TƆMSYAADƐ WOOSƐ 4

1-2Yɔ Piyɛr hi Yohana hi dɔksig dood hin anbɔ, yaala Bɛtmaakwookya wɔ hi Bɛtluk-ookya gbɔɔl bɔ hi Sadu-kiya wɔ hi zaa a hi hi nɔɔtig a hinyɔ hi goksig dood wɔ hi wɛɛ hi dɔgnik Yeesu rɛmtigɔ dɔgl a wɔrkɛ wɔ hi rɛml gi dɔŋgo. 3Yɔ anbɔ hi wà̧à̧hi hi ka̧hi a luknɔ du, hi yaahi hi yo duhɔ tuur yoosugɔ, lɛl da gi nɛ bulkbul be ya̧a̧nɛ.

4Hɔnɛ dood wɔ hí lāg nɛ dɔgl bɔrɔ anbɔ zaadɛya̧ kittɔnɔ hi ɗɔbs Yeesu be. Walɛ wɔ kitigya̧ tuur an duk nɔɔnɛ. 5Yoosugɔ, Yahuduya waar ɛ wɔ hi Ɗɛntɛ wɔ hi Bɛt-maakdɔkya wɔ hi mɔks a Urusalima. 6Bɛtmaakwookya gbɔɔl mɔɔt bɔ Hanas hi Kayafas, Yohana hi Iskandarus hi Bɛtmaakwookya gbɔɔl mɔɔt bɔ nɛsɛ ɔ̧ɔ̧ zaadɛ wɔ hi zaa hi mɔks lɛlɔdi sɛw. 7Hi loo Piyɛr hi Yohana hi gbaahi teesdu hi warihi hinɛ:

a nɛ za̧a̧s wal bɔrɔ hi nɔ tɛŋkɔ, hi a bɔ nuŋg du ɔnɛ?

8Hɔnɛyɔ Bɛt Mɔkilɔ wɛɛ gi hi̧i̧s a Piyɛr kpoos du raahi:

a nɛɛ Israhilaya waar ɛ wɛ hi ɗɛntɛ wɛ, 9anyɔ nɛ giw hin warik a woos rɔ́b yɔ wi woos wal bɔ hage nɛɛko, an wi raa za̧a̧k yɔ za̧a̧ ya! 10Mɛɛn nɛ sɛw, wɛɛ, an dood Israhilaya wɛrɛ sɛw ya̧nɛ hí mɛɛ a Yeesu Kristu Nazarɛdya bɔ nɛ doog a dɔ̧ɔ̧r ha, hí wɛɛ hí i̧i̧g a loor du, Bɛt wɛɛ rɛmsigrɛms a wɔrkɛ teesdu, a gi tɛŋk du ro wal yɛrɛ gi erk a nɛ muutdu sɛw hi muulɔ rɔbtɔnɔ yɔ.

11Yeesu gi bet gbɔɔl yɔ nɛɛ lukwɔŋkya wɔ nɛ bisig giya. Gii wɛɛ ma bet gbɔɔl tɛŋkya. 12Doo za dɔɔm ɗɛ̄ɛ̄ an gi za̧a̧sɛ gɛ nɛ zaŋ; ya̧a̧nɛ Bɛt gāāzɛ nuŋg za dɔɔm a dood teesdu a waal du an gi za̧a̧sɛ gɛ, gɛ nuŋg bɔ Yeesu kpɔd.

13Yɔ dɔgl-gbɛɛrikya gbɔlɛ wɔ hi gbɛn Piyɛr hi Yohana walumsya̧ anbɔ, hi mɛɛhimɛ a hi gi doo tɔsyɔ, hí zaŋg gɛ be, walumsya̧ kɔmsihi gɛrs ha̧a̧ltɔnɔ. Hi wɛɛ hi mɛɛhimɛɛki,

a hi da hi gi nɛ hi Yeesu ɔnɛ.

14Hɔnɛyɔ hi gbɛnik wal bɔ hi za̧a̧sig gi erk hi dɔŋdi rɔbtɔnɔ be, hí mɛ̄ɛ̄ hinyɔ gɔ hi goo ma gɛ. 15Yɔ anbɔ, hi wɛɛ hi raa Piyɛr hi Yohana a hi tuu a dɔglyɛ̧ɛ̧k luk bɔ gedu an hii be hi watin dɔglɔ hi kuudu be. 16Yɔ wɔrɔ hi tuu lakdi, hi watin gɔ

a wɛ́ wòòs nɔ dood wɛrɛ nɔ?

Urusalimaya wɔ sɛw hi gbɛn gɛrs gbɔɔl yɔ gi wooyyik a hi naan du bɛttɔnɔ be. Wɛɛ wɛ́ ɗɛ̄ɛ̄ an wɛ faa gɛ be. Yɛrɛ wɛ woo ri?

17Yɛrɛ an bɔ̄ dɔgl bɔrɔ gi hɛks gi re doos a dood tees du, ɗɛwɛ biglihi an bɔ̄ hi wɛɛ hi boos doo za hinza hi Yeesu nuŋgɔ bɔrɔ nɛ zaŋ.

18Kuudu anbɔ hi wɛɛ hi elihi, hi naahi

a bɔhi rek hi boos nɛ doo za hinza hi Yeesu nuŋgɔ nɛ zaŋ!

19Piyɛr hi Yohana hi goohi

a nɛɛ dɛ̧ɛ̧tin nɛ kpoos du be, hinɔ gi rii a Bɛt muutdu an hi kɛms nɛya hi ɔs Bɛt kɛŋko!

20Winɛ wí ɗɛ̄ɛ̄ an wi ɔɔ hinyɔ wi gbɛnɔ hi hinyɔ wi lag bookɔ gɛ ɔnɛ.

21Yɔ dood sɛw hi baanik Bɛt a hinyɔ turs wal bɔ geha, dɔgl-gbɛɛrikya wɔ hí mɛ̄ɛ̄ hinyɔ gɔ hi gaa tɔmsya wɔ ya̧a̧rhant dɔŋgɔ ma gɛ; hi wɛɛ hi naahi hi tɛŋko a bɔnɛ wɛɛ nɛ boo Yeesu dɔglɔ zaa. Hi wɛɛ hi bisihi hi rekɔ. 22Wal bɔ za̧a̧tig gɛrsya wooy gi muul wɛlɔ daar dumbili nas daarɔ.

23Yɔ hi bis Piyɛr hi Yohana anbɔ, hi rek a doodya̧ Yeesu ɗɔbsigya wɔ hi, hi fɔksihi hinyɔ Bɛtmaakwookya gbɔlɛ wɔ hi ɗɛntɛya̧ wɔ hi raahi . 24Yɔ Yeesu ɗɔbsigya wɔ hi lag fɔkil bɔrɔ anbɔ, hi zɔ̧b Bɛt hi kpoosya̧ gbunu, hi sɛw hi raa

a Waar Bɛto, mɔɔ yɔ mɔ kim bɛtha hi hɛbtdi, hi mɛmbalɛ hi hin wɔ hi gi du sɛw. 25Mɔɔ yɔ mɔ raa hi Mɔkil mɔ bɔ a woosya mɔ baa wi Dawda ya̧a̧ du: a dood dɔ̧ɔ̧t dɔɔmɛ wɔ hi pɛ̀ɛ̀ zulya̧ nɔ wɛɛha? Nɔ dood wɛrɛ hi book hintɔs nɔ? 26Waar ɛ gbɔlɛ wɔ hɛbtdi hi ɗund an hi gɔ nɔko. Waar ɛ dɛɛt wɔ hi ɔks hi hiya an hi gɔ nɔk hi Waar Bɛto, hi Masihu Za̧a̧nyɔ Bɛt sɔɔsig kurum an gi wɛɛ Waar i.

27Hɔɔ, hi rɔbo, Hirudus hi Pɔntiyu Pilatu hi mɔks lɛlgbun a waal yɛrɛ gedu hi dood rɔ̀bɛ wɔ hi, hi Israhila dɔ̧ɔ̧tɔ an hi boo gabs hi woosya mɔ gaat bɔ Yeesu , yɔ mɔ sɔɔsig kurum mɔ herige. 28Hi wòò hinyɔ mɔ mɔk nɛ hi tɛŋk mɔ hi ha̧a̧tig mɔ doos sɛw. 29Ɓɔryɔ, Waar Bɛto, seem biglik yɔ hi giw bigliko. Wɛɛm mɔ gaa gbaarɛ mɔ wɔ wii tɛŋko an wi boon dɔgl mɔ hi kpoos ɓaasigi. 30Zuunum gbɔlums mɔ an dood hi za̧a̧, hi gɛrs hinmɛksingoya wɔ hi gɛrs zaadɛ wɔ gɔ hi wooy a woosya mɔ gaat bɔ Yeesu nuŋg du. Aanbɔ.

31Yɔ hi da̧a̧s Bɛt bɔ zɔ̧kɔ, lɛl bɔ hi mɔks ge namɔ, Bɛt Mɔkilɔ hi̧i̧s hi kpoos du hi sɛw, hi wɛɛ hi dɔg Bɛt dɔglɔ hi kpoosya̧ ɓaasigi, hoobha̧a̧hi hinza gɛ.

32Ɗɔbsigya wɔ hi gin mɔkilya̧ gbunu hi kpoosya̧ gbunu. Doo za rāā a hinyɔ be ginɔ gi been be gbun gɛ. Hin sɛw gi walko a hi tees du. 33Tɔmsya wɔ hi boo Waar Yeesu rɛmtigɔ dɔgl hi tɛŋk gbɔɔltɔnɔ. Wɛɛ Bɛt rɔbsɔ gbɔɔl ɗɔɔt hi zulha sɛw.

34Doo za lɔ̄ɔ̄ hinza hi teesdu ma gɛ. Wɔ hi gin bako hi wɔ hi gin raat sɛw hi zebtirgo hi wɛɛ hi kamzig hinyɔ hi zebtir tusɔ 35hi zaa hi gaak tɔmsya wɔ naan du. Tɔmsya wɔ hii wɛ̄ɛ̄ hi gaak tus bɔ a za̧a̧nɔ ge anyɔ ha̧a̧ge. 36Doo za giro, nuŋgɔ a Yusufu, hi dɔ̧ɔ̧sig nuŋgɔ za a Barnabas: hinɔ raakɔ a wal doo muulɓaasig-yayɔ, doo Lewiya yɔ hi mɔɔg a Kiprus, 37zebr bakɔ, kamz tusɔ gaa tɔmsya wɔ naan du.

Currently Selected:

TƆMSYAADƐ WOOSƐ 4: NTD

Highlight

Copy