ZYAŊ 16

1Màa kpaa mìni ɓìɓan ɓiǹ lɛ kɛ̀ ɓi kɛ̀ɓtɛn fìɓàg. 2Ɓɛ ri nàɓ mini ɓi naa yi bɔ̀ŋzɛ̀n; cààmɛ̀n ki riì kɔm̀, kɔ yɛɛ ri ɓa lɛ, i mum à woli kìbog ki ɓi mìni, à fèkì lɛ à kìi Bɛ̀ll kìsay. 3Ɓɛ ri ɓiì kìkii fɔlɔɔ lɛ, ɓɛ yighà ɓi Tààta, ɓɛ̀ kɛɛ̀ ki yi mɛ. 4Wɔ̀lɛ màa kpaa mìni ɓìɓan ɓiǹ lɛ yɛ̀ɛ cààmɛ̀n ki ri kpaŋ, ɓì yitì lɛ ǹkalìghà mìni ɓyɔ̀. Ǹkalìghà ɓi mini ɓyɔ a rìtumɛ̀n ɓisuulɛ m̀ɓaghà rì mìni.

Kìsay ki Kitɛntɛ̀ɛ̀n ki Nghay

5Ɓigomìnɛ ǹkɛ̀ɛ yɛ̀ɛ roànɛ à romgày mɛ̀. Nsoò wààdɛŋ ù tɔɔgh ɓi mɛ lɛ, ù kɛ̀ɛ fe? 6Wɔ̀lɛ bim i mɛ ron mini ɓi mɛ̀rem ɓisuulɛ, màa kpaa mìni ɓìɓan ɓiǹ. 7Ǹsoò fɔlɔɔ, ǹkpaa mìni saaɗ lɛ ki ri mìni kìrɔɔ lɛ nkɛǹ; lɛ i ǹkɛ̀ɛ ɓi, m̀maasì-mɛ̀rem à yin lɛ à yù a lɔ̀ŋkin; wɔ̀lɛ i ǹkɛ̀ɛ, ǹɗom yì mìni nyì. 8Nni yɛ̀ɛ à ri yù, à ri konag ki rèsii ɓumɓɛ ɓi ziinɛ lɛ, mɛ̀yitì maa ɓi kìɓan ki kiɓe, rì ɓi saaɗ, rì ɓi rìren ɗi ɓiɓan ɗi Bɛ̀ll, mɛ ri kìtɛ̀ŋtɛ̀ŋ. 9Mɛ ri kìtɛ̀ŋtɛ̀ŋ ɓi kìɓan ki kiɓe ɓisuulɛ, ɓɛ gherɛɛ ɓi mɛ. 10Mɛ ɓa zɛ̀ɗ ɓi kìɓan ki saaɗ ɓisuulɛ, mɛ̀ ǹkɛ̀ɛ yɛ̀ɛ Tààta, ɓyàa ghɛɛ̀di ɓi mɛ. 11Mɔ zɛ̀ɗ ɓi kìɓan ki riren ɗi ɓiɓan ɗi Bɛ̀ll, ɓisuulɛ, kìɓan ki rifòm ɗi ziinɛ ki mɛ renɛ̀n.

12Ǹkaka rì ɓìɓan lɛɛ̀gwey ɓi lɛ nkpaà mìni, nni ɓì yin lɛ ɓì wog ɓyɔ ɓigomìnɛ. 13Lɔŋ yɛ̀ɛ Nghay à ɓɛ̀kɔɔ̀kɔɔ̀ ɓɛ ɓiɓan a ri yù, à ri rèsi mini saaɗ bimiɗ. Lɛ, àa kpaa ɓi mini ɓìɓan ɓi nyimiɗ yɛɛ ɓekii lɛ a kpaà, à rì lɔŋ mini ɓiì kpaà ɓìɓan ɓìcèm ɓi à woogh, à ki kpaa mini ɓìɓan ɓi ɓi ghɛɛ̀sɛɛ kì kìlɛɛ ɓi mɛ̀ru mɛ asu. 14À rì mɛ̀ ɓiì kemzii ɓisuulɛ à ri teɗ ɓiɓan ɓyɛm̀, à kpaa mìni ɓyɔ̀. 15Ɓìɓan ɓìcèm ɓi Tààta à rì rì ɓyɔ, ɓi ri ɓiŋkɛ̀m, fɔlɔɔ nnɛ màa kpaa miì lɛ, Nghay à ri teɗ ɓiɓan ɓyɛm̀, à kpaa mìni ɓyɔ̀.

Ǹɗemi-kɛŋɛn wu ɓiì lɔ̀ɔ̀ghrɛɛ kinyàà

16Cààmɛ̀n lɛsàg ɓyàa ghɛɛ̀di ɓi mɛ; nni yɛ̀ɛ maa cààmɛ̀n à ɓiì ghaghii ti, ɓì ghɛɛ̀di mɛ̀.

17Fɔɔnnɛ ɓɛ̀yilàg ɓii ɓɛdɛŋ ɓɛ tɔɔghrɛ̀ngà wɔɔ ɓɔ rì ɓɔ lɛ: Kìɓan ki à kpaa ɓìsi ki, ki ri ɓà azi lɛ cɛ? À kpaa lɛ: Cààmɛ̀n lɛsàg ɓyàa ghɛɛ̀di ɓi mɛ. Yɛ̀ɛ maa cààmɛ̀n à ɓiì ghaghii ti, ɓì ghɛɛ̀dì mɛ̀, rì tì lɛ ǹkɛ̀ɛ yɛ̀ɛ Tààta. 18Fɔɔnnɛ ɓɛ kpaaghà lɛ: Cààmɛ̀n lɛsàg ànɛ à kpaa ànɛ, à rì azi lɛ cɛ? Ɓìsii woogh ɓi com ki a kɔ̀nkɔn lɛ a kpaà.

19Yeesus à yighà lɛ ɓɛɛ̀ kɔ̀nkɔn lɛ ɓɛɛ tɔg nyi kìɓan kiǹ; fɔɔnnɛ à kpaaghà ɓɔ lɛ: Ɓi tɔɔtɔɔ̀ghrɛ̀n azi anɛ ɓi kìɓan ki màa kpaa mìni lɛ, cààmɛ̀n lɛsàg ɓyàa ghɛɛ̀di ɓi mɛ, nni yɛ̀ɛ maa cààmɛ̀n à ɓiì ghaghii ti ɓì ghɛɛ̀dì mɛ̀. 20Ǹkalii mìni saaɗ à rìkalì lɛ ɓì ɓiì kìi lɛ ɓì rèn, ɓì ki seeghkɛn, ziinɛ yɔ̀ɔ̀ nyàànyàà. Ɓì ri ɓa ri ǹɗemi-kɛŋɛn, kìɓan kifog ǹɗem win wu kɛŋɛn wu ɓiì lɔ̀ɔ̀ghrɛɛ kinyàà. 21Cààmɛ̀n ki giɓ a kɔ̀rii ɗyem, à rì nɗem wu ɓeɓtɛn lɛ cààmɛ̀n kii ki ntɔɓ ki kpaŋi. Nni i man à mɛ yalɛ̀n, à ɗimzɛ̀n rìkɛŋ ɗii ɗiǹ lɛ kìnyàà ki à rì rì kɔ lɛ ǹto wu mum wu yalɛɛ ɓi ziinɛ. 22Fɔlɔɔ nnɛ mìni girig bì rì rì ǹɗemi-kɛŋɛn ɓigomìnɛ, kìɓan kifog ǹɗi ghɛɛ̀di mini. Nni yɛ̀ɛ ǹɗi ghɛɛ̀di mini, mɛ̀rem min mɛ ri wog kinyàà, mum àa ki ɓàtɛn ti ɓi mini kìnyàà kiǹ. 23Ŋwos anɛ̀n, ɓyàa tɔg ti ɓi mɛ kìɓan. Ǹkpaa mìni ɓi saaɗ lɛ: Com kìcèm ki ɓì ri tɔg Tààta, à ri fa mini kɔ ɓi ɗii ɗyɛ̀m. 24À kpaŋ ɓigomìnɛ, ɓì ka tɔg ɓi com kidɛŋ ɓi ɗii ɗyɛ̀m. Tɔɔghna, ɓɛɛ fa mìni, di fɔɔnnɛ kìnyàà kin kɛɛ roǹ. 25Màa kpaa mìni ɓìɓan ɓiǹ ɓi dàɗkì. Cààmɛ̀n ki riì kɛɛ̀ki màa tòòghrɛn ti ɓi ri mìni ɓi dàɗkì, ǹɗi kpaa lɔŋ mini ɓìɓan ɓi ɓi seesee Tààta lɛ tɛntɛ̀ɛ̀n. 26Ŋwos anɛ̀n ɓì tɔɔgh gɛ Tààta ɓìɓan ɓi ɗii ɗyɛ̀m, nni mɛ̀ ǹki kalii ɓi mìni lɛ, m̀ɓɔ̀ŋzaagh gɛ Tààta ɓisu wiǹ; 27lɛ Tààta nyimiɗ a keesii mìni ɓisuulɛ ɓì keesìghà mɛ̀, ɓì ki gherɛn lɛ m̀pɛ̀sɛ̀ngày yɛ̀ɛ Bɛ̀ll. 28M̀pɛ̀sɛ̀ngày yɛ̀ɛ Tààta, ǹ-yùy ɓi ziinɛ. Nni ɓigomìnɛ m̀pɛ̀sɛɛ ɓi ziinɛ, ǹsugtì yɛ̀ɛ Tààta.

29Fɔɔnnɛ ɓɛ̀yilàg ɓii ɓɛ kpaaghà nyi lɛ: Ghɛna ɓà min yɛ̀ɛ u tòtog ri ɓìsi ɓigomìnɛ lɛ tɛntɛ̀ɛ̀n, kɛ̀ɛ̀ dàɗkì. 30Ɓigomìnɛ tì mɛ yi lɛ ù yii ɓìɓan ɓìcèm, rì tì lɛ, ki ghɛɓsii ɓi com lɛ mum a tɔg wɔ̀ ǹtɔɔ̀tɔɔgh. Fɔlɔɔ nnɛ tì gherɛɛ miì lɛ ù ɓaghày yɛ̀ɛ Bɛ̀ll. 31Nni Yeesus à ɓàkà ɓɔ lɛ: Ɓigomìnɛ nnɛ ɓì mɛ gherɛ̀n? 32Ɓì ghɛɛ! Cààmɛ̀n ki riì, kiŋcèm ki mɛ kpaŋ, kɛɛ̀ki ɓì ɓiì tyàŋzɛɛ, mum ǹcèm à nɔ̀ɔ̀tì bee yiì, ɓi càɗ mɛ̀ cɛ̀ncɛm; nsoò fɔlɔɔ, ǹ-yin cɛ̀ncɛm, lɛ Tààta à rì ɓɛɛ̀ mɛ̀. 33Mɛ̀ɛ ǹkpaa mìni ɓìɓan ɓiǹ lɛ, ɓi ɓa rì fyòoog a lɔ̀ŋkɛm̀. Ɓì ɓiì ɓaà rì ǹ-yeesɛ̀n ɓi ziinɛ nni sììriina mɛ̀rem, mɛ̀ m̀mɛ yag ziinɛ ɓi-tèɗ.

Currently Selected:

ZYAŊ 16: BAFNT

Highlight

Copy