TƆMSYAADƐ WOOSƐ 7
7
TƆMSYAADƐ WOOSƐ 7
1Bɛtmaakwookya gbɔɔl mɔɔt bɔ war Estafanus
a hin gi anbɔ ya?
2Estafanus goo
a yɛ̧ɛ̧dɛ Israhilaya wɛ hi baa be wɛ, laginɛ! Bɛt yɔ gin gbɔlums gbɔɔltɔnɔ míts baa wɛ Abraham yɔ gi nɛ a Mɛzo-potami anyɔ gɔ gi re gi ɗɔɔt a Haran, 3Bɛt raage a ɗundum mɔ ɔɔ hɛbt mɔ hi dood mɔ, rekum a waal yɔ gɔ be zunsum gedu. 4Abraham ɗund ɔɔ Kalde waalɔ rek da ɗɔɔt a Haran. Yɔ baatɔ wɔr a hɔ Bɛt wɛɛ kamzig a waal yɛrɛ nɛɛ nɛ waak gedu yɔ.
5Wɛɛ gāag hɛbt lɛl za zulumsɔ a waal yɛrɛ gedu gɛ, lɛlza fɛŋ nɛ an gi gbaa dɔɔtansɔ gedu gɛ; yɛrɛ Bɛt wɛɛ raage a bé gaag waal bɔ ɔ̧ɔ̧nɛ. Wɛɛ waal bɔ gi er waatɔ zul ya̧a̧n kuudu gɔ gi wɔrɔ. Hɔnɛ a wɛlɔ gedu Abraham taan waa be. 6Bɛt dɔgsig anyɔ lɛ a waat mɔ hi waa a waal za rɔ̀bi, dood hi wɛɛnihi gbaarɛ hi wɛɛ hi ha̧a̧nihiya̧a̧r lɛlɔge wɛl tɛmɛrɛ nasɔ. 7Wɛɛ raa a bé gbaas dood Misraya wɔ gɔ hi gbaa nɛ Israhilaya wɔ a gbaarums du dɔglɛ. Hin wɔrɔ gɔ hi talɔ hi tuu hi gɔsib maak a lɛl yɛrɛ ge.
8Bɛt wɛɛ wɔbya̧a̧ hi Abraham a dɔms dɔgl ha. Yɔ Abraham bɛɛ Isaaku mɔɔko, nage a ɔ̧t gɛ̧ɛ̧sims bɔ ge. Isaaku wɛɛ mɔɔ Yakuba nage. Yakuba wɛɛ mɔɔ yaawɛsɛɛ hii koobl daa eerɛ, wɛɛ nàhi be.
9Yaawɛsɛɛ wɔ hi hɛ̧ɛ̧n yɛ̧ɛ̧ya̧ Yusufu lɔlɛ hi zebrig a Misra. Hɔnɛyɔ Bɛt gi hi Yusufu be, 10gig ook a ya̧a̧rhant du sɛw, gaag hinmɛɛk dubt hi gɛmsil bɛr a Waar Misraya bɔ Firawna muutdu be; Firawna wɛɛ wɛɛnig doo nabl gɔ an Misra hɛbtzulya hi raatɔ zulya sɛw.
11A wɛlɔ gedu tɔs tuu a Misra hɛbt du hi Kanaana hɛbt du sɛw, ya̧a̧rhant gi gbɔɔltɔnɔ be. Baa wɛ hí dāg hinyɔ gɔ hi le gɛ. 12Hɔnɛyɔ Yakuba lag a tot gi Misra, yaa yaawɛsɛɛ hii biitiri an hi rek hi zebzɔ. 13Yɔ hi wɛɛ hi wɛɛ eesimɛ, Yusufu mid zulɔ a hindaɔ hi muut du hi mɛɛge. Wɛɛ Waar Firawna mɛɛhi a hi gi Yusufu nɛsɛ ɔ̧ɔ̧nɛ.
14Kuudu Yusufu yaa dood hi ɓɛɛz baatɔ Yakuba hi kamzig hi nɛsɛ ɔ̧ɔ̧ dumbili nɔɔn-erɛ daa nɔɔn wɔ sɛw. 15Yakuba tii waa gɔ a Misra; wɔr lɛlɔge hi baa wɛ zaadɛ wɔ sɛw. 16Hi pɛɛ wɔrkya̧ hi kam hi i̧i̧ a Sikɛm, a loor lɛlyɔ da Abraham ze nɛ hi tus a Hemɔr waatɔ naan duge.
17Ɔ̧t yɔ Bɛt gɔ gi da̧a̧s hinyɔ raas nɛ Abraham gaati a be woo gi sɛ̧ɛ̧buko, dood Israhilaya wɔ hi kitig a Misra hɛbt du hi daarik zul be. 18Kuudu waar za yɛr ɗɔɔt a Misra hɛbt bɔ gedu, mɛ̄ɛ̄ Yusufu yɔ ɗɔɔt nɛ waar a hɛbt bɔ gedu gɛ be. 19Waar bɔrɔ maat dood wɛ hiya, ha̧a̧n ɗɛntɛ wɛ wɔ ya̧a̧rɛ, wɛɛ fɛ̧ɛ̧hi hi bis waatya̧ hi wɔrɔ, an bɔhi za̧a̧ hi hɔŋg a Misra hɛbt du.
20A ɔ̧tɔ ge hi mɔɔ Muusa, bɛr waa a Bɛt muutdu be. Hi kaŋkig sɛɛ taarɛ a baatɔ raa du. 21Hi tuusig gɔ. Yɔ hi tuusige, Waar Misraya bɔ Firawna waasiŋ rek zolige loog kaŋkig an waaɔ buudumi. 22Yɔ anbɔ hi gogs Muusa hinyɔ Misraya wɔ hi mɛɛ sɛw, wɛɛ dag tɛŋk daarlɛl hi dɔgldɔki hi wooswooki.
23Yɔ gin wɛl dumbili nasɔ mɔkil zāa gi kpoos du an gi re gi zɛ̧btir doodɔ Israhilaya wɔ. 24Yɔ rek an gi zɛ̧brihi, zɛm doo za Misraya gi lɛk Israhilaya za gbunu. Gul nɔkɔ ɗaas wal bɔ hi gig gɔluko, tuus nɔɔtigɔ lɛb wal Misraya bɔ wɔrɔ. 25Ɔnɛ rum a dood be Israhilaya wɔ hi mɔk hi kpoos du a Bɛt gi za̧a̧sihi be naan du. Hii be, hí mɔ̄k anbɔ gɛ.
26Yoosugɔ rek zɛm Israhilaya eerɛ hi gbaatingo, tal hi tees du an gi zeehi; wɛɛ raahi a walɛ wɛ, gbun nɛɛn be nɛ gɔltingo nɔ? 27Hɔnɛ za̧a̧n bɔ gi nɛ naaza lɛk yaar Muusa ɛrige a bɔ wɛɛnum waar hi dɔglyɛ̧ɛ̧kya wi teesdu nɔ? 28Ha̧a̧m an mɔ gbɔ̧be anyɔ mɔ gbɔm nɛ Misraya zaabɔ lel ɓɛ ya? 29Yɔ Muusa lag dɔgl bɔrɔ anbɔ hoob gi ha̧a̧ge nɔɔ ɔɔ Misra hɛbtɔ rek waa an rɔ̀bi a Madiyaŋ, da mɔɔ waatwalɛ hɔ eerɛ.
30Yɔ wɛl dumbili nas daa, Bɛtwalsɛr za mits Muusa a kuusa laazebtya du a hɛtdɔŋ du a Sinay ga̧a̧t dɔŋdi. 31Yɔ Muusa gbɛn anbɔ hin wɛɛsig gɛrsɛ, sɔɔ a tɛ̧ɛ̧kuusà laazebtya bɔ dɔŋgɔdi an gi see hinɔ, kɛm Waar Bɛt raazig laazebt bɔ gedu: 32a bee gi baa mɔ Abraham hi Isaaku hi Yakuba Bɛtya̧. Yɔ hoobha̧a̧ Muusa gi beeko hā̧a̧g an gi sɔ̧ɔ̧ hinɔ ma gɛ.
33Waar Bɛt raage a hodum taal mɔ wɔ dɔɔ du, lɛlyɔ mɔ erk ge gi hɛbt gaatyɔ, ya̧a̧nɛ. 34Be sɔ̧ɔ̧ be gbɛn dood be Israhilaya wɔ hi gi a Misra hi gihi ya̧a̧rha̧a̧nik gbɔɔltɔnɔ, be lag hekilya̧. Be siz an be za̧a̧sihi. Zaamɔ be yaam a Misra an mɔ rek mɔ tuusihi hi ɔɔ hɛbt bɔ. 35Muusa bɔ za̧a̧nɔ baa wɛ Israhilaya wɔ hi da hi tā̧a̧g nɛ gɛ. Hi warig nɛ a bɔ wɛɛnum waar hi dɔglyɛ̧ɛ̧kya a wi tees du nɔ? Bɛt yaazig an gi wɛɛ waar i, hi za̧a̧sigya. Bɛt gɔ anbɔ hi walsɛrɔ yɔ midsig a tɛ̧ɛ̧kuusà laazebtya bɔ gedu gi wɛɛ gi boogya̧a̧.
36Muusa bɔ gii tuus dood Israhilaya wɔ a Misra gi gɔ gɛrs hinzuunikyaadɛ hi gɛrs zaadɛ a Misra, a Maaliya mɛmbal gbɔɔl du, hi a hɛtdɔŋ du wɛl dumbili nasɔ. 37Muusa bɔ za̧a̧nɔ gii raa Israhilaya wɔ a Bɛt gi her ya̧a̧kɛŋkɔya za a dood nɛ teesdu an beya, gi yaasinge. 38Yɔ baa wɛ hi mɔ́ks a hɛtdɔŋ du, Muusa gii er hi tees du hi Bɛtwalsɛr bɔ gig ya̧a̧book a Sinay ga̧a̧t ha. Bɛtwalsɛr bɔ gaag dɔgl za̧a̧tigya an gi wɛɛ gi goksɛ.
39Yɔ baa wɛ hā̧ā̧hi an hi wɛɛn kpoosya̧ a Misra, hi kɛ̄msig tɔn gɛ be hi inige. 40Yɔ anbɔ hi raa Haruna a wɛ mɛɛ hinyɔ zɛm Muusa bɔ tudzɛ a Misra ma gɛ. Yɛrɛ gɔsɛ bɛt zaadɛ wɔ gɔ wɛ gbɛn hi lɔl wɛ an hi dosɛ a gbɔnɔ du.
41A ɔ̧tɔge ro hi wɔm nawaa an bɛtya̧ hi gɔsig maako. Hi ɛ̧bs naab gbɔɔlɛ an hi dag hat a hinyɔ hi woon naanya̧ gedu. 42Hɔnɛ Bɛt wɛɛ zɛmrsihi kuu, ɔɔhi hi gɔs sɛwaat wɔ bɛtha maako anyɔ hi bi̧i̧ a Bɛtya̧a̧kɛŋkya wɔ hi ɗɛɛrwol du a dood Israhilaya wɛ, nɛ mɔk a nɛ gaa bee namb wɔ hi gbɛɛtiro hi gaas zaadɛ wɔ a hɛtdɔŋ du a wɛl dumbili nas wɔ gedu ya?
43Nɛ́ nɛ pɛɛ Mɔlokos maakluk bɔ hi gɔn gbandili hi maak nɛ Ramfa bɔ sɛwaatya̧, hi maak nɛ zaadɛ wɔ nɛ gɔ an nɛ zagl di nɛ ɗɔbsihi hii ma mi?! Ya̧a̧nɛ bé pɛɛ bé ka̧n a Baabila doos hɛmltɔnɔ. 44Yɔ baa wɛ hi gi nɛ a hɛtdɔŋ du hi gin ya̧a̧wɔk bɔ lukgbandilɔ an hi dagtin gedu hi Bɛto hi booya̧a̧, hi gbaa bethɛɛk wɔ hi bi̧i̧ Bɛt maakɔ ha gedu; Bɛt gii raa Muusa a gi gɔ luk gbanya gi riitin anyɔ gbɛnɔ a ga̧a̧t ha.
45Kuudu yɔ baa wɛ hi yɛr luk gbandil bɔ a yaa wɛ hi naan du hi kam ɔksi yɔ hi rek hi Yosuwa an hi wɔɔz hɛbt hi gabsɛ a dood hɛbtya zaadɛ naan du. Bɛt ninsihi dood wɔ hi muutdu hi ɗɔɔt hi waa lɛlɔge tuur a Dawda waabilɔ bɔ gedu. 46Anyɔ Dawda dag gɛmsil a Yakuba Bɛtɔ muutdu, re zɔ̧ge an gi gaag gbɔnɔ gi tɛbsig lɛlza yɔ gɔ gi waa du. 47Yɛrɛ Sulemaanu gii wɔmsig luko.
48Hɔnɛ taa an Bɛt Yɔ Gi Gbɔɔl Gi Daarlɛl gi waa a luk yɔ dood hi wɔmn naan gedu anyɔ Bɛtya̧a̧kɛŋkya dɔgɔ 49a Bɛt raa a waar ums be ɗɔɔtillɛl gi a bɛtha, hɛbt gi dɔɔ be ɗa̧a̧tillɛlɛ. Nɛ ɗɛɛ an nɛ wɔmsib nɔ lukɔ? Holum be lɛl gedo? 50Nɛ naan been woo ma hin wɔrɔ sɛw mi!
51Zulɓaatilya wɛ! Nɛ gi an kpaaryɔ, kpoos nɛ hi tɔn nɛ hi ɓaaɓa, nɛɛ hā̧a̧n Bɛt dɔgl lak gɛ! Nɛ gi waak zul nɛ ɓaasig a Bɛt Mɔkil gbaŋgi. Hinyɔ baa nɛ hi gi wooko, nɛ wook hinɔ gii be! 52Bɛtya̧a̧kɛŋkya nɔni gid baa nɛ hi kɛtinge ya̧a̧ gɛ? Hi wɛɛ hi gbɔm dood wɔ Bɛt yaazihi biitir hi dɔg nɛ Za̧a̧n riit bɔ Yeesu Kristu bɛtha zaakɔ, Za̧a̧nyɔ nɛ rɛ̧ɛ̧sig ya̧a̧ nɛ wɛɛ nɛ gbɔŋge. 53Nɛ dag Bɛtmaakdɔgl a Bɛt walɛsɛrɛ ɔ̧ɔ̧ wɔ hi naan du, nɛ́ wɛ̄ɛ̄ nɛ́ wā̧ā̧ dɔglɔ a nɛ kpoos du gɛ be!
54Yɔ Yahuduya dɔglyɛ̧ɛ̧kya wɔ hi kɛm hinyɔ Estafanus dɔg anbɔ hinɔ nɔɔhi ha̧a̧ltɔnɔ lɔlya̧ hob nɔɔtigi. 55Hɔnɛyɔ Bɛt Mɔkilɔ hi̧i̧s Estafanus kpoos du be, see yɔ̧l bɛtha gbɛn Bɛt gbɔlumsɔ, wɛɛ gbɛn Yeesu be gi erk a Bɛt naanrɔbo. 56Wɛɛ dɔgɔ
a yɛrɛ be gbɛnik bɛtha gi aasilyɔ, be gbɛnik Za̧a̧n Waa bɔ gi erk a Bɛt naanrɔbo.
57Wɔrɔ be, hi ɓooya̧a̧ ha̧a̧ltɔnɔ hi zukt tɔnya̧ hi ɔks gi muulɛ hi wa̧a̧ge. 58Hi dirige hi tuunig a waal gbɔɔl bɔ saŋgbatɔ gedu hi duutinge beto. (Segya wɔ be, hi hodil gbandilya̧ hi mɔksil a walza sɛr nuŋgɔ a Sawulu dɔŋdi. ) 59Hi rek hi duutin Estafanus beto. Estafanus be gi zɔ̧k Bɛt anyɔ lɛ
a Waar Yeesu , zem kol be.
60Wɛɛ zagldi ɓooya̧a̧ raa
a Waar Bɛto, bitsumɔhi hinha̧a̧l yɛrɛ hi woosibe.
Yɔ dɔg anbɔ wɔr gɔ.
Currently Selected:
TƆMSYAADƐ WOOSƐ 7: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
