LUKA 14

1Yɔ Yeesu gul a mɔksillukya zaa yɔ gi Farisaya raa du a holum-ɔ̧ti an gi lehinɛ, Farisaya zaadɛ wɔ hi gig seeko. 2Yɔ anbɔ, wal za yɔ gums hubs muulɔ, zaa nɛ gi erk a gi muut du. 3Yeesu war Bɛtmaakdɔkya wɔ hi Farisaya wɔ:

a maak wɛ raa a ri? Raa a hi za̧a̧s doo a holum-ɔ̧t ya, raa gɛ ya ri?

4Wɔrɔ hi kɔm hititi. Yɔ anbɔ Yeesu wɛɛ yaa naan a wal bɔ gi muulɛ, za̧a̧sige, wɛɛ yaage rekɔ. 5Kuudu wɛɛ raahi:

a bɔ waawalɔ, zaabe naaɔ gi mat a zɛŋk du a holum-ɔ̧ti gi ha̧sig ɓɔrbɔ gɛ?

6Wɔrɔ hi ɗɛ̄ɛ̄ hinza gook a dɔgl bɔrɔ hage gɛ. 7Yɔ Yeesu gbɛn dood wɔ hi elihi nɛ hi sɛ̧ɛ̧k ɗɔɔtillɛl rɔbɛ biitir wɔ, dɔksihi ya̧a̧daaniki, raahi:

8a za̧a̧n za gi elum a lootinslees lɛlɛ, bɔmɔ ɗɔɔt a doo gbɔɔl ɗɔɔtillɛlɛ. Nɛ kinsa doo za gbɔɔl gi a wɔrɔ hi elihi teesɔ du daar mɔya mɔ mɛɛ gɛ. 9Yɔ anbɔ, an bɔ za̧a̧nyɔ elin nɛ eer sɛw gi zaa gi raamɔ: a ɔsum za̧a̧n yɛrɛ lɛlɛ, mɔ wɛɛ mɔ ha̧a̧seem ɗukugɔ a lɛl bɔ ge an mɔ rek mɔ ɗɔɔt a lɛl yɔ̧ɔ̧sum bɔ ge.

10Yɛrɛ gɔ gi elum anbɔ, rekum mɔ ɗɔɔt a ɗɔɔtillɛl kuud bɔ ge. Gɔ gi anbɔ za̧a̧nyɔ elum gɔ gi zaa, gi raamɔ: a sa̧a̧ɔ, zaam hɛdi, mɔ ɗɔɔt a ɗɔɔtillɛl rɔb bɔ ge! Ɓɔr ma mɔ dag gbɔlumsɛ a dood wɔ hi lekhin hi mɔɔ hi muutdu sɛw. 11Ya̧a̧nɛ, za̧a̧nyɔ tɔɔs zulɔ, hi tiisige. Wɛɛ za̧a̧nyɔ tiis zulɔ be, hi dɔɔsige.

12Yeesu wɛɛ raa za̧a̧n bɔ elzige:

a gɔ mɔ gi gɛmsig lees lurkumi, zaabe lees lɛɛsumgbari, bɔmɔ el saam mɔ hiya; zaabe, yɛ̧ɛ̧dɛ mɔ hiya; zaabe, dood mɔ hiya; zaabe, namɔza wɔ hi gin rɔɔsɛ, an bɔ hii be hi elum ɔ̧tza hi wɛnsum hinyɔ riitin hi mɔnɛ bɔ. 13Yɛrɛ gɔ mɔ gɛmsig naablees gbɔɔlɛ, elum ya̧a̧rya wɔ, dood zaŋgdɛ wɔ, dɔɔ-wɔlya wɔ hi yɔ̧ɔ̧rɛ wɔ mɔ gaahi. 14Yɔ anbɔ anyɔ dood wɔ hi ɗɛ̄ɛ̄ an hi wɛnsum hinyɔ mɔ gaahi gi riitin gɛ, hat gi a mɔɔ. Yɔ anbɔ, hí toomɔ a hinrɔbɛgɔkya wɔ rɛmtigya̧ bɔ ɔ̧tɔ ge.

15Dood wɔ hi ɗɔɔtig hi Yeesu yɔ zaaya̧ gbun kɛm dɔgl bɔrɔ, raa Yeesu :

a hat gi a za̧a̧nyɔ gɔ gi le kok a Bɛt wáát duge.

16Hɔnɛ Yeesu raage:

a doo za gɛms lees gbɔɔltɔnɔ, wɛɛ elz dood kittɔnɔ. 17Yɔ lees bɔ lekɔ rii, yaa gbaarwalɔ raa dood wɔ hi elihi nɛ: a zaanɛ, hi gɛms lees sɛw da̧a̧da̧ ma. 18Yɔ anbɔ hi sɛw hi yɛɛls zulya̧ hindɔk gbunu gbunu: doos bɔ raage: a be zebz bako, gi an be rek be seezɔ, bɔgi nɔɔmɔ, be zɔ̧mɔ, da mɔ raa za̧a̧nleesya bɔ a be ɗɛɛ zaak gɛ.

19Eesum bɔ raa: a be zeb naa kooblɛ, gi an be rek be goohi hinbanuko, bɔgi nɔɔmɔ. Be zɔ̧mɔ, da mɔ raa za̧a̧n leesya bɔ a be ɗɛɛ zaak gɛ. 20Taasum bɔ raa: a gɛ be loo nis ɓɔryɔ, yɔ anbɔ be ɗɛɛ zaak ma gɛ. 21Gbaarwal bɔ wɛɛ a ɗɛntɔ bɔ ge fɔksig dɔglya̧ sɛw. Hɔnɛyɔ ɗɛntɔ raatya bɔ lag anbɔ kpoosɔ gi nɔɔge, wɛɛ raage: a rekum nɔɔktɔnɔ a waal gbɔɔl du a gbɔnɔnɔɔ wɔ hi du hi gbɔnɔ waat wɔ hi du mɔ elz ya̧a̧rya wɔ, dood zaŋgdɛ wɔ, yɔ̧ɔ̧rɛ wɔ hi dɔɔwɔlya wɔ hi zaa.

22Gbaar wal bɔ rekɔ, elzihi hi zaa, ɗɔɔtillɛl zɛ̧ɛ̧rɔ. Wɛɛ raa ɗɛntɔ bɔ: a ɗɛntyɔ, hinyɔ mɔ raa, be woo gɔ. Yɛrɛ lɛl zɛ̧ɛ̧r giste. 23Ɗɛnt bɔ wɛɛ raa gbaar walɔ bɔ: a rekum a gbɔnɔnɔɔ wɔ hɛt du hi gbɔnɔ waat wɔ hi fɔb a rɔkilya̧ wɔ hi du, dood wɔ gɔ mɔ zɛ̧hi sɛw, fɛ̧ɛ̧mɔhi hi zaa an ráá be gi hi̧i̧sɔ. 24Ya̧a̧nɛ be gisin raako: a dood wɔ be elihi nɛ hi inɔ, zaaya̧ gbun taa lees be dako.

25Yɔ dood saal gbɔlɛ hi retingo hi Yeesu , Yeesu wɛɛ zɛmrɔ raahi:

26a za̧a̧nyɔ zaa beege gi ı̄n baatɔ, hi nɔɔtɔ, hi nistɔ, hi waatɔ, hi yɛ̧ɛ̧dɛ ɔ̧ɔ̧, hi siŋdɛ ɔ̧ɔ̧ hi kolɔ hɛw gɛ, ɗɛ̄ɛ̄ an gi wɛɛ fɔkya be gɛ. 27Wɛɛ za̧a̧nyɔ pɛɛ dɔ̧ɔ̧rɔ gi fɔbzibe gɛ, ɗɛ̄ɛ̄ an gi wɛɛ fɔkya be gɛ.

28Ɔnɛ bɔ za̧a̧nɔ ha̧a̧ge a nɛ teesdu an gi wɔm luk hɔɔti gi ɗɔɔt gi dɛ̧ɛ̧t hinyɔ gɔ gi tuus gi zulha an gi sɔ̧ɔ̧ hinyɔ gɔ gi da̧a̧sin kɛn gɛ! 29Ya̧a̧nɛ, kinsa gɔ gi sɛŋg luk sɛŋk bɔ gi ɗɛɛ da̧a̧sig gɛ; dood wɔ gɔ hi gbɛnig sɛw hi yɛɛlig kpɛ̧ɛ̧liki, 30hi dɔgɔ: a za̧a̧n yɛrɛ yɛɛl luk bɔ wɔŋkɔ, wɛɛ ɗɛ̄ɛ̄ an gi da̧a̧sig gɛ!

31Zaabe, bɔ nɛ wáár gbɔɔlɔ gi gin dood duk kooblɛ gí rek nɔk gɔk hi wáár za dɔɔmi, gi ɗɔ̄ɔ̄t gi sēē an kinsa gi ɗɛɛ nɔk bɔ gɔkɔ hi dood duk yɔ̧ɔ̧lgbun wɔ hi zaak an hi dagtin hi gii kɛn gɛ! 32Gi táā an gi ɗɛɛ nɔk bɔ gɔk hi waar zaabɔ sɛ̧ɛ̧b zaak ket gɛ, yɔ yaasig tɔmsɔyaadɛ an hi re hi ɛrig boolumi. 33Gbunɔ, za̧a̧nyɔ ɔɔ hinyɔ gin sɛw gɛ, ɗɛɛ an gi wɛɛ fɔkya be gɛ.

34Manda gi hinrɔbo, wɛɛ à ti̧i̧ gɛ, yɔ hi wɛɛ hi ti̧i̧singe nɔ? 35Wɛɛ bɛ̄r an gi yɔ̧kt hinza a hɛbtdi gɛ, wɛɛ ɗɛ̄ɛ̄ an hi ɔksin naahutu gi bɛs lees a bak du gɛ. Hí bisig ma di tɔs. An za̧a̧nyɔ gin tɔn an gi kɛmɔ, gi kɛmɔ.

Currently Selected:

LUKA 14: NTD

Highlight

Copy