MARIKUS 5
5
Yeesus à wɔɔzii ŋwaànɛ à ɓaghà rì ɓìɓeɓtàg ɓi mɛghay
(Mt. 8:28-34; Lk. 8:26-39)
1Nni ɓɛ kɛngà kì kpaŋì cɛcɛɗ ki riɓày ɓi kìlɔ̀ŋ ki ɓɛ-Gerazenyɛŋ. 2Lɔŋ yɛ̀ɛ Yeesus à sɛngà kìkɔm, ŋwaàdɛŋ à kpaŋ yì ɓi dɛm i zɔ̀ŋ, à yù kì tuusɛɛ ri nyi; ŋwaàncèm à ɓaghà rì kìɓeɓtàg ki nghay. 3Àa ǹti à laayì ɓi dɛm i zɔ̀ŋ, fɔɔnnɛ ŋwaàdɛŋ à ɓatìghà ɓi ri ìtèɗ wulɛ à ɓan ŋwaànɛ̀n, à kàŋ nyi nsoò rì mɛ̀sɛ̀ŋi, 4ɓisuulɛ, ɓyààmɛ̀n lɛɛ̀gwey, ɓɛ kagà nyi mɛ̀kòò ri bɔŋ, ɓɛ sugì nyi mɛ̀sɛ̀ŋi ɓi ɓyàg, kìɓan kifog, àa ǹti à pwagì bɔŋ, à ki rengi mɛsɛ̀ŋi; mum ànɛ à ɓaghà lɛ à cenɛ̀n ŋwaànɛ̀n à ɓaghà ɓi. 5Yɛ̀ɛ ìru, yɛ̀ɛ ŋwos, ŋwaànɛ̀n àa ǹdègì ɓi dɛm i zɔ̀ŋ, rì ɓi don aɗyoo di a syansyan, à ki kpɛ̀ɛkpɛɛ̀rɛ̀n nyimiɗ ri gɔ̀g. 6Yɛ̀ɛ à ghɛngày Yeesus fìràɓ, à gheŋmɛ̀n yì, à yù nyi kì ɓaàgh mɛ̀ɗu asu 7à ki syan jɛ̀ɛ̀ aɗyoo rì ìtèɗ lɛ: Yeesus, Man à Bɛ̀ll ànɛ à teŋmɛɛ kɛ̀ɛ̀ vèg cɛ kɛɛ rì wɔ̀ rì mɛ̀? M̀ɓɔ̀ŋzii wɔ̀ ɓi ɗii ɗi Bɛ̀ll lɛ, kɔ̀ɔ ki mɛ ǹtɔɓ. 8À kalìghà fɔlɔɔ lɛ Yeesus à kpaakpààghà nyi lɛ: Kìɓeɓtàg ki ǹghay! Kpaŋa ɓi ŋwaànɛ! 9Nni Yeesus à tɔkà min nyi lɛ: Ù rì ɗii lɛ ghɛn? À ɓàg nyi lɛ: Ǹɗì ɗii lɛ: Kìtuu, ɓisuulɛ tì tèghɛɛ lɛɛ̀gwey. 10Ŋwaànɛ̀n à ɓɔ̀ŋzàkà Yeesus, à sììrɛ̀n lɛ, Yeesus kɛ̀ɛ nàɓ ɓiɓeɓtàg ɓi mɛghay ɓìn lɛ ɓyɛɛ pɛsɛn ɓi kìlɔ̀ŋ kiǹ, ɓyɛɛ kɛǹ jàŋ idɛŋ. 11Wɔ̀lɛ coo kìtuu ki jèè ki ɓaghà ɓiì ɗiɗii ɓyaaɓi jàŋbog rì dòn. 12Fɔɔnnɛ ɓìɓeɓtàg ɓi mɛghay ɓi ɓɔŋzàkà Yeesus di ɓyɛɛ kpaakpaa lɛ: Rom ɓìsi ɓi kìtuu ki jèè kinii, ti ɗiŋi ɓi yɔ. 13Nni Yeesus à gherɛ̀ngà, fɔɔnnɛ ɓìɓeɓtàg ɓi mɛghay ɓìn ɓi kpagà ɓi ŋwaànɛ̀n, ɓi ɗiŋɗàg ɓi jèè; kituu ki jèè kiǹ ki pwaŋɗɛ̀n yì ɓi dòn aɗyoo ki suùrɛ̀n ɓi rìɓày; jèè yiǹ yi ɓaghà nunùg jèè ɓɛ̀tɔɔsìm ɓɛɓɛɛ̀, nni yi cuughà lɔŋ ɓi rìɓày yìcèm. 14Ɓumɓɛ ɓɛ ɓeŋɓèŋgà jèè yiǹ ɓɛ panìghà rì mɛ̀ree, ɓɛ kɛǹ kì kakalii ɓumɓɛ ɓi bàn, rì ɓɛ̀roɓɛ ɓi jɛ̀m ì kìlɔ̀ŋ kìɓan kiǹ. Ɓum ɓɛ pɛɛ̀pɛ̀sɛ̀ngày lɛ ɓɛɛ ghɛǹ kìɓan ki ki kilɛ̀ngà kiǹ. 15Ɓɛ yu Yeesus a nyoo, ɓɛ ghɛn ŋwaànɛ à ɓaghà rì ɓìɓeɓtàg ɓi mɛghay lɛɛ̀gwey ǹkɔ̀kɔriyɛn, nni ìris wu ɓangà ɓɔ. 16Ɓumɓɛ ɓɛ ɓaghà wɔɔ yɛ̀ɛ kìɓan kiǹ ki kilɛ̀ngà, ɓɛ kalìghà ɓɛ̀ro ɓɛmbog yɛ̀ɛ kaa ɓaa, à tumɛ̀n ɓi ŋwaà ɓìɓeɓtàg ɓi mɛghay, à kpaŋ ɓi jèè. 17Nni ɓɛ tumɛ̀ngà rìɓɔ̀ŋzàg ɗi Yeesus lɛ, a pɛsɛn ɓi kìlɔ̀ŋ kaa. 18Yɛ̀ɛ Yeesus à ɗiɗiŋìghà ɓi kìkɔm, nni ŋwaànɛ à ɓaghà ànɛn ri ɓìɓeɓtàg ɓi mɛghay à ɓɔ̀ŋzàkà nyi, lɛ nyi ɓa ɓi nɗaŋ waanɛ̀n. 19Yeesus à ɓèn, wɔ̀lɛ à kpaa ŋwaànɛ̀n lɛ: Sugha a ɓum ɓɔɔ, u kali ɓɔ com kìcèm ki Kan àa kìi ɓisu wɔɔ, rì yɛ̀ɛ àa woogh wɔ̀ nyìighnyìg. 20Fɔɔnnɛ ŋwaànɛ̀n à kɛ̀ngà, à tumɛn rìlààlàmɓɛ̀n ɗi com kìcèm ki Yeesus à kìghà ɓisu wii ɓi kìlɔ̀ŋ ki ɓɛ nɗegi lɛ, kìlɔ̀ŋ ki bàn ǹtɛ̀ɗ. Ɓum ɓɛ̀cèm ɓɛ kuuràkà.
Yeesus à wɔ̀ɔ̀zii giɓ adɛŋ, à ghèmzì man à Zyayirus
(Mt. 9:18-26; Lk. 8:40-56)
21Yeesus à sugtìghà kìsyàa ɓɛg àmbog ɓi kìkɔm, coo kituu ki ɓum ki taŋzɛ̀n nyi a nyoo yɛ̀ɛ à ɓaghà ɓi bèn ì rìɓày. 22Fɔɔnnɛ mum ɗii lɛ Zyayirus, kìbog ki ɓi ɓumɓɛ ɓɛ lamìghà naà-bɔ̀ŋzɛ̀n, à yùghà, à ghɛn Yeesus, à kpì nyi a mɛ̀kòò. 23A ki ɓɔ̀ŋzag nyi, à sììrɛ̀n ɓi bɔ̀ŋzɛ̀n ìnɛn, à kpaakpàà lɛ: Maa ŋwɔɓti wɛ̀m à giɓ a kɔ̀ɔkɔɔ̀sì, nni yu, u saagh nyi ɓyàg ɓi nyoo, di fɔɔnnɛ à wɔǹ, à ki ɓa ti ri cɛɓ. 24Fɔɔnnɛ Yeesus ɓɛ sugtɛ̀ngà ɓɛɛ Zyayirus, coo kituu ki ɓum ki nɔɔ̀nɔ̀ɔ̀tì nyi, ki kɔm̀ nyi, ki ki sìisiìrì nyi. 25Nni giɓ adɛŋ ànɛ à roròɓkà fìroɓ fi lɛ, bwaɓ yi kpaŋkpàŋ nyi ɓyààmɛ̀n ɓìcèm à ɓaghà wɔɔ; fìroɓ fìn fi ɓaghà di fyaa finɛn bèg ǹtèɗ rì yiɓɛɛ̀. 26Giɓ anɛ̀n à ɓaghà di à mɛ ghɛn ntɔɓ lɛɛ̀gwey ɓi rìdèŋdèŋ ɗi a ɓɛ̀kìì-boòboo lɛɛ̀gwey à ki yogsi ɓɔɔ ɓyom ɓii ɓɛ̀cèm ɓɛ à ɓaghà rì ɓɔ, ɓi fìroɓ fii, kìɓan kifog fi kɛnkɛ̀n lɔŋ nyi ɗì rìroròɓ rì ìtèɗ. 27Nni yɛ̀ɛ à wokà di ɓɛɛ̀ ɓùŋɓuŋ kiɓan ki Yeesus, fɔɔnnɛ à yùghày Yeesus ajɛ̀m, di a sɔ̀ɔsɔlɛ̀n yì ɓi nyìinyìm à ɓum, à kòm nyi ɓi kìlàà; 28ɓisuulɛ à kpaakpààghà ɓi ǹɗem wii lɛ: I m̀mànɛɛ kì kòmi nsoò kìlàà kii, lɔŋ lɛ ǹwɔ̀ni. 29Ɓi cààmɛ̀n kɔm̀ kiǹ, bwaɓ yi ghàs kì renɛɛ rikpaŋ ɗi giɓ anɛ̀n, à wog yɛ̀ɛ nyoo yìì i fɛmɓɛɛ, à ghɛn lɛ à wɔ̀ni fìroɓ fii. 30Yeesus nyii ghas kì woògh fɛlɛ yɛ̀ɛ ìtèɗ wudɛŋ wu pɛsɛɛ nyi ɓi nyoo, à nìmɓɛ̀n ɓi nyìinyìm à ɓum, à tɔg lɛ: Ghɛn yɛɛ komi mɛ̀ ɓi kìlàà? 31Nni ɓɛ̀yilàg ɓii ɓɛ ɓakà nyi lɛ: Ù seesèè lɔŋ yɛ̀ɛ gwìy ì ɓum yɛɛ̀ sìisiìrì wɔ̀, ù tɔgtì lɛ ghɛn yɛɛ komi wɔ̀? 32Fɔɔnnɛ Yeesus à kɛ̀ɛ̀sìghà mis ɓi ɓumɓɛ ɓɛ kɔmgà nyi lɛ a ghɛǹ ŋwaànɛ àa kòmi nyi. 33Nni giɓ ànɛ̀n à risìghà, à nììghnìŋdɛ̀n lɛ kpàg-kpàg lɛ à yighà com ki ki kilɛ̀ngà ɓi nyoo yìì; fɔɔnnɛ à yùghà ki kpìi Yeesus a mɛ̀kòò, à kpaa nyi saaɗ ànɛ ɓi kìɓan kiǹ kìcèm. 34Nni Yeesus à kpaaghà nyi lɛ: Iyà, rìgherɛ̀n ɗyɔɔ ɗi ghɛɓsii wɔ̀, kɛ̀na lɛ fyòoog, ù wɔni fìroɓ fyɔɔ yaà. 35Di Yeesus à kaka à totòg fɔlɔɔ, nni ɓum ɓɛdɛŋ ɓɛ pɛsɛ̀ngày a mɛɛ mɛ Zyayirus, ɓɛ yu nyi ki kpaa lɛ: Zyairus, gɔ̀n yɔ̀ɔ̀ i mɛ maasì; kɔ̀ɔ yeesi ti ǹɗèsàg zɛy. 36Wɔ̀lɛ Yeesus à nɔ̀ɔ̀tìghà ɓi rìkpaa ɗiǹ à kpaaghà lɔŋ ǹlàmì naà-bɔ̀ŋzɛ̀n lɛ: Kɔ̀ɔ risi, ɓaya lɔŋ ri rìgherɛ̀n. 37Yeesus à gherɛ̀ngà ɓi lɛ, ŋwaàdɛŋ à kɛǹ nyi kì foŋì, lɔŋ Pyɛɛri, rì Zyag ɓɛɛ̀ geni ànɛ lɛ Zyaŋ ɓɛɛ̀ɓɛ à kɛ̀ngà rì ɓɔ. 38Yɛ̀ɛ ɓɛ kpagà a mɛɛ mɛ rifòm ɗi naà-bɔ̀ŋzɛ̀n, Yeesus à tanɛ̀n coo gom ì mɛ̀kɛɛ̀gh, rì ɓìkiŋ ɓi ɓɛ rɔŋɗɔ̀ŋgà. 39Fɔɔnnɛ à ɗiŋìghà ɓi naa, à kpaa ɓɔ lɛ: Ɓisuucɛ nnɛ ɓi rènɗen fɛlɛ di ɓi ɓooghɓoòghrɛ̀n, ŋwɔɓti ànɛ à wii ɓi, à rì yɛɛri ɓi fìlo. 40Ɓumɓɛ̀n ɓɛ tumɛ̀n nyi rìwɔ̀wɛ̀y, nni à kpaŋzàkà min ɓɔ ɓɛ̀sɛ̀ɛ̀ ɓɛcèm; à teɗ lɛ rì seŋi rì jɛɛ man, ri ɓumɓɛ à ɓaghày rì ɓɔ, ɓɛ ɗiŋì ɓi naa ìnɛ ŋwɔɓti à ɓaghà miì. 41Nni à ɓangà ŋwɔɓti ɓi càg, à kpaa nyi lɛ: Talita kumi! Yɛɛ lɔɔ lɛ, Ŋwutyàà-giɓ, ǹkalii wɔ̀ lɛ pɛ̀sɛn aɗyòò. 42Ŋwutyàà-giɓ anɛ̀n à ghàs kì pɛ̀sɛɛ aɗyoo, à tumɛ̀n rìkɛ̀ɛ̀kɛ̀ɛ̀, lɛ à ɓaghà di a ti bèg ntɛ̀ɗ rì yìɓɛɛ̀. Ɓum ɓɛ ghɛngà kìɓan kiǹ koŋnyoo lɛɛ̀gwey. 43Wɔ̀lɛ Yeesus à rɔ̀gsɛ̀ngà ɓɔ, à siitàg ɓɔ lɛ ɓɛ̀ kɛɛ̀ kali ŋwaàdɛŋ kìɓan kiǹ. À ki kpaa ɓɔ lɛ ɓɛɛ fa ŋwutyàà-giɓ anɛ̀n com kiɗiyɛn.
Currently Selected:
MARIKUS 5: BAFNT
Highlight
Share
Copy
Want to have your highlights saved across all your devices? Sign up or sign in
Bafia Nouveau Testament © Bible Society of Cameroon, 2019.
