GENESIS 25
25
Iba Pang mga Kapagarakian ni Abraham
(1 Mga Cro. 1:32-33)
1Nag-agom giraray si Abraham, na an ngaran Ketura. 2Anom an nagin aki ninda ni Abraham: si Zimran, Joksan, Medan, Midian, Isbak asin si Sua. 3Si Joksan iyo an ama ni Sheba asin ni Dedan. An mga Assurim, Letusim asin Leummim iyo an mga kapagarakian ni Dedan. 4An mga aking lalaki ni Midian iyo si Efa, Efer, Hanok, Abida asin Eldaa. Ini gabos an kapagarakian ni Ketura.
5Itinao ni Abraham ki Isaac an gabos niyang rogaring; 6alagad kan siya buhay pa, an mga aki niyang lalaki sa saiyang mga kasaroan tinawan niya nin mga regalo asin pinaerok sa daga na nasa sirangan, harayo sa aki niyang si Isaac.
An Pagkagadan asin Paglubongan ki Abraham
7-8Gurang nang marahay si Abraham kan siya magadan sa edad na syento setenta y singkong taon. 9Ilinubong siya kan mga aki niyang si Isaac asin Ismael duman sa lungib nin Macpela, sa oma na nasa sirangan kan Mamre, na dating pagsadiri ni Efron, na aking lalaki ni Zohar na Heteo. 10Iyo idto an oma na binakal ni Abraham sa mga Heteo; duman ilinubong si Abraham asin si Sara na saiyang agom. 11Benendisyonan nin Dios si Isaac na aki ni Abraham pagkagadan kaini. Dangan nag-erok si Isaac sa Beer-lahai-roi.
An mga Kapagarakian ni Ismael
(1 Mga Cro. 1:28-31)
12Si Ismael, na aking lalaki ni Abraham ki Hagar, an babaeng taga Egipto na oripon ni Sara, nagkaigwa nin doseng aki. 13Ini an saindang mga ngaran sosog sa saindang pagkamundag: Nebaiot, Kedar, Adbeel, Mibsam, 14Misma, Duma, Massa, 15Hadad, Tema, Jetur, Nafis asin Kedema. 16Sinda an ginikanan nin doseng tribu, asin an ngaran kan mga lugar na saindang pinag-eerokan isinunod sa saindang ngaran. 17Nagadan si Ismael sa edad na syento treynta y syeteng taon. 18An saiyang mga kapagarakian nag-erok poon sa Havila sagkod sa Sur na nasa ibong kan Egipto, sa dalan pasiring sa Asiria; namuhay sindang suhay sa ibang mga kapagarakian ni Abraham.
An Pagkamundag ni Esau asin ni Jacob
19Iyo ini an istorya ni Isaac na aking lalaki ni Abraham. 20Kan kwarenta na an edad ni Isaac, inagom niya si Rebecca, na aking babae ni Betuel, na Arameong taga Mesopotamia, asin tugang na babae ni Laban. 21Huli ta dai nag-aaki si Rebecca, namibi si Isaac sa Kagurangnan. Sinimbag nin Kagurangnan an pamibi ni Isaac asin nagbados si Rebecca. 22Kambal an ipinagbabados ni Rebecca asin naggugumulan an mga ini sa saiyang tulak. Nagsabi si Rebecca, “Tano ta nangyayari sako an siring kaini?” Kaya naglakaw siya tanganing hapoton an Kagurangnan.
23Tinaraman siya nin Kagurangnan,
“Duwang nasyon an nasa tulak mo,
duwang magkaribal na banwaan an mamumundag saimo;
an saro mas makosog ki sa saro,
an matua, maglilingkod sa ngohod.”
24Nag-abot an aldaw nin saiyang pag-aki asin namundag sa saiya an kambal na lalaki. 25Mapula an naenot asin mabarahibo an saiyang kublit siring sa gubing na anit, kaya inapod siyang Esau.#25 ESAU: An ngaran na ini sinasabing ipinapanongod sa Seir, an teritoryong ngapit pag-eerokan kan mga kapagarakian ni Esau; sa pandangog, an tataramon na Seir nakakaarog sa Hebreyong tataramon na mabarahibo. 26Namundag an ikaduwa na pugol nin marahay an bool ni Esau, kaya inapod siyang Jacob.#26 JACOB: Sa pandangog, an ngaran na ini nakakaarog sa Hebreyong tataramon na bool. An kambal namundag kan si Isaac sesentang taon na an edad.
Ipinabakal ni Esau an saiyang Deretso bilang Matuang Aking Lalaki
27Kan magdakula an kambal, si Esau, na mas gusto an buhay sa luwas nagin sarong marahay na paraayam; alagad si Jacob bakong paragirong asin mas gusto sa harong. 28Padangat ni Isaac si Esau huli ta nawiwilihan niyang kakanon an mga inayaman kaini alagad padangat ni Rebecca si Jacob.
29Sarong aldaw mantang nagluluto si Jacob nin sinabawan na balatong, uminabot si Esau hale sa pangangayam. Gutom na ini nin marahay 30kaya sinabihan kaini si Jacob, “Tawe ako kan mapulang linuluto mo huli ta grabe na an gutom ko.” (Kaya poon kaidto, nginaranan siyang Edom.)#30 EDOM: Sa pandangog, an ngaran na ini nakakaarog sa Hebreyong tataramon na pula.
31Nagsimbag si Jacob, “Tatawan taka kaini kun itao mo sako an saimong deretso bilang matuang aking lalaki.”
32Nagsimbag si Esau, “Sige! Magagadan na ako sa gutom, kaya ano pa an halaga kan sakong deretso bilang matuang aking lalaki?”
33“Magsumpa ka ngona,” an simbag ni Jacob.
Kaya nagsumpa si Esau asin ipinabakal an saiyang deretso ki Jacob. 34Pakatapos kaini, tinawan ni Jacob si Esau nin tinapay asin nin sinabawan na balatong; nagkakan asin nag-inom ini dangan naghale. Sa siring na paagi, dai pinahalagahan ni Esau an saiyang deretso bilang matuang aking lalaki.
Currently Selected:
GENESIS 25: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
