GENESIS 33
33
Sinabat ni Jacob si Esau
1Nahiling ni Jacob na nagdadangadang si Esau kaiba an kwatro syentos na kalalakihan, kaya an kaakian binanga niya ki Lea, ki Rachel saka sa duwa niyang kasaroan. 2Pinaenot niya an duwa niyang kasaroan sagkod an saindang mga aki; isinunod niya si Lea saka an mga aki kaini dangan pinahudyan niya si Rachel asin si Jose. 3Nangenotan si Jacob sainda asin pitong beses siyang nagdapa sa daga mantang naglalakaw pasiring ki Esau. 4Alagad nagdalagan si Esau sa pagsabat saiya, kinugos siya dangan hinadokan; pareho sindang naghibi. 5Kan mahiling ni Esau an kababaehan asin kaakian naghapot siya, “Siisay an mga kairiba mong ini?”
Nagsimbag si Jacob, “Sinda an mga aking pinagmarahay nin Dios na itao sako.” 6Enot na nagdolok ki Esau an mga kasaroan ni Jacob saka an saindang mga aki; nagduko sinda sa paggalang; 7dangan nagdolok si Lea kaiba an saiyang mga aki. Huring nagdolok si Jose saka si Rachel; nagduko man sinda ki Esau sa paggalang.
8Naghapot si Esau, “Ano an kahulogan kaidtong nasabatan kong sarong grupo?”
“Mga regalo ko idto saimo tanganing makua ko an saimong marahay na boot,” an simbag ni Jacob.
9Alagad nagsabi si Esau, “Igwa na ako kan magkakanigo sako, tugang ko; saimo na sana iyan.”
10Nagsimbag si Jacob, “Bakong siring kaiyan; kun talagang marahay na an boot mo sako, akoon mo an sakong regalo. Huli ta, kan mahiling ko an lalawogon mo, garo man sanang nahiling ko an lalawogon nin Dios, orog na ngunyan na inako mo ako sa marahay na boot. 11Kaya nakikimaherak ako na akoon mo an regalong dara ko saimo; nagin marahay sako an Dios asin tinawan ako kan gabos kong kaipuhan.” Nagparapirit si Jacob kaya inako ni Esau an regalo.
12Nagsabi si Esau, “Magpadagos na kita sa satong paglakaw; ako an mangengenot saindo.”
13Alagad nagsimbag si Jacob, “Aram mo man sana na maluluya pa an mga aki, asin kaipuhan na mangnohon ko an mga ogbon kan karnero saka baka patin an saindang ina. Kun manganaan an mga hayop sa saindang paglakaw sa sarong aldaw, magagadan sinda gabos. 14Mag-enot ka na sako, huli ta aantabayan ko an mga hayop asin kaakian sosog sa rikas kan saindang paglakaw sagkod na maabotan taka sa Edom.”
15“Kun siring mawalat ako nin nagkapira sa mga tawohan ko,” an sabi ni Esau.
Alagad nagsimbag si Jacob, “Dai na kaipuhan huli ta gusto ko sanang makua an marahay mong boot.” 16Kaya nagpuli sa Edom si Esau kan aldaw na idto, 17alagad nagpaduman sa Sukkot si Jacob. Nagpatindog siya duman nin harong asin mga harong-harong para sa saiyang mga hayop; kaya an lugar na idto nginaranan nin Sukkot.#17 SUKKOT: Sa Hebreyo, an ngaran na ini nangangahulogan mga harong-harong.
18Sa saiyang pagpuli hale sa Mesopotamia, nakaabot si Jacob sa syudad nin Shekem, sa daga nin Canaan. Nagkampo siya sa sarong oma na harani sa syudad. 19Binakal niya sa mga kapagarakian ni Hamor, na ama ni Shekem, an dagang pinatindogan niya kan saiyang kampo sa halagang sanggatos na pedaso nin plata. 20Nagpatindog siya nin altar duman asin nginaranan niyang El-Elohe-Israel.#20 EL-ELOHE-ISRAEL; o EL, an Dios nin Israel.
Currently Selected:
GENESIS 33: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
