LUKA 15

1Tooszekya wɔ hi hinha̧a̧l wookya wɔ sɛw hi sɛ̧ɛ̧buko an hi laks Yeesu dɔglɔ bɔ gi booko. 2Wɛɛ yɔ Farisaya wɔ hi Bɛtmaakdɔkya wɔ hi gbɛn anbɔ hi dɔntɔ hi raa:

a wal yɛrɛ gɔ ta̧a̧ hinha̧a̧lya wɔ wɛɛ lehin hi hiya.

3Hɔnɛ Yeesu yɔ mɛɛ anbɔ, wɛɛ dɔgsihi ya̧a̧daanik yɛrɛ:

4a bɔ za̧a̧nɔ a nɛ teesdu gi gin tam yɔ̧ɔ̧lɔ nɔɔnɛ, zaa gbun gi wagɔ, yɔ ɔ̄ɔ̄ tam dumbili naanza daatɔ naanza wɔ a hɛtdɔŋ du, yɔ tɛbz bɔrɔ wag an gi midzig gɛ ya? 5À midzig be, yɔ pɛɛz baŋk ha yɔ kamz hi hato. 6Gɔ yɔ wɛɛz raa du, yɔ èl saamɔ wɔ hi naaza hii yɔ raahi: a dagin hat hi bee lɛlgbunu, anyɔ be midz tam be zaabɔ wagzɔ.

7Be gisin raako: hat gi gi anbɔ a bɛtha gid hinha̧a̧lya gbun gi zɛmr kpoosɔ, daar dood dumbili naanza daatɔ naanza wɔ hi gi hinrɔbɛ wookya wɔ hā̧ā̧hi kpoosya̧ zɛmrik gɛ.

8Bɔ nisɔ gi gin tus gaat kooblɛ, zaa gbun gi wagɔ, taa an gi kpoo laa a pitila du gi hɛd luk bɔ gi tɛb rɔbtɔnɔ an gi mid ya? 9À midige, yɔ el naaza wɔ hi waatingo lɛlgbunu, hi saamɔ hiya yɔ raahi: a yɛnwɛ dag hato anyɔ be mid tus be bɔ wag nɛko. 10Be gisin dɔk gbunɔ giya: a hat gi a Bɛtwalɛ-sɛrɛ ɔ̧ɔ̧ wɔ hi muutdu anbɔ lab be a hinha̧a̧lya bɔ zɛmr kpoosɔ gi dɔŋgo.

11Yeesu wɛɛ dɔg ɓɛ:

a wal za gin waat walɛ eerɛ. 12Wans bɔ ɛr baatɔ: a baa, gaabe rɔɔs yɔ gi nɛ zul benɛ. Baaya̧ loo rɔɔs bɔ gɛ̧ɛ̧sihi.

13Kuudu yɔ ɔ̧t zaadɛ hi talɔ, waawal wans bɔ mɔks rɔɔsɔ wɔ gin sɛw, tuu rek rɔ̀bs a waal hɛmlɛ, ha̧tirz rɔɔsɔ wɔ a zɛlk du sɛw, a lɛlɔge. 14Yɔ daan rɔɔsɔ wɔ gi da̧a̧ sɛwi, tɔs ha̧a̧l tuur gɔ hɛbt bɔ gedu, yaala yɛɛl ya̧a̧rha̧a̧ko. 15Rek wooswook gɔ a dood wɔ hi gi a hɛbt bɔ gedu zaaɔ ge. Za̧a̧n bɔ yaag gi bak du a gi re gi oosig habɔ wɔ. 16gii be, yɔ rekɔ, a̧a̧kil bɔ gig ha̧a̧k be ha̧a̧ge an gi tɔk hinza kos wɔ hab gɔ hi tɔko an gi hi̧i̧sin buuɔ; wɛɛ doo za mɔ̄k an gi gaag lees gɛ be.

17Yɔ mɔkilhin gi mid zulɔ, raa: a yɛrɛ baa be gin woosya kittɔnɔ, hi gin lees gbɔɔltɔnɔ, hi ɗɛ̄ɛ̄ an hi da̧a̧s gɛ be, bee be a̧a̧kig a hɛdi be! 18Ɔbe ɗukɔ be rek a baa be ge be raage: a baa, be woo hinha̧a̧l a Bɛt muutdu hi a mɔ muutdu. 19Be tuur doo rɔb an mɔ elib a be waa mɔɔn ma gɛ; yɛrɛ gbààbè an woosya mɔ zaa.

20Wala bɔ ɗukɔ wɛɛ baatɔ ge. Yɔ gi zaak hɛmltɔnɔ baatɔ gi gbɛnige a lakyɔ̧ɔ̧rɛ, mɛɛsig ya̧a̧rɛ, nɔɔ rek dagige, kɔtige wɛɛ zɔŋge ya̧a̧gbarɔ. 21Waawal bɔ raage: a be woo hinha̧a̧l a Bɛt muutdu hi a mɔ muut du; bé tuur doo rɔb an hi elib a be waa mɔɔn ma gɛ.

22Hɔnɛ baatɔ raa woosɔya wɔ: a kamzin dimnaan yɔ bɛr gi daar zaadɛ wɔ sɛw nɔɔko nɛ heksige, hi banawaa nɛ heksig a naan du hi taal a dɔɔ du. 23Kamzin naabaa doolɛ, gbɛɛrinɛge an wɛ tɔbɔ wɛ dagin hato. 24Ya̧a̧nɛ, waa be wal yɛrɛ da wɔɔrɔ, yɛrɛ wɛɛ rɛmlɔ, da waagɔ, be wɛɛ be zolige. Hi wɛɛ hi mɛ̀ɛ̀s ma naabo hi dagin hat gɔ.

25Yɔ anbɔ waawal gbɔɔl bɔ da giz nɛ a bako gi zaak be. Yɔ sɛ̧ɛ̧b a raaya̧di gi lag hi ɓaak sumlɛ, hi waŋg ulko, hi hinnako. 26El woosya zaa gbunu ɛrig hinyɔ gi daako. 27Woosya bɔ raage: a yɛ̧ɛ̧ mɔ gii wɛɛzɔ; baa mɔ yɔ midig rɔbtɔnɔ ro gi gbɛɛr naabaa doolɛ an gi dagin hato.

28Yɔ waa gbɔɔl bɔ lag anbɔ kpoosɔ nɔɔgnɔ, ha̧a̧g gulik raa du ma gɛ. Yɔ baatɔ lagɔ tuuz zaa zɔ̧ge an gi gul raa du. 29Hɔnɛ waawal wɛɛ ta̧a̧ge: a baa, kɛmɔ! Be woosum woos wɛl kittɔnɔ. Hinyɔ mɔ raab sɛw, be wookwo; be tāl ya̧a̧ mɔɔn ɔ̧tza gɛ. Wɛɛ mɔ gaabe nɛ iswaa zaa an be gbɛɛrɔ be tɔb hi nabeza zaadɛ an wi dagn hat gɛ. Nɔ ma nɔ? 30Yɛrɛ waa mɔ bɔ ha̧dzir rɔɔs mɔ a zɛlklɛlɛ hi nɛɛd kaatɛ ha̧a̧lɛ wɔ, gi wɛɛ gi wɛɛza, mɔ wɛɛ mɔ gbɛrs gii ma naabaa doolɛ!

31Baatɔ raage: a waa be walɔ, mɔ gi hi bee ɔ̧t nuŋg sɛw, wɛɛ hinyɔ be gin sɛw gi mɔɔnɛ. 32Yɛrɛ yɛ̧ɛ̧ mɔ yɛrɛ wɔɔrɔ, gi wɛɛ gi rɛmlɔ, waagɔ gi wɛɛ gi midzɔ, yɔ anbɔ ginɛ an wɛ dag hato hi seet lɛlgbun sɛw.

Currently Selected:

LUKA 15: NTD

Highlight

Copy