LUKAS 5

Yeesus à reŋii ɓɛ̀yilàg ɓii ɓɛ ǹtonto

(Mt. 4:18-22; Mk. 1:16-20)

1Ŋwos adɛŋ, Yeesus à ɓaghà ɓi ǹwɔŋì wu riɓày ànɛ a Zyenezarɛt, fɔɔnnɛ gwìy ì kɔ̀mzɛ̀ngà nyi, ɓum ɓɛ tyɔɔ̀tyɔ̀ɔ̀rɛ̀n, lɛ ɓɛɛ wog ɓìɓan ɓi Bɛ̀ll, 2nni à ghɛngà ɓìkɔm ɓiɓɛɛ̀ ɓi bèn ì rìɓày. Ɓɛ̀pììgh-dam ɓɛ ɓɛ ɓaghà rì ɓyɔ, ɓɛ sɛngà lɛ ɓɛɛ cug dam yaa. 3Fɔɔnnɛ à ɓɔkà ɓi kìkɔm kìfog, ki ki ɓaghà ki Simɔn, à tɔg Simɔn lɛ, a raɓsɛn tìì rì bèn ì mɛ̀nig lɛsàg; nni à kɔ̀rìghà min ɓi kìkɔm, à tumɛ̀n rìrèsàg ɗi gwìy ì ɓum.

4Yɛ̀ɛ à lègsìghà ɓìtòkì, nni à kpaaghà Simɔn lɛ: Tyɛ̀ɛ̀ti kìkɔm ɓi dim ì rìɓày, ɓi pìg dam wɔɔ, ɓi ɓan ɓìzɛn. 5Simɔn à ɓàg nyi lɛ: Ǹɗèsàg, tyàa lali cem ɓi dam ì m̀pìghɛn, tyɛ̀ɛ̀ ki ɓan com, nni ǹɗì ɓiì pìigh dam lɛ yɛ̀ɛ wɔ̀ yɛɛ kpaa. 6Yɛ̀ɛ ɓɛ pikà dam, nni ɓɛ ɓangà ɓìzɛn lɛɛ̀gwey lèg ànɛ lɛ dam yaa yi tuùtùnɛ̀ngà. 7Fɔɔnnɛ ɓɛ reŋighà ɓɛ̀geni ɓaa ɓɛ ɓɛ ɓaghà ɓi kìkɔm kimbog rì kuriɓàɓ lɛ ɓɛɛ yu ɓɔ kì gheŋzii ritùg ɗi ɓìzɛn; ɓɛ yuis̀, ɓɛ roòzì ɓìzɛn ɓi ɓìkɔm ɓi kiɓɛ̀ɛ̀, lèg ànɛ lɛ ɓi tumɛ̀ngà rì ɓim. 8Yɛ̀ɛ Simɔn Pyɛɛri à ghɛngà fɔlɔɔ, nni à ɓakà Yeesus mɛ̀ɗu asu, à kpaa lɛ: Kan, pɛ̀sɛn mɛ̀ jàŋbog, ɓisuulɛ ǹɗì ǹkìì-kìɓe. 9A kpaaghà fɔlɔɔ lɛ, ìris wu ɓangà lɛ, rì Simɔn, rì ɓumɓɛ ɓɛ ɓaghà rì ɓɔ, ɓisuulɛ ɓɛ ɓangà ɓìzɛn lɛɛ̀gwey. 10Ìris wu ɓaadìghà girig ɓɔn ɓɛ Zeɓede ɓɛ kiɓɛ̀ɛ̀ ɓɛ lɛ rì Zyag rì Zyaŋ ɓɛ ɓɛ ɓaghà ɓɛ̀reŋkàŋ ɓɛ Simɔn. Fɔɔnnɛ Yeesus à kpaaghà Simɔn lɛ: Kɔ̀ɔ risi, à tumɛɛ gɛɛ̀nɛ, ɓum ɓɛɛ̀ɓɛ ù rì ɓiì ɓwemɓwemi ɓi sig à ɓìzɛn. 11Yɛ̀ɛ ɓɛ sugtighày rì ɓìkɔm a cɛɗ, nni ɓɛ càɗkà ɓyom ɓìcèm ɓɛ nɔɔ̀tì Yeesus.

Yeesus à wɔ̀ɔ̀zii kukwiy

(Mt. 8:1-4; Mk. 1:40-45)

12Yɛ̀ɛ Yeesus à ɓaghà ɓì bàn ìdɛŋ, nni ŋwaàdɛŋ ànɛ kwiy à ɗyɛɛrɛ̀ngà nyoo bimiɗ à ghɛngà nyi, à kpì nyi a mɛ̀kòò, à ɓag ìsu ɓi zi, à ɓɔŋzì nyi lɛ: Ǹɗèsàg, i ki kɔni wɔ̀, kìya ɓà lɛ mɓati lɛ syeesyee ɓi nyoo yɛ̀m. 13Nni Yeesus à nàmgà càg, à kòm nyi, à kpaa lɛ: Ki kɔni mɛ̀ fɔlɔɔ, ɓati lɛ syeesyee ɓi nyoo yɔ̀ɔ̀; kwiy a ghàs nyi kì lèegh ɓi nyòò. 14Fɔɔnnɛ Yeesus à siitàkà nyi lɛ: Kɔɔ ɓùŋ mum kìɓan ki, wɔ̀lɛ, kɛ̀na ki rèsɛɛ yɛ̀ɛ Pìrɛɛtìrɛ̀, u funɛn com ɓisuu zòghɛ̀n yɔ̀ɔ̀, fɛlɛ yɛ̀ɛ Moyis à kàngà, rìkì ɗiǹ ɗyɛɛ resi ɓum ɓɛ̀cèm lɛ ù mɛ wɔ̀n.

15Rìkem ɗi Yeesus ɗi kɛnkɛ̀ngà lɔŋ asu di ɗyɛɛ̀ sààsàà. Ɓum ɓɛ nti ɓɛ taŋzàg ɓyoo gwìy lɛ ɓɛɛ wowog ɓìtòkì ɓii, rì tì lɛ, a wɔɔ̀zi ɓɔ tìroɓ tyaa. 16Kìɓan kifog Yeesus nyii ǹti à kɛ̀ngì ɓi ɓìlɛŋ ɓi jaŋ, à kìkì bɔ̀ŋzɛ̀n wɔɔ.

Yeesus à wɔ̀ɔ̀zii kìsɛkɛ̀rɛ̀

(Mt. 9:1-8; Mk. 2:1-12)

17Ŋwos adɛŋ, Yeesus à rèrèsàkà ɓum ɓìɓan ɓi Bɛ̀ll nni Ɓɛ̀fàrìzyɛŋ rì ɓɛ̀rèsàg-ɓìdɔ̀gsɛna ɓɛ ɓɛ pɛsɛngày ɓi ɓɔɔ ɓilɔ̀ŋ ɓɛ a Galile, rì ɓɛ a Zyude rì ɓɛ a Yorisalɛm ɓɛ kɔkɔ̀rìghà wɔɔ. Ìtèɗ wu Bɛ̀ll wu wu ɓaghà ɓi Kan wu kikìghà lɛ, a wɔɔ̀wɔ̀ɔ̀zì ɓum. 18Nni ɓum ɓɛdɛŋ ɓɛ tɛkày mum ànɛ à yitìghà ɓi rikɛ̀ɛ̀ ɓi kon, ɓɛ kaakàà bee inɛ lɛ ɓɛɛ ɗiŋi rì nyi ɓi naa, di ɓɛɛ ŋɔŋzi Yeesus nyi asu. 19Yɛ̀ɛ ɓɛ ghɛngà ɓi bee inɛ ɓɛɛ ɗiŋzi ŋwaànɛ̀n lɛ gwìy ì ceeghà, fɔɔnnɛ ɓɛ ɓɔkà rì nyi a bwèy, ɓɛ rɔŋzìì ŋwaànɛ̀n ɓi ɗyas ǹkàŋɛn ɓi kon, ɓɛ ki sɛɛdii nyi asuu Yeesus, ɓi nyìinyìm à ɓum. 20Yɛ̀ɛ Yeesus à ghɛngà rìgherɛ̀n ɗi ɓumɓɛ̀n, nni à kpaaghà ŋwaànɛ̀n lɛ: Tɛɛnɛ, ɓìɓe ɓyɔɔ ɓi ti ɓìcenɛn. 21Fɔɔnnɛ ɓumɓɛ lɛ, rì ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ tumɛ̀ngà rìŋwɔ̀ŋwɔ̀ŋì di ɓɛɛ fèfeg ɓi mɛ̀rem maa lɛ ghɛn yɛɛ ri lɛ à cenɛ̀n ɓum ɓìɓe, i ki cee ɓi lɛ Bɛ̀ll cɛ̀ncii? 22Yeesus à yighà ɓɛ̀fèg ɓaa, fɔɔnnɛ à tɔkà ɓɔ lɛ: Ɓisuucɛ nnɛ ɓì rì rì mɛ̀kuu mɛ mɛyitì mɛǹ ɓi mɛ̀rem? 23Rì rìkpaa ɗì lɛ: Ɓìɓe ɓyɔɔ ɓi ti ɓìcenɛn, rì ɗi lɛ pɛ̀sɛn aɗyòò u kɛɛghi, ɗibe ɗyɛɛ ri lɛ fyɛ̀ɗ? 24Nkɔ̀nkɔn lɛ ɓi yi lɛ, Man à mum à rì rì ìtèɗ wulɛ à cenɛ̀n ɓum ɓìɓe fɛ ɓi ziinɛ. Fɔlɔɔ nnɛ à kpaaghà min kisɛkɛ̀rɛ̀ lɛ: Nkpaa wɔ̀ lɛ: Pɛ̀sɛn aɗyòò, u teɗ kon wɔɔ̀ u kɛǹ a mɛɛ. 25Fɔlɔɔ nnɛ ŋwaànɛ̀n à ghàskà ki pɛ̀sɛɛ aɗyoo ɓi mis mɛ ɓum ɓɛ̀cèm, à teɗ kon anɛ à ɓaghà miì ǹnɔ̀nɔŋiyɛn, à ròŋì bee inɛ a mɛɛ mii, di a fafa Bɛ̀ll rìkem. 26Ɓum ɓɛ̀cèm ɓɛ kuuràkà, ɓɛ ki keekemzì Bɛ̀ll. Iris wu rongà ɓɔ ɓi nɗem ɓɛ kpaakpàà lɛ, tì ghɛɛ ɓɛ̀koŋnyoo ɓɛ ɓiɓan ɓi ŋwos a gɛɛ̀nɛ.

Yeesus à reŋii Levi

(Mt. 9:9-13; Mk. 2:13-17)

27Ajɛ̀m ìnɛn, Yeesus à kpagà ɓi dan à ghɛn ǹterì-làmpoŋ̀ àdɛŋ ɗii lɛ Levi, di à kɔ̀kɔrii a-kɔ̀ɔ̀ wii wu kisay. Fɔɔnnɛ à kpaaghà nyi lɛ: Nɔ̀ɔ̀ti mɛ̀. 28Nni Levi à pɛ̀sɛ̀ngà aɗyòò, à càɗ ɓyom ɓii ɓìcèm, à nɔ̀ɔ̀tì nyi.

29Fɔɔnnɛ à kɛ̀ngà rì Yeesus a mɛɛ mii, à taŋzɛ̀n coo kisɛ̀nɛ̀: Ɓɛ̀terì-làmpoŋ̀ lɛɛ̀gwey rì ɓum ɓɛdɛŋ ɓɛ ɗiɗìghà ǹɗaŋ ri ɓɔ. 30Nni Ɓɛ̀fàrìzyɛŋ rì ɓɛ̀rèsàg-ɓìdɔ̀gsɛna ɓɛ tumɛ̀ngà rìŋwɔ̀ŋwɔ̀ŋì di ɓɛɛ tɔtɔg ɓɛ̀yilàg ɓɛ Yeesus lɛ: Ɓisuucɛ nnɛ ɓi kìki lɛ, ɓì ɗiɗì, ɓì ki nɔnɔ ǹɗaŋ ri ɓɛ̀terì-làmpoŋ̀ rì ɓɛ̀kìì-kìɓe? 31Yeesus à ɓàkà ɓɔ lɛ: Ɓɛ̀roroɓ ɓɛɛ ti ɓɛ ɓalàg ɗì zày ì dɔgtà, àa ɓumɓɛ ɓɛ rì lɛ syeesyee. 32Ǹ-yùghà ɓi ki reŋii ɓumɓɛ ɓɛ ri lɛ saaɗ, lɛ ɓɛɛ lɔɔ̀ghrɛn mɛ̀rem, lɔŋ ɓɛ̀kìì-kìɓe ɓɛɛ̀ɓɛ ǹ-yùghà kì reŋii.

Ɓɛ tɔɔgh Yeesus kìɓan ki ricèlì ɗi ɓiɗilàg

(Mt. 9:14-17; Mk. 2:18-22)

33Ɓum ɓɛ kpaaghà Yeesus lɛ: Ɓyààmɛ̀n ɓidɛŋ, ɓɛ̀yilàg ɓɛ Zyaŋ ɓɛ ti ɓɛ celàg ɓìɗilàg, ɓɛ kikì bɔŋzɛ̀n, ɓɛ̀yilàg ɓɛ Ɓɛ̀fàrìzyɛŋ girig, wɔ̀lɛ ɓɛnkɔɔ ɓɔɔ ɗiɗì, ɓɛ ki nɔnɔ (cààmɛ̀n kìcèm). 34Fɔɔnnɛ Yeesus à ɓàkà ɓɔ lɛ: Ɓì rì nya lɛ ɓì kɔ̀ɔ̀sì ɓɛ̀reŋkàŋ ɓɛ ǹwɔlì giɓ zày, di ǹwɔlì giɓ a kaka rì ɓɔ? 35Cààmɛ̀n ki lɛ ɓɛɛ ɓatɛn ɓɔ ǹwɔlì giɓ ki tiì, mɛ̀ru mɛ̀n mɛɛ̀mɛ ɓɛ ri cèli ɓiɗilàg miì. 36Nni à teɗtìghà ɓɔ dàɗkì lɛ: Ɓaà ghàs ɓi zyònà ì kìlàà ì nyɔn ɓɛ raɗkì ki kitùg miì, ì ɓɛ kii fɔlɔɔ, ki nyɔn ki tùnɛ̀n, ɓyɛ̀ kɛɛ̀ ki wɔɔsɛn lɛ rì zyònà ì nyɔn, rì kìtùg ki kilàà. 37Ɓaà ɓèni ɓi mɛrɔ̀g mɛ nyɔn ɓi ɓìtùg ɓi ɓiren, lɛ mɛ ri ɓiì ki weeyii ɓìren, mɛ soɓɓàg, ɓìren ɓìcèm ɓi ɗyoŋ; 38kìɓan kifog ɓɛ ghɛɛ̀sɛɛ kì foŋì mɛ̀rɔ̀g mɛ nyɔn ɓi ɓìren ɓi nyɔ̀n. 39Fɔɔnnɛ ŋwaànɛ à mɛ mɛ̀ɛ̀zi ŋwɔm ɓi tìɗyàɓ ti mɛrɔ̀g, à ti kɛ̀ɛ kɔ̀ɔ̀di mɛ mɛ kaka nyɔn, lɛ mɛ abɛ̀y mɛɛ rɔɔtɛɛ ɓi rìghɛn ɗii.

Currently Selected:

LUKAS 5: BAFNT

Highlight

Copy