GENESIS 40
40
Ipinaliwanag ni Jose an mga Pangatorogan kan mga Bilanggo
1Dai nahaloy, nagkasala sa hade kan Egipto an saiyang kopero saka an saiyang panadero. 2Naanggot an hade sainda 3asin ipinabilanggo sa harong kan kapitan kan mga bantay, sa bilanggoan na namumugtakan ni Jose. 4Haloy na nabilanggo an duwa asin nagin sorogoon ninda si Jose sa pagboot kan kapitan.
5Sarong banggi, duman sa bilanggoan, nangatorogan an kopero asin an panadero alagad an saindang pangatorogan magkaiba an kahulogan. 6Pagkaaga, naabotan sinda ni Jose na parehong mamondo. 7Hinapot niya sinda, “Tano ta mamondo kamo ngunyan?”
8Nagsimbag sinda, “Pareho kaming nangatorogan asin mayo digdi nin siisay man na makakapaliwanag kun ano an kahulogan.”
Nagsimbag si Jose, “An Dios an nagtatao kan kakayahan sa pagpaliwanag nin mga pangatorogan. Istoryahan daw nindo sako.”
9An kopero kan hade nagsabi, “Sa pangatorogan ko, igwa nin sarong poon nin ubas sa atubang ko 10na igwa nin tolong sanga. Kan magdahon an mga sanga, namurak tolos ini dangan naghirinog an mga ubas. 11Kapot ko an kalis kan hade; ginuno ko an mga ubas asin pinuga ko an mga ini sa kalis dangan itinao ko sa hade.”
12Nagsabi si Jose, “Ini an kahulogan kan pangatorogan mo: an tolong sanga, tolong aldaw. 13Pakalihis nin tolong aldaw, papaluwason ka digdi kan hade, papatawadon asin papabalikon sa dati mong trabaho. Ika giraray an matao sa hade kan saiyang kalis siring kan enot na mga aldaw kan ika an saiyang kopero. 14Alagad giromdoma man ako kun nasa marahay ka nang kamugtakan, na maonabihan mo ako sa hade asin matabangan na makaluwas digdi sa bilanggoan. 15Bako kong kagustohan an pagdigdi sa Egipto; kinidnap ako sa daga kan mga Hebreyo, asin minsan digdi sa Egipto, mayo akong ginibong ano man tanganing ilaog sa bilanggoan.”
16Pagkahiling kan panadero na marahay an paliwanag sa pangatorogan kan kopero kan hade, nagsabi siya ki Jose, “Nagkaigwa man ako nin pangatorogan: suknong ko an tolong basket nin tinapay. 17An basket na nasa ibabaw nalalaogan kan manlaen-laen na kakanon para sa hade, asin kinarakan idto kan mga gamgam.”
18Nagsimbag si Jose, “Iyo ini an kahulogan: an tolong basket, tolong aldaw. 19Pakalihis nin tolong aldaw, papaluwason ka digdi kan hade asin papupugotan ka! Dangan ipapabitay niya an saimong bangkay sa sarong kahoy asin kakakanon kan mga gamgam an saimong laman.”
20Pakalihis nin tolong aldaw, sa kumpleanyo kan hade, nagtao siya nin bangkete sa gabos niyang opisyal; pinaluwas niya sa bilanggoan an saiyang kopero asin an saiyang panadero dangan pinaatubang sinda sa saiyang mga opisyal. 21Ibinalik niya sa dating katongdan an saiyang kopero 22alagad ipinagadan niya an panadero. Nangyari an gabos siring sa sinabi ni Jose. 23Alagad dai nagiromdoman si Jose kan kopero kan hade; nalingawan na siya kaini.
Currently Selected:
GENESIS 40: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
