TƆMSYAADƐ WOOSƐ 6
6
TƆMSYAADƐ WOOSƐ 6
1A ɔ̧tɔge yɔ Yeesu fɔkya wɔ mɔglikya̧ hi hɔŋko, Yahu- duya wɔ hi book Yonaniŋko ya̧a̧boonɛ hi kaa hin a Yahuduya zaadɛ wɔ hi zulha. Hi booko a lees yɔ gɔ hi gɛ̧ɛ̧k ɔ̧t nuŋg sɛw hí gāā kuurɛ nɛɛdya̧ wɔ gɛ. 2Tɔmsya wɔ koobl daa eer hi mɔks Yeesu fɔkya wɔ sɛw hi raa
a rı̄ı̄ an wi ɔɔ Bɛt dɔglɔ dɔki an wi wɛɛ kokgɛ̧ɛ̧kyaadɛ gɛ.
3Yɔ anbɔ yɛ̧ɛ̧dɛ be wɛ, herin walɛ nɔɔn-erɛ a nɛ tees ɗu, walɛ hinmɛɛkya wɔ Bɛt Mɔkilɔ hi̧i̧s hi kpoos du, wɔ dood hi gihi seek an dood rɔ́bɛ, an wɛ gbaahi hi woowoos yɛrɛ. 4Wii be wi gbor Bɛt zɔ̧k hi dɔglɔ dɔki. Anbɔ.
5Yɔ dɔgl bɔrɔ bɛs dood saal wɔ sɛw hi her Estafanus yɔ Bɛt Mɔkilɔ hi̧i̧s gi kpoos du, hi Filib, Porokɔr, Nikanɔr, Tiimɔŋ, Parmɛnas hi Nikola yɔ fu̧u̧ a Aŋtakiya gi gul Yahuɗuya maako. 6Hi esihi a tɔmsya wɔ hi muutdu. Yɔ hi zɔ̧ Bɛto hi gbaasihi naan zulha. 7Bɛt dɔgl bɔ gi yɛdugo, Yeesu fɔkya wɔ hi hɔŋk a Urusalima, hi kitig gi daariklɛlɛ. Bɛtmaakwookya wɔ saalya̧ kittɔnɔ hi ta̧a̧k Yeesu dɔglɔ.
8Estafanus yɔ kpoosɔ hi̧i̧s hi gɛmsili hi tɛŋko woo gɛrs gbɔlɛ hi gɛrs hinmɛksingoyaadɛ a dood tees du. 9Dood zaadɛ wɔ hi fu̧u̧z a mɔksilluk za yɔ gɔ hi el a Gbaarɛ Bisilyaadɛ Mɔksilluko, wɔ hi lag Kirɛnɛ ya̧a̧boon hi Iskandariya wɔ ya̧a̧boonya̧, hi Yahuduya wɔ a Silisi hi wɔ hi gi a Aaziya ya̧a̧boonya̧ hi yɛɛl hinfaltingo hi Estafanus. 10Anyɔ Bɛt Mɔkilɔ gaa Estafanus hinmɛɛki, hi ɗɛ̄ɛ̄ an hi daaringe hinmɛɛk zaa gɛ. 11Hɔnɛ wɔrɔ hi wɛɛ hi sɔmb walɛ zaadɛ
a luurlɛlɛ hi gɔ̧ɔ̧sihi ya̧a̧ a wi lagig gi book ya̧a̧ha̧a̧l a Muusa zulha hi Bɛt zulha.
12Hi sɔmb dood wɔ hi ɗɛntɛya̧ wɔ hi Bɛtmaakdɔkya wɔ hi zaa hi wa̧a̧ge hi kaŋg a dɔglyɛ̧ɛ̧kya wɔ hi muutdu. 13Hi wɛɛ hi tɔmz dood hi zaa hi gɔ̧ɔ̧sigya̧a̧ hi raa
a wal yɛrɛ gɔ gi waak ya̧a̧ha̧a̧l book a Bɛtluk gaat yɛrɛ gi zulha hi Muusa maakdɔglɔ zulha. 14Wi lagig gi book a Yeesu Naza-rɛdya bɔrɔ gii gi ɛ̧btir Bɛtluk bɔ gi wɛɛ gi zɛmtir maak wɔ Muusa da goksɛ nɛko.
15Dɔglyɛ̧ɛ̧kya wɔ hí ɗɔ̄ɔ̄t a luk bɔ gedu sɛw yɔ̧lya̧ gi a Estafanus muulɛ, hi gbɛnk muutɔ an Bɛtwalsɛr muuto.
Currently Selected:
TƆMSYAADƐ WOOSƐ 6: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
