GENESIS 39
39
Si Jose asin an Agom ni Potifar
1Dinara si Jose sa Egipto kan mga Ismaelita asin ipinabakal siya ninda ki Potifar, sarong opisyal na Egipcio, na kapitan kan mga bantay sa palasyo kan hade. 2Inibahan nin Kagurangnan si Jose kaya nag-uswag siya. Nag-erok si Jose sa harong kan Egipcio niyang kagurangnan, 3na nakamasid na iniibahan nin Kagurangnan si Jose asin pinapauswag an gabos na gibo. 4Nagustohan si Jose ni Potifar, asin ginibo siya kaining pinaniwalaan na sorogoon; siya an nagin parapamahala kan harong ni Potifar asin kan gabos na pagsadiri kaini. 5Poon kaidto, huli ki Jose, benendisyonan nin Kagurangnan an harong kan Egipcio asin an gabos na pagsadiri kaini. 6Itinao ni Potifar an gabos niyang pagsadiri sa pamamahala ni Jose. Mayo na siyang ibang minamangno kundi an saiyang kinakakan.
Gwapo si Jose asin marahay an saiyang tindog, 7kaya dai nahaloy, nagkaigwa nin pagmawot saiya an agom ni Potifar asin nagsabi saiya, “Dorogan mo ako.” 8Nagsayuma si Jose asin nagsabi, “Dai na naghahadit an sakong kagurangnan kan manongod digdi sa harong huli ta uya ako. Ginibo niya akong parapamahala kan gabos niyang pagsadiri; 9pareho an samong kapangyarihan digdi sa harong asin dai siya nin ipinapangalad sako kundi ika sana, huli ta agom ka niya. Tano ta magibo ako kan siring na karigsokan asin magkasala ako sa Dios?” 10Minsan inoroaldaw kan agom ni Potifar an pag-alok ki Jose, nagsayuma siya.
11Sarong aldaw, naglaog sa harong si Jose tanganing mag-trabaho, asin mayo gabos sa harong an mga sorogoon. 12Kaya kinapotan kan agom ni Potifar an gubing ni Jose asin nagsabi, “Dorogan mo ako.” Nakadalagan si Jose paluwas kan harong alagad nawalat an saiyang alikboy sa kamot kan agom ni Potifar. 13Kan mahiling kan babae na nawalat ni Jose an saiyang alikboy pagdulag saiya, 14inapod niya an mga oripon niya sa harong asin nagsabi, “Hilinga nindo ini! Nagdara digdi sato an agom ko nin sarong Hebreyo na iyo man sana an masopog sato. Linaog niya ako sa sakong kwarto tanganing lupigan, alagad nagkurahaw ako. 15Kan madangog niya an kurahaw ko, nagdalagan siya paluwas kan harong asin nawalat an alikboy niya.”
16Sinaray niya an alikboy sagkod na magpuli an kagurangnan ni Jose 17dangan inosipan niya kan parehong istorya: “An sorogoon mong Hebreyo na dinara mo digdi, naglaog sa sakong kwarto asin sinopog ako. 18Alagad kan magkurahaw ako, nagdalagan siya paluwas kan harong asin nawalat an alikboy niya sa sako.”
19Naanggot nin marahay si Potifar kan madangog an sumbong kan agom. 20Ipinadakop niya si Jose asin ipinabilanggo sa namumugtakan kan mga bilanggo kan hade. 21Alagad inibahan si Jose nin Kagurangnan na nagpahiling saiya nin danay na pagkamoot, kaya naoyonan siya kan bantay kan bilanggoan. 22Ginibo kaining parapamahala si Jose kan gabos na bilanggo asin kan gabos na trabaho sa bilanggoan. 23Kaya daing paghadit an bantay sa ano man na ipinapamahala niya ki Jose, huli ta kaibahan ni Jose an Kagurangnan asin pinauswag ini sa gabos na trabaho.
Currently Selected:
GENESIS 39: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
