GENESIS 23
23
Nagadan si Sara asin Nagbakal nin Lulubngan si Abraham
1Nabuhay si Sara sa laog nin syento beynte y syeteng taon. 2Nagadan siya sa Kiriat-arba na inaapod man Hebron sa daga nin Canaan. Ipinagmondo asin tinangisan ni Abraham an saiyang pagkagadan.
3Binayaan niya an saiyang gadan na agom asin nagduman siya sa mga Heteo. Nagsabi siya sainda, 4“Dayuhan ako digdi na nakikihimanwa sa saindo; pabakalan nindo ako nin daga tanganing ikalubong ko an sakong agom.”
5Nagsimbag sinda, 6“Dangoga kami, kagurangnan. Minimidbid mi ika bilang sarong dakulang lider kaya ilubong mo an saimong agom sa pinakamarahay ming lulubngan. Mayo nin siisay man sa samo na masayuma saimo kan saiyang lulubngan o maolang saimo sa paglubong kan saimong gadan.”
7Nagduko si Abraham sa atubang kan mga Heteo 8dangan nagsabi, “Kun tugot kamong digdi ko ilubong an sakong agom, kaolayon nindo si Efron na aking lalaki ni Zohar 9tanganing ipabakal niya sako an lungib nin Macpela na sadiri niya; nasa poro ini kan saiyang oma. Kaolayon nindo siya na sa atubang nindo, babakalon ko idto saiya sa presyong gusto niya tanganing masadirihan ko bilang lulubngan.”
10Kan oras na iyan, kaibahan si Efron kan mga Heteo na nagtutukaw sa may trangkahan kan syudad. Sinimbag niya si Abraham sa pandangog kan gabos, 11“Dangoga ako, kagurangnan; sa atubang kan sakong mga kahimanwa, itatao ko saimo an bilog na oma asin an lungib na yaon duman tanganing ikalubong mo an saimong agom.”
12Alagad nagduko si Abraham sa atubang kan mga Heteo 13asin nagsabi ki Efron sa pandangog kan gabos, “Dangoga ngona ako; babakalon ko an bilog na oma. Akoa an kabayadan tanganing ikalubong ko duman an sakong agom.”
14Nagsimbag si Efron, 15“Kagurangnan, para sa satong duwa, ano na an daga na nagkakahalaga nin kwatro syentos na pedasong plata? Ilubong mo na duman an saimong agom.” 16Nag-oyon si Abraham kaya tinimbang niya an halagang sinambit ni Efron sa atubang kan mga tawo—kwatro syentos na pedasong plata, sosog sa kinaugalean na timbang na ginagamit kan mga negosyante.
17Kaya nasadirihan ni Abraham an rogaring ni Efron duman sa Macpela, sa sirangan nin Mamre. Nabakal niya an daga kaiba an oma, an lungib asin an gabos na kahoy na nasa laog kan daga. 18Minidbid kan gabos na Heteo na nagtiripon duman na an daga sadiri na ni Abraham. 19Dangan ilinubong ni Abraham an saiyang agom na si Sara sa lungib nin Macpela harani sa Mamre, na inaapod man Hebron, sa daga nin Canaan. 20Kaya an oma na dating pagsadiri kan mga Heteo asin an lungib duman nagin pagsadiri ni Abraham asin ginibo niya ining lulubngan.
Currently Selected:
GENESIS 23: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
