Lúkàs 15
15
Yésù áá sà̧à̧ ndèɗú ya lɔ̧́ kùb ɨ́ kwàcùú gà̧à̧nɨ gɨ̀gàìn ɓe kí
1 Nùb ɓáhɨ làmpóò ɓe nùb ɓáŋhɨ́b kù ɨ́ ɓáàwò yɨ́ Yésùù óknɨ nɨ́m ŋgə́ du nyìnniì. 2Fàrísààb ɓe nɨ̀gááŋ káàtàbì ɨ́ ô bɨ́ ɓáŋhîn, kí á ŋgáb yaré tànɨ mvókín ŋgábè no ɨnè: «Pə́há ɓwà rè kà, ŋgə́ ɗúɓa ju ɓe nùb ɓáŋhɨ́b lèé, ɓe ŋgáb á cè tàŋɓáànɨ cɔŋ!» 3Á Yésù nyinna ŋgáb ɓe gɨ̀gàìn ɨnè: 4«Yɨ́ nyí dukɨ́ ɗàrɨ́, nò kù ɨ́ dù ɓe ndèɗú təmərì mwi̧, ɗà mwi̧ ɨ́ lɔ̧́hô̧, ŋgə́ tɨ̀ nɨ mbɨ́kkɨ́sòwá nùb vii nààsɨ̀b ɨ́ cóóŋ ɨ́ ɓwécɔ̧́ meré yɨ́ cɔɔ̀ŋ, ŋgə́ a gì másénɨ nò mwi̧ ndè há̧á̧ hȩ ŋgə́ ɓa ŋgə́ kwàniì à? 5Ɓwâ ŋgə́ kwacu ŋgéé, ŋgə́ á ɓe mɨ̀tù, ŋgə́ a hàìncùwò ŋgə́ mbɨ̧́ɨ̧́. 6Ŋgə́ a gɨ̀cù no yó, ŋgə́ a ɓê ɓwàjììb noò ɓe nùb no gín síhé tànànɨ ŋgáb: ‹Nɨ́m ókná mɨ̀tù, ɓetí mɨ kwacutɨ́ ndèɗú mo tɨ lɔ̧́ré.› 7Mɨ tànà nyí, ɓa dùɓwênɨ u̧ ɓɨllin á. Mɨ̀tù ɓa dùɓànɨ ɓɨllin ɓe ɨ́r nɨ̀vɨ́tè mwi̧ ɓandɨ sumí á, a ndôŋ kɨ́ du ɓe ɨ́r nùb vii nààsɨ̀b ɨ́ cóóŋ ɨ́ ɓwécɔ̧́ du bɨ́ lə́ə̀mnɨ vúm á cɨ̀ bɨ ɗɨ́ɗɨ̧́ɨ̧́.»
Sure mònéè ya lɔ̧́ kùb ɨ́ kwàcùú
8«Kɨ́ kù, nɨ̀gwi kù duú ɓe sure mònéè cóóŋ, ɗà mwi̧ ɨ́ lɔ̧́hô̧. Ŋgə́ tɨ̀ nɨ lámbà tòŋwá, ŋgə́ a ìhè dúhé mîn mányààŋnɨ mwèìn kɨ́ há̧á̧ ŋgə́ a kwàcù à? 9Ɓwâ ŋgə́ kwacuré, ŋgə́ a ɓê ɓwàjììb noò ɓe nùb no gín síhé, tànànɨ ŋgáb: ‹Nɨ́m ókná mɨ̀tù ɓetí mɨ kwacutɨ́ mwèìn mo tɨ lɔ̧́ré!› 10Mɨ tànà nyí, ɓa dùɓwênɨ u̧ mvókín dùgallɨb Mèèín á, ŋgáb ɓa óknɨ mɨ̀tù ɓe ɨ́r cɨcóm mwi̧ ɓandɨ sumí á.»
Mwin ya gɨlɔ̧́ré ti̧í̧ ɗà ŋgə́ ɨ́ cùwò yá tá noò
11Yésù ɨ́ tàkwà: «Nɨ̀ŋgwá kù yaá ɓe munɨ́b nɨ̀ŋgwáàb bɨrɨ́b. 12Nò mutí ɨ́ tànà tá noò: ‹Bɨ̀bá, na wu mɨ nɨ́ɨ́b kwíhɨ̀b moò íí jááŋ.› Á nɨ̀ŋgwá rè ya gɔkléna munɨ́b no bɨrɨ́b lè njɔdì tə̧ə̧́. 13Jíì ti ŋgób cùr kɨ́ no, nò mutí ɨ́ sə́rɨ̀kî kɨ́ noò lâs, mwèìn yi fó̧na ŋgə́ nóò, ŋgə́ ɨ́ gɨ̀lɔ̧́rê ti̧í̧ ɓe kí. Féín tíí ku, ŋgə́ ɨ́ jɔ̀kî mè ɓe vùùm mwèìn kíì lâs. 14Ɓwâ mòné yi cɔ̧́ ŋgə́ ŋgáréè, ŋgàk kàm kù ɨ́ gù ti kɨ́ no, ŋgə́ ɨ́ yàrê jóktɨ̀nɨ. 15Ŋgə́ ɨ́ gì yɨ́ nɨ̀ŋgwá kù, ŋgə́ mánà ní ə́r yáá. Nò kɨ́ ɨ́ tôm ŋgə́ no mwa̧á̧ gə́tɨ̀nànɨ ní ŋgwèé bɨ. 16Ŋgə́ yaá ɗúnɨ tàŋɓwênɨ cɔŋ kùb ya waanakom ŋgwèé biì, ɨ́dù nò kù yi nɨ́ ŋgə́ nànɨ ɗàà. 17Kí á ŋgə́ ɗooŋkɨ́ njuúŋ, ŋgə́ ɨ́ tà: ‹Nùb ə́ré tá moò yóò á ɓe cɔŋ mgbə̀ktə̀k, kɨ́ moò mɨ a kúce hò̧ ɓe cɨ̧̀! 18Mɨ á mɨ gɨ̀cùnɨ yɨ́ tá moò, féíntɨ́ ku mɨ a tànà ŋgə́: Bɨ̀bá, mɨ comtɨ́ Mèèín tíí, mɨ ɨ́ jààŋkî wu, 19Wu wu mɨ hȩ mwin wóò ácɨ̀r, á cɨ̀ wu mɨ hȩ nò wo ə́ré.› 20Á ŋgə́ ə́llé gɨ̀cùnɨ yɨ́ tá noò.
«Hȩ tá noò pə́so ŋgə́ gònɨ cóo, mwàm ɨ́ bɨ̀ɓà ŋgə́ cei. Ŋgə́ ɨ́ lùsò ŋgə́ gàmnɨ, ŋgə́ ɨ́ bɨ̀kùùkî ŋgə́. 21Á mwɨi lè tana tá noò: ‹Bɨ̀bá mɨ comtɨ́ Mèèín tíí, mɨ ɨ́ jààŋkî wu. Wu wu mɨ hȩ mwin wóò ácɨ̀r.› 22Ɨ́dù nɨ̀ŋgwá rè ɨ́ tànà nùb no ə́ré: ‹Gewonáam júk nyɔ̧ɔ̧́ kɔ́klîn, nyí a lə́rə́nà ŋgə́ só. Lə́rénanáam ŋgə́ wòré mbə́reé, nyí a lə́nàɓwê ŋgə́ tə́b. 23Bɨwonáam mwin ndèèìn tɨ yúklîn ɗàrɨ́, kwíináam, nɨ́m tàŋná ɓe mɨ̀tù. 24Ɓetí mwin mó rè tɨ kúnɨ kú̧u̧ á, ŋgə́ səəmcutɨ́ nɨ́; ŋgə́ tɨ lɔ̧́tɨ́, mɨ kwacuceé mɨ́ ŋgə́.› Á jùrúb kàm jíri yaré.
25«Mvókín kɨ́ no cè, mwin ŋgwéé nɨ̀ŋgwá rèè yaá mwa̧á̧. Ɓwâ ŋgə́ cuworé, ŋgə́ ɨ́ óksò wòr yó. 26Ŋgə́ ɨ́ ɓéwò nò ə́ré kù fɔ́nɨ ŋgə́ ŋgwé wàì kíì. 27Á nò ə́ré rè tana ŋgə́: ‹Wɨ́í wóò cuwotɨ́, á tá woò ta kùb téín mwin ndèèìn tɨ duɓa yúklîn ndɨ ɓetí mwin níì kwacutɨ́ nɨ́ ní síí wááŋ yáá.› 28Á mwin ŋgwéé rè ók njù̧, ŋgə́ ɨ́ nyàhȩ̀ lénɨ yó. Tá noò ɨ́ fô̧ ŋgə́ ɓérénɨ. 29Ɨ́dù mwin ŋgwéé rè ɨ́ tànà tá ni: ‹Bɨ̀bá, á cɨ̀ dáín ví̧i̧ mɨ du wu éínànɨ, mɨ cè nyindí wó ɓɔ̧ne jààŋkɨ́wa. Ɨ́dù wu mɨ nàkɨ́yèwá, dugɨ mwin ti jíírí, mɨ tàŋ ɓe ɓwàjììb moò. 30Àm mwin wó rè cuworé, ŋgə́ nò gɨ ɓáàŋkɨ́nɨ njɔdì woò ɓe sàkè biì, wu téínkɨ́naá ŋgə́ mwin ndèèìn tɨ duɓa yúklîn ndɨ!› 31Á tá noò piina ŋgə́ ɨnè: ‹Nɨ́me wu dulɨ́ŋ ɓwâ lâs á, nɨ́ɨ́b moò lâs duna wu á. 32Ɗúce nɨ́m jɔ̀ jùrúb á, nɨ́m a ô mɨ̀tù, ɓetí wɨ́í wó rè tɨ kúú nɨ́, á ŋgə́ səəmcu, ŋgə́ tɨ lɔ̧́tɨ́ mɨ kwacuceé mɨ́ ŋgə́!› »
Currently Selected:
Lúkàs 15: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
