LUKA 16

1Yeesu raa walɛsɛrɛ ɔ̧ɔ̧ wɔ:

a doo za rɔɔsya gin rɔɔs-ookya. Hi zaa hi raas za̧a̧n rɔɔsya bɔ: a rɔɔs mɔ ookya bɔ gi ha̧tirgo rɔɔs mɔ ha̧tiro. 2Ɗɛnt rɔɔsya bɔ elige; raage: a be lak dɔgl mɔ a nɔ? Ɓɛsibe woos mɔ wɔ mɔ wooko. Yɛrɛ ɗɛ̄ɛ̄ an mɔ wɛɛ rɔɔs be ookya ma gɛ. 3Rɔɔs-ookya bɔ mɔk a gi kpoos du: a be woo nɔ? Yɛrɛ ɗɛnt be gib ha̧sig a rɔɔs-ook woos bɔ gedu be. Hinbalki, be dɛ̄ɛ̄ gɛ, ɛɛlik a doo dɔŋdi be, seem gi ha̧a̧bha̧. 4Hɔɔ, yɛrɛ be mɛɛ hinyɔ gɔ be woo an gɔ hi ha̧sib a woos du, dood hi dagib a hi raa du.

5El belkya wɔ a ɗɛntɔ bɔ ge sɛw gbunu gbunu. Ɛr doos bɔ: a ɗɛnt be gim fɔk baari? 6Bɔrɔ ta̧a̧: a kurum tik yɔ̧ɔ̧lɔ nɔɔnɛ. Rɔɔs-ookya bɔ raage: a loom ɗɛɛrwol mɔ nɔɔko, bi̧i̧m a kurum tik dumbili nɔɔnɛ.

7Wɛɛ ɛr zaabɔ: a ɗɛnt be gim fɔk baari? Bɔrɔ ta̧a̧ a tot saa wɔbl yɔ̧ɔ̧lɔ nɔɔnɛ. Rɔɔs-ookya bɔ raage: a loom ɗɛɛrwol mɔ nɔɔko, bi̧i̧m a tot saa wɔbl dumbili gɛ̧ɛ̧sɛ. 8Ɗɛnt bɔ baan rɔɔsɔ-ookya ha̧a̧l bɔ yɔ woo wɔɔsɔ hi kɛ̧ɛ̧tigɔ giya. Ya̧a̧nɛ, dood waalduya hi daarin dood wɔ hi gi a lɛlgaal du wooswook hi kɛ̧ɛ̧tig a hi tees du. 9Yɛrɛ bee be gin raako: a dagsin zul nɛ sa̧a̧mɛ hi rɔɔs ha̧a̧l yɔ waal du. Rɔɔs nɛ bɔ gɔ gi da̧a̧, hi loonɛ a waabil lɛlyɔ gɔ hi waa faa gedu.

10Za̧a̧nyɔ woo hinrɔbo hi hin fɛŋwaa, gi woo hinrɔb be hi hin gbɔɔlɛ. Za̧a̧nyɔ woo ha̧a̧lɛ hi hin fɛŋwaa, gi woo hinha̧a̧l woo hi hin gbɔɔl bɔ be. 11Gid nɛ́ wōō rɔbtɔnɔ hi rɔɔs ha̧a̧l yɔ waal du gɛ, bɔ gi gaan rɔɔs rɔb bɔ an nɛ oo nɔ? 12Wɛɛ gid nɛ́ wōōs doo za rɔbtɔnɔ hi rɔɔsɔ yɔ gin gɛ, bɔ gi gaan rɔɔs yɔ gɔ gigi nɛnɛ?

13Doo za taa an gi woos ɗɛntɛ eer woosɛ. Yɔ hɛ̧ɛ̧n zaa gbun lɔlɛ, yɔ wɛɛ yɔ ha̧a̧g zaabɔ gi muulɛ. Yɔ ɗɔbs zaa gbunu, wɛɛ yɔ bɔ̧ɔ̧ zaa gbunu. Ɗɛ̄ɛ̄ an nɛ woos Bɛt woosɛ hi tus woos a ya̧a̧ gbun du gɛ.

14Farisaya wɔ hi ɗɔkingo tusɛ yɔ hi kɛm dɔgl wɔrɔ sɛwi, hi kpɛ̧ɛ̧l Yeesu kpɛ̧ɛ̧lɔ. 15Yeesu yɔ lag anbɔ raahi:

a ha̧a̧n wɛɛk dood rɔbɛ a dood muutdu, wɛɛ Bɛt mɛɛ kpoos nɛ be. Yɔ anbɔ hinyɔ dood hi seek an hin gbɔɔlɛ, hinɔ gi hin bɔbtini a Bɛt muutdu. 16Muusa maakɔ yɔ gaahi hi Bɛtya̧a̧kɛŋkya wɔ ɗɛɛrwolya̧ wɔ hi amɔ tuur a Yohana Bɛtmɛm Hotingoya bɔ wɛlɔ yɛɛl woosɔ gedu. A wɛlɔ gedu ro hi yɛɛl Bɛt wáátɔ Dɔgl Rɔb bɔ gi booko. An bɔ ɓɛ gi tɛk hi tɛŋko an gi gul a Bɛt wáát bɔ gedu.

17Bɛtha hi hɛbtdi da̧a̧kya̧ gi ɓaa gɛ, hi anyɔ Bɛtmaak dɔglɔ bi̧i̧sɔ za fɛŋ gi ha̧sɔ. 18Za̧a̧nyɔ yaa nisɔ gi wɛɛ gi lootin hi zaa dɔɔmi, gɔ mansyɔ; wɛɛ za̧a̧nyɔ lootin hi nis zayɔ waltɔ bisige, gɔ mansyɔ.

19Doo za rɔɔsya giro, heg gbandil ɗaktil hob muulɛ. Ɔ̧t nuŋg sɛw gi hat dako, wɛɛ gi lees hɛmntɛ leko. 20Doo za ya̧a̧rya nuŋgɔ a Laazar, nɔk yɔ̧ɔ̧s muulɔ ɓodgo gi kusig a doo waar bɔ gi luk gbarɔ, 21an gi sɛ̧ɛ̧k kok rumnt wɔ doo rɔɔsya bɔ gi mɛlsugo gi le. Kaa wɔ be, hi zaa hi gi nɔkɔ wɔ ɗɛktilgo be. 22Yɔ rii, ya̧a̧rya bɔ Laazar wɔrɔ, Bɛt walɛsɛrɛ ɔ̧ɔ̧ hi zaa hi pɛɛge hi kaŋg a Abraham dɔŋdi a bɛtha. Doo waar bɔ be wɔr be, hi pɛɛ hi i̧i̧ge.

23Yɔ kolɔ tuur a wɔrkɛ ɗɔɔtillɛlɛ, a lɛlyɔ gi ya̧a̧ryɔ̧k duge, pɛɛ lɔlɔ wɛɛha, gbɛn Abraham hɛmltɔnɔ, Laazar gi ɗɔɔtig gi dɔŋdi. 24Ɓooya̧a̧: a baa Abraham, mɛɛsibe ya̧a̧rɛ! Be gi yɔ̧kya̧a̧r gɛrɛ a laazebt yɛrɛ gedu! Yaam Laazar gi bɔɔz naanwalɔ mɛm du gi zaa gi saŋktsinbe mɛl be. 25Abraham ta̧a̧: a waa be, mɔkum mɔ mɛɛ a yɔ mɔ giz za̧a̧til a waal du mɔ dag rɔɔs gbɔɔltɔnɔ. Wɛɛ Laazar yɔ giz nɛ za̧a̧til a waal du be, dag ya̧a̧rhant gbɔɔltɔnɔ. Yɛrɛ hi rɔɔgrɔ ma hɛdi. Wɛɛ mɔɔ be, mɔ ya̧a̧ryɔ̧k gɛrɛ be.

26A hinɔ gedu sɛw, yɛrɛ hi gbaa zɛŋk gbɔɔl dubt gi a wɛ tees du hi mɔya. Ya̧a̧nɛ, za̧a̧nyɔ ha̧a̧ge an gi ɗuk wiige dihɛ gi tal nɛɛge, zaabe za̧a̧nyɔ ha̧a̧ge an gi ɗugz a nɛɛge hɔ gi taz a wiige hɛdi yɔ ɗɛɛ gɛ. 27Wal rɔɔsya bɔ raage: a baa Abraham, be zɔ̧mɔ, yaam Laazar a baa be raa du. 28Yɛ̧ɛ̧dɛ be hi gi hɔ nɔɔnɛ, gi fɔksihi hin sɛw, an bɔhi zaa a ya̧a̧ryɔ̧klɛl yɛrɛ gedu hɛw.

29Abraham wɛɛ ta̧a̧ge: a hi gin Muusa maakdɔglɔ hi Bɛtya̧a̧kɛŋkya wɔ dɔglya̧ wɔ hi bi̧i̧, gi an hi kɛmsihi. 30Wal rɔɔsya bɔ goo: a ɛ̧-ɛ̧, baa Àbraham, an doo za wɔrki rek a hi, yɔ hi kɛmsige, hí zɛmr kpoosya̧. 31Abraham wɛɛ raage: a gid hi kɛ̄ms Muusa hi Bɛtya̧a̧kɛŋkya wɔ gɛ, an doo za rɛml nɛ gi rek hɔ si̧, hi taa ɗɔbsugo.

Currently Selected:

LUKA 16: NTD

Highlight

Copy