LUKAS 2

Rìyalɛ̀n ɗi Yeesus

(Mt. 1:18-25)

1Ɓi cààmɛ̀n kiǹ, kaaza ànɛ à ɓaghà ɗii lɛ Ogus, à lamìghà lɛ ɓɛɛ ɓay ɓum ɓɛ̀cèm ɓɛ ɓi zi bimiɗ. 2Bàlì ìnɛn yɛ̀ɛ ɓaghà ǹtonto à bàlì, ànɛ à kìlɛ̀ngà ɓi cààmɛ̀n ki Kirinus à ɓaa gɔmìnà ànɛ ɓi kìlɔ̀ŋ ki lɛ Sirii. 3Mum ǹcèm à kɛ̀ngà kì ɓàlɛɛ ɓi kìlɔ̀ŋ kii.

4Fɔɔnnɛ Yoosɛɓ à pɛ̀sɛ̀ngà girig a Galile, ɓi bàn ìnɛ lɛ Naazarɛt, lɛ a kɛǹ, a Zyude ɓi bàn ì Davit ìnɛ lɛ Bɛtilɛhɛm, ɓisuulɛ à ɓaghà ɓi boo ì mum ì Davit; 5à kɛ̀ngà wɔɔ lɛ ɓɛɛ ɓay ɓɔ ɓɛɛ̀ Marii à kìlɔnì kii ànɛ à ɓaghà rì ɗyem.

6Yɛ̀ɛ ɓɛ ɓaghà di ɓɛ kaka a Bɛtilɛhɛm, cààmɛ̀n ki lɛ Marii a yas̀ ki kpagà; 7nni à yalà man wìì à ǹtonto baŋì, à lɔkì nyi rì ɓìlàà, à nɔ̀ŋzì nyi ɓi kìɓɛrɛ ki ɓìtuwe ɓi ǹɗilàg miì lɛ jàŋ inɛ ɓɛ kɔrì miì ì ɓatìghà ɓi ɓi naà-ɓɛ̀kèn.

Ɓɛ̀ɓèŋì-jɔ̀ɔ̀ ɓɛ a Bɛtilɛhɛm

8Ɓi kìlɔ̀ŋ kɔm̀ kiǹ, ɓɛ̀bèŋì-jɔ̀ɔ̀ ɓɛ ǹlaayì cɛm a dɛm, ɓɛ ɓeŋɓèŋ ɓìtuwe ɓyaa. 9Yɛ̀ɛ ŋwaà-fìtom a Kan à resɛ̀ngà ɓɔ, kìtɛɛtɛn ki rigwey ɗi Bɛ̀ll ki ceŋzɛ̀n ɓɔ, fɔɔnnɛ ɓɛ risìghà lɛɛ̀gwey. 10Kìɓan kifog ŋwaà-fìtom à kpaa ɓɔ lɛ: Kɛ̀ ɓi risì, ǹɗìì mìni rì syeesyee à ɓɔlɛ̀ ànɛ à rì ɓiì faa kìlɔ̀ŋ kìcèm coo kinyàà ɓi mɛ̀rem. 11Ɓɔlɛ ànɛ̀n à rì lɛ: ǹghɛɓsì ɓum à yalɛɛ gɛɛ̀nɛ ɓìsu wìn, ɓi bàn ì Davit, nnyɛɛ ri Kiris Kan. 12Nni kìrèmzɛnà ki ki ri mìni ɓiì rèsii nyi ki ri lɛ, ɓì ɓiì tanɛɛ man à m̀ɓwɛɗ ǹlɔkakɛn, ǹnɔ̀ŋziyɛn ɓi kìɓɛrɛ.

13Fɔɔnnɛ ɓɛ sigmɛ̀ngà di kìtuu ki ɓum ɓɛ titom ɓɛ aɗyoo ki mɛ yù ki tanɛɛ roà ǹtonto, ɓɛ ɓɔɔ̀ɓɔ̀gsì Bɛ̀ll di ɓɛɛ kpaakpaa lɛ;

14Rìkem ɗyɛɛ ki Bɛ̀ll ɓi ɗyoo ɓi ɗùm,

fyòoog à ɓa rì ɓumɓɛ ɓi ziinɛ ɓɛ Bɛ̀ll à keesii.

15Yɛ̀ɛ ɓum ɓɛ titom ɓɛ sugtìghà kì ɓɔɔgh aɗyoo, nni ɓɛ̀ɓèŋì-jɔ̀ɔ̀ ɓɛ rɔɓkà kì kpaa wɔɔ ɓɔ rì ɓɔ lɛ: Ti kɛ̀ɛna a Bɛtilɛhɛm, ti ghɛn kìɓan ki kaa kìlɛɛ wɔɔ, kɛɛ̀ki Kan àa wogsii ɓìsi. 16Fɔɔnnɛ ɓɛ kɛngà wɔɔ ri mɛ̀ree, ɓɛ tanɛ̀n Marii rì Yoosɛɓ, rì maa man ànɛ̀n ǹnɔ̀nɔŋiyɛn ɓi kìɓɛrɛ. 17Yɛ̀ɛ ɓɛ ghɛngà man ànɛ̀n, ɓɛ tumɛ̀n rìkpaa ɗi ɓiɓan ɓi ŋwaà-fìtom à kpaaghà ɓɔ ɓi kìɓan kii. 18Ɓum ɓɛ̀cèm ɓɛ ɓɛ wokà ɓìɓan ɓi ɓɛ̀ɓèŋì-jɔ̀ɔ̀ ɓɛ kpaaghà ɓiǹ, ɓɛ kuuràkà ɓyɔ. 19Marii à ɓèŋɓèŋgà ɓìɓan ɓiǹ ɓìcèm, à ki fèfeg ɓyɔ rì ǹɗem. 20Fɔɔnnɛ ɓɛ̀ɓèŋì-jɔ̀ɔ̀ ɓɛ sugtìghà di ɓɛɛ ɓɔɔɓɔgsì Bɛ̀ll, ɓɛ keèkèmzì nyi rì tyem ɓisuulɛ, ɓìɓan ɓìcèm ɓi ŋwaà-fìtom a kpaaghà ɓɔ, ɓi ɓaghà com kìfog rì ɓi ɓɛ ghɛngà.

Ɓɛ kɛɛ̀ rì Yeesus ɓi naà-Bɛ̀ll ìnɛ a Yorisalɛm

21Ɓi mɛ̀ru taàɓɛ̀ɛ̀ ànɛ ɓɛ ghɛɛsɛ̀ngà kì kɛ̀ri man, innɛ ɓɛ roòghà nyi ɗii lɛ Yeesus; ɗii ɗìn ɗyɛɛ̀ɗi ŋwaà-fìtom à faghà, di jɛɛ à ka teɗ ɓi ɗyem ɗii. 22Yɛ̀ɛ cààmɛ̀n ki zòghɛ̀n inɛ Yoosɛɓ ɓɛɛ̀ Marii ɓɛ ghɛɛ̀sɛ̀ngà kì kìlɛɛ ki kpagà, lɔŋ yɛ̀ɛ ki ri ɓi ɓìdɔ̀gsɛna ɓi Moyis, fɔɔnnɛ ɓɛ kɛngà rì man ànɛ̀n a Yorisalɛm, lɛ ɓɛɛ resi nyi ɓi mis mɛ Kan, 23lɛ ki ri kì kànɛn ɓi ɓìdɔ̀gsɛna ɓi Kan lɛ: Man à baŋì bimiɗ ànɛ à rì man à ǹtonǹto, ɓɛ̀yalì ɓii ɓɛ ghɛɛ̀sɛɛ nyi kì faà rì Kan; 24ɓɛ ghɛɛ̀sɛɛ kì fùnɛɛ ɓɛ̀kuùkuù ɓɛɓɛɛ̀, nsoò lɛ ɓɛ̀sɔ̀m ɓɛ kòokòs ɓɛɓɛɛ̀, lɛ fɔɔnnɛ ki ri kì kànɛn ɓi ɓìdɔ̀gsɛna ɓi Kan. 25Ɓi mɛ̀ru mɛ̀n, ŋwaàdɛŋ à ɓaghà a Yorisalɛm ɗii lɛ Simeyɔŋ, à ɓaghà syeesyee à mum, ànɛ àa nti à risàg Bɛ̀ll; à ɓoŋɓòŋgà gòri ì Isirayɛl, à ɓaghà rì Kìtɛntɛ̀ɛ̀n ki Nghay. 26Nni Kìtɛntɛ̀ɛ̀n ki Nghay ki rèsìghà nyi lɛ, àa wu ɓi di à ka ghɛn ɓi Kiris ànɛ Kan à ɓiì romìì. 27Fɔɔnnɛ Simeyɔŋ à yughày ɓi naà-Bɛ̀ll yɛ̀ɛ Nghay à tinìghày nyi; nni ɓɛ̀yalì ɓɛ Yeesus ɓɛ yuyùghày rì man waà lɛ ɓɛɛ roòzi rìkpaa ɗi ɓi ɓìdɔ̀gsɛna ɓi Bɛ̀ll. 28Fɔɔnnɛ Simeyɔŋ à ghàɓkà man ànɛ̀n ɓi ɓyàg ɓii, à fa Bɛ̀ll rìkem à kpaa lɛ:

29Tààta, ù ti lɛ ù càɗ ǹkìì-kìsay wɔɔ lɛ,

a sug rì ǹɗem ɓi ɗùm ɓigomìnɛ,

yɛ̀ɛ ù mɛ roozi ǹkàg wɔɔ.

30Ɓisuulɛ mɛ̀ɛmiɗ ǹɗuusii mis ɓi

nghɛɓsì-ɓum ànɛ ù romiì

31nyi nnɛ ù pègsɛ̀ngà ɓi mis

mɛ ɓilɔ̀ŋ ɓìcèm.

32À rì kìtɛɛtɛn ki kii ɓiì kìi lɛ ɓìlɔ̀ŋ

ɓi ɓi ziinɛ ɓyɛ yi wɔ̀,

ki ki fa Isirayɛl à kìlɔ̀ŋ kɔɔ rikem.

33Seŋi rì jɛɛ Yeesus ɓɛ rɔɓkà myɔm ɓìkpaŋ, ɓɛ keg ɓìɓan ɓi Simeyɔŋ à kpaakpààghà ɓisuu man ànɛ̀n. 34Fɔɔnnɛ Simeyɔŋ à màgà ɓɔ, à kpaa Marii à jɛɛ man lɛ: Man ànɛ A ɓiì kìi lɛ ɓumɓɛ a Isirayɛl lɛɛ̀gwey ɓɛɛ kɛɓtɛn fìɓàg ɓi mis mɛ Bɛ̀ll, ɓɛ̀ro ɓɛmbog ɓɛ ɓa kɛ̀ɛ̀ bɛ̀lɛn; à rì ɓiì ɓaà fɛlɛ yɛ̀ɛ roànɛ a konag kì rèsii yɛ̀ɛ ɓum ɓɛ ɓeèzɛɛ rìkì ɗi Bɛ̀ll, 35Wɔɔmiɗ anɛ, ù ɓiì woògh ǹɗemi-kɛŋɛn yɛ̀ɛ mɛ̀nɔ̀ɓɔ̀, fɔlɔɔ nnɛ mɛ̀yitì mɛ mɛ rì ɓum lɛɛ̀gwey ɓi mɛ̀rem mɛ ɓiì yilɛɛ.

36Giɓ adɛŋ ɗii lɛ Ana, gɔ̀n ì Fanuɛl, ŋwaànɛ ɓi rìpwìɗ ɗi Azɛr a ɓatìghà girig ǹkpaŋzì-ɓìɓan a Bɛ̀ll. À ɓaghà di à mɛ rùn lɛɛ̀gwey; à ghɛɓkà bèg taàɓɛ̀ɛ̀ rì ŋwaànɛ ɓɛ wɔlɛ̀ngà ɓɛɛ̀ nyi ɓi rìgɔ̀n ɗii. 37Fɔɔnnɛ à rɔ̀ɓkà ǹkpɔɓ; yɛ̀ɛ à ɓaghà min di à ti bèg mɛ̀tin mɛnin rì bèg yinin, nni à kɔ̀rìghà ɓi naà-Bɛ̀ll ìsuùcèm, à kìkì Bɛ̀ll kìsay lɛ, rì ìru rì ŋwos; àa ǹti à cèlàg ɓìɗilàg ɓyààmɛ̀n lɛɛ̀gwey, à ki ɓɔ̀ɔɓɔŋzàg. 38Nni giɓ anɛ̀n à yùghày girig ɓi cààmɛ̀n kɔm̀ kiǹ, à tum rìfa ɗi Bɛ̀ll rìkem, à ki kpaakpaa ɓum ɓɛ̀cèm ɓɛ ɓɛ ɓoŋɓòŋgà gòri ì Bɛ̀ll ɓisuu Yorisalɛm kìɓan ki Yeesus.

39Yɛ̀ɛ ɓɛ̀yalì ɓɛ Yeesus ɓɛ legsìghà ɓìɓan ɓi ɓɛ ghɛɛsɛ̀ngà kì kìi lɔŋ yɛ̀ɛ ɓìdɔ̀gsɛna ɓi Kan ɓyɛɛ̀ kpaakpàà, nni ɓɛ sugtìghà rì nyi a Galile, ɓi ban ìnɛ ɓɛ kɔkɔ̀rìghà wɔɔ lɛ Naazarɛt. 40Fɔɔnnɛ man ànɛn a tɔɔtɔ̀ɔ̀ghà à ki tèeteèsɛ̀n; à ɓaghà rì ɗyomzɛ̀n lɛɛ̀gwey, Bɛ̀ll à ki keekeèsì nyi.

Yeesus à kɛ̀ɛ bi naà-Bɛ̀ll inɛ a Yorisalɛm di à ti bèg nteɗ ɗì yiɓɛɛ̀

41Ɓɛ̀yalì ɓɛ Yeesus ɓɛ ǹti ɓɛ kɛngì kì ɗiì Paskà a Yorisalɛm bèg yìcèm. 42Nni yɛ̀ɛ Yeesus à ɓaghà di à ti bèg ǹtɛ̀ɗ rì yiɓɛɛ̀, nni ɓɛ kɛɛdìghà lɔŋ Paskà yɛ̀ɛ ɓɛ ǹkɛ̀ngì. 43Yɛ̀ɛ tìcàɓ ti lekà, nni ɓɛ sukà, wɔ̀lɛ Yeesus à man waà à rɔ̀ɓ yì a Yorisalɛm ɓɔ ɓɔ kɔɔ̀ yi. 44Di ɓɛ mɛ kɛɛ̀ghi bimiɗ a ŋwos, ɓɛ fefèg lɛ Yeesus à rì ɓi kìtuu ki ɓum ki ɓɛ kɛɛ̀kɛ̀ɛ̀zɛ̀ngà rì kɔ, nni ɓɛ tumɛ̀ngà nyi rìkaa, di ɓɛɛ tɔtɔg nyi rì ɓɔɔseŋi ɓaa, rì ɓisɛn ɓyaa. 45Ɓaa rɔ̀ɓ ɓɛ̀ kɛɛ̀ ghɛn nyi, nni ɓɛ sugtìghà min a Yorisalɛm di ɓɛɛ̀ tɔtɔ̀g. 46Ɓi mɛ̀ru mɛɓɛɛ̀ nnɛ ɓɛ tanɛɛ nyi ɓi naà-Bɛ̀ll ǹkɔ̀kɔriyɛn ɓi nyìinyìm à ɓɛ̀rèsàg-ɓìdɔ̀gsɛna ɓɛ Ɓɛ̀yudɛ̀n, à tɔtɔ̀g ɓɔ mɛ̀tɔɔ̀ghtɔɔgh, à ki wowog riɓàg ɗyaa. 47Ɓum ɓɛ̀cèm ɓɛ ɓɛ wowòkà ɓìtòkì ɓii ɓɛ kuuràkà coo ɗyomzɛ̀n ɗii, rì rìɓàg ɗi à ɓàɓàkà ɓumɓɛ̀n. 48Yɛ̀ɛ ɓɛ̀yalì ɓii ɓɛ ghɛngà nyi, ɓɛ kuuràg lɛɛ̀gwey, nni jɛɛ à tɔkà nyi lɛ: Man wɛm̀, ù yeesii ɓà ɓisi fɛlɛ lɛ cɛ? Rì mɛ̀ rì soŋi tyàa tì mɛ̀rem aɗyòò lɛ ti kaakaa wɔ. 49Nni à ɓakà ɓɔ lɛ: Ɓisuucɛ nnɛ ɓyàa kaakaa mɛ̀? Ɓyàa yii ɓi lɛ ki ghɛɛ̀sɛɛ lɛ nkiki ɓiɓan ɓi Seŋi wɛ̀m? 50Kìɓan kìfog, ɓɛ yighà ɓì azi anɛ ɓi jɛ̀ɛ̀ ìnɛ à kpaaghà ɓɔ ìnɛ̀n. 51Fɔɔnnɛ à sugtìghà min ri ɓɔ a Naazarɛt, a kìkì ɓɔ mɛ̀wog; jɛɛ à ɓèŋɓèŋgà ɓìɓan ɓiǹ ɓìcèm ɓi ǹɗem. 52Yeesus à tɔɔtɔ̀ɔ̀ghà, ɗyomzɛ̀n ɗii ɗi teèghtèghɛ̀n, Bɛ̀ll à keèkèèsì nyi, ɓum ɓɛ ki keekeèsì nyi girig.

Currently Selected:

LUKAS 2: BAFNT

Highlight

Copy