GENESIS 41
41
Ipinaliwanag ni Jose an mga Pangatorogan kan Hade
1Pakalihis nin duwang taon, nangatorogan an hade nin Egipto na nakatindog siya sa pangpang kan Salog nin Nilo, 2kan maghawas hale sa salog an pitong matataba saka magagayon na baka, dangan nagpoon manabsab kan doot. 3Dai nahaloy, pito pang baka na maniniwang asin makakanos an naghawas asin nagtindog sa kataed kan ibang mga baka na yaon duman sa pangpang kan salog. 4Dangan kinakan kan mga maniniwang na baka an mga matatabang baka. Nagimata an hade. 5Nagkatorog siya giraray asin nangatorogan na naman na sa sarong poon nin mais nagbuswak an pitong purosok asin matatagas na puso. 6Dangan nagbuswak pa nin pitong puso na saradit asin tagiltilon huli sa init kan doros na hale sa desyerto. 7Hinalon kan mga saradit na puso nin mais an mga purosok na puso. Nagimata an hade asin naaraman niyang nangatorogan siya. 8Alagad pagkaaga nahadit siya nin marahay kaya ipinaapod niya an gabos na salamangkero asin mago sa Egipto. Isinaysay niya sainda an saiyang mga pangatorogan, alagad mayo nin siisay man na nakapaliwanag kaini saiya.
9Dangan nagsabi sa hade an saiyang kopero, “Nagiromdoman ko ngunyan an kasalan ko. 10Kan anggot ka sako asin sa panadero, ipinabilanggo mo kami sa harong kan kapitan kan mga bantay. 11Nangatorogan kami sa parehong banggi alagad magkaiba an kahulogan kan samong pangatorogan. 12Yaon duman an sarong hoben na Hebreyo, an oripon kan kapitan kan mga bantay. Kan isaysay mi saiya an samong mga pangatorogan, ipinaliwanag niya samo an kahulogan kan mga ini. 13Nagkatotoo sa samo an saiyang sinabi: ibinalik mo ako sa dati kong katongdan alagad ipinagadan mo an panadero.”
14Ipinaapod si Jose kan hade, asin pinaluwas siya tolos sa bilanggoan. Pakatapos niyang mag-ahit asin magsangle kan saiyang gubing, nag-atubang siya sa hade. 15Sinabihan siya kan hade, “Nangatorogan ako alagad mayo nin siisay man na nakakapaliwanag kaiyan. Igwang nakasabi sako na nakakapaliwanag ka nin mga pangatorogan.”
16Nagsimbag si Jose, “Mahal na hade, bakong ako, kundi an Dios an mapaliwanag saimo.”
17Nagsabi an hade, “Nangatorogan ako na nakatindog ako sa pangpang kan Salog nin Nilo, 18kan maghawas an pitong matataba saka magagayon na baka asin nagsabsab kan doot. 19Dangan naghawas man an pitong maniniwang saka makakanos na baka na kaidto ko pa sana nahiling sa bilog na daga nin Egipto. 20Kinakan kan mga ini an mga matatabang baka, 21alagad pakatapos nindang kakanon an mga idto, mayo nin siisay man na makasabing kinakan ninda an mga matatabang baka huli ta maniwang man giraray sinda siring kan dati. Dangan nagimata ako. 22Nangatorogan pa akong nahiling ko an pitong puso nin mais na purosok asin matatagas na nagbuswak sa sarong poon. 23Dangan nagbuswak man an pitong saradit asin tagiltilon na puso nin mais huli sa init kan doros na hale sa desyerto, 24asin hinalon an mga purosok saka matatagas na puso. Inistorya ko an mga pangatorogan na ini sa mga salamangkero, alagad mayong nakapaliwanag sako.”
25Sinabihan ni Jose an hade, “Pareho an kahulogan kan duwang pangatorogan; ipinahayag saimo nin Dios an saiyang gigibohon. 26An pitong matatabang baka, pitong taon; asin an pitong purosok na puso nin mais, pito man na taon; saro an kahulogan ninda. 27An nagsunod na pitong maniniwang na baka asin an pitong tagiltilon na puso nin mais huli sa init kan doros na hale sa desyerto, pitong taon nin gutom. 28Siring sa sinabi ko, ipinahayag saimo nin Dios an saiyang gigibohon. 29Magigin abunda sa bilog na Egipto sa maabot na pitong taon, 30alagad pakatapos kaini maabot an pitong taon nin gutom, asin an mga abundang taon malilingawan huli ta an bilog na daga papasakitan kan gutom. 31An panahon nin abunda malilingawan huli kan grabeng gutom na masunod. 32An pagigin doble kan saimong pangatorogan nangangahulogan na itinalaga iyan nin Dios asin madali na niyang gibohon.
33“Kaya ngunyan magpili ka nin sarong madonong asin may kakayahan na lalaki dangan ibugtak mo siyang parapamahala kan bilog na Egipto. 34Magbugtak ka man nin mga enkargado kan daga, asin kuahon mo an ikalimang parte kan gabos na produkto kan daga sa laog kan pitong taon nin abunda. 35Pagbotan mo sinda na tiponon an gabos na pagkakan sa laog kan mga maabot na taon nin abunda asin tawan mo sinda nin kapangyarihan sa pagtipon saka sa pagbantay kan pagkakan sa mga syudad. 36Iaandam an pagkakan na iyan para sa daga sa laog kan pitong taon nin gutom na maabot sa Egipto. Sa siring na paagi dai magugutom an mga tawo.”
Ginibong Gobernador kan Egipto si Jose
37Naoyonan kan hade nin Egipto asin kan gabos niyang opisyal an planong ini, 38kaya sinabihan niya sinda, “Makakakua pa daw kita nin arog ki Jose, na igwa kan espiritu nin Dios?” 39Kaya sinabihan si Jose kan hade, “Ipinahiling nin Dios an gabos na ini saimo, kaya mayo nin siisay man na makakaarog saimo sa kadonongan asin sa kakayahan. 40Ika an sakong ibubugtak na parapamahala kan bilog na daga. An saimong pagboot ootobon kan gabos kong nasasakopan. Magigin ikaduwa ka sako sa kapangyarihan. 41Poon ngunyan, ika na an gobernador kan bilog na Egipto.” 42Dangan hinugkot kan hade sa saiyang muro an singsing na may selyo asin isiningsing ki Jose. Sinulotan niya ini nin gubing na pinong lino saka binugtakan nin kulintas na bulawan. 43Tinawan man si Jose kan hade kan ikaduwa niyang karwahe tanganing lunadan niya kaiba an mga bantay na maeenot sa saiya asin magkukurahaw, “Luhod kamo!” Sa siring na paagi nagin gobernador si Jose kan bilog na Egipto. 44Sinabihan siya kan hade, “Ako an hade nin Egipto, asin sinasabihan taka na mayo nin siisay man sa daga nin Egipto na makakaitaas kan saiyang kamot o bitis sagkod na dai mo itinutugot.” 45-46Dangan si Jose nginaranan Zafenat Panea kan hade, asin tinawan siya kaini nin agom, si Asenat, an aki ni Potifera na sarong padi sa On.#45-46 Sa lengwaheng Hebreyo On; sa Egipcio Heliopolis.
Treynta na an edad ni Jose kan magpoon siyang maglingkod sa hade nin Egipto. Pakahale niya sa atubang kan hade, naglibot siya sa bilog na daga. 47Sa laog nin pitong taon, nagkaigwa nin dakul saka marahay na ani sa daga. 48Tinipon ni Jose an gabos na pagkakan dangan sinaray niya sa mga syudad. Sa lambang syudad, sinararay niya an pagkakan na naani sa kaomahan na nasa palibot. 49Dakul nin marahay an ani, kaya inontok ni Jose an pagtakad kaiyan—garo iyan baybay sa dagat.
50Bago nag-abot an mga taon nin gutom, igwa na nin duwang aking lalaki si Jose ki Asenat. 51Olay ni Jose, “Pinalingawan sako nin Dios an gabos kong pagtios asin an pamilya nin sakong ama”; kaya nginaranan niyang Manases#51 MANASES: Sa pandangog, an ngaran na ini nakakaarog sa Hebreyong tataramon na pinalingaw o pinalingawan sako nin Dios. an matua niyang aki. 52Nagsabi pa siya, “Tinawan ako nin Dios nin mga aki sa daga nin sakong kasakitan”; kaya nginaranan niyang Efraim#52 EFRAIM: Sa pandangog, an ngaran na ini nakakaarog sa Hebreyong tataramon na tinawan nin mga aki o pinangagin mabinunga. an ikaduwa niyang aki.
53Natapos an pitong taon nin abunda sa daga nin Egipto, 54asin siring sa sinabi ni Jose, nagpoon an pitong taon nin gutom. Igwa nin gutom sa ibang lugar, alagad igwang pagkakan sa bilog na Egipto. 55Kan magpoon nang magutom an mga Egipcio, naghagad sinda nin pagkakan sa hade. Pinagbotan niya sinda na magduman ki Jose asin magsunod sa sasabihon kaini. 56Kan lakop na an grabeng gutom sa bilog na daga, binukasan ni Jose an gabos na sarayan nin pagkakan dangan pinabakalan niya nin mais an mga Egipcio. 57Nagduman sa Egipto an mga tawo hale sa gabos na lugar kan kinaban tanganing magbakal nin mais, huli ta grabe an gutom minsan saen.
Currently Selected:
GENESIS 41: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
