GENESIS 24
24
Agom Para Ki Isaac
1Gurang nang marahay si Abraham asin benendisyonan siya nin Kagurangnan sa gabos na bagay. 2Sinabihan niya an pinakagurang niyang oripon na namamahala kan gabos niyang rogaring, “Ibugtak mo an saimong kamot sa pagultanan kan sakong mga hita#2 ibugtak…hita: Iyo ini an paagi tanganing an sarong sumpa dai nanggad mabago. asin magsumpa ka. 3Isumpa mo sa ngaran nin Kagurangnan, an Dios kan langit asin daga, na an sakong aki dai mo ikukua nin agom na gikan sa Canaan na pinakikihimanwahan ko. 4Magbalik ka sa dagang namundagan ko asin an aki kong si Isaac ikua mo nin sarong agom hale sa sakong mga kadugo duman.”
5Naghapot an sorogoon, “Paano kun habong mag-iba sako an babaeng mapili ko? Tama daw na ipag-iba ko si Isaac duman sa dagang hinalean mo?”
6Nagsimbag si Abraham, “Dai mo nanggad ipag-iba duman an aki ko! 7An Kagurangnan, an Dios nin langit, na nagdara sako digdi hale sa harong nin sakong ama asin sa dagang namundagan ko, nanuga sako na itatao niya an dagang ini sa sakong mga kapagarakian. Papaenoton niya saimo an saiyang anghel tanganing ikakua mo duman nin agom an aki ko. 8Kun habong mag-iba saimo an babae, makakatalingkas ka na sa sumpang ini; alagad dai mo nanggad ipag-iba duman an aki ko.” 9Kaya ibinugtak kan sorogoon sa pagultanan kan mga hita ni Abraham an saiyang kamot dangan nagsumpa na gigibohon an hinahagad saiya ni Abraham.
10Nagkua an sorogoon nin sampolong kamelyo kan saiyang kagurangnan asin kinargahan nin manlaen-laen na mamahalon na regalo dangan naglakaw na siya pasiring sa Mesopotamia, sa syudad na pinag-eerokan ni Nahor. 11Pag-abot niya, pinaluhod niya an mga kamelyo sa may bubon sa luwas kan syudad. Nagsosolnop na an aldaw asin iyo idto an oras na an kababaehan nagduduman tanganing magharok nin tubig. 12Namibi an sorogoon, “O Kagurangnan, Dios kan sakong kagurangnan na si Abraham, tawe ako nin marahay na palad asin pahilingan an saimong danay na pagkamoot sa kagurangnan kong si Abraham. 13Uya ako ngunyan sa may bubon na pinaghaharokan nin tubig kan mga daraga kan syudad na ini. 14Masabi ako sa saro sa sainda, ‘Painoma man ako sa saimong dulay!’ Kun magsabi siyang, ‘Inom na asin papainomon ko man an saimong mga kamelyo,’ siya na man logod an napili mo para sa sorogoon mong si Isaac. Sa paaging ini, maaaraman kong ipinahiling mo sa sakong kagurangnan an saimong danay na pagkamoot.”
15Dai pa siya nakakatapos magpamibi, nag-abot si Rebecca na pasan an sarong dulay. Siya an aking babae ni Betuel na aking lalaki ni Milca, na agom ni Nahor na tugang ni Abraham. 16Magayon nin marahay si Rebecca asin birhen pa. Luminusad ini sa bubon, pinano nin tubig an dulay dangan suminakat. 17Sinabat siya tolos kan sorogoon ni Abraham asin sinabihan, “Painoma man ako sa saimong dulay.”
18Nagsimbag siya, “Inom na, kagurangnan.” Ibinaba niya an dulay asin pinainom an sorogoon. 19Kan makainom na ini, nagsabi si Rebecca, “Maharok pa ako asin papainomon ko man an saimong mga kamelyo sagkod na mahimahaan sinda.” 20An natadang tubig inula niya sa pararaan kan mga hayop dangan nagbalik siya sa bubon tanganing magharok pa; pabalik-balik niyang ginibo ini sagkod na mapainom niya an gabos na kamelyo. 21Mantang ginigibo niya ini, pinagmamasdan siya kan sorogoon tanganing mahiling kaini kun tinabangan na siya nin Kagurangnan sa saiyang katuyohan o dai.
22Pakainom kan mga kamelyo, kinua kan sorogoon an sarong mamahalon na singsing asin duwang bulawan na pulseras dangan itinao ki Rebecca. 23Naghapot an sorogoon, “Kiisay kang aki? Pwede daw kaming makitorog saindo?”
24Nagsimbag si Rebecca, “Aki ako ni Betuel na aki ni Nahor asin Milca. 25Dakul an sakati saka pagkakan sa samong harong asin igwa kamong matotorogan duman.”
26Nagluhod an sorogoon dangan nagsamba sa Kagurangnan 27asin nagsabi, “Pag-omawon an Kagurangnan, an Dios kan kagurangnan kong si Abraham, na nagpahiling kan saiyang danay na pagkamoot asin kaimbodan sa sakong kagurangnan; huli ta an Kagurangnan an nangenot sako pasiring sa mga kadugo kan sakong kagurangnan.”
28Nagdalagan si Rebecca pasiring sa harong kan saiyang ina asin inosip an bilog na nangyari. 29Si Rebecca igwa nin tugang na lalaki na an ngaran Laban, asin ini nagdalagan pasiring sa sorogoon ni Abraham sa may bubon, 30huli ta nahiling niya an singsing asin an mga pulseras sa mga kamot ni Rebecca patin nadangog niya kun ano an isinabi kan lalaki sa tugang kan mag-istorya ini. Dinolok niya an sorogoon ni Abraham, na nagtitindog kataed kan saiyang mga kamelyo sa may bubon, 31dangan nagsabi, “Madya sa harong, ika, na benendisyonan nin Kagurangnan. Tano ta nagtitindog ka digdi sa luwas? Inandam ko na an kwarto para saimo asin an lugar para sa mga kamelyo.”
32Kaya nagdagos an lalaki sa harong; asin diniskargahan ni Laban an mga kamelyo dangan tinawan nin pagkakan an mga ini. Pakatapos, dinarahan niya nin tubig an sorogoon ni Abraham asin an kairiba kaini tanganing maghanaw kan saindang mga bitis. 33Kan andam na an kakanon sa atubang niya, nagsabi an sorogoon, “Dai ako makakan sagkod na dai ko nasasabi an sakong tuyo.”
Nagsimbag si Laban, “Sabihan na.”
34“Sorogoon ako ni Abraham,” an sabi niya. 35“Benendisyonan nin marahay nin Kagurangnan an sakong kagurangnan kaya siya nagyaman. Tinawan siya nin dakul na karnero, kanding asin baka, plata asin bulawan, mga oripon na babae asin lalaki, mga kamelyo asin asno. 36An agom niyang si Sara nangaki nin lalaki kan siya gurang na, asin an gabos na rogaring kan sakong kagurangnan itinao na sa saiyang aki. 37Pinasumpa ako kan kagurangnan ko na, ‘An sakong aki dai mo ipagkua nin agom na gikan sa kadaragahan sa Canaan na pinakikihimanwahan ko; 38alagad magduman ka sa sakong ginikanan, sa mga kadugo ko, asin duman ka magpili nin agom para sa sakong aki.’ 39Hinapot ko an sakong kagurangnan, ‘Paano kun habong mag-iba sako an daraga?’ 40Nagsimbag siya, ‘An Kagurangnan na danay kong sinusunod mapadara nin anghel na maiba saimo, asin matao saimo nin marahay na palad. An sakong aki ikukua mo nin agom hale sa pamilya nin sakong ama. 41Kun pag-abot mo duman sa mga kadugo ko, dai siya ninda paibahon saimo, dangan ka makakatalingkas sa saimong sumpa.’
42“Pag-abot ko sa bubon kasubago, namibi ako, ‘Kagurangnan, Dios nin sakong kagurangnan na si Abraham, tawe ako nin marahay na palad sa gigibohon ko. 43Nagtitindog ako ngunyan sa may bubon; kun igwang magharok na daraga, hahagadan ko siya nin inomon hale sa saiyang dulay. 44Kun painomon niya ako asin painomon man niya an sakong mga kamelyo, siya na logod an saimong napili para sa aki kan sakong kagurangnan.’ 45Dai pa ako nakakatapos magpamibi, nag-abot si Rebecca na pasan an sarong dulay asin nagharok siya sa bubon. Sinabihan ko siya, ‘Painoma man ako.’ 46Ibinaba niya tolos an darang dulay asin nagsabi, ‘Inom na asin papainomon ko man an saimong mga kamelyo.’ Kaya nag-inom ako dangan pinainom niya an sakong mga kamelyo. 47Pakatapos, hinapot ko siya kun kiisay siyang aki. Nagsimbag siya, ‘Aki ako ni Betuel na aki ni Nahor asin Milca.’ Dangan tinawan ko siya nin singsing asin nin mga pulseras. 48Pakatapos, nagduko ako asin nagsamba sa Kagurangnan. Inomaw ko an Kagurangnan, an Dios kan sakong kagurangnan na si Abraham, na nangenot sako pasiring sa mga kadugo kan sakong kagurangnan saen nakua ko an magigin agom kan saiyang aki. 49Kaya sabihi ako ngunyan kun ano an nasa boot nindo tanganing makadesidir ako kun ano an dapat kong gibohon.”
50Nagsimbag saiya si Laban asin si Betuel, “Mayo kaming masasabi huli ta an bagay na ini hale sa Kagurangnan. 51Uya si Rebecca, ipag-iba mo siya tanganing magin agom kan aki nin saimong kagurangnan, siring sa itinaram nin Kagurangnan.” 52Kan madangog ini kan sorogoon, nagduko ini asin nagsamba sa Kagurangnan. 53Ilinuwas niya an darang alahas na plata asin bulawan saka mga gubing, dangan itinao an mga ini ki Rebecca; tinawan man niya nin mga mamahalon na regalo si Laban asin an saiyang ina.
54Dangan nagkakan asin nag-inom an sorogoon ni Abraham kaiba an saiyang mga tawohan; duman sinda nagkatorog. Pagbangon ninda kinaagahan, nagsabi an sorogoon ni Abraham, “Tugote akong magpuli sa sakong kagurangnan.”
55Alagad nagsimbag si Laban asin an saiyang ina, “Tugoteng masakaibahan mi ngona si Rebecca sa laog nin sarong semana o sampolong aldaw pakatapos, pwede na siyang maghale.”
56Nagsimbag an sorogoon, “Dai nindo ako pag-olangon. Tinabangan ako nin Kagurangnan sa sakong lakaw; tugote akong magpuli sa sakong kagurangnan.”
57Nagsabi sinda, “Apodon ta si Rebecca asin hapoton ta siya.” 58Inapod ninda ini asin sinabihan, “Maiba ka sa lalaking ini?”
Nagsimbag si Rebecca, “Maiba ako.”
59Kaya tinugotan ninda si Rebecca asin an saiyang sorogoon na mag-iba sa sorogoon ni Abraham asin sa mga tawohan kaini. 60Benendisyonan ninda si Rebecca asin sinabihan,
“Tugang, magin ina ka logod nin dai mabilang na kaakian!
Sakopon logod kan saimong kapagarakian an mga syudad kan saindang mga kaiwal!”
61Nag-andam si Rebecca asin an saiyang hoben na babaeng mga sorogoon, asin nagsunod sa sorogoon ni Abraham; sarabay sindang nagharale lunad sa mga kamelyo.
62Kan panahon na iyan, si Isaac nag-eerok sa habagat na parte kan Canaan; nag-abot siya sa kalangtadan#62 Sa ibang daan na traduksyon nag-abot siya sa kalangtadan nin; sa Hebreyo nag-abot siya hale sa. nin Beer-lahai-roi. 63Kan naglalakaw-lakaw siya sa oma sarong banggi, nahiling niya an nagdadangadang na mga kamelyo. 64Kan mahiling ni Rebecca si Isaac, naghilig siya sa kamelyo 65asin naghapot sa sorogoon ni Abraham, “Siisay an lalaking idto na naglalakaw sa oma sa pagsabat sato?”
“Siya an kagurangnan ko,” an simbag kan sorogoon. Kaya kinua ni Rebecca an saiyang belo asin tinahoban an saiyang lalawogon.
66Inosip kan sorogoon ki Isaac an gabos na nangyari. 67Dangan dinara ni Isaac si Rebecca sa tolda na pinag-erokan kaidto ni Sara na saiyang ina asin nagin niyang agom si Rebecca. Namotan niya si Rebecca na nagin karangahan niya sa pakagadan kan saiyang ina.
Currently Selected:
GENESIS 24: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
