Lúkàs 14

Yésù wáaŋnaá nɨ̀ŋgwá kù yáb ɓɔ̧ne ye Sàbáà

1Ye Sàbáà kù, mvèìn Fàrísàbì kù ɨ́ ɓésò Yésù cɔŋ no yó. Nùb yi du yó kwe ɨ́ yà góòmnyààŋnɨ Yésù pénɨ nɨ́m ŋgə́ ɓa ndɨ̀ŋniì. 2Nɨ̀ŋgwá kù yáb ɓɔ̧ne yi du ndɨ̀ŋniì ɨ́ gò ə́ə̀ŋnɨ Yésùù tíí. 3Á Yésù fɔ́ nɨ̀gááŋ káàtàbì ɓe Fàrísààb ɨnè: «Ɓíì Mòyíìs á tànɨ kùb wáàŋ nɨ̀vɨ́tè ye Sàbáà kèè kùb bɨ wáŋhɨ̀r?» 4Ŋgáb yɨrɨ́b. Á Yésù ɗaamndóŋwo nɨ̀yáb lè, ŋgə́ ɨ́ wáŋnè ŋgə́, á ŋgə́ tana nɨ̀ŋgwá rè: «Gɨ̀ wu!» 5Yésù ɨ́ fɔ̂ ŋgáb: «Mvókín nyínè no, nò kù duú ɓe mwin, kɨ́ kù ndèìn, ɨ́ gùrê lááŋ mvúmí no, ŋgə́ tɨ̀ nɨ ŋgə́ ɓè mu̧u̧ ɗàmcùhó̧wa àm tɨ du nɨ́ ye Sàbáà à?» 6Pìí fɔ́ kíì ɨ́ yɔ́kkwàhâ ŋgáb.

Gàá yɨ́ juù

7Hȩ Yésù yi pə́ nùb kùb yi ɓéworé jùndɨ̀nɨ ju tíí, á ŋgə́ nyinna nɨ̀vɨ́tɨ̀b ɓe gɨ̀gàìn ɨnè: 8«Ɓwâ nò kù ɓé wu cɔŋ jùrúb gùmní rɨ, wu wu ju tíí jùndɨ̀r, kɨ́ kù kùb yè tɨ ɓéɓwéetɨ́ bɨ́ nò ndóŋ wé kè. 9Ɗà nò tɨ ɓéwoɓáhe nyíne nò kíì a gò wu tànànɨ ɨnè: ‹Mbɨ́knam ŋgə́ mɨ̀yɨ́ juù kɨ́.› ɗú wu éícùwúcɨ̀ ɓè sə̀ré ŋgwȩ́ȩ́ gìnɨ dùrénɨ ju cùrìì ya á. 10Kùb ɨ́ ɓê bɨ́ wu cɔŋ jùrúb gùmní, gɨ̀ wu dùrénɨ ju cùrìì ya, àm ɓwâ nò tɨ ɓé wé ɓa féínwòniì, ŋgə́ a tànà wu: ‹Á! Ɓwàjìrí moò, wu duce wú cùrì ɓe ní, gòm dùnɨ tíí hò̧.› Yɨ́ kɨ́ ɓè, nùb kùb tɨ ɓéɓáhe nyíne ŋgábè lâs, wu ɓa dùnɨ ɓe dɨmɨɨr ŋgábè tíí á. 11Ɓetí nò gewú síí nóò còmné, Mèín ɓa nò kɨ́ gèsénɨ ɗàá á. Nò geséce síí nóò ɗàá, Mèín ɓa nò kɨ́ gèwúnɨ còóm á.»

Na bɨ á du ɗúnɨ nɨ́m ɓénà cɔŋ jùrúbí?

12Á Yésù tana nò tɨ ɓé ŋgə́ cɔɔ̀ŋ ɨnè: «Ɓwâ wu si cɔŋ jùrúbí, nɨ ɗúwa wu ɓé ɓwàjììb woò, dùgɨ̀ nùb wo gbàŋné, dùgɨ̀ nùb njɔdìì wo gín síhé; wu ɓétɨ́ ŋgáb, ŋgáb tɨ̀ ɓécuɓwéeháce bɨ́ wu ye kù ɓáàbnɨ nyər kɨ́. 13Ɨ́dù ɓwâ wu si cɔŋ jùrúbí, ɓébɨ̂ŋ wu nùb tiri, nùb ɗə́əm, nùb cəə́ŋ cə̧né ɓe ɓùɓú̧ù̧b. 14Wu ɓa dùnɨ ɓe mɨ̀tù á, ɓetí sàmàìn ŋgáb ɓa wu ɓáàbnɨ nyər kíì ɗàà. Mèín nɨ̀mɨr kwá ɓáabna wu ɓwâ ŋgə́ ɓa sə̀ə̀mcùhó̧nɨ nùb ya ndɨŋ nyɔ̧né cwéé rɨ.»

Yésù áá cɔŋ jùrúb gùmní hȩ túúm, gà̧à̧nɨ gɨ̀gàìn ɓe kí

(Góòmɓwê Mt 22.1-10)

15Á nɨ̀mwi̧ kpáín nùb ya du cɔɔ̀ŋ ya ók nyindí kíì, tana Yésù ɨnè: «Mɨ̀tù á ɓe nò kwá taŋ cɔŋ noò Haam Mèèín nokwe!» 16Kí á Yésù nyinna ŋgə́ ɓe gɨ̀gàìn ɨnè: «Nɨ̀ŋgwá kù ya sií cɔŋ ví̧i̧, ŋgə́ ɨ́ ɓê nɨ̀vɨ́tɨ̀b ví̧i̧ gò tàŋnɨ. 17Ɓwâ cɔɔ̀ŋ ɨ́ ɗóhè, ŋgə́ ɨ́ tôm nò no ə́ré gɨ̀ tànànɨ nùb ŋgə́ tɨ ɓéré ɨnè: ‹Á sàmàìn nyí gocɨré, ɓetí nɨ́ɨ́b lâs á cɨ̀ nyaaŋkí̧i̧.› 18Ɨ́dù vùùm nùb ŋgə́ tɨ ɓéré lâs ɨ́ tà bɨ́ sàmàìn vúm goré ɗàà. Nò tíí ɨ́ tà: ‹Mɨ guttɨ́ mwar, ɗúce mɨ gɨ̀ pénɨ mwai kɨ́ á, mɨ yóóŋ wu, tɨ́í mɨ.› 19Nò kù mwi̧í̧ ɨ́ tà: ‹Mɨ guttɨ́ ndèìn cóóŋ àm ɗȩ̀hí̧, á ɗúnɨ mɨ gɨ̀ ŋgáb kə̀knɨ pénɨ hȩ ŋgáb ɓa ə́nniì. Mɨ yóóŋ wu, tɨ́í mɨ.› 20Nò mwi̧ kù ɨ́ tàcè: ‹Mɨ á yè mɨ náámbè, àm kɨ́ á du sàmàìn mɨ goré ɗàà ru.› 21Nò ə́ré rè ɨ́ gècùwònà tá no ə́ré pénè bɨ kɨ́ lâs. Á tá no ə́ré kɨ́ ókɓa njù̧, ŋgə́ ɨ́ tànà nò no ə́ré rè ɨnè: ‹Kɔ́klîn, gɨm laŋtaaŋ jííbí ɓe jìíb kwé tə̧né lâs no, wu a ɓétèèwò nùb tiri, nùb ɗə́əm, ɓùɓú̧ù̧b ɓe nùb cəə́ŋ cə̧né.› 22Mvin ti ŋgób, nò ə́ré ɨ́ cùwò tànànɨ tá no ə́ré ɨnè: ‹Tá, mɨ ndɨŋtɨ́ hȩ wu tɨ taré, ɨ́dù mɨ̀yɨ́ juù á ɓàyè nɨ ku.› 23Á nɨ̀ŋgwá rè tana nò no ə́ré: ‹Gɨm jìíb kwɨ́íbɨ̀nnè ɓe jìíb mwaibɨnne lâs, kpɔ́ɔwom nɨ̀vɨ́tɨ̀b ŋgáb gò lénɨ. Á ɗúnɨ dúú mó rè yúktɨ. 24Nɨ́m duré á, nùb mɨ tɨ ɓéyaye ɨ́ nyàhȩ̀ gònɨ rɨ, dugɨ nɨ̀mwi̧ tɨ̀ nɨ cɔŋ mo rè kə̧ə̧́ rɨ kə̀kkɨ́ɓàr!› »

Nɨ́m du ɗúnɨ nò tu Yésùù ndɨ̀ŋte

(Góòmɓwê Mt 10.37-38)

25Yésù yaá gùrí jȩ̀ȩ̀ ɓe kùŋkùŋ kàm nɨ̀vɨ́tɨ̀bì, á ŋgə́ ɓandɨ́curé ŋgáb no, ŋgə́ ɨ́ tà: 26«Nò ɗú mɨ tùniì, nò kɨ́ ɗú mɨ a ŋdôŋ tá noò, yà nóò, gwi noò, munɨ́b noò, mwin yàáb noò nɨ̀ŋgwáàb ɓe nɨ̀gub, dùgɨ̀ síí ŋgə́ nɨ̀mɨrí. Duú u̧ ɗàà, sàmàìn ŋgə́ du nɨ̀fuùb moò ɗàà. 27Nò du bàŋ noò hàìnwá mɨ tùniì, sàmàìn nò kɨ́ du nɨ̀fuùb moò ɗàà. 28Nɨ̀mwi̧ mvókín nyínè noò ɨ́ ɗû óŋnɨ dúú kàm jíri, ŋgə́ ɓaye dùrénɨ ɗàá á, ŋgə́ a mâ ɗə̀ə̀ŋnɨ vùùm mwèìn du ŋgə́ ɗúnànɨ ɓe ɨ́r ə́r kíì. Ŋgə́ a pê kɨ́ no ŋgáréè, yè á sàmàìn cáŋhȩ ə́r kíì kè. 29Ɓetí ŋgə́ ɨ́ yàrê ə́r dúú kíì, ŋgə́ ɨ́ dù nɨ́ cáàŋwá, nùb lâs ɓa pénɨ ə́r kíì ɓa ŋgə́ kə́ə̀nɨ á. 30Ŋgáb a tà: ‹Kɨ́ rè yaré ɓaháá ə́r dúhéé hò̧ hȩ nɨ̀vɨ́tè, féín tə̧ə̧́ yɔ́kléci nɨ́ ŋgə́!› 31Nɨ́m mwi̧ ɓwê ɓe mvèìn jíri, ɓwâ ŋgə́ ɗú gànnɨ kùŋ noò mvèìn su rɨ, ŋgə́ á dùréyènɨ ɗàá mánɨ pénɨ yè á sàmàìn ní gainme nò kɨ́ su ɓe nɨ̀vɨ́tɨ̀b tɔ́sìn cóóŋ kè. U̧ kɨ́ nò kɨ́ á cɨ̀ nɨ gònɨ jȩ̀ȩ̀ ɓe nɨ̀vɨ́tɨ̀b tɔ́sìn vɨríí. 32Ŋgə́ ɨ́ pê ɓa nɨ ní yɔ́knɨ á, ŋgə́ á tómsònànɨ kùŋ noò mvèìn tɨ́pénɨ̀b ɓwâ ŋgə́ duye nɨ́ cóo rɨ, tànànɨ nò kɨ́ vúme ŋgə́ nyààŋkɨ́ àm.» 33Á Yésù ɓaaré, ŋgə́ ɨ́ tà: «Àm kɨ́ á mɨ tana nyí, nò du nɨ́ sàmàìn mbɨ́kkɨ́so nɨ́ɨ́b noò lâs ɗàwáá, sàmàìn du nɨ̀fuùb moò nɨ ɗàà ru.»

Mbeè ducɨ ɗóom ɗàwáá

(Góòmɓwê Mt 5.13; Mk 9.50)

34«Mbeè duɓa nɨ́m nyɔ̧ɔ̧́ á, ɨ́dù ɗɨ́ɗóme ŋgéé ɨ́ cɔ̧̂, ɨna á kùb ɓa ndɨ̀ŋnɨ ŋgə́ a ɗómcù? 35Sàmàìn kùb kɨ́kléɓacéye ŋgə́ ɗɔ̀bín kɨ́ kù kùkùní àm nɨ́m ɗo̧ó̧ a hàm ɓe kíí ɗàà. Kùb a wààhó̧sòkî bɨ́ lúu. Nò du ɓe tó ók àmnì, óknyààŋtɨ!»

Currently Selected:

Lúkàs 14: NTV

Highlight

Copy