru mɛ̀n nfoŋi gɛ Ǹghay wɛ̀m ɓi ɓɛ̀kìì-ɓìsay ɓɛm lɛ, rì ɓɛ ɓɛbaŋì, rì ɓɛ ɓɛ̀yiɓ lɛ ɓɛɛ kpaŋzi ɓìɓan. 19Nɗi kìi gɛ lɛ dàm yi ɓiɓan yɛɛ resɛn ɓi ɗyoo ɓi ɗùm, ɓɛ̀koŋnyoo ɓɛ ɓiɓan ɓɛ kilɛ̀n ɓi ziinɛ; rì bwaɓ, rì ɗuu, rì fìsilì ɓi ɓaa gɛ; 20ŋ̀wos à suu gɛ ɓi mis yɛ̀ɛ birìm, ŋwii à lɔɔ̀ghrɛ̀n m̀ɓàŋ yɛ̀ɛ bwaɓ, di gòn i rìyù ɗi Kan ì ka kpaŋ ɓi, yɛ̀ɛ ri ɓaa gɛ coo ŋwos a rìkem ɗii. 21Fɔɔnnɛ mum ǹcèm ànɛ à reŋii gɛ ɗii ɗi Kan lɛ a ghɛɓsi nyi à ghɛɓi gɛ.
22Mìni ɓumɓɛ a Isirayɛl, wooghna kìɓan ki nkìki lɛ, nkpaà mìni: Yeesus ànɛ a Nazarɛt àa nɗì ŋwaànɛ Bɛ̀ll àa ǹɗèsii mìni lɛ, nnyɛɛ romgày nyi, ɓi dàm yi ɓiɓan, rì ɓɛ̀koŋnyoo ɓɛ ɓiɓan, rì ɓìrèmzɛnà ɓi à faghà nyi ìtèɗ wulɛ a ki ɓi nyìinyìm wìn lɔŋ yɛ̀ɛ mìniìɓɔmiɗ ɓì yii. 23Yeesus ànɛn innɛ ɓɛ nkàɓi lɔŋ yɛ̀ɛ ki ɓaghà kìkaliyɛn, lɔŋ yɛɛ̀ Bɛ̀ll à fèkà ɓi coo ɗyomzɛ̀n ɗii, nyi nnɛ ɓìi nkpani ɓi kɔrɔs aɗyoo, ɓì ki fa nyi rì ɓɛ̀kìì-kìɓe lɛ ɓɛɛ wey. 24Wɔ̀lɛ Bɛ̀ll àa ǹghèmzii nyi, à fùmì nyi bɛn yi riwù, lɛ ki n-yin lɛ ki kilɛ̀n lɛ, rìwu ɗyɛɛ ghaatɛn yì rì nyi. 25Lɛ Davit à ɓùgà kìɓan kii yɛ̀ɛ à kpaaghà lɛ:
Ǹseesèèghà lɔŋ Kan mɛ̀ asu ɓyààmɛ̀n ɓìcèm, ɓisuulɛ, à rì mɛ̀ ɓi weèlem lɛ m̀ɓa kɛ̀ɛ ǹnìŋdɛ̀n. 26Kìɓan kiǹ kɛɛ̀ki ǹɗem wɛ̀m wu roni rì kìnyàà, ɓìtòkì ɓyɛm̀ ɓi ki ɓa ɓikpakpag ɓi kinyàà; nsoò nyoo yɛ̀m ì rì ɓiì fɔɔsɛɛ lɛ fyòoog rì ǹtyweeyi wu ǹɗì rì wɔ. 27Lɛ, wàa rini ɓi ǹghay wɛ̀m a ǹyɔ̀ɛ̀y ìsuùcèm, kɔ̀ɔ ki gherɛn lɛ ǹkìì-kìsay wɔɔ̀ ànɛ àrì ǹtɛnɛn a ɓwɛy ɓi zɔ̀ŋ. 28Ù rèsìghà mɛ̀ bee ì cɛɓ, fɔɔnnɛ rìɓa ɗi ù rì mɛ̀ jàŋbog, ɗi ri fa mɛ coo kinyàà.
29Ɓɔɔsoŋ̀, ǹɗì lɛ ǹkpaa mìni lɛ tɛntɛ̀ɛ̀n ɓi ɓɛg ànɛ yɛ̀ɛ Davit à seŋi wis a ǹsɛ̀ɛ̀ lɛ: À wughà, ɓɛ ki ɓòm nyi, zɔ̀ŋ yìì i rì fɛ a lɔ̀ŋkis à kpaŋ gɛɛ̀nɛ. 30Kìɓan kifog, yɛ̀ɛ à ɓaghà ǹkpaŋzì-ɓìɓan à ki yi ǹkàg wu Bɛ̀ll à kàkà nyi à kànɛ̀n bɛ̀ɗ lɛ, à kɔ̀ɔ̀sii gɛ dòò yìì idɛŋ ɓi-kɔ̀ɔ̀ wii wu rilàmì, 31rìghèmɓɛ̀n ɗi Kiris ɗyɛɛ̀ɗi à lokà lɔɔ ki ghɛɛ̀, à ki kpaa lɛ: Bɛ̀ll àa rini ɓi nyi a nyɔ̀ɛ̀y, kɛ̀ɛ ki càɗ lɛ nyoo yìì yɛ̀ɛ ɓwɛy ɓi zɔ̀ŋ. 32Yeesus ànɛ̀n nnɛ Bɛ̀ll àa ǹghèmzii, ɓìsiìcèm tì rì ɓɛ̀wusìnɛ̀ɗ ɓɛ ɓi rìghèmɓɛ̀n ɗii. 33Yɛ̀ɛ àa mɓɔɔ ki kɔ̀rii ɓi weèlem à Bɛ̀ll, Seŋi àa nfaa nyi Kìtɛntɛ̀ɛ̀n ki Nghay ki à kàkà, kɛɛ̀ki à romiì lɔŋ yɛ̀ɛ ɓi seesee lɛ, ɓì ki wowog. 34Davit à ɓɔkà ɓi aɗyoo kìɓan kifog nyimiɗ a kalag lɛ: Kan Bɛ̀ll à kàlighà Kan wɛ̀m lɛ, kɔ̀ri mɛ̀ fɛ ɓi weèlem 35à kɛ̀n kì kpaŋì yɛ̀ɛ ǹɗì ɓiì ghaasii ɓɛ̀bènàbena ɓɔɔ com ki, u rɛsag mɛ̀kòò miì.
36Ɓum ɓɛ̀cèm ɓɛ a Isirayɛl ɓɛ ghɛɛ̀sɛɛ kì yiì syeesyee à rìyi lɛ, Bɛ̀ll àa ǹkìi lɛ, Yeesus ànɛ ɓìi nkpani ɓi kɔrɔs aɗyoo a ɓa lɛ nyi Kan wis, nyi Kiris.
37Yɛ̀ɛ ɓɛ wokà ɓìtòkì ɓi Pyɛɛri ɓiǹ, ɓi ɗiŋì ɓɔ ɓi ǹɗem lɛ kɔɔ̀kɔɔ̀, nni ɓɛ tɔkà Pyɛɛri ri ɓɛ̀kɛ̀nì-fìtom ɓɛm̀bog lɛ: Ɓɔɔsoŋ̀, ki ghɛ̀ɛ̀sɛɛ min lɛ ti ki la?
38Pyɛɛri à ɓàg ɓɔ lɛ: Lɔ̀ɔ̀ghrɛɛna mɛ̀rem, mum ǹcèm ànɛ ɓi mìni à ki ɓàɓtɛn ɓi ɗii ɗi Yeesus Kiris fɔɔnnɛ Bɛ̀ll a cenɛn ɓìɓe ɓin, à ki fa mini Kìtɛntɛ̀ɛ̀n ki Nghay. 39Lɛ ǹkàg wu Bɛ̀ll à kàkà wu ri ɓisu win, rì ɓisuu ɓɔn ɓin, wu ki ɓa ti ɓisuu ɓum ɓɛ̀cèm ɓɛ ɓɛ ri tìràɓ, ɓɛɛ̀ɓɛ Kan Bɛ̀ll wìs à regiigɛy bàlì ìnɛ ki kɔ̀ni gɛ nyi lɛ a regiì. 40Fɔɔnnɛ Pyɛɛri à rèrèsìghà ɓɔ saaɗ, à ki rereɓ ɓɔ rì jɛ̀ɛ̀ yidɛŋ yi à kpaatìghà ɓɔ nwèe: Pɛ̀sɛɛnas̀ lɛfyɛ̀ɗ ɓi nyìinyìm à ɓumɓɛ ɓɛ ri ɓi rìɗim ɓi ɗùm.
41Ɓumɓɛ ɓɛ gherɛ̀ngà rìkpaa ɗi Pyɛɛri ɗiǹ ɓɛ ɓaɓtàkà, fɔɔnnɛ bàlì ì ɓum ìnɛ ì sagtɛ̀ngà ɓi bàlì ì ɓɛ̀gherɛ̀n, ì ɓaghà nunùg ɓum ɓɛ̀tɔɔsìm ɓɛraa.
42Ɓɛ siìrɛ̀ngà ɓi rìwowòg ɗi rirèsàg ɗi ɓɛkɛ̀nì-fìtom, rì ɓi cɛɓ ki rigeni, rì ɓi rìcusàg ɗi bìrɛs, rì ɓi bɔ̀ŋzɛ̀n. 43Ìris wu ɓangà mum ǹcèm ànɛ ɓi ɓɔ, lɛ ɓɛ̀kɛ̀nì-fìtom ɓɛ kikìghà dàm yi ɓiɓan rì ɓɛ̀koŋnyoo ɓɛ ɓiɓan, lɛɛ̀gwey. 44Ɓɛ̀gherɛ̀n ɓɛ ɓaghà kìbyɔg kìfog, ɓyom ɓyaa ɓìcèm ɓi ɓa bùtag. 45Ɓɛ kakàɓkà lɛ: Rì ɓìden ɓyaa ɓi zi, rì ɓyom ɓyaa, ɓɛ kaàkàɓɓɛ̀n mɔɔ̀ni mɛ miì ɓɛ̀sɛ̀ɛ̀ ɓɛ̀cèm, mum bimiɗ à tekì gàɓ ìnɛ ì ghɛ̀ɛ̀sɛɛ rì nyi. 46Cààmɛ̀n kìcèm ɓɛ ǹti ɓɛ taŋzàg ɓi naà-Bɛ̀ll ŋwos bimiɗ, ɓɛ ɗiɗì ɓìɗilàg ɓyaa ǹɗaŋ ɓi naa yaa ɓɛ ɗiɗì ɓyɔ rì kìnyàà, rì ǹɗem wu risɛɛ̀dɛ̀n. 47Ɓɛ mɓɔgsàg Bɛ̀ll, ɓum ɓɛ̀cèm ɓɛ ki keekeèsì ɓɔ, fɔɔnnɛ Kan à tèèghtègsìghà ǹɗaŋ waa ɓɛ ŋwos ɓɛ̀cèm rì ɓum ɓɛ ki kɔngà Bɛ̀ll lɛ a ghɛɓsi.
Currently Selected:
MƐ̀KÌKÌÌ MƐ ƁƐKƐ̀NÌ-FÌTOM 2: BAFNT
Highlight
Share
Copy
Want to have your highlights saved across all your devices? Sign up or sign in
Bafia Nouveau Testament © Bible Society of Cameroon, 2019.
