GENESIS 38
38
Si Juda asin si Tamar
1Kan panahon na iyan, binayaan ni Juda an saiyang mga tugang asin nag-erok siya sa kaibahan nin sarong lalaking Adullamita na an ngaran Hira. 2Duman niya namidbid an sarong babaeng taga Canaan na aki ni Sua. Inagom niya an daraga, 3asin nangaki ini nin lalaki na nginaranan niyang Er. 4Nagbados giraray an agom ni Juda asin nangaki nin lalaki na nginaranan niyang Onan. 5Nangaki pa nin lalaki an saiyang agom asin nginaranan niyang Shela. Nasa Akzib si Juda kan mamundag an aki.
6Si Er na saiyang matua, ikinua ni Juda nin agom na an ngaran Tamar. 7Alagad maraot an ugale ni Er asin dai siya naoyonan nin Kagurangnan, kaya ginadan siya nin Kagurangnan. 8Sinabihan ni Juda si Onan, “Dorogi an balo kan saimong tugang, asin otoba an katongdan nin sarong bayaw tanganing magkaigwa nin aki an saimong tugang.” 9Alagad aram ni Onan na dai man mapapasaiya an aki, kaya kan dorogan niya an agom kan saiyang tugang, inula niya sa daga an saiyang semilya, tanganing dai niya matawan nin aki an saiyang tugang. 10Dai naoyonan nin Kagurangnan an ginibo niya kaya ginadan man siya nin Kagurangnan. 11Dangan sinabihan ni Juda si Tamar na saiyang manugang, “Magbalik ka sa harong kan saimong ama asin magdanay ka sa pagkanibalo sagkod na magdakula an aki kong si Shela.” Sinabi niya ini huli ta natakot siyang magadan man si Shela arog kan mga tugang kaini. Kaya nagpuli si Tamar asin nag-erok sa harong kan saiyang ama.
12Dai nahaloy nagadan an agom ni Juda. Kan matapos na an panahon kan pagmondo, si Juda, kaiba an amigo niyang si Hira na Adullamita, nagduman sa Timna sa lugar na pinagguguntingan kan saiyang mga karnero. 13Igwang nakaosip ki Tamar na an saiyang panugangan maduman sa Timna sa paggunting kan mga karnero. 14Kaya hinuba ni Tamar an gubing niyang sa balo asin nagsulot nin iba; tinahoban niya nin belo an saiyang lalawogon dangan tuminukaw sa may trangkahan kan banwaan nin Enaim, sa dalan pasiring sa Timna. Aram ni Tamar na dakula na si Shela, an ngohod na aki ni Juda, alagad dai pa siya itinatao ni Juda ki Shela bilang agom.
15Kan mahiling ni Juda si Tamar, naghona siya na si Tamar sarong maraot na babae, huli ta tinahoban kaini an saiyang lalawogon. 16Dinolok siya ni Juda sa gilid kan dalan asin sinabihan, “Gurano man an hagad mo?” (Dai namidbidan ni Juda na an babae iyo an saiyang manugang.)
Nagsimbag si Tamar, “Ano an ikakatao mo sako?”
17Nagsabi si Juda, “Papadarahan taka nin sarong ogbon na kanding hale sa sakong mga ataman na hayop.”
Nagsimbag si Tamar, “Tugot ako, kun wawalatan mo ako nin sangra sagkod na ikapadara mo sako an kanding.”
18“Ano an itatao ko saimo bilang sangra?” an hapot ni Juda.
Nagsimbag siya, “An saimong singsing na pangmarka kaiba an gakod asin an dara mong sugkod.” Itinao ini gabos ni Juda ki Tamar. Nagdorog sindang duwa, asin nagbados si Tamar. 19Nagpuli siya, hinale an belo, asin isinulot giraray an gubing niyang sa balo.
20Sinugo ni Juda an amigo niyang si Hira na darahon sa babae an ogbon na kanding asin kuahon saiya an mga isinangra niyang gamit. Alagad dai nakua ni Hira an babae. 21Naghapot siya sa mga lalaki kan Enaim, “Haen na an maraot na babae na nagtutukaw digdi sa may dalan?”
“Mayo man nin arog kaiyan na babae digdi minsan kaidto,” an simbag ninda.
22Nagbalik si Hira ki Juda asin nagsabi, “Dai ko nahiling an babae, asin an kalalakihan duman nagsabi na mayo man nin maraot na babae sa lugar ninda minsan kaidto.”
23Nagsabi si Juda, “Pabayaan ta na saiya an mga gamit ko ta tibaad pagngisihan kita kan mga tawo. Babayadan ko na kuta siya alagad dai mo man siya nahiling.”
24Pakalihis nin tolong bulan, igwang nag-osip ki Juda, “Nagin maraot na babae an manugang mong si Tamar asin bados siya ngunyan.”
Nagboot si Juda, “Iluwas nindo siya asin suloon sagkod na magadan.”
25Mantang ilinuluwas ninda si Tamar, nagpatogon siya sa panugangan niya, “Nabadosan ako kan lalaking kagsadiri kan mga gamit na ini. Midbida nin marahay kun kiisay ining singsing na pangmarka kaiba an gakod asin ining sugkod.”
26Namidbidan an mga ini ni Juda asin nagsabi siya, “Orog na matanos siya ki sa sako, huli ta dai ko siya itinao sa aki kong si Shela bilang agom.” Dai na nanggad dinorogan ni Juda si Tamar.
27Kan mangangaki na si Tamar, napag-araman na kambal an nasa tulak niya. 28Kan nagpoporos na si Tamar, ilinuwas kan sarong aki an saiyang kamot; kinapotan ini kan partera asin ginakodan nin pulang torsido dangan nagsabi, “Ini an naenot.” 29Alagad kan ilaog giraray kan aki an saiyang kamot, naenot na namundag an saiyang tugang. Nagsabi an partera, “Siring palan kaini an paglusot mo!” Kaya nginaranan siyang Perez.#29 PEREZ: Sa Hebreyo, an ngaran na ini nangangahulogan labot o paglusot. 30Dangan namundag man an saiyang tugang na may gakod nin pulang torsido sa saiyang kamot; nginaranan siyang Zera.
Currently Selected:
GENESIS 38: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
