TƆMSYAADƐ WOOSƐ 8

1Sawulu be ta̧a̧ nɛ dɔglɔ an hi gbɔŋg hɛw. A ɔ̧tɔge dood hi yɛɛl Yeesu fɔkya wɔ zɛksig ha̧a̧ltɔnɔ a Urusalima. Hi nɔɔ hi hɛks hi rek a Yahuduya hɛbt du, zaadɛ be a Samariya hɛbt du. Tɔmsya wɔ hii kɔm kpɔd. 2Yeesu -ɗɔbsigya rɔ́bɛ wɔ zaadɛya̧ hi loo Estafanus wɔrkɔ hi rek hi i̧i̧ge. Hi wɛɛ hi kaag ha̧a̧ltɔnɔ. 3Sawulu be zɛks Yeesu fɔkya wɔ, gut raato hi raato, gi wa̧a̧lik walɛ hi nɛɛdɛ gihi yaak luknɔ du.

4Yeesu fɔkya zaadɛ wɔ hi hɛks hi rek hi dɔg Dɔgl Rɔb bɔ a lɛlyɔ hi re ge sɛw. 5Filib be rek a Samariya waal gbɔɔl du dɔg Masihu bɔ dɔglɔ be. 6Anyɔ dood saal wɔ hi kɛm hinyɔ Filib gi dɔk hi wɛɛ hi gbɛn gɛrs hintuusingoya yɔ gi wook be, hi zaa hi sɛw hi ta̧a̧ dɔglɔ rɔbtɔnɔ. 7Loorɛha̧a̧l hi tuu a dood kittɔnɔ hi muul du hi kaal ha̧a̧ltɔnɔ. Dood zaŋdɛ wɔ, hi dɔɔwɔlya wɔ hi za̧a̧k be. 8Yɔ anbɔ ma Samariyaya wɔ hi dag hat gbɔɔltɔnɔ.

9Doo za da gi a waal gbɔɔl bɔ gedu nuŋgɔ a Simɔŋ, raa zulɔ a be doo gbɔɔlɛ, gɔ gis nɛ Samariyaya wɔ gɛrs gɔko; hii be, hinɔ yɔɔhiyɔɔ. 10Dooɗ gbɔlɛ hi waat sɛw gɔ hi gisig kɛŋk dɔglɔ bɛttɔnɔ. Dood wɔ hi wɛɛ hi dɔk be

a gii gi Bɛt Tɛŋk yɔ gɔ hi el a Tɛŋk Gbɔɔlɛ.

11Yɔ Simɔŋ gisihi waak nɛ gɛrsɔ bɔ gɔk be, hii be duhidumɔ hi wɛɛ hi ta̧a̧k dɔglɔ gɔ be. 12Hɔnɛyɔ Filib dɔgsihi Dɔgl Rɔb bɔ yɔ gi Bɛt wáátɔ dɔgl hi Yeesu Kristu nuŋgɔ hi ɗɔbs dɔglɔ; walɛ hi nɛɛd sɛw hi look Bɛtmɛmɛ. 13Simɔŋ hi zulɔ ɗɔbs Bɛt dɔgl bɔ hɛw, wɛɛ dag Bɛtmɛmɛ. Yɔ anbɔ wɛɛ ɔ̄ɔ̄ Filib dɔŋgɔ zaa ma gɛ. Yɔ gbɛn hinmɛksingoyaadɛ hi gɛrs gbɔlɛ zaadɛ wɔ Bɛt zuun a Filib naan du, yɔɔgyɔ.

14Yɔ tɔmsya wɔ hi gi a Urusalima hi lag a dood wɔ hi waak a Samariya hi ta̧a̧ Bɛt dɔglɔ, hi yaa Piyɛr hi Yohana a hiige a Samariya. 15Yɔ Piyɛr hi Yohana hi tuur a Samariya hi zɔ̧bs ɗɔbsigya wɔ hi gi hɔ Bɛt an hi dag Mɔkilɔ. 16Bɛt Mɔkilɔ da sidir nɛ a Samariyaya wɔ zaaya̧ gbun zulha ket gɛ be, hi dag Bɛtmɛm gii kpɔd a Yeesu nuŋg du.

17Hɔnɛyɔ Piyɛr hi Yohana hi tuur hi gbaas wɔrɔ naan zulha hi dag Bɛt Mɔkilɔ gɔ hi kpoos du. 18Anyɔ Simɔŋ gbɛn tɔmsya wɔ hi gbaas ɗɔbsigya wɔ naan zulha Bɛt gi wɛɛ gi gaahi Mɔkilɔ anbɔ, ha̧a̧g an gi gaa tɔmsya wɔ tusɛ, 19raahi

a gaanbe tɛŋk bɔrɔ an za̧a̧nyɔ gɔ be gbaasig naan zulha gi dag Bɛt Mɔkilɔ be.

20Hɔnɛ Piyɛr wɛɛ raage

a an Bɛt gi ha̧tirmɔ hi tus mɔ bɔ sɛw anyɔ mɔ mɔk a be zeb Bɛt gaasɔ hi tusɛ! 21Anyɔ kpoos mɔ gāā a Bɛt muutdu gɛ, ɗɛ̄ɛ̄ an mɔ ɔks hi wii a woos yɛrɛ gedu zaŋ gɛ. 22Ɔɔm mɔkil mɔ ha̧a̧l bɔrɔ mɔ wɛɛ mɔ dɛms Waar Bɛt naan an mɔ zɔ̧g kinsa gi bitsum mɔkil mɔ bɔ mɔ kpoos du. 23Be gbɛn an kpoos mɔ zoobɔ, yɔ anbɔ hinha̧a̧l daarumdaarɔ.

24Simɔŋ wɛɛ raa Piyɛr hi Yohana

a saanɛ, zɔ̧bsinbe Waar Bɛto hi zul nɛ an bɔ hinwɔ nɛ raa zaaya̧ gbun gi zɛ̧be.

25Kuudu yɔ Piyɛr hi Yohana hi raas dood hinyɔ Yeesu woo hi wɛɛ hi dɔksihi Bɛt dɔgl gi da̧a̧ hi wɛɛ a Urusalima. Yɔ hi gi wɛɛko hi dɔg Dɔgl Rɔb bɔ nɔɔha a raat kitɛ du a Samariya hɛbt du sɛw.

26Bɛtwalsɛrɔ za zaa a Filib ge raage:

a ɗukumha, mɔ rek a ɔ̧tkazig naanyɛ̧li, a gbɔnɔ yɔ fu̧u̧ a Urusalima gi tii a Gaaza ge, gbɔnɔ yɔ fɔb a hɛtdɔŋ du.

27Filib ɗuk rek a gbɔnɔ bɔ gedu, dagtin hi wal za Etiyobya gi zaako, giz nɛ a Urusalima an gi ɗɔbs Bɛto. (Hi sɔɔg nɛ an gi oo nɛɛwaar Etiyobya bɔ rɔɔsɔ sɛw. ) 28Gi wɛɛk ma gi lɛlɛ, ɗɔɔt a mɔɔta yɔ dɔy gi dirk hage, gi zaŋgig Bɛtya̧a̧kɛŋkya bɔ Esaya ɗɛɛrwolɔ. 29Wɛɛ Bɛt Mɔkilɔ raa Filib

a rekum mɔ sɛ̧ɛ̧b a mɔɔta bɔrɔ gi dɔŋdi.

30Yɔ Filib nɔɔ gi reko lag wal Etiyobya bɔ gi zaŋgig hin a Esaya ɗɛɛrwol du. Ɛrige

a mɔ kɛŋk hinyɔ mɔ zaŋgig ya?

31Gii goo

a doo za gogsib hinɔ gɛ be, be ɗɛɛ hinɔ kɛŋk ri?

Wɛɛ el Filib a kazum hɛdi mɔ ɗɔɔt hi bee ɔksi an mɔ wadsibe hinɔ. 32Lɛl bɔ gi nɛ zaŋgig

a ɗɛɛrwol bɔ gedu gi an yɛrɛ lɛ a hi kaŋg an tamɔ a gbɛɛrik lɛlɛ. Wɛɛ kɔ̀m an tamwaa yɔ gɔ ɓōō a za̧a̧nyɔ gɔ gi dɛ̧ɛ̧lik sɛɛsɔ gi muutdu gɛ. Āā ya̧a̧ an gi inɔ gi raa doodɛ a ha̧a̧be an hi huur sɛɛs be gɛ zaŋ. 33Yɔ hi wa̧a̧ge, hi mātinge dɔgl rɔb gɛ. Bɔ ɗɛɛ an gi dɔg zaŋgɔ dɔglɛ? Ya̧a̧nɛ, hi da̧a̧s kolɔ a hɛbtdi.

34Etiyobya bɔ ɛr Filib

a raasibe, Bɛtya̧a̧kɛŋkya bɔ gi book dɔgl yɛrɛ a bɔ zulha nɔ? Gi book gi zulha ya, zaa gi book doo za zulha ya ri?

35Filib yɛɛl ya̧a̧book dɔgsig Yeesu dɔglɔ bɔ baar a lɛl yɔ hi zaŋg nɛ a tamwaa bɔ gbɛɛrikɔ dɔglɔ ge. 36Anyɔ hi gi rek gbɔnɔ du hi tuur a mɛmlɛlɛ, wɛɛ Etiyobya bɔ raa

a mɛm gɛrɛ, à be dag Bɛtmɛm hɛdi yɔ gɔ nɔ?

[ 37Filib raa

a gɔ hinza gɛ, gid mɔ ɗɔbsig Yeesu hi kpoos mɔ sɛw, mɔ ɗɛɛ an mɔ dag Bɛtmɛmɛ.

Woosya bɔ goo

a yɛrɛ be ɗɔbs a Yeesu Kristu gi Bɛt waayɔ. ]

38Wɛɛ es mɔɔta ɔ̧ɔ̧ bɔ. Wɛɛ Filib hi Etiyobya bɔ hi sil mɛm bɔ gedu hi eer sɛw. Filib hotinge Bɛtmɛm gɔ. 39Yɔ hi tuuz a mɛm bɔ gedu, Bɛt Mɔkilɔ ha̧s Filib. Etiyobya bɔ gbɛnig zaa ma gɛ, yɔ anbɔ gii wɛɛ fɔ gbɔnɔɔ hi hato. 40Hi wɛɛ hi da hi gbɛn Filib a Azota, dɔŋgɔ rek a Kaysariya hɛbt du, gi Bɛt dɔglɔ dɔk nɔɔha a waal gbɔlɛ wɔ du a lɛlyɔ gi daak ge sɛw.

Currently Selected:

TƆMSYAADƐ WOOSƐ 8: NTD

Highlight

Copy