GENESIS 34
34
An Paglupigi ki Dina
1Sarong aldaw, si Dina na aking babae ni Jacob asin ni Lea, nagdalaw sa kababaehan kan Canaan. 2Kan mahiling siya ni Shekem, na aki ni Hamor na Heveo, na prinsipe kan daga, kinua siya kaini asin linupigan. 3Alagad nagayonan si Shekem ki Dina kun kaya tinuboan siya nin pagkamoot sa aking babae ni Jacob. Hiningowa ni Shekem na mahulog man an boot kaini saiya. 4Sinabihan niya an saiyang ama, “Boot kong lakawon mo na magin agom ko an babaeng ini.”
5Naaraman ni Jacob na linupigan ni Shekem an aki niyang si Dina alagad huli ta nagpapastor pa kan mga hayop sa kaomahan an mga aki niyang lalaki, dai siya naggibo nin ano man sagkod na dai pa sinda nagpuli. 6Nagduman ki Jacob si Hamor na ama ni Shekem tanganing makiolay saiya. 7Nag-abot an mga aking lalaki ni Jacob asin kan maaraman ninda an nangyari, nabigla sinda asin naanggot nin marahay huli ta sarong insulto sa mga Israelita an ginibong panlupig ni Shekem sa aki ni Jacob. 8Olay ni Hamor, “Namomoot nin marahay an aki kong si Shekem sa aki mong si Dina; nakikimaherak akong itao mo na si Dina saiya bilang agom. 9Magkaoyon logod kita na pwedeng mag-inaragoman an satong mga nasasakopan. 10Dangan pwede na kamong mag-erok sa kaibahan mi, magnegosyo asin magsadiri nin daga digdi.”
11Sinabihan man ni Shekem si Jacob asin an mga tugang na lalaki ni Dina, “Tawan nindo sako an saindong marahay na boot asin itatao ko saindo an ano man na hagadon nindo. 12Sabihan nindo sako an ano man na regalo saka dote sa kasal, asin itatao ko saindo, kun tugotan nindo akong agomon siya.”
13Alagad huli ta linupigan ni Shekem an saindang tugang na si Dina, nagsimbag ki Shekem asin ki Hamor an mga aking lalaki ni Jacob sa madayang paagi. 14Olay ninda, “Dai kami matugot na itao an samong tugang sa sarong lalaking bakong serkomsisyonado; dakulang insulto iyan sa samo. 15Matugot sana kami sa kondisyon na magpasirkomsisyon kamo arog samo, asin magpasirkomsisyon man an gabos na lalaki saindo. 16Dangan maoyon kami na makipag-agoman saindo. Maerok kami sa saindong daga asin magigin mga kahimanwa nindo. 17Alagad kun habo kamo sa itinao ming kondisyon asin dai kamo magpasirkomsisyon, kukuahon mi si Dina asin mahale kami digdi.”
18Naoyonan ni Hamor asin ni Shekem an kondisyon. 19Kaya ginibo tolos kan hoben an hinagad saiya, huli ta namotan niya si Dina. Siya an pinakaimportanteng myembro kan saiyang pamilya.
20Nagduman sa trangkahan kan syudad si Hamor asin an aki niyang si Shekem, dangan sinabihan an mga kalalakihan, 21“Maboot an mga tawong ini; tugotan ta sindang mag-erok sa kaibahan nyato asin magnegosyo digdi, huli ta dakula man an satong daga. Pwede tang agomon an saindang kadaragahan asin pwede man sindang mag-agom kan satong kadaragahan. 22Alagad maerok sana sinda digdi asin magigin kahimanwa nyato, kun an gabos na lalaki digdi sato magpasirkomsisyon arog sainda. 23Bako daw na mapapasato an gabos nindang hayop asin rogaring? Kaya mag-oyon kita sa kondisyon ninda tanganing mag-erok sinda sa kaibahan ta.” 24Nag-oyon an gabos na kalalakihan kan syudad sa sinabi ni Hamor asin ni Shekem, kaya nagpasirkomsisyon sinda gabos.
25Pakalihis nin tolong aldaw, kan grabe an kulog na namamatean kan kalalakihan huli sa pagserkomsisyon sainda, an duwang aking lalaki ni Jacob na si Simeon saka si Levi, na mga tugang ni Dina, hilom na naglaog sa syudad dara an saindang espada, asin ginadan an gabos na lalaki duman. 26Ginadan ninda si Hamor saka an aki kaining si Shekem. Dangan kinua ninda si Dina sa harong ni Shekem asin naghale. 27Pakatapos, sinamsam kan iba pang aki ni Jacob an gabos na yaon sa syudad bilang pagbalos sa kasosopgan na inabot kan saindang tugang na babae. 28Kinua ninda an mga hayop—baka, asno, asin an gabos na yaon sa syudad sagkod sa kaomahan. 29Kinua ninda an gabos na mahahalagang bagay asin binihag ninda an gabos na babae saka aki; kinua man ninda an gabos na yaon sa mga harong.
30Nagsabi si Jacob ki Simeon asin ki Levi, “Dinarahan nindo ako nin problema; maaanggot sako an mga Cananeo, mga Perezeo saka an gabos na nag-eerok digdi sa daga. Dikit an tawohan ko; kun magkaboronyog sinda laban sako asin salakayon ako, magagadan an bilog tang pamilya.”
31Alagad nagsimbag sinda, “Dai mi maaako na an samong tugang na babae iarog sa sarong maraot na babae.”
Currently Selected:
GENESIS 34: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
