Lúkàs 6
6
Yésù á nyìnnɨ ɓe ɨ́r ye Sàbáà
(Góòmɓwê Mt 12.1-8; Mk 2.23-28)
1Ye Sàbáà kù, Yésù ɓe nɨ̀fuùb noò yaá ndóŋnɨ mwaai mɨ́ŋgòŋnì no. Nɨ̀fuùb noò ɨ́ yà wèègènɨ ɓáám mɨ́ŋgòŋnì, ŋgáb a oomce tàŋnɨ. 2Fàrísààb kù ɨ́ fɔ̂ ŋgáb ɨnè: «Àm níì á nyí duce ndɨ̀ŋnɨ nɨ́m ɓíì nɨ́mè du kààŋnɨ ye Sàbáà?» 3Kí á Yésù tacuna ŋgáb ɨnè: «Nyí ya fainhaá nɨ́m Dàvît yi ndɨŋ ye kù, ɓwâ cɨ̧̀ yi nóm ŋgə́ ɓe nùb noò ye? 4Ŋgə́ ya léé dúú Mèèín no, ŋgə́ ɨ́ â bɨ̀rê múbí, ŋgə́ ɨ́ tàŋ, ŋgə́ ɨ́ nàɓwê nùb noò, dugií hȩ ɓíì nɨ́mè du tànɨ nò kù nɨ tàaŋ, sé nùb na satɨgàà.» 5Yésù ɨ́ tànàkwà ŋgáb: «Mwin Nɨ̀rì ɨ́ du nɨ́ kɨ́ɨ́nɨ ye Sàbáà ru.»
Yésù taamcunatɨ́ nɨ̀ŋgwá kù ŋgáár noò yi du mvə́ndɨ́nne
(Góòmɓwê Mt 12.9-14; Mk 3.1-6)
6Ye Sàbáà kù, Yésù ɨ́ lê dúú mɨ̀yú̧ú̧ kù no, ŋgə́ ɨ́ yàrê tɔ̀ɔ́. Nɨ̀ŋgwá kù yaá yó ku ɓe ŋgáár lam mvə́ndîn. 7Nɨ̀gááŋ káàtàbì ɓe Fàrísààb yaá góòmnyààŋɓànɨ Yésù, pénɨ ŋgə́ yè ɓa wáàŋkɨ́nànɨ nò kù yáb noò ye Sàbáà á kè. Ɓetí ŋgáb yaá mánɨ kum kù ŋgə́ ɓa ndɨ̀ŋniì àm vúm a dɨ̀hè ŋgéé. 8Ɨ́dù Yésù yi ɗəəŋtɨ́ nɨ́ kɨ̀cáàb ŋgábè, á ŋgə́ tana nɨ̀ŋgwá ŋgáár mvə́ndîn ndè ɨnè: «Éíwúum còóm, wu a ə́ŋhȩ̀ nùb lâs tíí ɓè.» Nɨ̀ŋgwá rè ɨ́ éíwû còóm ə́ə̀ŋnɨ. 9Á Yésù fɔ́ ŋgáb ɨnè: «Ní á ɓíì nɨ́mè du tànɨ: Kùb ndɨ̀ŋ nyɔ̧ɔ̧́ ye Sàbáà kèè kùb ndɨ̀ŋ ɓáŋhîn? Kùb ɓátɨ̀ mè nɨ̀vɨ́tèé kèè, kùb láàŋkɨ́ mè no kɨ́? Mɨ fɔ́ nyí á!» 10Ŋgə́ ɨ́ ŋgèrɨ̀tèè nùb yi du ɓèé lâs, á ŋgə́ tana nɨ̀ŋgwá rè: «Naamwom ŋgáár.» Nɨ̀ŋgwá rè ɨ́ nààmsò, ɗà ŋgáár noò ɨ́ tàmcù. 11Ɨ́dù nùb yi du ɓè kɨ́ ɨ́ ókɓà bɨ́ njù̧. Ŋgáb ɨ́ yà mánɨ nɨ́m ŋgáb fɨ́tɨ ndɨ̀ŋnɨ Yésùù.
Yésù cahó̧tɨ́ nùb tómé cóóŋ ɨ́ bɨrɨ́b
(Góòmɓwê Mt 10.1-4; Mk 3.13-19)
12Jíìb kɨ́ no, Yésù ɨ́ wɨ́ì ɓe kù ya gìnɨ mɨ̀yú̧ú̧. Ŋgə́ ɨ́ yôŋ Mèín ɓeè ku séè. 13Ɓwâ ye yi sallé, ŋgə́ ɨ́ ɓê vùùm nùb yi tukom ŋgéé lâs, ŋgə́ ɨ́ càhô̧ kpáín ŋgábè no nɨ̀fuùb cóóŋ ɨ́ bɨrɨ́b, ŋgə́ ɨ́ bɨ́nà ŋgáb ɨ́r: «Nùb tómé.» 14Nùb kɨ́ yɨɨ́m: Sìmôŋ, nò ŋgə́ ya bɨ́na ɨ́r Píyéèr rɨ, ɓe mwin yàá noò Àndɨ̀rê á, Jâk ɓe Jâŋ, Fɨ́lɨ̂b ɓe Bàrtèlèmî, 15Màtíyò ɓe Tòmâ, Jâk mwin Àlféè, Sìmôŋ nò ya lɨɨŋkom ɓe ɨ́r tií, 16Yúdàs mwin Jáàk, ɨ́ Yúdàs Ìskàrìyôt nò ya sə́rɨkɨ́ Yésùù.
Yésù á tɔ̀ɔ̀nɨ nɨ̀vɨ́tɨ̀b, ŋgə́ a wáaŋce nɨ̀yáàb
(Góòmɓwê Mt 4.23-25)
17Yésù ɨ́ sócùwò ŋgòmeè ɓe nùb tómé noò, ɗà ŋgə́ ɨ́ ə́ŋhȩ̀ yɨ́ ɗə̀ktə̀k. Nɨ̀fuùb noò ví̧i̧ yaá ɓè. Nɨ̀vɨ́tɨ̀b yaá ɓwê ɓè ví̧i̧: Nùb Jùdéè bɨ̂ŋ, hȩ nùb Yèrúsàlèèm u̧, nùb éísówo Tíìr ɓe nùb Sìdóòŋ, swaàr mɨ̀kwehɨ̀rí yaà. 18Ŋgáb yi go ónɨ tɔ̀ɔ́ Yésùù á, ŋgə́ a wáàŋnàɓwê ŋgáb yáàb ŋgábè. Nùb nyéhɨ̀b ɓáŋhɨ́b yi jáabkomndé lâs yi wáaŋtɨ́. 19Nùb lâs yaá mánɨ ŋgə́ dì̧nɨ, ɓetí nyòm kù yaá fó̧nɨ no só, a wáaŋce ŋgáb lâs.
Ju nyɔ̧ɔ̧́ ɓe ju ɓáŋhîn
(Góòmɓwê Mt 5.1-12)
20Yésù ɨ́ ŋgèrè nɨ̀fuùb noò u̧u̧, ŋgə́ ɨ́ tà:
«Mɨ̀tù á ɓe nyí nùb tiri,
ɓetí Ŋgɔ̧́ɔ̧̀ Mèèín ók ɓe nyí á.
21Mɨ̀tù á ɓe nyí, nùb cɨ̧̀ du nómnɨ ɗàròò,
ɓetí nyí kwá du ɓe cɔŋ mgbə̀ktə̀k.
Mɨ̀tù á ɓe nyí nùb du kɨ́kɨ́rí ɗàròò,
ɓetí nyí kwá sərɨ sɨ̀r.
22«Mɨ̀tù á ɓe nyí, ɓwâ kùb ɓəndɨ nyí, kùb ɨ́ lèhè nyí, kùb ɨ́ àndè nyí, kùb ɨ́ nyìnɓáàŋcè nyínè só ɓe àm Mwin Nɨ̀rì rɨ. 23Óknáam mɨ̀tù ɓwâ nɨ́m kɨ́ kwá féínndé, ɗà nyí a ŋgà̧à̧nè, ɓetí lɔ̀ɔ́ jíri á nyí móŋnɨ ɓɨllin. U̧ á ɓwê tákɨ̀rɨ́b nùb kwá jóktɨ nyí kɨ́ ya jóktɨkomɓagɨ tɨ́kɨ̀nɨ́b Mèèín.»
24Ɨ́dù jábɨ́r á ɓe nyí nùb njɔdìì,
ɓetí nyí kwacií nɨ́ ju nyɔ̧ɔ̧́ nyínè.
25Jábɨ́r á ɓe nyí nùb du ɓe cɔŋ ɗàrò mgbə̀ktə̀k lè,
ɓetí cɨ̧̀ kwá ndóoŋ nyí.
Jábɨ́r á ɓe nyí nùb du sɨ̀rí ɗàròò,
ɓetí nyí kwá kɨ́íɓa cei.
26«Jábɨ́r á ɓe nyí ɓè nɨ̀vɨ́tɨ̀b lâs nyin nyɔ̧ɔ̧́ ɓe ɨ́r nyínè, ɓetí, u̧ á ɓwê tákɨ̀rɨ́b nùb du nyìnnɨ nyɔ̧ɔ̧́ ɓe ɨ́r nyínè kɨ́ ya nyinɓwée ɓe tɨ́kɨ̀nɨ́b kàŋnì!»
Ɗûú nùb ɓi̧ní
(Góòmɓwê Mt 5.38-48; 7.12a)
27«Ɨ́dù, nyí nùb du mɨ ókkɨ́ɓànɨ rè, mɨ tànà nyí, ɗúnáam nùb ɓi̧ní nyínè. Nùb jɨ nyínè, ndɨ̀ŋná nùb kɨ́ nyɔ̧ɔ̧́. 28Famnáam nùb káí nyínè. Nùb jóktɨce nyínè, nyí a yóŋnà nùb kɨ́ Mèín. 29Nò kù ɨ́ láhè wu ɓɔ̧ɔ̧, ɓàndɨ̀nàcáàŋ ŋgə́ péín meré. Nò kù ɨ́ â júk ndoŋnɨri woò, njèìcáàŋsònà ŋgə́ kɨ́ wo sóò. 30Nò ɓwei wu nɨ́mí, nam nò kɨ́ nɨ́m ŋgə́ ɓwei kɨ́. Nò kù ɨ́ pɨ̀mnè nɨ́m wóò, mbɨ́ksònà nò kɨ́ nɨ́m kɨ́. 31Ndɨŋnanáam kùb nɨ́m nyí ɗú kùb ndɨ̀ŋnàcé nyínè. 32Nyí ɨ́ ɗúhó̧ɗóhè nùb ɗúɓwéece nyínè, kúúm nyí ɗúce Mèín nà nyínè ma kɨ́ níì? Dùgɨ̀ cɨcóòm á ɗúɓwênɨ nùb ɗú ŋgábè. 33Nyɔ̧ɔ̧́ nyí ndɨŋndé ɨ́ ókhó̧bɨ̂ŋhácè nɨ́ ɓe nùb ndɨŋɓwéece nyí nyɔ̧né, kúúm nyí ɗúce Mèín nà nyínè ma kɨ́ níì? Dùgɨ̀ cɨcóòm á ndɨ̀ŋɓwênɨ u̧. 34Nyamandì nyínè, nyí ɨ́ nàhó̧ɗóhè nùb nyí du ɓe gíí ɓa nyí nàcùnɨ á rɨ, kúúm nyí ɗúce Mèín nà nyínè ma kɨ́ níì? Dùgɨ̀ cɨcóòm á ɓwê nànɨ nyamandì mvókín ŋgábè no u̧. 35Nɨ́m mwi̧, ɗúnáam nùb ɓi̧ní nyínè, nyí a ndɨ̀ŋ ŋgáb nyɔ̧ɔ̧́. Nàná nyamandì, nyí a dù nɨ́ káŋhɨ̀r. Nyí ɓa kwànɨ lɔ̀ɔ́ jíri á, nyí a dùcè munɨ́b Mèín nò du còóm cóo, ɓetí nyàŋnjɔ̧̀ noò duna lamjáar bɨ ɓe nùb ɓírí á. 36Dunáam ɓe njɔ̧̀ nyɔ̧ɔ̧́, hȩ Tá nyínè duceré.»
Nyí nò kù ŋgwìnwá
(Góòmɓwê Mt 7.1-5)
37«Nyí nɨ nò kù ŋgwìn, Mèín tɨ̀ ŋgwinɓwée nɨ́ nyí. Nyí nɨ nò kù àm ŋgwéé téìn, Mèín tɨ̀ téínɓwée nɨ́ kɨ́ nyínè ŋgwéné. Tɨ́ínáam kùŋ nyínè, Mèín a tɨ́íɓwêcè nyí. 38Nanáam nyər sàk sàk, Mèín a nàɓwêcè nyí. Jɨ̀r nyí na kùŋ nyínè nyər lɨ, Mèín ɓa nyí nàɓwênɨ u̧ á.»
39Yésù ɨ́ gà̧à̧nàkwà ŋgáb gɨ̀gàìn kù, ŋgə́ ɨ́ tà: «Á sàmàìn ɓùɓú̧ ɗaamcu kùùŋ à? Duú u̧, ŋgáb bɨrɨ́b lâs ma ɓaha bɨ gùrénɨ ŋgwiín á ye! 40Nɨ̀fuùb nɨ ndóŋnɨ tá tɔ̀hí ɗàà, ɨ́dù ɓwâ ŋgə́ fobɨɓa cei lɨ, ŋgə́ á ɓwê ɓe kɨ̀cáàb hȩ tá tɔ̀hí. 41Àm níì á wu pə́hó̧ɗóo wú káhé ti du mwin yàá woò íhɨ́nné, wu cè wú kɨ́ɨ̀ŋ kàm wo íhín ndè pə́yàyèwá? 42I̧ á wu fɨ́tɨ tànànɨ mwin yaá woò: ‹Mwin yàá moò, gom mɨ ákɨ́nà wu kpárè úndií wo íhín ndè›, u̧ kɨ́ wu wu pə́ɓàcénɨ kɨ́ɨ̀ŋ kàm wu nɨ̀mɨrí íhín ndè ɗàà. Mɨ̀yooɗíím ndè, ákɨ́yaye kɨ́ɨ̀ŋ kàm wo íhín ndè, ɗà wu a pə́nyààŋɓàgì úndi ti wu ɓa ákɨ́nɨ mwin yàá woò íhɨ́nné.»
Yɔ̀ ɓe njáàb noò
(Góòmɓwê Mt 7.16-20; 12.33-35)
43«Yɔ̀ nyɔ̧ɔ̧́ nɨ nànɨ gum ɓáŋhîn ɗàà. Yɔ̀ ɓáŋhîn cè nɨ́ nànɨ gum nyɔ̧ɔ̧́ ɗàà. 44Kùb ɗəəŋ bɨ yɔ̀ ɓe gum noò á. Kùb bɨ kòŋnɨ sáá yɔ̀ ŋgamɨ́rí ya ɗàà, kùb cè bɨ́ kòŋnɨ loob ɗə̀b lúŋbí ya ɗàà. 45Mîn nò nyɔ̧ɔ̧́ du ndɨ̀ŋniì fó̧ nɨ́ no njɔ̧̀ɔ̧ á. Ɓáŋhîn nò ɓáŋhîn duce ndɨ̀ŋniì fó̧ nɨ́ no njɔ̧̀ɔ̧ á, ɓetí nɨ́ɨ́b du njɔ̧̀ɔ̧ ɗéé á ɓɔ̧ du tàhó̧nɨ.»
Sà̧à̧ ɓe ɨ́r dúhɨ́b bɨrɨ́bí
(Góòmɓwê Mt 7.24-27)
46«Àm níì á nyí du mɨ ɓénɨ: ‹Kéké, Kéké›, nɨ́m mɨ taré nyí cè nɨ́ ndɨ̀ŋ? 47Nò tu mɨ, ɨ́ ô nyindí móò, ɨ́ ndɨ̀ŋcè nɨ́m mɨ taré rɨ, mɨ á nyí túùmnànɨ nò ŋgə́ du fɨ́tɨ̀niì. 48Nò kɨ́ á fɨ́tîn ɓe nɨ̀ŋgwá kù yi óŋ dúú nóò. Ŋgə́ yi lə́rɨɓatɨ́ nɨ́ kɨ̀ɨ̀r sɨ̀neè cei. Ɓwâ mbɨ̀ɨ̀ŋ ya yúklé, ɨ́ dù nɨ́ dúhé hàìnwá ɓetí dúú kɨ́ yaáɓà nɨ ɗàá cɨ́ɨmndȩ́ȩ mîn. 49Ɨ́dù nò ók nyindí móò ɨ́ dù nɨ́ ndɨ̀ŋwá nɨ́m mɨ taré, nò kɨ́ á fɨ́tîn ɓe nɨ̀ŋgwá yi óŋ dúú nóò, ŋgə́ ɨ́ dù nɨ́ lə́rɨ̀wá kɨ̀ɨ̀r sɨ̀neè. Ɓwâ mbɨ̀ɨ̀ŋ ya yúklé, dúú kɨ́ ɨ́ mùŋ, ɗà ɨ́ tə̀m.»
Currently Selected:
Lúkàs 6: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
