GENESIS 35
35
Benendisyonan nin Dios si Jacob sa Betel
1Nagtaram an Dios ki Jacob, “Magduman ka tolos sa Betel asin duman ka mag-erok. Gumibo ka nin sarong altar duman para sako, an Dios na nagpahiling saimo kan ika magdulag sa tugang mong si Esau.”
2Kaya sinabihan ni Jacob an saiyang pamilya asin an gabos na kaibahan niya, “Itapok nindo an mga dayuhan na dios na yaon saindo; maglinig kamo kan saindong sadiri asin magsangle kamo kan saindong gubing, 3huli ta maduman kita gabos sa Betel tanganing ikatugdok ko nin altar an Dios na nagtabang sako sa panahon nin kasakitan asin nag-iba sako saen man ako magduman.” 4Kaya itinao ninda ki Jacob an gabos nindang mga dayuhan na dios sagkod an mga hikaw na sulot ninda. Ilinubong ini gabos ni Jacob sa irarom kan poon nin sarong hamurawon na kahoy na harani sa Shekem.
5Kan magpoon na sindang maglakaw, natakot nin marahay an mga tawong nag-eerok sa mga syudad sa palibot ninda, kaya dai sinda linamag kan mga ini. 6Nakaabot si Jacob asin an gabos na kaiba niya sa Luz (o Betel) sa daga nin Canaan. 7Itinugdok niya duman an sarong altar asin an lugar nginaranan niyang El-Betel, huli ta duman nagpahiling saiya an Dios kan nagdulag siya sa saiyang tugang. 8Duman nagadan si Debora na paraaling ni Rebecca. Ilinubong siya sa tangod nin sarong hamurawon na kahoy sa habagat kan Betel, kaya an lugar na idto nginaranan Allon-bacut.#8 ALLON-BACUT: An boot sabihon Hamurawon nin Pagtangis.
9Nagpahiling giraray an Dios ki Jacob kan magbalik ini hale sa Mesopotamia. Benendisyonan siya nin Dios 10asin tinaraman, “Jacob an ngaran mo, alagad poon ngunyan aapodon ka nang Israel.” Kaya nagin Israel an saiyang ngaran. 11Nagtaram saiya an Dios, “Ako an Makakamhan na Dios. Magkaigwa ka nin dakul na aki. Gigikanan ka nin dakul na nasyon asin sa saimo magikan an mga hade. 12Itatao ko saimo an daga na itinao ko ki Abraham saka ki Isaac, asin itatao ko man iyan sa saimong mga kapagarakian.” 13Dangan binayaan siya nin Dios. 14Sa lugar na idto, saen nagtaram saiya an Dios, nagpatindog si Jacob nin hariging giromdoman na an ibabaw inulaan niya nin arak saka lana nin oliba. 15An lugar nginaranan niyang Betel.
An Pagkagadan ni Rachel
16Naghale sa Betel si Jacob kaiba an saiyang pamilya, asin kan harani na sinda sa Efrat, nag-abot an oras kan pangaki ni Rachel; dipisil an saiyang pangaki. 17Kan grabe na an kulog kan pagporos niya, sinabihan siya kan partera, “Dai ka matakot, Rachel; lalaki na naman an ipapangaki mo.” 18Alagad naghihingagdan na si Rachel asin bago siya nautsan, nginaranan niyang Benoni#18 BENONI: Sa Hebreyo, ini nangangahulogan aki nin sakong kamondoan. an saiyang aki, alagad inapod ining Benjamin#18 BENJAMIN: Sa Hebreyo, ini nangangahulogan aki na magigin mapalad. kan saiyang ama.
19Nagadan si Rachel asin ilinubong sa may dalan pasiring sa Efrat (na ngunyan inaapod Betlehem). 20Nagbugtak si Jacob nin sarong hariging giromdoman sa linubongan ki Rachel asin sagkod ngunyan idtoon pa iyan duman. 21Dangan nagpadagos sa paglakaw si Jacob asin nagkampo sa ibong kan tore nin Eder.
An Mga Aki ni Jacob
(1 Mga Cro. 2:1-2)
22Kan nag-eerok na si Jacob sa dagang idto, dinorogan ni Ruben si Bilha na saro kan mga kasaroan nin saiyang ama; naanggot nin marahay#22 Sa ibang daan na traduksyon naanggot nin marahay; mayo ini sa Hebreyo. si Jacob kan maisihan ini.
Dose an mga aking lalaki ni Jacob. 23An mga aki ni Lea iyo si Ruben (an matuang aking lalaki ni Jacob), si Simeon, Levi, Juda, Issakar, asin Zabulon. 24An mga aki ni Rachel iyo si Jose asin si Benjamin. 25An mga aki ni Bilha na katabang ni Rachel iyo si Dan asin si Neftali. 26An mga aki ni Zilpa na katabang ni Lea iyo si Gad saka si Aser. An mga ini iyo an mga aki ni Jacob na namundag saiya sa Mesopotamia.
An Pagkagadan ni Isaac
27Dinalaw ni Jacob si Isaac na saiyang ama duman sa Mamre, harani sa Hebron, saen nakihimanwa si Abraham asin si Isaac. 28Nabuhay si Isaac sagkod sa edad na syento otsenta, 29asin nagadan sa pagkagurang; ilinubong siya kan mga aki niyang si Esau saka Jacob.
Currently Selected:
GENESIS 35: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
