GENESIS 37
37
Si Jose asin an Saiyang mga Tugang
1Padagos na nag-erok si Jacob sa Canaan, an daga na pinag-erokan kan saiyang ama. 2Iyo ini an istorya kan pamilya ni Jacob.
Si Jose, sa edad na dyes y syeteng taon, iyo an nagpapastor kan mga hayop sa kaibahan kan saiyang mga tugang na mga aki ni Bilha asin ni Zilpa—mga kasaroan kan saiyang ama na si Jacob. Isinumbong ni Jose sa saiyang ama an mga maraot na ginigibo kan saiyang mga tugang.
3Orog na namotan ni Jacob si Jose ki sa gabos niyang aki, huli ta namundag ini kan gurang na siya; iginibo niya ini nin sarong halabang gubing na may manggas.#3 halabang gubing na may manggas; o gubing na may dekorasyon. 4Kan namasdan kan mga tugang ni Jose na mas padangat siya kan saindang ama, naongis sinda saiya mala ngani ta dai na ninda ini kinakaolay sa marahay na boot.
5Nagkaigwa kaidto nin pangatorogan si Jose asin kan inistorya niya ini sa mga tugang niya, orog sindang naanggot sa saiya. 6Nagsabi siya sainda, “Dangoga nindo an pangatorogan ko: 7gabos daa kita nagbuburugkos kan mga inasyab na trigo sa oma, kan magbuhat asin magtindog nin tanos an sakong binugkos. Pinalibotan kan saindong binugkos an sakong binugkos asin dinukoan ninda ini sa paggalang.”
8Nagsabi sinda saiya, “Sa paghona mo, ika an magigin hade asin kagsakop nyamo?” Kaya orog na naongis sa saiya an saiyang mga tugang huli kan saiyang mga pangatorogan asin mga pinagsasabi.
9Dangan nangatorogan na naman si Jose asin inistorya niya ini sa saiyang mga tugang, “Nangatorogan na naman ako na nahiling ko an aldaw, an bulan asin an onseng bitoon na nagduko sa paggalang sako.”
10Inosip man ini ni Jose sa saiyang ama alagad inanggotan siya kaini, “Anong pangatorogan iyan? An boot mong sabihon, madolok asin mataong galang kami saimo—ako, asin an saimong ina, sagkod an saimong mga tugang?” 11Kaya naori saiya an saiyang mga tugang alagad an bagay na ini pinaghorophorop kan saiyang ama.
Ipinabakal si Jose asin Dinara sa Egipto
12Sarong aldaw, nagpaduman sa Shekem an mga tugang ni Jose tanganing pasabsabon an mga hayop kan saindang ama. 13Sinabihan ni Jacob si Jose, “Magduman ka sa Shekem, sa mga tugang mong nagpapasabsab kan mga hayop.”
Nagsimbag si Jose, “Andam akong magduman.”
14Sinabihan siya ni Jacob, “Lakaw na, asin hilinga kun marahay an kamugtakan kan saimong mga tugang saka kan mga hayop; dangan magbalik ka asin osipan mo ako.” Kaya pinalakaw ni Jacob si Jose hale sa Kapantayan nin Hebron.
Nakaabot si Jose sa Shekem 15asin sarong lalaki an nakanumpong saiya kan nalalagalag siya sa kaomahan. Hinapot si Jose kan lalaki, “Ano an hinahanap mo?”
16Nagsimbag siya, “Hinahanap ko an sakong mga tugang. Pwede mo daw akong ikatukdo kun saen sinda nagpapasabsab kan mga hayop?”
17Nagsimbag an lalaki, “Naghale na sinda alagad nadangog ko sindang nagsabi na maduman sinda sa Dotan.” Kaya sinundan ni Jose an saiyang mga tugang dangan nanumpongan niya sinda sa Dotan.
18Natanawan ninda si Jose sa harayo asin bago ini nakaabot sainda, nakaplano na sindang gadanon siya. 19Nag-orolay-olay sinda, “Nagdadangadang an parapangatorogan. 20Madya kamo, gadanon ta siya; pakatapos ihulog ta siya sa saro kan mga mamarang bubon. Dangan sabihon tang ginadan siya nin sarong maringis na hayop. Hilingon ta kun ano an mangyayari sa mga pangatorogan niya.”
21Nadangog ni Ruben an sinabi ninda kaya naghingowa siyang iligtas si Jose. Nagsabi siya, “Dai ta na siya paggadanon. 22Dai kita magpabulos nin dugo; ihulog ta na sana siya sa bubon na ini digdi sa kalangtadan, alagad dai ta siya pagkulogan.” Sinabi niya ini tanganing iligtas si Jose sa saindang mga tugang dangan papulion siya sa saiyang ama. 23Kaya pag-abot ni Jose sa saiyang mga tugang, hinubaan siya ninda kan halaba niyang gubing na may manggas; 24dangan dinara siya ninda asin ihinulog sa sarong mamarang bubon.
25Mantang nagkakakan sinda, nahiling ninda an grupo nin Ismaelita na hale sa Gilead asin mapaduman sa Egipto. An saindang mga kamelyo kargado nin mga pahamot, balsamo, saka mira. 26Nagsabi si Juda sa saiyang mga tugang, “Anong pakinabang an mapapasato kun gadanon ta an satong tugang asin matahoban an krimen? 27Ipabakal ta na sana siya sa mga Ismaelitang iyan; sa siring na paagi, dai na kaipuhan na kulogon ta pa siya; tugang ta siya, sadiri tang dugo saka laman.” Dinangog siya kan saiyang mga tugang. 28Kan mag-agi an mga negosyanteng Midianita, hinawas sa bubon si Jose kan magturugang dangan ipinabakal sa mga negosyante sa halagang beynteng pedaso nin plata. Dinara si Jose kan mga negosyanteng Ismaelita sa Egipto.
29Kan balikan ni Ruben an bubon asin nahiling na mayo na duman si Jose, ginisi niya an saiyang gubing sa kamondoan. 30Nagbalik siya sa saiyang mga tugang dangan nagsabi, “Mayo si Jose sa bubon! Ano na an gigibohon ko?”
31Nagbuno sinda nin kanding dangan ibinuntog ninda sa dugo an gubing ni Jose. 32Dinara ninda an gubing sa saindang ama asin sinabihan, “Nakua mi ini. Midbida daw kun gubing ini ni Jose.”
33Namidbidan ini ni Jacob asin nagsabi, “Saiya an gubing na ini! Ginadan siya nin sarong maringis na hayop. Daing duwa-duwa na nagkaperedaso si Jose!” 34Dangan ginisi ni Jacob an saiyang gubing sa kamondoan asin nagsulot siya nin sako; haloy niyang pinagmondoan an kagadanan kan saiyang aki. 35Dinalaw si Jacob kan gabos niyang aking lalaki asin babae tanganing rangahon, alagad padagos siyang nagmondo. Olay niya, “Magagadan akong nagmomondo para sa sakong aki.” Siring kaiyan an pagmondo ni Jacob para ki Jose.
36Kan panahon na ini sa Egipto, ikinapabakal na si Jose kan mga negosyanteng Midianita ki Potifar na sarong kapitan kan mga bantay sa palasyo kan hade.
Currently Selected:
GENESIS 37: BPV
Highlight
Share
Copy
Want to have your highlights saved across all your devices? Sign up or sign in
Philippine Bible Society, New Testament © 1981, Bible © 1992
