Matiyu, echî 11

Jisos na Jon nnyo mfúgha-ane-ayép

(Luk 7.18-35)

1Nji Jisos a jeghê esə́rə́m ágbán abhê ófó na ábháe achot mmá chénchén, a mághe eji áji a jená a kpík achot Obhasi mbâ ane ka nték nnyi a kpíri áfo.

2Jon nnyo mfúgha-ane-ayép a ri ka ókúmí ka ebhú njí. A yûk esə́re Krayis, nne nnyo Obhasi a túmi se a yim ngun á sém. A yûk esə́re ntûm nnyi á yimá. A tûm mân etʉ̂ atóbhá abhê 3á bhá bhə́p Jisos sê, “Nâ-ngá we a ri nkúbhi nne nnyo á sə́ra nná sê tîk a bhák, kən é wóm nnyo tat?”

4Nji á bhâ bhə́bhe Jisos, a táme ábho se, “Choŋ osə́ré ên Jon achot mma ó yen ên, na mma ó yuk ên. 5Ó yen ên atáná-amə̂t á yen mbá, abhə́né á rui ngyím, amaŋá-ofunum á son, ayághá-atûŋ á kí yuk mbá, ane mba á kpóe á chəbhe njəm ka ekpin, akpák ane á yuk otîp ogyebhá-ḿbə́ŋé Obhasi.#Asa 35.5-6; 61.1. 6Deê ogyebhá-ḿbə́ŋé ó jóe na nne nnyo á ka kéré se a ri ejûm ísonê nji a chə̂m na mme.”

7Nji ágbán í Jon á mághe á kí ji, Jisos a bhə̂p ekam ane nji é rî áfo na yê achot í Jon se, “Ebhú nji o maghê ên o jî kpúghi Jon ka etə́m, o kére ên sê tîk o yên ên jen? O kére ên sê o kí ji ó jí yén ên nne noŋ kpe ńjé egomé nnyi a kí neŋ a jak ngá a jak ńgô ka ekpak nji mfêp a kí nok a? Ée! 8O jiî ên mân, o jiî oyén ên jen? Nne nnyo a gúŋi nnyen oguŋi obhê a? Ée! Ane mba á kágha énoê oguŋi mbí á kúma ka ókʉ́rí atúi-ofâm. 9O jiî ên mân, ó jí yén ên jen? Nkara-otîp Obhasi a? Nâ nji o jiî oyén. Deê ń sə́ré ên mân bəre nne nnyo o jî yên ên a fâŋ a chíŋi nkara-otîp Obhasi. 10Nan? Ḿfa nâ nne nnyo á séŋe nná sê

Obhasi a chorê se,

‘Ńgyê, n kí tum ḿgbán omé a raŋ mbá,

a jí tʉrí ngûm a kí wâ.’#Mak 3.1.

11Deê ń sə́ré ên bəre kpe nne yót cháŋ nnyo á jíi a fâp ka ngun nnyí kən a fâŋ mbiŋ a sî Jon nnyo á fugha ane ayép. Kən nne nnyo kə́n á kêp sê kpe ejûm á ka fáp ka otúi Obhasi, a fâŋ a chíŋi Jon. 12É róghé ta ka ebhú Jon nnyo mfúgha-ane-ayép ta é si égyé, otúi Obhasi ó kí ji ochî na ikom. Ane fə́ne mba á wóma na ḿbə́ŋé-a-ḿbə́ŋé sê á gyé, á kí nok na ikom. 13Echî aŋ? Ebhín í Mosis na akará-otîp Obhasi éróghé ta ka ebhú áji ta é sî ebhú Jon, á chóra achot á kpek na otúi mbí.#Luk 16.16. 14Ájoé ó bhó firi ên, Jon a ri Erayija nnyo á chóre ta éməné sê tîk a bhák.#Mak 4.5; Mat 17.10-13; Mak 9.11-13. 15Nne mân nnyo a fonê atûŋ mma á yugha mbá, deê a yúk.

16“N kí gaé abhon ebhú njí na jen? Á rî noŋ abhonche mba á kûn ka éré ogəm, ekam jə́t á kí kpoŋe na nji tat sê,

17‘É kon nkôn ogyebhá-ḿbə́ŋé nnyi ebháé,

ó ka bhə́n ên.

É kon maná kpe okʉ́gane,

ekʉ̂ ó ka rí ên.’

18Nji Jon a bháe, a kák njaé noŋ ejík mbâ Obhasi, aməm á bhó gwo. Á chə́bhe á chorá sê ojê nâ ó kará yê oseŋe. 19Kən mme, Mmon-i-ntem-nne, ḿ ba, n kí di, n gwók. Ane á chə́bhe á chorá sê, ‘Yên ndûm i ndígha-édî nnyó, mgbogha-aməm ejûm í nchane. Otem obhê, á yimá a ri na abhə́bhá-ntí-echî na ane abhí.’ Kən deê ń sə́ré ên bəre ane á kí məŋé oməŋá-ejûm Obhasi ka etûm nji Obhasi á yimá.”

Nték nnyi á ká ki ḿbə́ŋé na Obhasi

(Luk 10.13-15)

20Jisos a róghe mân efámám nték nnyi yê a yîm ntûm okpógha-biji a tî a chîŋ ochíŋ. Echî aŋ? Ane nték ányi á ká maghé obhí ábho.

21A chôt se, “Eték í Korasi, tîk é bhîp na ên é tî é chîŋ. Ên ane Besayida eróŋ, tîk é bhîp na ên é chîŋ. Echî aŋ? Ekpatə́m í ntûm okpógha-biji nnyi á yími ka nték eyəné, á yími ka nték i Taya na Sidon eê, kə́n ebhú njí ane nték ányi á kak ányaghé-ḿfô á jóme atôŋ ka biji noŋ eriŋ sê ábho á maghe obhí ábho.#Asa 23.1-18; Ese 26.1—28.26; Jow 3.4-8; Emos 1.9-10; Sak 9.2-4. 22Deê ń sə́ré ên bəre ka ofú mbi Obhasi a kí toŋ ngun tîk a fôn nsôn na ane Taya na Sidon, a chíŋi ên. 23Ên ane Kapanom, o kérá ên tîk sê á kí ko ên sê ó faŋ ên ó chiŋ ochíŋ a? Baram! Á kí ko ên ńgô sê ó ka bhik ên kpe ebhighím. Ntûm okpógha-biji nnyi á yími ka eték ejə́né, á yími ka Sodom eê, kə́n eték áji é nyə́ne ta é si égyé.#Asa 14.13-15; Eróghá 19.24-28. 24N kí səre ên bəre ka ofú mbi Obhasi a kí taŋ ngun, a kí fon nsôn na ane eték í Sodom, a chíŋi ane eték ejə́né.”#Mat 10.15; Luk 10.12.

Bhák ên mbâ amé, bhá yoê ên biji

(Luk 10.21-22)

25Ka ebhú áji, Jisos a kí goré Ńsé owe se, “Ńsé, Ntûfâm ósô na nsi, ń kup wâ kpe-eji, ka ó bhət iyîm mbí mbâ ane mba á kera sê á məŋe, kən ó rəbhe ó toŋe mbâ ane mba á ká məŋé. 26Ńsé, ḿ məŋe bəre ńji é dʉ̂ ka okorá-ḿbə́ŋé obhâ.

27“Ńsé omé a mághe iyîm chénchén ka obhô obhámé. Kpe nne yót nnyo a məŋê ekpin í Mmon cháŋ, é ká chiŋi Ńsé átíŋ. Nne fə́ne kpe yót nnyo a məŋê ekpin í Ńsé cháŋ, é ká chiŋi Mmon na ane fə́ne mba Mmon a sáŋe se á mə́ŋe Ńsé owe.#Jon 3.35; 1.18; 10.15.

28“Kpe énê mân nnyo a kə̂n echóé oseŋe ejê a kêt, deê a bhá mbâ amé, mme tîk n káre yê oyoá-biji. 29Kam ên na okpígha-ejûm obhámé. Tôp ên erû ejámé, ka mme m fonê ekpin í nyamḿ, biji ḿ bó yuŋ na obhigha-biji ka ekpin ejámé. Tîk o fôn ên oyoá-biji.#Jer 6.16. 30Etûm nji n kí karé ên é ká son kpe esonóm. Echóé nji n kí chi ên é bhó yup kpe eyúbhúm.”

Currently Selected:

Matiyu, echî 11: ETUNT

Highlight

Copy