TƆMSYAADƐ WOOSƐ 3

1Ɔ̧tza ma yɔ Bɛtzɔ̧k bɔ ɔ̧tɔ rii a naaba̧a̧n du, Piyɛr hi Yohana hi dɔ̀ɔ̀ lɛlgbun a Bɛtluk du. 2Doo za giro mɔɔy dɔɔgumtilyayɔ. Gɔ hi waa hi gig pɛɛko hi gig kaŋk ɔ̧t nuŋg sɛw a Bɛtluk ya̧a̧gbar bɔ nuŋgɔ a ꞋꞋBɛtiꞋꞋ ge an gi zɔ̧̀k tus a wɔ hi gulik a Bɛtluk du hi. 3Yɔ wal dɔɔgumtilya bɔ gbɛn Piyɛr hi Yohana hi gulko, zɔ̧hi tusɛ. 4Wɔrɔ hi seesig gbig, Piyɛr wɛɛ raage

a seeziwi be.

5Dɔɔgumtilya bɔ seehi, gi ook ma an wɔrɔ hi gaag hinza. 6Hɔnɛ Piyɛr wɛɛ raage

a be taan tusɛ, be taan hɛɛlmɔt an be gààmɔ. Yɛrɛ hinyɔ be gin be gàam giya, be raam a Yeesu Kristu Nazarɛdya bɔ gi nuŋg du: ɗukumha mɔ wɛɛ mɔ ɛmbɔ.

7Wa̧a̧g a naanrɔbo ɗunsige. Ɓɔrbɔ dɔɔɔ wɔ hi dɔɔ-hiŋsɔ wɔ hi ɓaaɓa. 8Yɔ rɔnd anyɔ er ha yɛɛl ɛmbikyɔ. Wɛɛ gul a Bɛtluk bɔ gedu lɛlgbun hi hiya. Gi ɛmbiko, gi gi̧i̧liko, wɛɛ gi baanik Bɛto. 9Dood sɛw hi gbɛnig gi ɛmbiko, wɛɛ gi Bɛt baanuko. 10Hi mɛksigmɛks a gii tuszɔ̧kigya bɔ ɗɔɔt nɛ a gbɔnɔya̧ bɔ nuŋgɔ a ꞋꞋBɛtiꞋꞋ ge an gi zɔ̧k hinɛ. Anyɔ hi gbɛn wal dɔɔgumtilya bɔ gi za̧a̧ anbɔ hoobha̧a̧hiha̧, hin wɛɛ kɔmsihi gɛrs gbɔɔltɔnɔ, wɛɛ yɔɔhi be.

11Anyɔ wal dɔɔgumtilya bɔ ɔ̄ɔ̄ Piyɛr hi Yohana dɔŋya̧ gɛ, dood sɛw kɔmsihi gɛrsɛ; hi nɔ̀ɔz hi zaa a hii, a gbag yɔ gɔ hi el a Sulemaanu zekslɛl gedu. 12Yɔ Piyɛr gbɛn dood wɔ anbɔ, raahi

a walɛ Israhilaya wɛ, hin yɛrɛ wɛɛsin nɔ gɛrsɛ? Lɔl nɛ gi inik nɔ wi muulɛ? Nɛ mɔkig a wi woos wal yɛrɛ hinɔ an gi ɛmb hi tɛŋk wiin ger ya? Zaabe hi fɔk yɔ wi fɔk Bɛt hi gbɔnɔ giya? Lab gɛ! 13Baa wɛ Abraham hi Isaaku hi Yakuba Bɛt ya̧a̧n gaa woosɔya Yeesu gbɔlumsɛ. Nɛ loo nɛ za̧a̧nɔ gii nɛ gaag dood gbɔlɛ naan du, nɛ wɛɛ nɛ faage a taa waar nɛnɛ a Pilatu muutdu be. Pilatu ɔnɛ ha̧a̧g nɛ an gi bisige, wɛɛ nɛɛ be ha̧a̧n gɛ.

14Nɛ faa doo gaat bɔ gi doo riiti. Nɛ zɔ̧b Pilatu bitsin doogbɔŋkya bɔ gii wɛ food a Yeesu kalɛ, nɛ ɔɔ nɛ doo gaat riit bɔ bisugo, 15nɛ wɛɛ nɛ gbɔm za̧a̧nyɔ su̧u̧ za̧a̧tig gbɔnɔ. Bɛt wɛɛ rɛmsig a wɔrkɛ teesdu, wii wi gi segyaadɛyɔ wí ɗɛɛk dɔglɔ dɔko. 16Wal yɛrɛ nɛ gig gbɛnik nɛ mɛɛg yɔ, ɗɔbs Yeesu , Yeesu nuŋg ɔ̧ɔ̧n gaag tɛŋko. Ɗɔbsig bɔ a Yeesu nuŋg du gaag ma za̧a̧tig gɛrɛ a nɛ lɔlgbar sɛw.

17Yɛrɛ saam be wɛ, be mɛɛ a yɔ nɛ gbɔm Yeesu anbɔ, nɛ woo hinyɔ nɛ́ mɛ̄ɛ̄ gɛ gii hi waar ɛ nɛ wɔ sɛw. 18Yɛrɛ Bɛt woo hinyɔ dɔg nɛ amntɔnɔ a Bɛtya̧a̧kɛŋkya wɔ sɛw hi ya̧a̧ du a Masihu gi ha̧a̧ya̧a̧rɛ. 19Yɔ anbɔ, dɛnnaanɛ, zɛmr kpoos nɛ an Waar Bɛt gi pugd hinha̧a̧l nɛ sɛw, 20an Waar Bɛt gi gaazin holum-ɔ̧ti, gi wɛɛ gi yaasin Yeesu , za̧a̧nyɔ hesinge gaati an gi wɛɛ Masihu nɛnɛ.

21Gi an Yeesu gi kɔm bɛtha hɔ kete ɓɔr ɔ̧tyɔ Bɛt gɔ gi gɛms hin du sɛw gi rii, gi ɔɔ zaako. Bɛt dɔg nɛ ɔ̧t bɔrɔ dɔglɔ da amntɔnɔ a Bɛtya̧a̧kɛŋkya gaatɛ wɔ hi ya̧a̧ du. 22Ya̧a̧nɛ Muusa gi raa nɛ a Waar nɛ Bɛt gi her za̧a̧n za a dood nɛ hi teesdu gi yaasinge an Bɛtya̧a̧kɛŋkya an beya. Nɛ́ kɛmsig hinyɔ gɔ gi dɔgsin sɛw. 23Za̧a̧nyɔ gɔ gi kɛ̄ms Bɛtya̧a̧kɛŋkya bɔrɔ lab tɔn gɛ Bɛt gi ha̧sig tɔlɛ a doodɔ tees du.

24Bɛtya̧a̧kɛŋkya wɔ sɛw hi dɔg ɔ̧t bɔrɔ dɔglɔ dɔgɔ . Samyɛl yɛɛl dɔgɔ, wɔ́ hi zaa a gi kuudu hi dɔg dɔglɔ sɛw. 25Nɛɛ nɛ yɛr hinyɔ Bɛtya̧a̧kɛŋkya wɔ hi raa a Bɛt gi gaazɔ, wɛɛ ya̧a̧wɔk yɔ Bɛt wɔb nɛ hi baa nɛ hii be nɛ gidu, anyɔ Bɛt raa Abraham a bé rɔbs dood dɔ̧ɔ̧t wɔ a waal du sɛw, a dɔ̧ɔ̧t mɔ bɔ gi dɔŋgo. 26Yɔ anbɔ Bɛt hes nɛɛ waaɔ Yeesu gɔ biitiri wɛɛ yaazig an gi rɔbsinɛ, gi zɛmr kpoos nɛ sɛw gbunu gbunu an nɛ ɔɔ hinha̧a̧l nɛ.

Currently Selected:

TƆMSYAADƐ WOOSƐ 3: NTD

Highlight

Copy